LUKE 16
16
Ning Makathar Lansinawui Chānjam
1Anala awui sākhangatha̱bingli hānga, “Atam akhali kashānga mi akhawui lan kasinga mi akha leisai. Ana akhavāwui lan leimamāngli sāshimānmihaoda awuitungli kaphen leihaowa. 2Chieina ana lansina chili hokhuida ngahāna, ‘Nawuitungli kaphen hi khikhala? Nawui lansin saikorawui hishap khuirālu, kaja na aja eina thuilaga lansina masāluipaimara.’ 3Chieina lansina china akhalatta hānga, ‘Kathāusido? Iwui akhavāna ili lansinpam eina khuishokhaora jihaira! Pangshap maleithuda tin singda otla masārarmarali, kala pokazāla khayakrali. 4Ili lansinpam hiwui eina khuishok kahai tharan mibingna ili athumwuili shimzun sākhavai kathada sāsikhala kaji theihaira.’ 5Chieina akhavāwui leiman kazangbing ava̱va̱li hokhuida khare chili ngahāna, ‘Nana iwui akhavāli kayākha shukhaili?’ 6Ana ngahānkai ‘Thao tin shākha shukhaida lei.’ Chieina ana ali hānga, ‘Lairik kapi kahai chi khuilu kala thākta pamzanglaga hangphangāna da kapilu.’ 7Chiwui thili khangatei akhali ngahāna, ‘Nana kayākha shukhaida lei?’ Ana ‘Kehu tin shākha shukhaili’ da ngahānkai. Chieina ali hānga, ‘Lairik kapi kahai chi khuilu kala hangchishatna da kapilu.’ 8#1 Thes 5.5; Eph 5.8; Lk 20.34; Joh 12.36. “Akhavā china ningmakathar lansinawui arah kathem chiwui vang soi kaja okathui hiwui mibingna athumwui thotliva kahorwui naobingli thangmeimeikhara.” 9#Lk 12.33; 18.22. Kala ina nathumli kahāngna, “Nathum khalatta makathar okathuiwui lan eina ngasotnao phākhui, chithākha lan chi shimān kahai tharan athumna nathumli makashimānpamli zangngasakra. 10#Mat 25.21; Lk 19.17. Kateowa otli ningkhamazing mi china kahaka otlila ningmazinga, kala kateowa otli ningmakathar mi chi kahaka otlila ning matharmana. 11Chieina nathumna okathuiwui lanli ningtharda masārarakha nathumli khipāna khamashunga lan chi horsangmingairakhala? 12Kala nathumna kateiwui otli ningmazingda masingmirarakha nathum khalattawui lan chi khipāna nathumli mirakhala? 13#Mat 6.24. “Rao akhana akhavā khanili otram mangatha̱paimana; kaja ana akhali yangkharinglaga akhapali leishira, maningakha akhali mashitlaga akhapāli ningkachaira. Nathumna Vare eina okathuiwui lanli otram mangatha̱rumpaimana.”
Jishuwui Chānsamthui Kaikha
(Mat 11.12-13; 5.31-32; Mk 10.11-12)
14Lupāli khangamara Phariseebingna tui hi shālaga Jishuli mana̱shiya. 15#1 Sam 16.7; Chān 21.2; Ots 1.24; Lk 10.29. Kha ana athumli hānga, “Mibingwui miktāli nathum khalatta mashungkhui khavai sāzata, kha Varena nathumwui wuklung theisera, kaja mibingwui miktāli khamathāna da kakhui hiya Varewui miktāli ningkakachaiya otna.
16 #
Mat 11.12-13. “Ain kala marānbingwui tui chi Ra̱hikme Johnwui thot eina tangda leisai, chiwui thili Vare wungramwui paokaphā hi hāshokphoka; kala mi kachiva̱na chili nganurzanga. 17#Mat 5.17-18; Lk 21.33.Kha Ainwui tui sampārikkha sākakhailiva kazing eina okathui shimān kahaina paimei.
18 #
Mat 5.31-32; 19.9; Mk 10.11-12; 1 Cor 7.10-11. “Preiva̱li pānghailaga khangatei akhali kakhui kachiva̱ phokaphāna, kala gaharali pāngkahaiva̱ sha̱nao chili khangakuma mi chila phokaphāna.
Kashānga Mi Akha eina Lazarus
19“Atam akhali kashānga mengchin kahai kashankachon khangavai kala thangkachida hekmaheilak eina phāshak phazākapam mi akha leisai. 20Awui ngaveili Lazarus kaho chāmlak kahai kala ngapharhok kahai mi akha leisai. 21Ana kashāngpawui zāneng tātung kahai chi ngamuizāngaiya; chili lāngda fanala awui khangaphār chi rāmaleklek ji. 22#Joh 13.23. “Khaleilaga kachāma chi thihaowa kala kazingraobingna ali Abrahamwui makāli khuikai. Kashānga chila thihaida chifahaowa; 23kala kazeiramli chotlakhaoda ana yangkai kala Lazarusna Abrahamwui makāli kapam chi tālāk eina ngashānthei. 24Chieina ana hānga, ‘Avā Abraham, ili khalumashanmilu kala Lazarusli awui pāngmarengnao chi tara̱ simkhuilaga imale hili kharāmakuimi ngasak khavai chihotāmilu kaja I meilung hili chotnāhaira.’ 25#Lk 6.24. “Kha Abrahamna hānga, ‘Inaomayara, phaningunglu, kaja na ringda leilakha khamathāthāmāng samphanga kala Lazarusva zakkashimāng samphanga; kha ara nana kachot samkaphang tharan ana hili ringkaphā samphangda lei. 26Chili langmeikharda nathum eina ithumwui marakli chāngam akha lei, hiwui eina nathumli vākhangaibingna mavāpaimana kala nathumwui eina hili kāka kajebingnala makāpaimana.’ 27Chieina ana hānga, ‘Avā, chithākha ali ishāvāwui shimli kashiunmilu; 28kaja ichināngara phangā lei, athumnala kachotkachāngpam hili marā khavai unghāngmachinmi ngasaklu.’ 29#Joh 5.45-47; Ots 15.21; Lk 4.17. “Kha Abrahamna hānga, ‘Athumli hāngmachinmi khavai Moses eina marānbing leida lei: athumna athumwui tui nganāranu.’ 30#Lk 3.8; 19.9. Chieina ana ngahānkai. ‘Maningmana avā Abraham, kachikathā akhana kathiwui eina unglaga athumli unghāngakha ning ngateira.’ 31Abrahamna ali hānga, ‘Athumna Moses eina marānbingwui tui manganaakha kachikathā kathiwui eina ringshokta unghānglala makhuisangmara.’”
Currently Selected:
LUKE 16: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
