LUKE 15
15
Shiman kahai Yaonaowui Chānjam
(Mat 18.10-14)
1 #
Lk 5.29-30; 19.7. Ara khāshinā khalokbing eina morei kaphungbingna Jishuwui tui nganākida rāsera. 2Phariseebing eina ain kathembingna kapupkaseoda hānga, “Mipā hina morei kaphungbingli samphanglaga phakazāla phazārumli.” 3Chiwui vang ana athumli chānjam hi hāngchithei:
4 #
Mat 18.10-14. “Nathumwui alungli khipana yao shākha leilaga, akha shimānhaiakha yao hangchikoda chiko chi lamhāngli haihailaga shimān kahai yao akha chi masamphangranglakha eina tangda maphāmarakhala? 5Ana chi samkaphang tharan mathanthathup awui yartuili khāngkākhui. 6Ana shimli khaung eina awui ngasotnaobing kala khongnainaobingli hokhuilaga hānga, ‘Ithum ringphārumsa kaja iwui shimān kahai yaonao chi samphanghaira.’ 7#Jam 5.20; Lk 19.10; 15.10. Chithada sāda ina nathumli kahāngna, ning ngatei khavai makhalei khamashung khangaronga mi hangchikoda chikoli ngasokapamliva morei kaphunga mi akhana ning khangatei china kazingramli mathānmeikharra.
Shiman kahai Lupāwui Chānjam
8“Lha sha̱nao khipana lupāsā tharā leilaga akha shimānhaiakha ana thaomei sharkāda shim pha̱da masamphangranglakha eina tangda ningkachāng eina maphamarakhala? 9Ana chi samkaphang eina khongnainaobingli hokhuilaga hānga, ‘Ithum ringphārumsa kaja shimān kahai lupā chi samphanghaira.’ 10Chithada sāda ina nathumli kahāngna, morei kaphunga akhana ning khangatei chitharan Varewui kazingraobingna ringphā mathāna.”
Shiman kahai Naomayarawui Chānjam
11 #
Mat 21.28. Kala ana hānga, “Mi akhawui naomayara khani leisai. 12#Khal 21.15-17. Agato china avāva̱li hānga, ‘Ava, iwui shimluiyar milu.’ Chieina avāva̱na awui khalalei lan saikora ani chinaonili ngayarmi. 13Zimiksho khani kathumthangwui thili ana awui shimluiyar yorkhuiserhailaga pheisā chi khuiphungda ngalei katāva̱ akhali thuihaowa. Apam chili sopmasaplak eina okthuilaga awui lan saikora sākasakserhaowa. 14Ana awui khalalei saikora sākasakser kahaiwui thili apam chili chāmrei rāda zākhavaila maleithuwa. 15Chieina ngalei chiwui ruichumnao akhawuili ot asai kala ali awui hok homkhavai luili chihovai. 16Ana thainā kahai eina hokzāt chila zāngai, chithālala khipānakha ali mamizāmana. 17Ning mathingkhaung eina ana hānga, ‘Iwui Avāna masākakhui rao saikora athumwui zāshapli lāngmeida samphanga, kha ina apam hili kathaina thiki jiura! 18Ina ngakarthuida ishāvāwuili latungura kala ina ali, Avā, ina Varewui mangalila, nawui mangalila khayon ot sāhaira. 19I nawui nao akhana da mahophayoluimana; nawui masākakhui rao akha thada kakhuimilu’ da hāngra. 20Chieina ana ngakarthuida avāva̱li unga.
“Kha ana katāva̱li zatta khalei chi avāva̱na kathei tharan awui wuklungli lukhamashana pemtinghaoda ngasamvālaga angavamkhuida ali maya̱ya. 21Chieina anaomayarana ali ‘Avā, ina Varewui mangālila, nawui mangālila khayon ot sāhaira, I nawui nao akhanada mahophayoluimana’ da hānga. 22#Hao 41.42; Zec 3.4. Kha avāva̱na awui raobingli kasoi, ‘Thakta mathāmeikap kaje kachon khuirāda ali rāngavaimilu. Apāngli khutop rāsangmilu kala pheihop ngahopmilu; 23kala asakakā seinao akha ashimenkhuilaga taithatlu, ithum phāshak phazāda ringphārumsa; 24#1 Tim 5.6; Eph 2.1; Lk 9.60. kaja inaomayara hi thihairasai, kha ringluihaira; shimānhairasai, kha ara samphangluihaira.’ Chi eina athumna shaohāhā mana̱da ringkaphā eina phāshak phazāruma.
25“Chithada leilakha naomayara khararra chi luili leisai. Ana ungmamānda shim ungkhanganai eina laa kasā kala pheichak kasākhon shai. 26Chieina ana rao akhali hokhuida, ‘Khi kasākhala’ da ngahāna. 27Rao china hānga, ‘Nagato unghaira kala ka̱lākashi maleila samphangluishit kajiwui vang navāna asākakā seinao taithatmi.’ 28Chi kashā eina ama chi malungvātnāhaida shimlungli makāngaiga jihaowa. Chieina avāva̱na shoksuiya. 29Kha ana avāva̱li hānga, ‘Yanglu, ina nali kum hirankha otram ngatha̱mihaira kala nawui kahāng makailakranga; chithālala nana ili iwui ngasotnaobingli ngasoda ringphārum khavai menao akhala mataithatmilakranga. 30Kha nawui naomayarapā hina sopkhamasap sha̱naobingli ngasoda nawui lan sāmakanmihailaga hankhaung tharan nana awui vang asākakā seinao taithatmilamā!’ 31Chieina avāva̱na ali hānga, ‘Inao, nava ili ngasopamching kajina kala iwui khalalei saikora hi nawuisera. 32Kha hiya mathānda ringphārum ngayilak kahaina, kaja nagato hi thihairasai, ringluihaira; shimānhairasai, kha samphangluishithaira.’”
Currently Selected:
LUKE 15: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
