SHONGZĀ 5
5
Lanji Khami Khām kahai
1Chiwui thili Moses eina Aaronna Pharaohli vāda hānga, “Israelwui Proho Varena kahāngna, ‘Iwui mibingli zatngasaklu; chieina athumna lamhāngli ili zātkhān sāpaira.’ ”
2Kha Pharaohna hānga, “Israelnaobingli zatngasak khavai ina kahāng nganāki kaji Proho chi khipākhala? Proho chi I matheimana, Israelnaobingli mathui ngasakmara.”
3Chieina anina hānga, “Hebrewnaobingwui Vare inili samphanghaira, chieina kathumthangzat lamhāngli vāda Proho ithumwui Vareli pha̱phayā khavai kha-vā ngasakmiluda kapona, chi maningakha ana ithumwuitungli kazātkashi maningakha raighai eina chithithaipai.”
4Kha Egypt awungana anili hānga, “Moses eina Aaron, kachiwui vang eina mibingli ot masā ngasakla khuithuiki kajikhala! Nathum otpamli vaulu.” 5Kala Pharaohna hānga, “Ara ngalei hiwui mili athumna chungmeikharhaira, laga athumli otpamwui eina ngasām ngasaki kajila!” 6Chithang ngalāngda Pharaohna mibingli kashinabing kala khayangabingli hānga, 7“Khareli athumli chek semkhavai lanji khami thāda mamiluipaimara, athum khalattana aphākhuiranu. 8Kha athumna kharewui kasā thāda chek mashinga masuitāpaimana, kaja athum ngachāng makāmada chi eina athumna chapta, ‘ithumwui Vareli apha̱phayā khavai chihomilu’ kajina. 9Athumli ot ritmeida milu; thakha ot sāthuihaida mikhanamtui khamatui maphaningluimara.”
10Chieina kashinabing kala khayangabing china athumli hānga, “Pharaohna kahāngna, ‘Ina nathumli lanji mamiluimara. 11Lanji khalaleipamli kachichāna aphākhuilu, kha nathumwui ot kasāva masuitāpaimara.’ ” 12Chiwui vang athumna Egypt ngalei kachiva̱li vāda lanji pongzata. 13Kashinabing china mangasāmlakla hānga, “Thakta sālu, lanji milakhawui ot kasā thāda thangthangwui ot kuphalungra.” 14Kala Israelnaobingwuitungli yangkhame sangkahaibing chili akhavābingna shaomamanda hānga, “Kachiwui vang eina thang-thangwui sāki kaji chek kharewui kasā thāda makup kajikhala?”
15Chieina Israelnaobingwui ngachaili yangkhamebing china Pharaohli chapta rāhānga, “Naraobingli kathāda hithāda kasākhala? 16Naraobingli lanji mamimana, laga athumna ithumli ‘Chek sālu!’ ji. Yanglu nawui raobingli kathāda shaomikhala; nava nawui mibingli malumashanmana.”
17Kha ana hānga, “Nathum chāngshiya; kala nathum ot masāngaimana, chiwui vang eina ‘Proholi apha̱phayāra’ da nathumna ili khamayā kapona. 18Ungulu, ot asaulu; kaja lanji mamiluimara, kha nathum chek mashing khangachā chi sāchingphalungra.” 19“Nathum thangthangwui chek mashing masuitāpaimara” kaji shālaga, kalākashi ot rāhaira da Israelnaobingwui yangkhamebingna thei.
20Pharaohwui eina kashok eina, athumli samphang khavai ngaraikasā Moses eina Aaronli samphanga. 21Athumna anili hānga, “Prohona naniwuitungli bichar sāranu! Pharaoh kala awui otshinabingbingna ithumli yangkharing khavai sāmihaira kala ithumli sāthat khavai athumwui pāngli raighai chisinmihaira.”
Moseswui Seihā Kasā
22Chieina Mosesna Proholi seihā sāda hānga, “O Proho, khisāda mibing hili sāshida sāhaokhala? Ili khisāda shirātkharākhala? 23Khikhalajila Pharaohli nawui ming singda ina vāhāngkhare eina thuida ana mibingli sāshida sāhaira, kala nana mibingli ngatangkhui khavai khikha masāmana.”
Currently Selected:
SHONGZĀ 5: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
