LUKE 19

Jishu eina Zacchaeus

1 # Mk 10.46. Jishuna Jericholi azangda keinung chi akāna. 2Keinung chili Zacchaeus kaho mi akha leisai. A khāshinā khaloka akhavāna kala shānglaka. 3Ana Jishu chi kachipākhala da theikhavai ngarāna. Kha akho kasha̱ mi sāhaoda yaruilungli anganinglala Jishuli matheirarthuwa. 4Chieina Jishuna rāki kaji shongfali rida ana ngasamvai kala ali yangkhuipai khavai sycamorerong akhali vākai. 5Jishuna apam chili rākashung eina yangkāda hānga, “Zacchaeus, thākta tunglu, aja nawui shimli ngasāmkhuiphalungra.” 6Chieina ana totot tunglaga Jishuli mathanthathup samphangkhui. 7#Lk 5.29-30; 15.1-2. Mi saikorana chi kathei tharan athumna, “Ana morei kaphunga mi akhawui shimli azangra jihaira” da kapumkaseoda matuisera. 8#Lk 7.13; 3.14; Sho 22.1; Pāng 6.5; Mis 5.6-7. Zacchaeusna nganingkāda Proholi hānga, “Nganāmilu, Ojā! Iwui khalalei lan ngakaipakta kachāmabingli mira, kala ina kachikathā akhali kateizāhaisaakha akhum mati mataida ali hanmira.” 9#Lk 3.8; 13.16; Rom 4.16. Chieina Jishuna ali hānga, “Mipā hila Abrahamwui ara̱-azā ngasahaoda aja shimkhur hili huikhami rāshunghaira. 10Kaja miwui Naomayarana shimān kahaibingli phākhuida huimi khavai kharāna.”

Lupā Tharāwui Chānjam

11 # Lk 9.51; 13.22; 17.11; 18.31; 9.27. Mibingna tui chi nganāmahungda leilakha Jishuna athumli chānjam akhala hāngchithei. Chitharan a Jerusalem vāshungnanaihairasai kala mibingna Vare wungram chi thākta rāra da phaningsai. 12#Mat 25.14-30. #Mk 13.34. Chieina ana hānga, “Atam akhali khangama akha ngalei katāva̱ akhali vālaga awungawui pangshap samphangda shim hanung khavai khangarān sāsai. 13Ana mazatphokranglakha awui rao tharāli hokhui kala athum avāva̱li lupā akharip milaga, ‘I mahanungranglakha hi eina leih sāsālu’ da hānga. 14Kha aramnaobingna ali yangkharinghaoda a zatthui kahaiwui thili, ‘Ithumwuitungli mipā hina khamung maningchāngmana’ da ahāng khavai minganin chihovai. 15Mipā china awungawui pangshap samphangda hankhaung tharan heng sāda ana lupā mikahai raobing chili athumna kayākha tongkhuikhala da theikhui khavai rāserlu da kasoi. 16Khare china awuili rāda, ‘Amei, nawui lupā chieina tharā tongkhui’ da hānga. 17#Lk 16.10. Chieina ali hānga, ‘Phālakhaira! kaphā rao! Nana kateowa otli ningmazinglak eina kasāwui vang nana keinung tharāwui akhava sāra’ 18Kakhane chinala, ‘Amei, nawui lupā chi eina lupā phangā tongkhui’ da rāhānga. 19Chieina ali hānga, ‘Nana keinung phangāwui akhavā sāra.’ 20“Chiwui thili khangatei akhanala rāhānga, ‘Amei, hi ina chonsakainao akhali romtitlaga haikahai nawui lupā china; 21kaja nali ngacheelaka, khiwui vangkhala kaja na sākashe mina; nawui makhaning chila nana khui, nana makhayao chila nana hātkhuiya.’ 22Ana ali hānga, ‘He makaphā rao! Ina nali nawui chanhān tākam eina bichar sāra. Nana I sākashena, iwui makhaning chi kakhuia kala makhayao chi hātkakhuiana da thei jihaira! 23Chithākha khi sāda hankhaungli iwui lupā chi atar zangda samphang khavai lupā kazip khavaili masanghaithukhala?’ 24“Ana chiwui ngalemli khanganingbingli hānga, ‘Lupā chi awui eina khuida lupā tharā kasingapāli mihaolu.’ 25Kha athumna hānga, ‘Amei, awui lupā thara leilagavā?’ 26#Mat 13.12; Mk 4.25; Lk 8.18. Ina nathumli kahāngna, khaleia mi kachiva̱li chungmeida mirorra, kha makhaleia mi chiwui eina awui kateokha khalei chila khuithuihaora. 27Athumwuitungli ili mamung ngasak khangaia yangkashebing chiva hili khuirāda iwui miktāli shaothathaolu.’”

