LUKE 4

Jesu'ya Malhim

(Mt 4.1-11; Mk 1.12-13)

1Heirou Jesuri Lhawai Khyingne thimmurbi Jordan kung'rouwei yenkallengkur, heirouri lhawaine aya ramhangra ruilouheikur, 2#Khn 9.9; 1 Kr 19.8. heitoubi bi heirou aya lhangaimak lhawaine malhimbine tlaini somlini leikur. Heirou tlaini somlini heiwairouri Ane koukhatkhi chamaimakne leiwurkhou, heitounei ngamrou hillouri A heiri beimakne msulkur. 3Heirouri lhangaimak lhawaine Anungei kyun, “Nangne Dunpuei Chanapawa hoiyanungri thlung heiya mumtol holnanungei chay pilakma.” 4#Khn 8.3. Heiya Jesu'ne loumallangkur, “Khyingei Lailikne asitoubi yunlei, ‘Thimine kouniroukhi mumtoltomni ringrou nimak.’ ” 5Heirouri lhangaimak lhawaine Aya lhungdoura ruibaangbi mitrup khatrou tlaipangei Krungbom nammaya muyerwurbi, 6#1 Jn 5.19. “Keine mantrang namyerkhi heirou tlaipangei lal, nimanung thang'al namyerwa heikhi Neinungei pirou. Ngamri heiyei mane namyerwa heiri keinung piwurla, heine ngam hoibi namyerwa heiya keiyei pi'kni thimi rapnung keine pikur mane. 7Heitoubi nangne arou keiya khrumlanungri, namyerwa heiya keine neinungei pirou.” 8#Khn 6.13. Jesu'ne loumallangkur, “Khyingei Pu'tloune asitoubi yunlei: Neiyei Umpu Dunpu'yatom nangne khrumlak, heirou Aiyei watlhouya toulak!” 9Heirouri lhangaimak lhawaine Aya Jerusalem'ra ruilouheibi heirou Aya Pukhrumna Cheembung doura ruibaangloukur, heitoubi Anung kyun, “Nangne Dunpuei Chanapawa toulanungri, Nangne arouwei yukchunsundawa. 10#Laa 91.11-12; Khn 6.16. Ngamri Khyingei Pu'tloune asitoubi yunlei: Dunpune Aiyei Thangring rapya shunbine Neiya lhangaine loukhangropirou. 11Asitoubikhi yunlei: Yaiyei hutne Neiya loukhangrorou, heirouri Neiyei horap heiri thlungra yongseomakrou.” 12Heiya Jesu'ne loumallangkur, “Khyingei Pu'tloune yunlei: Naiyei Umpu Dunpuya chaangh thimak.” 13#Lk 22.28. Heirouri lhangaimak lhawaine Jesu'ya lammit kantangra malhim luikur hillouri, ane kheen lepchaeinung Aya lakurkhoubi shaalkur.

Jesu'ne Galilee'ra Aiyei Khul-Lhou Churkyou

(Mt 4.12-17; Mk 1.14-15)

14 # Mt 4.12; Mk 1.14; Mt 9.26; Lk 4.37. Heitoubi Jesu'ri Lhawai Khyingei mantrangne kalhonbine Galilee'ra kallengkur. Heitoubi Aiyei ngamrou karnakrilni klei ramrakhi pao heiri karyoune chaikur. 15#Mt 4.23; 9.35; 11.1. Heirouri Ane Pukhrumna Cheemra polhakbi marnopikur, heisi toubi thimi rapne Dunpuya mathangkur.

