HAOKAPHOK 18
18
Isaac Kapharā Ngashitkhami
1Mamrewui shirimthingpamli, ngashunshong sāhaida, awui kachonshim khāmongli pamlakha Prohona Abrahamli rāchithei. 2#Heb 13.2. Ana kapeikakā eina, yanglu mi kathum awui mangāli nganingkasā thei. Ana athumli kathei eina totot angakhumzanga, 3kala hānga “Iwui amei, I hi nathumna ngahānkhangaia mi akhana jiakha narao ili mamakānthuimihaialu. 4Tara̱nao khuirāmiranu, phei pheolaga thingphei khaya̱li ngasāmkhuisālu, 5naraowui shimli rāhaokada ina kashakazā ngahomkha ungkhuimiga, chiwui thili nathum thuinaolu.”
“Nana kahāng thāda sālu” da athumna hānga. 6Chieina Abrahamna kachonshimli totot yongungda Sarahli hānga, “Mathir khamathā nailaga mi kathumwui vang khangarān sālu.” 7Kala Abrahamna totot seishangli vālaga asā kakā seinao akha khuida awui raoli khuimi, kala ana totot hangmi. 8Chiwui thili ana seina̱khan, seina̱, kala ana hangkahai sā chi athumli khuivāmi; kala athumna zālakha ana thingpheili nganingpama.
9Athumna ali ngahāna, “Napreiva̱ Sarah kali leilikhala?” Ana, “Shimlungli leili” da ngahānkai. 10#Rom 9.9. Prohona hānga, “Ina mashoila mayokachāng rāluira, kala napreiva̱ Sarahna naomayarnao akha samphangra.” Sarahna awui khanukli kachonshimwui khāmongli nganāpamsai. 11Chitharān Abraham eina Sarah sarlākhairasai; Sarah naotheila chathairasai. Sha̱naowui khangachāla ngasāmhairasai. 12#1 Pet 3.6. “Ila, igaharala sarhaira, kathāda ina nao pharāda ringkaphā samphangrakhala?” da awui ningli ngathumda mana̱ya. 13Prohona Abrahamli hānga, “Khisāda Sarahna mana̱da, ‘I nao vaikachangluirala, ara sarhaira’ jikhala? 14#Mat 19.26; Mk 10.27; Lk 1.37; Rom 9.9. Prohowui vang sakkhanā khi leikhala? Hāngkahai atam mayokachāng ina rāluira, kala Sarahna naomayara akha samphangra.” 15Kha Sarahna, “I mamana̱mana” da hānga, kaja a ngacheehaowa. Ana hānga, “Maningmana, na mana̱ya.”
Abrahamna Sodomwui vang Kaphayat
16Chiwui thili athumna zatphokta Sodomshong ngashānvai; kala Abrahamna athumli shongfali athai. 17Prohona hānga, “Ina sāki kaji chi Abrahamli mahāngla ngathumhaorala, 18#Hao 12.3; Ots 3.25; Gal 3.8. kaja Abraham hi pangshap khalei kahaka yur akha ngasāra kala awui vang eina okathui miyur saikora sokhami ngasāra kaji thatheilaga? 19Maningmana, kaja awui naongarāli, kala awui shimkhurli anaolamshong eina tangda kathar eina khamashung eina Prohowui shongfali zatkhavai kala Prohona ngashitmi kahai chi Abrahamna samphang khavai ali kapangkhui kahaina.” 20Chiwui thili Prohona hānga, “Sodom eina Gomorrahwuitungli kakhalop marnāhaira, kala athumwui morei hakmahālakhaira, 21athumli khamatui ina kashā saikora chi athumna sākachangkhatka kathākhala kaji ina tāyanglaga theira.”
22Chieina mibing chiwui eina mai ngareida Sodomshong tāhaowa, kha Abrahamna Prohowui mangāli nganingpama. 23Kala Abrahamna anganaida ngahāna, “Khamashunga athumlila makaphā athumli ngasoda shimān ngasakrala? 24Chānjam sāda keinung chiwui alungli kathara mi hangphangā leisasi kaja, athum kathara hangphangā chiwui vang keinung chi mayangmila shimān ngasakrala? 25Khatharabingli makaphābing eina ngasoda shaokathat, kaja katharbingla makaphābingwui kashimānli zangkhangasak chi nawui eina katāva̱li leiranu! Okathui katongawui Bichar akhavāna mashun bichar masāmarala?” 26Chieina Prohona hānga, “Sodomwui alungli kathara mi hangphangā leisaakha athumwui mangā eina ina keinung katonga huimira.” 27Abrahamna ngahānkai, “Yanglu, ina Proholi chān ngazekrada ngazekta lei, kha iva chifa eina hotlāna. 28Chānjam sāda hangphangā chiwui ngachaili phangā vātsasi kaja, phangā khavāt chiwui vang nana keinung katonga shimān ngasakrala?”
Ana ngahānkai, “Hangmatida phangāmāng leisālala ina mashimān ngasakmara.” 29Abrahamna ngahānluishita, “Chānjam sāda hangmatimāng leisasi kaja kathāra?” Ana ngahānkai, “Hangmati chiwui vang mashimān ngasakmara.” 30Chieina ana hānga, “Prohona malung mavātmiranu, ina akha hāngluiga, chānjam sāda thumrāmāng leisāsi kaja kathara?”
Ana ngahānkai, “Thumrāwui mangā eina ina mashimān ngasakmara.” 31Ana hānga, “Yanglu, ina Proholi ngazekrada khangazekna. Chānjam sāda maga̱ leisasi kaja kathara?” Ana ngahānkai, “Maga̱ chiwui mangā eina ina mashimān ngasakmara.” 32Chiwui thili ana hānga, “Prohona malung mavātmiranu; akhamāng hānghaoga, chānjam sāda tharā leisasi kaja kathara?”
Ana ngahānkai, “Tharā chiwui mangā eina ina mashimān ngasakmara.” 33Abrahamli ngazekkhui kahaiwui thili Prohona thuihaowa, kala Abrahamna awui apamli latunghaowa.
Currently Selected:
HAOKAPHOK 18: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
