SHONGZĀ 12
12
Makānkhami Phanit
(Mis 9.1-14; Khal 16.1-8; Ezek 45.21-25)
1 #
Pāng 23.5; Mis 9.1-5; 28.16; Khal 16.1-2. Egypt ngaleili Prohona Moses eina Aaronli hānga, 2Aja kachāng hina nathumwui vang kum haokaphoka kachāng khare ngasāra. 3Israel katongali hānglu kaja kachāng hiwui katharāthang shimkhur kachiva̱ kala shimlak kachiva̱na yaonao akharip khuirāra. 4Shimkhur akha mi teonāhaida tongda mashokrarakha ashiwui khongnaishili mi chākyanglaga shaikashap athishurda ngafara. 5Yaonao nilala, me nilala, achuk kapeiya kumkhawui avānao khuira; 6kala chi kachāng hiwui tharāda khamatethang eina tangda hailaga, Israel kazip ashangva̱na chithang zimik atun ngasha̱da taithatra. 7Kala athumna zākhavaipamli ashee kateokha khuilaga khāmongthing khanganing khani eina khamakharli ashee kateokharip neora. 8Athumna chithang ngayā asā chi ruishaira, khawok makazang khamui kala khārisi kaje thingnā han eina ngasoda shaira. 9Kharing eina kala tara̱ eina hanglaga mashaialu, kha akuila, apheila akhari-akharāla meili ruishailu. 10Kala ngathorshong vāshungda mataihaipaimana; ngathor eina tangda katai leisālala meili riktāhaolu. 11Nathumna hithāda shaira; nathumna kashān masa̱laga, pheihop sanglaga, kala napāngli khāmshui ngazunglaga katotlak eina shaiki kajina. Hi Prohowui makānkhami phanitna.
12Kaja chithang ngayā ina Egypt ngalei makānda, Egypt ngaleili pharākhare saikora sāthatra; mila, sha̱keila; kala Egyptwui varebing saikorawuitungli ina mashun bichar sāra: I Prohona. 13#Heb 11.28. Ashee china khudam sāda nathum khaleipam theikhuira, kala ashee chi ina theilaga nathumli makānmihaida, Egypt ngaleili sākathat tharan kazātkashi mimao nathumli maraza̱mara.
14 #
Sho 23.15; 34.18; Pāng 23.6-8; Mis 28.17-25; Khal 16.3-8. “Zimiksho hi nathumwui phaningung khavai atam ngasāra, kala Proho mingli zātkhān sāda, thot kachida shiyan sāda mayonchingra.”
Khawok Makazang Phanit
15“Shinithang khawok makazang khamui shaira, kharethang khawok saikora shimwui eina horserhaora, kala kharethang eina thuilaga kashinethang eina tangda khawok kazanga khamui kashai mi chili Israelwui eina katathaora. 16Kharethang nathumna kathara kazip khuira, kala kashinethang kathara kazip khuira; chiwui atamli ot masāpaimana; kha chithang zāki kaji chi nanina ngarānmira. 17Kala khawok makazang khamui phanit nathumna mayonra, kaja chithang nathum katongali ina Egypt ngaleiwui eina thānkashokna: Chiwui vang eina thot kachida nathumna zimiksho hi shiyan sāda mayonchingphalungra. 18Kachāng kharewui tharāda khamatethang ngazin eina thuida kachāng chiwui maga̱da kharethang ngazin eina tangda khawok makazang khamui shaira, 19khikhalajila shinithangwui vang nathumwui shimli khawok maleipaimara, kala khawok kazang kashai mi chi, ngasokharā kha̱miranu, ngalei chiwui miranu, Israel ashangva̱wui eina katathaora. 20Nathum khawok kazang mashaipailakmana, nathumwui shim kachiva̱li khawok makazangmāng shaiki kajina.”
Khare Makānkhami Phanit
21Chiwui thili Mosesna Israel khararnao saikorali hokhuida hānga, “Kachichashi shimkhurwui athishurda yaonao kapangkhuida makānkhami sā taithatlu. 22Maharnā sinkha khuida khongsaili kazang ashee chi rurkhuilu, kala khāmong thing khani kala khamakhāra chili khongsaiwui ashee chi neolu; kala kazing mathangranglakha eina tangda kachichāshi shimwui eina khipākha kayāng mashokpaimara. 23#Heb 11.28. Khikhalajila Prohona Egyptnaobingli shaothat khavai rāra, kala khāmongthing eina khamakhārli neokahai ashee chi theilaga khāmong chieina makānthuihaida nathumli sāthat khavai sākathata chili Prohona nathumwui shimli makāngasakmara. 24Ots hi shiyan sāda nana kala nawui naothot naothot eina tangda mayonchingki kajina. 25Kala ngashit kahai athishurda Prohona nathumli miki kaji ngalei chili vākashung chitharan shiyan hi mayonchingphalungra. 26Kala nanao ngarāna ‘Hi khiwui vangkhala?’ jiakha, 27‘Hi Prohona makānkhamiwui pha̱kaphayāna, kaja Egypt ngaleili leilakha Egyptnaobingli shaokathat tharan ana Israelnaobingwui shimli makānthuihaowa, kala ithumwui shim makānkhamiwui vangna’ da hāngra.”