Jesu'ya Nazareth'ra Yanemakur

(Mt 13.53-58; Mk 6.1-16)

16 # Pao 13.14-16. Heirouri Jesu'ne Aya yuktangna ram Nazareth'ra kallengkur. Heirou Mathrilna tlainirou Aiyei youkna khoine Pukhrumna Cheemra polhakur. Heirou Ane Khyingei Tlou rapya sherthutnanungei mayungnarou, 17heirou Anung Thimkhui Isaiahyei Lailik-khyo heiwaya malanpikur. Heirouri Ane lailik-khyo heiwaya yuklaatnarou, Ane heirouei asitoubi mayekhoubi klei heiwaya karthangkur: 18#Isa 61.1-6. “Puei Lhawaini Keidoura leipila, ngamri Ane Keiya kanring thimi rapnung Lhangai Pao-laaya shunthutpina'nungei khalthutpiwurla. Mihutra kulchalkur thimi rapnungei malhetthutpinei Lhangai Pao-laaya shunthutpinanungei Keiya yenmalhetpila; heitoubi mitdeo thimi rapya mit muyerna'nungei yenyilpi; heirou mine marhotkur thimi rapya malhetthutnanungei yenpilei, 19heitoubi Puni Aiyei thimi rapya kalpina'nungei kheen heiri hungurame toubi shunthutpina'nungei yenmalhetpi.” 20Heitoubi Jesu'ne Lailik-khyo heiwaya khyowurbi, Ane heiwaya lhousilla rapnung malanpiwurthubi omkur. Heisi tounarouri Pukhrumna Cheemra ombi klei thimirap nammane yai mit'thril heiri aya thimanthrambi leikur. 21Heitounei ngamrou Ane yanung kyun, “Naiyei khnarei mayekkur heinakrimne, lailik-khyo arouwei kyun heiri angtu tlainiroukhi chimbilni hungthukkura.” 22#Jn 6.42; 7.15. Heisi tounarouri thimi rapne Aiyei ngamrou lhangaileime toubi beimakne kartlinni yunrilkur, heitoubi Aiyei murni yunthutkur man kluei lhangaikur tlourap heiroukhi yane beimakne ngakkur. Heitounei ngamrou yaitam yunkril, “A heiri Josephbei chanapawa nimakeiko?” 23#Mk 1.21; 2.1; Jn 4.46. Ane yanung kyun, “Keine ningmulei touri, nane yulmakne anakei yailimya Keinungei yunheirou, ‘Thimkhuiwa, neiyei kna heiri neitamne raiyerlaklo.’ Heitoubi nane keinung asitoubikhi yunthuweirou touri, Nangne Caperna-um'ra touwurkhou kai mayekkur kngakei lhourap heiri Neiyei yultlai aroukhi kai maibongra hanui mutpithulak! toubi yunheirou.” 24#Jn 4.44. Jesu'ne asitoubikhi yenyunthu, “Keine nanungei tanghakne yunpilei, hu thimkhui khatyakhi aiyei yultlaira yapibi loulhakpimaklei.” 25#1 Kr 17.1,8-16; 18.1; Jas 5.17-18. “Keiyei kyunya louninglak. Atoubi kyunri chimbilme, touri, Elijahyei chaanrou Israel rapbei ramra trulmeirap chungne louleikhou, heiyei chaanrouri ram karyoune kum khyumle lhang'khat nungkhi romakne leiwurnarouri, heirou kum taarwurbi purvi-purcham(chaktang thuk) thukkur. 26Heisiya hoiyanungkhi Elijah heiri Israellei thimidei hukhatnungkhi yenmalhetpi nimak, heiya Sidon ramle ri-karchunbi klei Zarephath ramrei trulmei rapnungtom yenmalhetpikur. 27#2 Kr 5.1-14. Heitoubi Israellei ram heirou Elishaei chaanroukhi thimi kounak chungne yaiyei hak'unra raichi paatbine beimakne mrim knangne leiwurkhou; heiya Syria'rei napawa Naaman nimakne thimidei hukhatchakhi raichi paat damkhoumak.” 28Pukhrumna Cheem rilwaira klei thimi rapne tlou heiya mayeknarouri beimakne malungkhakur. 29#Pao 7.58; Msh 15.35. Heitounei ngamrou yane fyoubine Jesu'ya manbi Pukhrumna Cheemrei tangthutloubi, yane sabaangbi klei Krungkullei thakra, lhung chounara urbaangloubi, heirou yane Aya mathuknara lu mathukni khoubi khingsundanungei wairangkur, 30#Jn 8.59; 10.39. heiya Ane thimi tlakrouwei kartleithutdurbi shaalkur.

