SHONGZĀ 3

Varena Mosesli Kaho

(Sho 6.2—7.7; 11.1-4; 12.35-36)

1 # Sho 6.2-13. Chitharan Mosesna Midianwui pāngmon, awova̱ Jethrowui yao homsai; kala lamhāngwui zingtunshong Horeb, Varewui phungreili homvai. 2#Ots 7.30. Kala Prohowui kazingrao akha thingpompa̱ akhali meiwon eina ali rāchithei. Ana yanga, kala thingpompa̱ chi meiwon kālala machuitāmana. 3Chieina Mosesna hānga, “Kathāda thing chi machuitāmakhala, ina lākhavāk chi vāyangkhuira.”

4Ana nganaida ayang khavai khavā chi Prohona theida, Varena thingpom chiwui eina ali hoi, “Moses! Moses!”

Ana ngahānkai, “I hili lei.”

5 # Ots 7.33. Chieina ana hānga, “Marānganaialu; napheiwui eina pheihop khuishokhaolu, kaja nana khanganingpam chi kathara apamna.” 6#Mat 22.32; Mk 12.26; Lk 20.37; Ots 3.13; 7.32. Kala ana hānga, “I navā ngarāwui Vare, Abrahamwui Vare, Isaacwui Vare, kala Jacobwui Vare china.” Kala Mosesna amai kafahaowa, kaja a Vareli yangki kaji ngacheehaowa.

7Chieina Prohona hānga, “Egyptli khalei iwui mibingwui kachotkachāng ina theihaira, kala kashinabingwui vang eina ringkhangā ina shāhaira, ina athumwui kakhanang saikora theihaira. 8Chieina athumli Egyptnaobingwui eina kanshok khavai, kala chiwui eina thānshokta seina̱ eina khuira̱ khalonga khamathā kala khamashā apam Canaannao, Hitnao, Amornao, Periznaobing, Hivnaobing, kala Jebusnaobingwui ngaleili thānvā khavai I katāna. 9Ara yanglu, Israelnaobingwui ringkhangā ina shāhaira. Kala Egyptnaobingna rekakharek chi theihaira. 10Chithāda sāda rālu, Egyptwui eina iwui mibing, Israelnaobingli thānshok khavai ina nali Pharaohwuili chihovāra.”

11Kha Mosesna Vareli ngahānkai, “I khipada ina Pharaohli vāda Egyptwui eina Israelnaobingli thānshokrakhala?”

12Ana hānga, “Ina nali ngasomira: kala nali ina kachihona kaji hieina theikhuira: Egyptwui eina athumli thānkashok tharan, Vareli nathumna phungrei hili otram ngatha̱ra.”

13 # Sho 6.2-3. Kha Mosesna Vareli hānga, “Ina Israelnaobingli ‘Navā ngarāwui Varena ili kachihona,’ da akahāng chitharan athumna, ‘Awui aming khipa hokhala?’ da ngahānakha ina khi ngahānkārakhala?”

14 # Phon 1.4,8. Varena Mosesli hānga, “I CHI INA.” Ana hānglui, “Israelnaobingli, ‘I kaho china ili nathumwuili chihokharāna’ da hānglu.” 15Kala Varenala Mosesli hānga, “Israelnaobingli hithāda ahānglu, ‘Proho, navā ngarāwui Vare, Abrahamwui Vare, Isaacwui Vare, kala Jacobwui Varena ili nathumwuili chihokharāna’ hi katang makhavai iwui mingna,” nathumwui thot kachida ili phaningungki kajina. 16Zatlu, kala Israelwui khararnaobingli kazipkhuida hānglu, Prohona navā ngarāwui Vare Abrahamwui Vare, Isaacwui Vare, kala Jacobwui Varena ili rāchitheida kahāngna, Egyptli nathumli kasāsā chi ina theiserhaira; 17kala ina khangashitna, Egypt ngaleili kakhanang kachotwui eina thānshokta Canaannaobing, Hitnaobing, Amor, Periznaobing, Hivnaobing, kala Jebusnaobingwui ngalei seina̱ eina khuira̱ khalong chili thānvāra.

18“Athumna nawui tui khuira; kala Israel ararbingli ngasoda nathum Egypt awungali ahāngra, ‘Proho, Hebrewwui Vare, ithumli samphanghaira; chieina nali kapona kaja ithumwui Proho Vareli pha̱phayā khavai kathumthangzat lamhāngli kha-vā ngasakmilu.’” 19Pangshapa akhana tandi kasā maningakha Egyptwui awungana nathumli mamayāmara kaji ina thei. 20Chieina ina ipāng katingda Egyptli sākhangayi matakhak kahai tandi mira, chitharan mayānaora. 21Ina nathumli Egyptnaobingna khayā shingasakra chithāda sāda iwui mibingna kathui tharan, athumna pāng khamasai eina mathuimara. 22Israel prei kachiva̱na awui Egypt khongnaiva̱, kala awui shimli yaothuikharāva̱, athumwui eina lupāla, kashan-kachonla pokhuida, chi nanaongarā, mayarnao sha̱naobingli chiphunhaora; Egyptnaobingwui lan khuithuihaora.

Currently Selected:

SHONGZĀ 3: TANGBSI

Highlight

Copy