LUKE 7
7
Raimi Akhavā akhawui Raoli Raikhami
(Mat 8.5-13)
1 #
Mat 8.5-10,13; Joh 4.46-53. Mibingli hāngki kaji hāngkup kahaiwui thili Jishuna Capernaumli vai. 2Chitharan raimi shākhawui akhavā akhana lumlak kahai rao akha kazāda thinanai leisai. 3Ana Jishuwui maramli kashā eina awui raoli raimi khavai Jihudiwui khararnao kaikhali ali aho khavai chihovai. 4Athumna Jishuli rāda saklak eina poda hānga, “A nawui khangachon samphang khangayi milaka. 5#Ots 10.2. Kaja ana ithumwui yurli leishi kala ithumwui vang synagoguela sāmi.” 6Chieina Jishuna athumli ngasovai kala shim vāshungnanai tharan akhavā china awui ngasotnaobingli chihovāda Jishuli vāhānga, “Proho, marāluialu, chotvai, nali iwui shimli rāzang ngasaki kaji hi vaishiya. 7Chiwui vang eina I mashā eina marākhalengna. Kha thada kasomimalu, china iwui rao chi raishapra. 8Kaja ila akhavāwui azingli khalei mi akhana kala iwui azinglila raimi tarākha lei. Kachikathā akhali ina ‘Vālu’ jiakha vai, kala khangatei akhali ‘Rālu’ jiakha rai, kala iwui raoli ‘Hi sālu’ jiakha ana chi sai.” 9Jishuna tui chi kashā eina matakhakhaowa kala shurkazat mi kachungkha chili ngareiungda hānga, “Ina nathumli kahāngna, Israelwui alungli ina hikathā shitkasang matheilakranga.” 10Chihokhavā paophungmebing china shimli latkhanung tharan rao chi raihairasai.
Jishuna Rāmeiva̱wui Naoli Ringkhangasak
11 #
Mk 5.21-24,35-43; Joh 11.1-44; 1 Wung 17.17-24; 2 Wung 4.32-37. Khaleilaga Jishuna Nain kaho keinungli vai kala awui sākhangatha̱bing eina mi kachungkha ali ngasovai. 12Ana keinung chiwui ngavei vākashung tharan, yanglu, yaronnao akha thihaida ngazonshokrāsai. A ra̱meiva̱ akhawui akhamāng kaje naomayarana, chili keinung chiwui mi kachungkha ngasozatsai. 13#Lk 7.19; 10.1; 11.39; 12.42; 13.15; 17.5-6; 18.6; 19.8; 22.61; 24.3. Prohona ali kathei eina lumashanhaida “Machapalu” da hānga. 14Kala ana vāda kathi okoli sākaza̱ eina ngava̱kazatbing china nganingmihaowa. Chieina Jishuna hānga, “He mayara, ina nali kahāngna, ngakarthuilu.” 15Kathipā chi thuipama kala tui matuiphokuwa, kala Jishuna ava̱va̱wui pāngli mihaowa. 16#Lk 7.39; 24.19; Mat 21.11; Joh 6.14. Kashok chi theilaga athum ngacheelakhaowa kala Vareli masot chikatta hānga, “Ithumwui ngachaili marān kahaka akha shokhaira! kala Varena awui miyurli huimi khavai phaningmihaira!” 17Awui pao chi Judea ngalei eina chiwui kuikhamareili khalei apam saikorali ngayaovāserhaowa.
Johnwui Pao Phungkharā
(Mat 11.2-9)
18 #
Mat 11.2-19. Johnwui sākhangatha̱bingna kashokshok saikora ali unghāngsera. 19Chieina Johnna awui sākhangatha̱ khani hokhuilaga Proholi chihovāda “Raki kaje chi nakā, khangatei akhali honfarakhala?” da angahān ngasaka. 20Anina ali vākashung eina “Inili Ra̱hikme Johnna nali tui hi ngahānkhui khavai chihokharāna, chiya, ‘Raki kaje chi nakā, khangatei akhali honfarakhala?’” da ngahāna. 21#Mat 4.23; Mk 3.10. Atam chichang chili ana kazāt ayur kachungkha kala raih kazangbinglila raimi kala khangapeo kachungkhalila theingasaka. 22#Isa 29.18-19; 35.5-6; 61.1; Lk 4.18-19. Ana anili ngahānkai, “Ungulu kala nanina theikahai shākahai chi Johnli unghānglu, chiya, khangapeobing kathei samphanghaira, phei katekbing zatpaihaira, phārrei kakazābing kathar samphanghaira, khangakhokbing shāhaira, kathebingli ringngasakhaira, kachāmbingnala paokaphā kashā samphanghaira. 23Chieina ili maningkhamaong a chi sokhami ngasāranu!”