Chieina mibingna kui mashunzangda khoruma. 28Chiwui thili Moses eina Aaronli Prohona kakaso chithāda Israelnaobingna sai.
Singkakhareng Katharā: Naochizai Kathi
(Sho 11.1-10)
29 #
Sho 4.21-22. Ngayā sailung Egypt ngaleili khalei pharākhare saikora Prohona wungpamkhongli kapama Pharaohwui naochizai eina thuilaga, narshimli narhaida khalei raonaobingwui naochizai eina tangda, kala sha̱kei anao pharākhare saikorala zangda shaothathaowa. 30Pharaoh, kala awui otshinabingla, Egyptnao saikorala ngayā ngaunlop eina thuichapa, kaja shim kachiva̱li makathi maleisamana. 31Chieina ngayāshong Moses eina Aaronli hokhuida hānga, “Ngakarthuilu, ithumwui eina thui-ulu; nanila kala Israelnaobing, kala nanina kahāng thāda nathumwui Proholi otram angatha̱ulu, 32Mebing kala yaobingla nanina kahāng thāda khuithuiserulu, kala ilila somilu!”
33Egyptnaobingna Israelnaobingli thāklak eina thuikhavai poi, kaja athumna hānga, “Ithum thingakanki jihaira.” 34Chieina athumna khamui khanailila khawok masangphāmada, naikhavai akhongli phonda romlaga phungkhuiya. 35#Sho 3.21-22. Mosesna kakaso athishurda athumna sāhairasai; kaja Egyptnaobingwui eina lupāsā kala sināwui chara̱-chāsān kala kashankachon kathā pokhuiserhairasai; 36kala Egyptnaobingna athumli ngahanngai khavai Prohona sangmihaisāda, athumna kapopo chi mihairasai. Chithāda athumna Egyptnaobingwui eina ngaponkhui.
Egyptwui eina Israelnao Zatkaphok
37Kala Israelnaobingna Rameseswui eina zatlaga Succothli vāshunga, prei-naosan mashānla phei eina kazat mayarnaomāng mi thing shātharuk sha̱khana. 38Chili lāngda miyur kachungkha manātta athumli ngasoshoka kala seila, yaobingla, kala mebingla zanga. 39Kala athumna Egyptwui eina khuikaphung khawok makazang khamui chi sākhui, kaja thaklāk eina kasham kahaiwui vang mangaraiphathuda kashakazā khikha khangarān masaphāthuwa.
40 #
Ots 7.6. Israelnaobingna Egypt ngaleili kapam atam kum shāmati thumrāna. 41Kala kum shāmati thumra kāpeithang, chithang ngalāngda Prohowui mi saikora Egypt ngaleiwui eina shoka. 42Egypt ngaleiwui eina athumli thānkashok ngayā chi Prohona mayonkhame ngayāna; chiwui vang eina thot-thot kachida Israelnaobingna ngayā chi rinsit eina Proho wui vang mayonchinga.
Makānkhamiwui Shiyan Chikan
(Hao 17.9-14; Sho 12.1-13)
43Kala Prohona Moses eina Aaronli hānga, “Hi makānkhamiwui shiyana; yur kateibingna mashaipaimara; 44kha pheisā eina lokakhui raonaoli ahui rimshokmi kahaiwui thili mishaipaira. 45Ramkazat mi kala ngalang kaphei mina mashaipaimana. 46#Mis 9.12; Joh 19.36. Chi shim akhali shaira, shimwui eina asā chi makhuishokpaimana; kala ara̱kui akhala masātekpaimana. 47Israel ashangva̱na mayonphalungra. 48Nathumli kha̱mi ngasokhara leida makānkhami phanit Proholi mayonrumga jiakha mayarnaobingli ahui rimshokmihailaga rāmayonpaira; ala ramnao akha thāhaora. Kha ahui marimkashoka mina mashaipaimana. 49#Pāng 24.22; Mis 9.14; 15.15,16; 29. Ramnaobingwui vangla kala nathumli ngasokharā kha̱miwui vangla ain akhamāngmara.” 50Moses eina Aaronli Prohona kahāng athishurda Israelnaobingna sai. 51Kala chithang ngalāngda Egypt ngaleiwui eina Prohona Israel katongali thānshokmi.
Currently Selected:
SHONGZĀ 12: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
