HAOKAPHOK 23
23
Sarah Kathi kala Abrahamna Chikhur Khalo
1Sarah kum shākha maga̱da shini okthui, hi Sarahwui mirin zingkumna. 2Sarah Canaan ngaleili khalei Kiriath-arba (chiya Hebron) li thihaowa; kala Abrahamna Sarahwui vang wukkhanangda chapngachai. 3Kala Abrahamna awui kathi khaleipam chiwui eina ngakarthuida Hitnaobingli hānga, 4#Heb 11.9,13. “Iya kha̱mi sāda nathumwui ngachaili hunakha rākapamna; chieina chikhur sākhavai ili apam akha khamilu, chithakha kathi hi chizanpaira.” 5Hitnaobingna ngahānkai, 6“Ithumwui tui khuimilu, amei, nava ithumwui ngachaili pangshap sāshapa wungnao akhana. Ithumwui chikhur leida khalei hili nana ningchāngmeikap kaji chikhurli chizanpaira; ithum khipānakha makhāmmara, lah makhamayāla masāmara.” 7Abrahamna ngakarthuida ngalei chiwui mibing, Hitnaobingli kui mashungzangda khayākashi mi. 8Kala ana athumli hānga, “Kathi hi chizanpai khavai iwui vang nathumna mayāmiakha ili nganāmilu, Zoharwui naomayara Ephronli, 9awui luipheili khalei Machpelah kaho lungkhur chi mikhavai kahāngmilu. Nathumwui mangāli luiman horzakta ili chitheida ishiwui chikhur sākhavai lokhuira.” 10Atam chili Ephronla Hitnaobingli ngasoda pamsai; kala Hitnaopa Ephronna Hitnaobingwui mangāli ana Abrahamli hānga; 11“Khuikhalailu, amei, nganāmilu; iramnao saikorawui mangāli ina lui chila lungkhur chila nali thāda mikahaina; kathi chi chili chizanpaira.” 12Chiwui thili Abrahamna ngalei chiwui mibingwui mangāli kui mashungzangda khayākashi mi. 13Kala ana Ephronli aramnao saikorawui mangāli hānga, “Kha nana mayāmiakha iwui tui kakhuimilu, ishi chikhur sāchang khavai ngalei chiwui aman kakhuimilu.” 14Ephronna Abrahamli ngahānkai, 15“Amei, ili nganāmilu, lui chiwui aman lupāsā shekel shāmati sha̱kha china iniwui vang khi sārakhala? Kathi chi chizanmalu.” 16#Ots 7.16. Abrahamna Ephronwui chi mayāhaowa; kala Abrahamna Hitnaobingwui mangāli hāngkatā lupāsā shekel shāmati aramwui leih kasānaobingna zatkhāna athishurda Ephronli onmihaowa.
17Chithāda Mamrewui zingshoshong khalei Machpelah kaho Ephronwui lui chi, lungkhur pamla, luipam chila Abrahamli miserhaowa. 18Kala awui keinung ngaveili kharā Hitnaobing saikorawui mangāli Abrahamwui sāhaira da horsangmi. 19Chiwui thili Mamre (chiya, Hebron) wui zingshoshong, Canaan ngaleili khalei Machpelahwui lungkhurli Abrahamna apreiva̱ Sarahli chifahaowa. 20Lui kala chiwui alungli khalei lungkhur chi awui chikhur sākhavai Hitnaobingna Abrahamli metchanghaowa.
Currently Selected:
HAOKAPHOK 23: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
