LUKE 18

Rameiva̱ eina Bicharwowui Chānjam

1 # Lk 11.5-8. Jishuna athumli atam kachida seihā sāching khavai kala ning masuitā khavai chānjam akha hāngchithei. 2Ana hānga, “Kachikathā keinung akhali Vareli makhangacheea kala milila mautkashita bicharwo akha leisai. 3Keinung chili ‘Mashun bichar sāmida khamashunga tuitak tāmilu’ da ali rāhāngching kaje rameinao akhala leisai. 4Atam kasāngkhawui vang ana mamayāmana, kha naolak eina akhalatta chukmaja̱laga hānga, ‘Ina Vareli mangacheesālala kala mikumoli mautshitsālala 5rameiva̱ hina sheikhautlakli, chiwui vang eina mashun bichar chi ina sāmihaora. Chi maningakha thangkachida ana rākahāng hina ning koktarāklakhaora.’” 6#Lk 7.13. Chieina Prohona hānglui, “Makhangaronga bichawona khi hāngkhala kaji nganālu. 7#Phon 6.10; Mat 24.22; Rom 8.33; Col 3.12; 2 Tim 2.10. Chithākha ngashun ngayā mateila ngachonmi khavai chapta kapo awui kapangkhui kahai miyurli Varena mashun bichar masāmimaralā; ana ngarainganaoralā? 8Ina nathumli kahāngna, ana thaklāk eina mashun bichar sāmira. Chithāmāngmada miwui Naomayarana rāthanghon shitkasanga mi okathui hili leisaralā?”

Pharisee eina Khāshinā Khalokawui Chānjam

9Khalatta khamashungana da kaphaninga kala mi saikorali machāpkhame athumlila Jishuna chānjam hi hāngchithei: 10“Atam akhali mi khani khorumshimli seihā sākhavai vai, akhana Phariseena kala akhapāna khāshinā khalokana. 11#Mat 6.5; Mk 11.25. “Phariseepā china kha-lāchāda anganinglaga hithada seihā sai, ‘O Varivara, ina nali ningshilaka kaja iva mi khangatei thada ngaponkazā, ning makathar, phokaphā lah khāshinā khalokapā kathā maningmana. 12#Lk 5.33; 11.42. Ina haptākhali khanishida khuma, kala samkaphang saikorawui tithebing michinga.’ 13“Kha khāshinā khaloka china achithek akhali nganinglaga kazingramshongla mayangkalengla amathikli kapheda, ‘He Varivara, morei kaphunga ili khalumashanmilu’ da poi.” 14#Mat 18.4; 23.12; Lk 14.11; 1 Pet 5.6. Ina nathumli kahāngna, “Phariseepā maningla khāshinā khalokapāna pheokhami samphangda shimli hanunghaowa; kaja khalatta hakkakhui mi kachiva̱li teongasakra kala khalatta kateowana da kaphaninga mi chili hakngasakra.”

Jishuna Naoshinaobingli Sokhami

(Mat 19.13-15; Mk 10.13-16)

15 # Mat 19.13-15; 18.3; Mk 10.13-16. Kachikathā mi kaikhana Jishuwui ngalemli angangnaobingli ana pāng parrormi khavai khuirai; kala chi sākhangatha̱bingna kathei tharan athumli khararra. 16Kha Jishuna athumli hokhuida hānga, “Naoshinaobingli iwui ngalemli rāngasaklu, athumli mahaphaialu; kaja Vare wungram chi athum kathāwuina. 17Kachangkhat eina ina nathumli kahāngna, naoshinao thada Vare wungram hi makhuikasanga mi china kachilikha chili mazangrarlakmara.”

Kashānga Mi Akha

(Mat 19.16-30; Mk 10.17-31)