24Johnwui paophunga khani chi zatkahaiwui thili ana yaruili Johnwui maramli tamchitheiphokta hānga, “Nathumna khi yangkhuikida lamhāngli khavākhala? Masina phanung phankhavā titililā? 25Khi yangkhuikida khavākhala? Kachon khamanaka khangavai mililā? Yanglu, kachon khamathāthā khangavaibing kala kāshunglak eina okthuida khalei athum chiya awungawui dolanli khaleina. 26Nathumna khi yangkhuikida khavākhala? Marānlila? Mha, ina nathumli kahāngna, marānlila mataikhamei nathumna thei. 27#Mal 3.1; Mk 1.2. Awui pongli hithada kapihaidalei; ‘Yanglu, iwui paophungmeli nali rida chihoi, ana nawui shongfa rida ngarānmira.’ 28Ina nathumli kahāngna, sha̱naona kapharāwui ngachaili Johnli reikhamei khipākha maleimana. Chithālala Vare wungramli teomeikap kaje mi china ali reimei.” 29#Mat 21.32; Lk 3.12. Tui hi kashā eina Johnwui ra̱kahik samphang kahai mi saikorana kala khāshinā khalokbingna Varewui tui chi mashunglaka jihaowa. 30Kha Phariseebing eina ain kathembingna Varena athumwui vang ngarānmi kahai chila khalanhaowa kala Johnwui ra̱hikkhamila makhuimana.
31Jishuna hānglui, “Chithākha ina mithot hili khi eina ngaheosikhala? Athum khili ngaraichākhala? 32Athum hiya naoshinaobingna leihngapha̱li pamlaga, ‘Ithumna nathumwui vang sipa̱ khongmilala nathumna pheijak majakmana; ithumna kathi laa sālala nathumna machapmana’ da akha eina akha hangkhangarok kathāna. 33#Lk 1.15. Kaja Ra̱hikme Johnna kharā tharan a khamuila mashai kala drakhāra̱la mamangmana, laga nathumna ‘A raih kaphungana’ da hānga. 34Miwui Naomayarana rāphāshak rāphāzai, laga nathumna ‘Yanglu, a morkahaka, khamaripa kala khāshinā khalokabing eina morei kaphungabingwui ngasotnaona’ da phena. 35Chitha-ilala thangkhamei chili Varewui naongarābingna mashunga da mayai.”
Phariseepāwui Shimli Khavā
36 #
Mat 26.6-13; Mk 14.3-9; Joh 12.1-8. #Lk 11.37; 14.1. Pharisee akhana phazāngarum khavai Jishuli hoi. Chieina ashi shimli ana vāda phazāruma. 37Kala yanglu, keinung chiwui morei kaphungva̱ sha̱nao akhana Jishu phazāli kaji kashā eina nganamkaphā alabaster thaokhong akha khuirai. 38Ana Jishuwui phei khanukvāk nganingda chapsasui awui chara̱ eina phei ya̱ngasakhailaga kuisam eina mitmihai kala apheili maya̱da nganamkaphā thao chi neomi. 39#Lk 7.16; 24.19; Mat 21.11; Joh 6.14. Chi kathei eina phazāt kaho Phariseepā china akhalatta phaninga, “Mipā hi marānsi kaje ali sakaza̱ sha̱nao hi khipākhala kala kachikathā mikhala kaji theida leira, kaja ava morei kaphungva̱ sha̱naona.” 40Chieina Jishuna ngahānkāda hānga, “Simon ina nali hāngkhangai akha lei.” Ana “Khikhala Ojā, hāngmilu” da ngahānkai. 41“Lupā kachishuta mi akhawuili kashuka mi khani leisai, akhana lupā shāphangā kala akhapāna hangphangā shukhaisai. 42#Mat 18.25. Anina marunkharar eina ana yangmithathuihaowa. Chithākha aniwui ngachaili kachipana ali leishimeirakhala?” 43#Lk 10.28. Simonna ngahānkai, “Ina kaphaninga, chungmeida yangmi kahaipa china ali leishimeira.” Chieina Jishuna ali hānga, “Nawui kaphaning chi mashunglaka.” 44Chiwui thili sha̱naovāk ngareivāda Simonli hānga, “Na sha̱naopava̱ hili theilā? Ina nashi shimli rāzanglaga nana iphei pheokhavai tara̱la mamimana kha sha̱naopava̱ hina awui chara̱ eina iphei ya̱ngasaklaga akuisam eina mitmi. 45Nana ili samkaphang shālamla masāmana, kha rākhaleodawui eina thuilaga ana ipheili khamaya̱ mathāhairangli. 46Nana ikuilila thao maneomimana, kha ana ipheili nganamkaphā thao neomi. 47Chiwui vang eina ina nali kahāngna, awui morei kachungkha khalei chi pheomihaira, kaja ana leishilak eina sāmi; kha teoda pheokhami mi china teomeida leishi.” 48#Mat 9.2; Mk 2.5; Lk 5.20. Sha̱naopava̱ chili hānga, “Nawui morei saikora pheomihaira.” 49Chieina ali phazā khangarumbingna athum khalatta, “Morei eina tangda pheomikashap hi khipākhala?” da ngazek ngaroka. 50#Mat 9.22; Mk 5.34; Lk 8.48. Chieina ana sha̱naopava̱li hānga, “Nawui shitkasangna nali huimihaira, chingri eina ungulu.”
Currently Selected:
LUKE 7: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