Jerusalemli Kazang

(Mat 21.1-11; Mk 11.1-11; Joh 12.12-19)

28 # Mk 10.32. Jishuna hi hānghailaga athumli rida Jerusalem vākhavai zathaowa. 29#Mat 21.1-9; Mk 11.1-10; Joh 12.12-18. Ana Olive kaphungli khalei Bethphage eina Bethanyli vāshungnanai tharan awui sākhangatha̱ khanili chihovāda hānga, 30“Mangāshong khalei kha̱ chili vālu kala nanina chili kazang eina mina matonglakrang kaji gadhānao akha hokhaisāra; chi akhalākhuilaga hili khuiunglu. 31Nanili kachikathāna ‘Khiwuivang khala?’ da ngahānakha ‘Prohona sāvai khavai lei’ da ngahānkālu.” 32#Lk 22.13. Chieina kachihopā khani china vāhaowa kala ana hāngkahai tākam eina samphanga. 33Anina gadhānao chi khalāmahunglakha akhavā china ngahāna, “Khiwuivang eina kakhalākhala?” 34#Lk 7.13. Chieina anina, “Prohona ot sākhavai lei” da ngahānkai. 35Anina chi Jishuli khuiungmi kala gadhānao chiwuitungli athumwui kachon hamihailaga Jishuli kātong ngasaka. 36#2 Wung 9.13. Ana tongzatmamānlakha mibingna athumwui kachon shongfali hamizata. 37Ana Jerusalem vāshungnanai Olive kaphungwui atun katā vākashung chitharan athi shurkazata mi saikorana ringphākhaihaowa kala athumli hakkhamahā ot kachungkha theikhangasakwui vang panglāk eina vaoda Vareli masot chikatta hānga, 38#Laa 118.26; Lk 13.35; 2.14. “Proho mingli kharā awungali ka̱lā mahairanu! Kazingramli chingrihairanu kala juikhamataiyali tekmateirānu.” 39#Mat 21.15-16; Hab 2.11. Chieina yaruili zatrumkasā Pharisee kaikhana Jishuli hānga, “Ojā, nawui sākhangatha̱bingli hāngmachinlu!” 40Ana ngahānkai, “Ina nathumli kahāngna, athum chingri eina pamhailala lungguibingna vaoshokra.”

Jerusalemwui vang Jishuna Kachap

41 # Lk 13.33-34. Ana vānganaimeida keinung chi akathei tharan keinung chiwui vang khanangda chaplaga hānga, 42“Chingri kahai hi kachiwui eina kharākhala da nathumna aja theisāsi kaja jong! Kha ara chila nathumwui eina thumihaira, 43#Lk 21.21-24; 21.6; Isa 29.3; Jer 6.6; Ezek 4.2. kaja nathumwuitungli ka̱lākashi atam chi rārāsāra, chitharan nathumwui yangkashebingna raipan sālaga rākuinamhaora kala achithek kachiva̱wui eina muirāra. 44#1 Pet 2.12. Athumna nathumli kala ngaveilungli leikasā naongarā saikora shimān ngasakra; lunggui akhawuitungli lunggui akhala maleiluimara, kachiwui vangkhala kaja Varena nali huikida kharā atam nana matheimana.”

Khorumshim Sākhamathā

(Mat 21.12-17; Mk 11.15-19; Joh 2.13-22)

45 # Mat 21.12-13; Mk 11.15-17; Joh 2.13-17. Chiwui thili ana khorumshimli azanga kala ot khayorabingli kashamkhayangda hānga, 46“Hithada kapihaida lei: ‘Iwui shim hi seihā sākhavai shim hora’ kha nathumna hi pha̱ma̱kashaobingwui shim sāngasakhaira.”

47 # Mk 11.18; Lk 21.37; 22.53. Kala thangkachida ana khorumshimli tamchitheichinga, kha pāngmon akhokabing, Ain kathembing kala kathānabingna ali shimān ngasakida apong phai. 48Thālala apong akhala masamphangthuwa kaja mi saikorana awui tamkachithei chi ningsanglak eina nganāngaichinghaowa.

Currently Selected:

LUKE 19: TANGBSI

Highlight

Copy