Hyingmak Lhawai Tungbi Klei Napawa Khat

(Mk 1.21-28)

31Heirouri Jesu'ne Galilee'yei Caperna-um'ra wakur, heitoubi Ane bi heirou Mathrilna tlainirou thimi rapnung marnopikur. 32#Mt 7.28; 12.24; 22.23; Mk 11.18; Jn 7.46. Heirou thimi rapne Aiyei marnopikur rapya mayekbi beimakne ngakkur, ngamri Ane mantrangle kalhonne marnopikur. 33Heirou Synagogue rilwaira hyingmak lhawai tungbi klei napawa napung khat louklei, heirou ane kanthramni lou'ungraobi kyun, 34“Oh! Nazareth'yei Jesu, Nangne kayari kouya tourou kyouwo? Nangri kaya maangyerrou wakurrako? Nangri huwo touri keine mulei; ‘Nangri Dunpuei Khyingei Paocha thimi.’ ” 35Heirouri Jesu'ne hyingmak lhawai heiya chaytloune shunkur, “Mulleiya, heitoubi napawa heirouwei thukkurlaka!” Heisi tounarouri hyingmak lhawai heine yai maibongra napawa heiya khingsundawurbi, aya msei koukhatkhi leiyermakne lakurkhoubi thukkura. 36Heirouri thimi rapne ngakurbi yaitam khatle-khat yunrilkur, “Aiyei yunthutkur tlourap heiri kounaksi tlouweiyo? Heirou Ane toumanele, heirou mantrangle kalhonne hyingmak lhawai rapya chaytloune shunnarouri, yane trukthutdurlei!” 37#Lk 4.14; 5.15; Mt 9.26. Heirou Jesuei ngamrou ram heiyei lhunglim-daamlim karyoune kartlinkur.

Jesu'ne Thimirap Chungni Kna Raiyerpikur

(Mt 8.14-17; Mk 1.29-34)

38Jesu'ne Pukhrumna Cheem lakurkhoubi heirou Ane Simonyei cheemranung wakur. Bi'heirou Simonyei pipee heiri kanchun nabine louklei, heirou yane Jesu'nung loushun. 39Heitounei Ane wachangbi aiyei pongra wamayungbi kanchun kna heiwaya rainanungei chay pikur. Heisi tounarouri kanchun kna heiri tallengne raikur, heirou ane kanthoubi yaya watlhou toupikur. 40Tlaini heirou kinni yenchipkur heirouri, thimi namyerwane yanungei klei limlimei kna thimirap nammaya ruibine Jesuei leina bira heiruilhakur. Heirou Jesu'ne ya napung kantangei doura thangknaini Aiyei hut khoupibi yaiyei kna heiwaya raiyerpikur. 41Heitounei ngamrou hyingmak lhawai rapkhi thimirap'rouwei yane “Nangri Dunpuei Chanapawa” toubi ungraochabi trukthutkur.

Jesu'ne hyingmak lhawai rapya koutloukhi yunyermaknungei chaytloune shunkur, ngamri Ari Messiah'me touri yanekhi kmu.

Jesu'ne Pukhrumna Cheemra Polhakbi Lhangai Pao-laa Shunthutpikur

(Mk 1.35-39)

42Tlaini khuwaarkur heirouri Jesu'ne khukarthil heiwaya lakkurkhoubi thimi karkulna bi khatrou pochutkur. Heirouri thimi rapne Aya thiphakur, heirou yane Aya raphamukur heirouri, yane Aya shaalyermaknungei wairaangkur. 43Heiya bi heirou Ane yanung kyun, “Keine khukarthil deirakhi chabi Lhangai Pao-laaya shunthutdeirou, ngamri Dunpune Keiya heinaksi tlouya shunthutnanungei yenmalhetpi.” 44Heitounei ngamrou Ane Judeaei ram bi kantangrou chabine, heirou Pukhrumna Cheemrakhi polhakbi Lhangai Pao-laaya shunthutpikur.

Currently Selected:

LUKE 4: MARIBSI

Highlight

Copy