HAOKAPHOK 17
17
Ahui Rimkashok, Tuingashitwui Machut
1Abram kum hangchikoda chiko kākashung tharān Prohona rāchitheida hānga, “I Sashap-pangshapa Varena; iwui mangāli zatlu, kala shāt makā ngasakalu. 2Kala ina iniwui alungli iwui tuingashit sāra, kala nali sorngasaida mataisangmira.” 3Chieina Abramna ngaleili ngakhumzanga, kala Varena ali hānga, 4“Yanglu, iwui tuingashit nali ngasomida lei, nana shānda makakhui yurwui avāva̱ ngasāra. 5#Rom 4.17. Nawui ming Abram maholuimara, kha Abraham hohaora; kaja ina nali shānda makakhui yurwui avāva̱ sāngasakhaira. 6Ina nali sorngasaida athei mathei ngasakta yur kachungkha kala wungnao kachungkha nawui eina shokra. 7#Lk 1.55; Gal 3.16. Kala iwui khangashit katang makhavai tuingashit akha sāda na eina nawui ara̱-azābingwui thot vāshungda ina mayonmira, nawui kala nawui ara̱-azābingwui Vare sāchingra. 8#Ots 7.5. Kala nana zatta khalei Canaan ngalei hupta katang mavaila nawui kala nawui ara̱-azābingwui ngasā khavai mira, kala ina athumwui Vare sāra.”
9Kala Varena Abrahamli hānga, “Nala kala nawui thili kharā ara̱-azābingla athumwui mithot peida iwui tuingashit mayonra. 10#Ots 7.8. Hi I eina na kala nawui thili rāki kaji ara̱-aza̱bingwui ngachaili mayonki kaji tuingashit china: Nathumwui alungli mayarnao kachiva̱ ahui rimshokra. 11#Hao 17.24; 21.4. Nawui phasā ahui rimshokra, I eina nawui ngachaili china tuingashitwui machut sāra. 12Nathumwui alungli pharāda chishatthang kāshung kahaiya mayarnao, nawui shimkhurli kapharāranu, nawui theisā makhaning pheisā eina yur khangateiwui nao lokakhuiranu, mithot peida ahui rimshokserra, 13nawui shimkhurli kapharāranu, nawui pheisā eina lokakhuiranu, rimshokphalungra. Chithāda sāda iwui tuingashit hi naphasāli katang makhavai tuingashit sāda leichingra. 14Ahui marimkashoka mayarnao, chile awui yurwui eina katatphalungra; ana iwui tuingashit sākakhaina.”
15Kala Varena Abrahamli hānga, “Napreiva̱ Saraiwui vanga, nana awui ming Sarai maholuimara, kha Sarah #17.15: Sarah: Hebrewli aming hiwui kakhalat “philā wungnao” kajina. hohaora. 16Ina ali somira, kala chili lāngda awui eina ina nali naomayara akha mira; ina ali somira, kala ana miyur kachungkhawui ava̱va̱ sāra; awui eina miyur kachungkhawui awungabing shokra.” 17Chieina Abrahamna ngakhumzangda mana̱da akhalatta hānga, “Kum shākha kāshung kahai mi akhana nao pharārala? Kum hangchiko kāshung kahaiva̱ Sarahna nao leirala?” 18Kala Abrahamna Vareli hānga, “O Ishmaelna nawui mangāli okthuichingranu!”
19Varena hānga, “Maningmana, kha napreiva̱ Sarahna nali nao mayarnao akha pharāmira, kala nana awui ming Isaac hora. Ali kala awui ara̱-azābingli mashimānla iwui tuingashit hi leingasakchingra. #17.19: Isaac: Hebrewli aming hiwui kakhalat “ana mana̱ya” kajina. 20Ishmaelwui pongli ina nawui tui shāhaira; yanglu, ina ali somira kala ali athei mathei ngasakra kala kachungkha mataisangmira; ana wungnao tharāda khaniwui avāva̱ ngasāra, kala ina ali kahaka yur akha sāngasakra. 21Kha iwui tuingashitva Sarahna zingkuma hitharan pharāki kaje nawui nao Isaacli sāra.” 22Chān ngazek khuihailaga Varena Abrahamwui eina thuihaowa.
23Chiwui thili Abrahamna anaomayara Ishmael kala awui shimli pharākasang raobing kala lupā eina lokakhui raonaobing saikora Varena kakaso athishurda chithang ngalāngda ahui rimshokmi. 24Abrahamna ahui rimkashok chitharān a kum hangchikoda chiko kāshunghairasai. 25Kala anaomayara Ishmaelna ahui rimkashok tharān kum tharāda kathum kāshunghairasai. 26Chithang Abraham eina awui nao Ishmael ahui rimshokhaowa; 27kala ashi shimkhurli kapharā, kala yur kateiwui eina lokakhui mayarnao saikora ali ngasoda ahui rimshoksera.
Currently Selected:
HAOKAPHOK 17: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
