SHONGZĀ 4
4
Moseswui Matakhak kahai Pangshap
1Chieina Mosesna ngahānkai, “Kha kalikhada athumna iwui tui makhuila lah mashitsangla, athumna; ‘Prohona nali machitheimimana’ jiakha kathāra.” 2Prohona ali hānga, “Napāngli kasing chi khikhala?” Ana hānga, “Lijeina.” 3Chieina ana hānga, “Ngaleili hortālu,” chieina ana lijei chi ngaleili hortai kala chi phara̱ ngasāthuihaowa; kala Mosesna sa̱na̱unga. 4Chieina Prohona Mosesli hānga, “Napāng katingda akhameili yonkhuilu,” chieina ana apāng katingda akhameili yonkhui kala apāngli kakā eina lijei ngasāhaowa — 5“Chi athumna Proho avāva̱ ngarāwui Vare, Abrahamwui Vare, Isaacwui Vare, kala Jacobwui Varena nali rāchitheihaira da shitsang khavaina.”
6 Prohona ali hānglui, “Napāng nawui phahonlungli thara̱zanglu.” Ana apāng phahonlungli thara̱zanglaga khuishokkhayang tharan, apāng phārreina horam thāda charshi eina leisai. 7Chiwui thili Varena hānga, “Napāng nawui pha̱honlungli thara̱zangluilu.” Chieina ana apāng phahonlungli thara̱zanglui; kala ana khuishokta khayang eina awui phasā khangachā thāda raihairasai. 8“Athumna nali mashitsangakha, lah khare khudam chili mahengsangakha, khudam kakhanepā chili shitsangra. 9Athumna khudam khaninili mashitsangakha, lah nawui tuili mahengsangakha, Nile kongwui tara̱ kateokha khuilaga ngalei katheng tungli heirorlu; Nile tara̱ chi ngalei katheng tungli ashee ngasāhaora.”
10Kha Mosesna Proholi hānga, “O iwui Proho, iya tuila mamatuitheimana, kharelila kala arui eina tangdala naraoli rākahāng atam hieina tangdala; iva tuimatuila mathākmana chukhamajala huilaka.” 11Chieina Prohona ali hānga, “Miwui tuimatui khipāna mikhala? Khangasha̱la, khangakhokla, katheila, khangapeola khipāna sāmikhala? Chi, Proho ina maningmala? 12Chieina ara vālu, ina nakhamorli ngasomira, kala khi matuirakhala kaji chi tamchitheira.”
13Kha ana hānga, “O iwui Proho, lumashanmida mi khangatei akhali kachihovāhaolu.”
14Chiwui vang Prohona Mosesli malungvāthaoda hānga, “Nachinā Aaron, Levipa maleimala? A matuitheilaka kaji ina thei; arui ana nali samphang khavai rārādalei, kala ana nali rākathei tharan awui ning ringphālakhaora. 15Nana ali ngazekta tui saikora ali hāngngasaklu; kala ina nakhamorlila, a khamorlila ngasomira, kala nanina khi sārakhala kajila tamchitheira. 16Nawui vang ana mili hāngmira; kala a nawui khamor ngasāra, kala nana awui vang Vare kathā sāra. 17Kala khudam sāchithei khavai lijei hi nana khuiphungra.”
Mosesna Egyptli Hankhaung
18Mosesna awova̱ Jethrowuili latungda hānga, “Egyptli khalei ichināngarā ringchingda leika kathakhala ungyang khavai ili lumashanmida khaung ngasakmilu.” Jethrona Mosesli hānga, “Chingri eina ungulu.”
19 #
Ots 7.34. Kala Midianli leilakha Prohona Mosesli hānga, “Egyptli latunglu, kaja nali sāthatkida khangarānbing ara thiserhaira.” 20Chieina Mosesna apreiva̱, kala naomayarabing gadhāli tongngasakta Egypt ngaleili hanunga; kala Mosesna apāngli Varewui lijei chi singphunga.
21Kala Prohona Mosesli hānga, “Na Egyptli ungkashung tharan ina nali mikahai mina masākharar pangshap chi Pharaohwui mangāli sacheitheilu; kha chithālala ina awui ning makang ngasakra, kala ana mibingli machihomara. 22Chieina nana Pharaohli hāngra, ‘Prohona kahāngna, Israel hi iwui naochizaina. 23#Sho 12.29. Ina nali kahāngna, ‘Ili otram ngatha̱ khavai inaomayarali chihohaolu”; kalikhada nana mamayāsākha, ina nawui naochizai sāthathaora.’ ”
24Athumna zatlakha, athumna ngayā ngasām khavai apam akhali Prohona ali samphanga kala ali sāthat khavai ngarāna. 25Kha Zipporahna lungkainao akha khuida anaomayarawui ahui rimshokmilaga Moseswui pheili sāza̱da hānga, “Kachangkhat eina na iwui ashee khangaruma gaharana!” 26Chieina ana ali khikha mathathuwa. Hi preiva̱na, “Ahui rimkashok mangā eina ashee khangaruma gaharana” da kahāngwui vangna.”
27 Prohona Aaronli hānga, “Vāda Mosesli lamhāngli asamphanglu.” Chieina ana vai, kala ana ali Varewui phungreili samphanga kala ali maya̱khuiya. 28Mosesna Aaronli Prohowui tui saikora, ali kachihowui apong, kala ana sāki kaji kakaso khudam saikora hāngsera. 29Chieina Moses eina Aaronna vāda Israelwui ararbing saikorali kazipkhui. 30Kala Mosesli Varena hāngkahai saikora chi Aaronna hāngchithei kala mibingwui miktāli khudambing sāchithei. 31Mibingna shitsanghaowa; kala Prohona Israelnaobingwui kachotkachāng theimihaira kaji shālaga athumna mashunzanga kala khoruma.
Currently Selected:
SHONGZĀ 4: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