18 # Mat 19.16-22; Mk 10.17-22. #Lk 10.25. Chiwui thili Jihudiwui kathāna akhana Jishuli rāngahāna, “Kaphā Ojā, makashimān kharing samphang khavai ina khi sārakhala.” 19Jishuna ngahānkai, “Ili khisāda kaphā hokhala? Vare maningla kaphā khipākha maleimana. 20#Sho 20.12-16; Khal 5.16-20; Rom 13.9; Jam 2.11. Ningkhami chi nana thei: ‘maphophāpaimana, mashaothatpaimana, maleepaimana, minama shākhi mamipaimana, nava̱ navāli khayāshilu.’” 21Chieina ana ngahānkai, “Ina saikora hi nganuilakhawui eina thuida mayonrā kahaina.” 22#Lk 12.33; Ots 2.45; 4.32. Jishuna chi kashā eina ali hānga, “Nawui khavāt akha leifaya. Nawui khalalei saikora yorhailaga kachāmnaoli yaohaolu, chithākha kazingramli nawui lan leira, laga rālu, ithi shurlu.” 23Ana hi kashā tharan wukhananglakhaowa, kaja a kashānga mi akhana. 24#Mat 19.23-26; Mk 10.23-27. Jishuna ali yangkālaga hānga, “Lan kachungkha khaleinaobingwui vang Vare wungramli zangkida kayākha sakrakhala? 25Kaja, kashānga mina Vare wungramli zangki kachiliva utna kapimkhurli ngara̱kashokna paimei.” 26Hi kashā mibingna ngahānna, “Chithākha khipā kahui samphangrakhala?” 27#Hao 18.14; Job 42.2; Jer 32.17; Lk 1.37. Kha ana ngahānkai, “Mibingwui vang masākapai chi Varewui vanga sāpaisera.” 28#Mat 19.27-30; Mk 10.28-31; Lk 5.1-11. Chieina Peterna hānga, “Yanglu, ithumwui shim horhailaga ithum nathi shurhaira.” 29Jishuna hānga, “Kachangkhat eina ina nathumli kahāngna, Vare wungramwui vang shimlui nilala, preiva̱ nilala, achinā ngarā nilala, ava̱ avā nilala, naongarā nilala horhaida zatthui kahai mi china 30aruihonwui thotli mataimeikharda rārāda khalei thotli makashimān kharing masamphangki kaji khipākha maleimana.”

Jishuna Awui Kathi Hāngkhamarān Kakathuma

(Mat 20.17-19; Mk 10.32-34)

31 # Mat 20.17-19; Mk 10.32-34; Lk 9.22,44-45; 17.25. Jishuna tharāda khani chili ngateida hokhuilaga hānga, “Nganālu, ithum Jerusalemli vāra kala marānbingna miwui Naomayarawui pongli kapi kahai saikora chi ungshung ngasaksera. 32Kaja ali miyur khangateibingwui pāngli horsangmihaida athumna ali mana̱kashila mana̱shira, kakhayakla khayak ngasakra kala machora̱la mashorrorra. 33Athumna khangaphitla ngaphitta shaothatra, kha kakathumathang ana ringshokra.” 34Hāngda khalei tui chi sākhangatha̱bingna akhala bhap matāmana; tui chiwui kakhalat chi athumwui eina ngathummihaoda Jishuna khi kahāngkhala da matheikhuirarthuwa.

Khangapeoali Raikhami

(Mat 20.29-34; Mk 10.46-52)

35 # Mat 20.29-34; Mk 10.46-52; Mat 9.27-31; Mk 8.22; Joh 9.1-7. Jishuna Jericho vāshungnanai khangapeoa mi akha shongfapheili zāt popamsai. 36Ana mi kachungkha rakakānwui akhon kashā tharan, “Khi kasākhala?” da ngahānna. 37Athumna ali ngahānkai, “Nazarethwui Jishu rārāda lei.” 38Chieina ana, “Davidwui naomayara Jishu, ili khalumashanmilu.” da vaowa. 39Awui ngalemli khanganinga mi kaikhana kasainakha pamlu da kahara, kha ana juimei pangmeida “Davidwui Naomayara, ili khalumashanmilu” da vaolui. 40Chieina Jishuna ngasāmda khangapeowa chi awuili khuirā khavai kasoi, kala ana rākhanganai tharan ali ngahānna, 41“Nawui vang ili khi sāmilu jikhala?”

“Proho, imik theingasakmilu” da ngahānkai. 42#Mat 9.22; Mk 5.34; 10.52; Lk 7.50; 8.48; 17.19. Chieina Jishuna ali hānga, “Theihaoranu! Nawui shitkasang china nali theingasakhaira.” 43Chieina ana ngalāngda kathei samphangda Vareli masot chikatta athi shurthuwa; kala mi saikorana chi kathei tharan Vareli masochikata.

Currently Selected:

LUKE 18: TANGBSI

Highlight

Copy