LUKE 17
17
Morei
(Mat 18.6-7,21-22; Mk 9.42)
1 #
Mat 18.6-7; Mk 9.42; 1 Cor 8.12. Chiwui thili Jishuna awui sākhangatha̱bingli hānga, “Morei sākhavai kasui kachungkha rāra, kha kasui rākhangasakpā chili kakhanang ringkashi ngasāranu. 2Khangazanbingli morei sāngasaki kachiliva akahungli lungriham hokthāngmihailaga ngayilungli horsang kahaina awui vang phāmei. 3#Mat 18.15,21-22. Nathumwui ot kasāli ningngasharlu! “Nachināna yonhaiakha ali hāngmachinlu kala ana ning ngateiakha pheomilu: 4kala ana nawuitungli khayon ot thangkhali shini shida sāhaiakha, kala shini shida ‘I yonhaira’ da ning ngateiakha nana ali pheomiphalungra.”
Shitkasang
5 #
Mat 17.20; 21.21; Mk 11.22-23. #Lk 7.13. Paokazatbing china Proholi hānga, “Ithumwui shitkasang mataisang ngasakmilu.” 6Chieina Prohona hānga, “Nathumwui shitkasang kayānghanthārikha leisi kaja hikathā khaorārong hili ‘Angayung eina phurkhuilaga ngayilungli aphorlu’ da nathumna hāngshapra kala chinala nathumwui kahāng nganāra.
Raowui Angalang
7“Nathumwui ngachaili khipāna rao akha ngavālaga ana luili vālaga lah yao ahomlaga shimli hankhaung eina ‘thākta ungphāzaulu’ da hangra? 8#Lk 12.37; Joh 13.3-5. Chiwui mahutle nana ‘Iwui zākhavai ngarānlu kala sāri shaksākharikkhuida ina maphāshak maphazākhuiranglakha eina tangda otram ngatha̱lu kala chiwui thili nana phāshak phazāpaira’ da mahangmarala? 9Rao china awui kakaso sāhaowa da ali ningkashi mimaraola? 10Chi tākam eina nathumli kaso kahai saikora sākup kahai tharan ‘Ithum khikha masā khavai raobingna; ithumna ithumwui angalang chimāng sākahaina’” da hānglu.
Phārrei Kakazā Tharāli Raikhami
11 #
Lk 9.51; 13.22; 19.11. Jishuna Jerusalemli vākhavai Samaria eina Galileewui amarakli akāna. 12#Pāng 13.45-46. Ana kha̱lung akhali zanguki kaji eina phārrei kakazā mayarnao tharā ngarokta athumna lachāhamsam nganingda, 13#Lk 5.5; 8.24,45; 9.33,49. panglāk eina vaoda hānga, “Amei Jishu, ithumli khalumashanmilu.”
14 #
Lk 5.14; Mat 8.4; Mk 1.44; Pāng 14.2-32. Jishuna athumli kathei eina hānga, “Zatulu, kala nathum khalattana pāngmonbingli achitheilu.”
Athumna zatmamānlakha athumli tharmihaowa. 15Athumwui ngachaili akhana ali tharmihaira kaji kathei eina panglāk eina vaoda Vareli masot chikatlaga latunga. 16Kala Jishuwui pheizingli ngakhumshāmzangda ningkashi tarākha miya. Mipā hi Samarianaona. 17Chieina Jishuna ngahāna, “Mi tharāli tharkhami maningmalā? Athum chiko chi kali vāhao? 18Miyur khangateipa hi maningla khangatei akhala Vareli masot chikat khavai malatungthulā?” 19#Mat 9.22; Mk 5.34; Lk 8.48; 18.42. Chieina ali hānga, “Ngakarthuilu, kala nashi shimli ungulu, nawui shitkasang china nali tharchao ngasakhaira.”
Rākharā Wungram
(Mat 24.23-28,36-41)
20 #
Lk 19.11; 21.7; Ots 1.6. Pharisee kaikhana Jishuli Vare wungram katharān rārakhala da khangahān eina athumli ana ngahānkai, “Vare wungram chi mik eina yangkhuikapai machut eina rāki kaji maningmana. 21Khipānakha ‘Yanglu, hili leili, chili leili’ da mahāngmara; kaja yanglu, Vare wungram chi nathumwui alungli lei.”
22 #
Mat 9.15; Mk 2.20; Lk 5.35. Chiwui thili ana awui sākhangatha̱bingli hānga, “Nathumna miwui Naomayarawui atam chi thangkhamāngla theingailala matheirarki kaji zimiksho rārāsāra. 23#Mat 24.23; Mk 13.21. Chitharan nathumli, ‘Hivāk, chivāk’ da hāngra kha mayāmhaialu, chikathāli kashurla mashuralu. 24#Mat 24.27; Phon 1.7. Kaja rikhān khangashei tharan achikun akhawui eina achikun akhali horkhavā thada miwui Naomayarana awui zimiksholi chithada rāra. 25#Lk 9.22. Kha rimeikapta ana kachot kachāng kachungkha phungphalungra kala thot hina ali makhuisangmara. 26#Mat 24.37-39; Hao 6.5-8; 7.6-24. Noahwui atamli kashok thada miwui Naomayarawui atamlila shokra. 27Noahna marikhong kātongkhuida tara̱ phongshilongda ot saikora mashimānranglakha eina tangda athumna phāshak phazāpama, ngalā khuipama, fathuipama. 28#Hao 18.20-33; 19.24-25.Lotwui atamlila chi tākam eina sāsai—athumna phāshak phāzai, khalola loi, khayorla yora, luila vai, shimla sai, 29Kha Lotna Sodomwui eina shokthanghon kazingramwui eina meiwon eina raichiri rotāda athum saikorali shimān ngasaka. 30miwui Naomayarali phongmithanghon chi tākam eina shokra. 31#Mat 24.17-18; Mk 13.15-16; Lk 21.21. “Chithanghon shimtungli leikasā china shimlungli haikahai awui thongthāng chi mazangkhuiaranu, chi tākam eina luili leikasā chinala mahanungaranu. 32#Hao 19.26. Lotwui preiva̱li phaningunglu! 33#Mat 10.39; 16.25; Mk 8.35; Lk 9.24; Joh 12.25. Kharing samphang khavai kaphā mi chi shimānra, kha chi kashimāna chili ringngasakra. 34#Mat 24.40-41. Ina nathumli kahāngna, chithanghon ngayā pet akhali mi khani pisāra, akhali khuithuihaora, akhapāli nothāhaora; 35sha̱nao khani mā rungsāra, akhali khuithuihaora, akhapāva̱li nothāhaora; 36luili mayarnao khani ot sārumsāra, akhali khuithuihaora, akhapāli nothāhaora. 37#Mat 24.28. Chieina sākhangatha̱bingna ali ngahāna, “Proho, kalikhala?”
Jishuna ngahānkai, “Kathingun khaleipamli khalāng sāshaiala rākazipra.”
Currently Selected:
LUKE 17: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
