HAOKAPHOK 22
22
Isaacli Pha̱khavai Abrahamli Varena Kakaso
1 #
Heb 11.17-19. Hiwui thili Varena Abrahamli chāng yangda, “Abraham” da kaho eina “I hili leili” da ngahānkai. 2Ana hānga, “Nawui akhamāng kaje naomayara nana leishilak kahai Isaacli Moriah ngaleili, ina chitheiki kaji phungrei chili thānvāda rikkatā kachigat akha sāda apha̱haolu.” 3Ngathorthakva̱ Abrahamna ngakarthuida gadhānaoli ot shaksāmi; kala yaronnao khanili thānphung kala Isaacli ngasoda hanphut sākhavai thing phākhuilaga Varena kakaso pamli vai. 4Kakathumathang Abrahamna ngashān khavā tharān apam chi katāva̱li thei. 5Chieina yaronao khani chili Abrahamna, “Hili gadhā eina ngasoda pamsālu; ini vānaoni lākhashong akhorumlaga ungrāsanaoga.” da hānga. 6Kala rikkatā kachigat riktā khavai thing chi khuilaga naomayara Isaacli ngava̱ ngasaka, kala ana mei eina khainao khuiphunga. Chithāda ani ngasothuihaowa. 7Kala Isaacna avāva̱ Abrahamli “Avā” da kaho eina “Khikhala inao, I hili leili” da ngahānkai. Chieina ana ngahāna, “Yanglu, meila, thingla leihaira, kha pha̱phayā khavai yaonao kali leili?” 8Abrahamna hānga, “Inao, rikkatā kachigatwui vang Vare akhalattana yaonao ngarānmira.” da hānglaga ani ngasothuiuwa.
9 #
Jam 2.21. Varena ali hāngkahai apam chi vākashung eina Abrahamna hanphut akha sākhui kala riktā khavai thing ayet eina semkahaiwui thili Isaacli pheipāng khalaplaga hanphut chiwui thingtungli khāngkai. 10Chiwui thili pāng khangkāda khainao yonkhuilaga anao mayarli sāthat khavai sai. 11Kha Prohowui kazingraona kazingramwui eina “Abraham, Abraham!” da vaotai kala ana “I hili leili” da ngahānkai. 12Ana hānga, “Nao chili napāng maparalu, lah ali khikha mathālu; nawui nao akhamāng kaje chi eina tangda iwui vang kashivām maleimana kaji theilaga na Vareli ngacheeya kaji ina theihaira.” 13Kala Abrahamna amik kapeikakā tharān, yanglu, awui khanukshong khararli angachi ngaruishāntitlaga yaovā akha leisai; kala Abrahamna yaovā chi akhuilaga Isaacwui mahut rikkatā kachigat sāda pha̱phayāhaowa. 14Chieina Abrahamna apam chili Prohona ngarānmira da hoi; aja eina tangda “Prohowui phungreili ngarānmira” da hānga.
15Kala Prohowui kazingraona Abrahamli kakhane sāda kazingramwui eina vaotāda 16#Lk 1.73; Heb 6.13-14; 11.12. hānga, “I khalattana nali ngashit kahaina, nana nanaomayara akhamāng chila iwui vang mashivāmlakla kasāwui vang, 17kachangkhat ina nali somira, kala ina nawui ara̱-azā kazingli khalei sirāyākha kala kongpheiwui situiyākha ngasā ngasakra. Kala nawui ara̱-azāna nawui yangkashebingwui ngavei khavangra. 18Kala nawui ara̱-azāwui mangā eina okathuiwui miyur saikora sokhami ngasāra, kaja nana iwui kahāng nganai.” 19Chieina awui rao khaniwui chili latunglaga athum ngasoda Beer-shebali ungshunga, kala Abrahamna Beer-shebali pama.
Nahorwui Ara̱-azā
20Chiwui thili Abrahamli hithāda rāhānga, “Yanglu, nachinā Nahorwui preiva̱ Milcah nao kachungkha pharāhaira: 21Khararrali Uz, agatoli Buz, Kemuelwui avāva̱ Aram, 22Chesed, Hazo, Pildash, Jidlaph kala Bethuel.” 23Rebekahli Bethuelna pharai. Ashi chishat hi Abrahamwui achinā Nahorwui preiva̱̱ Milcahwui naosera. 24Chili lāngda Nahorwui angashirva̱ Reumahna Tebah, Gaham, Tahash kala Maacahli pharai.
Currently Selected:
HAOKAPHOK 22: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
