SHONGZĀ 11
11
Naochizai Thiki kaji Mosesna Hāngkhamathin
1 Prohona Mosesli hānga, “Pharaoh eina Egyptwuitungli kazāt akha shida rāngasakfara; chiwui thili ana nathumli chihonaora; kala ana kachiho tharan, nathum katongali chihora. 2Mi saikorana shākhavai hānglu kaja mayarnao kala preinao kachiva̱na kachichāshi khongnainaoli sināwui, lupāsāwui chara̱-chasān pokhui ngasaklu.” 3Kaja Egyptnaobingna athumli ngahānngai khavai Prohona yangmida lei. Chili lāngda Egypt ngaleili, Pharaohwui otshinabing kala mibingwui miktāli Moses hi kahaka mi akha ngasāsai.
4Kala Mosesna hānga, “Prohona hithāda hānga: ngayā sailung ina Egypt ngaleili vāra; 5kala Egypt ngaleili pharākhare katonga thira, wungpamkhongli kapama Pharaohwui naochizai eina thuida mā kharungva̱ rao sha̱naowui naochizai, kala sha̱kei pharākhare eina tangda katonga thira. 6Kala Egypt ngalei katongali chapkhangachā hāngkhavai maleimara; chikathā mashoklakranga, kala kashokla mashokluimara. 7Israelnaobingli nilala, mibingli nilala, sāyurbingli nichilala fa akha eina tangda makhongmara. Chithāda sāda Prohona Egypt eina Israelli ngakheikhang eina sai kaji nana theira. 8Kala nawui otshinabing hina ili rāda ngakhumshāmda, ‘Thuiulu, nawui thi kashurbingla thuiserulu’ da hāngra, chiwui thili I thuihaora.” Kala ana malungvātta thurshi Pharaohwui eina thuihaowa.
9Chiwui thili Prohona Mosesli hānga, “Pharaohna nali manganāsangmara; kaja Egypt ngaleili iwui matakhak kahai ot chungmeida chithei khavaina.”
10Moses eina Aaronna Pharaohwui mangāli matakhak kahai ot saikora hi sai, kala Prohona Pharaohwui wuklung mararmihaida Israelnaobingli awui ngaleiwui eina mathuingasakthuwa.
Currently Selected:
SHONGZĀ 11: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
