LUKE 8

Jishuli Ngayurkazat Sha̱naobing

1 # Lk 4.15; Mk 15.40-41; Mat 27.55-56; Lk 23.49. Khaleilaga Jishuna Vare wungramwui paokaphā khuiphungda keinungbing kala kha̱bingli hāshokvai. Kala tharāda khani chi ali ngayurzata. 2Chipee zangkasā kala kazāt leikasāwui eina raimi kahai sha̱nao kaikhala ngayura. Kameo shini kashamshokmi kahaiva̱ Mary Magdalene, 3Herodwui lanse Chuzawui preiva̱ Joanna kala Susanna kala athum khalattawui lan khuishokta ngachonkhame sha̱nao kachungkhala ngayurzatsai.

Athā Khayaowui Chānjam

(Mat 13.1-9; Mat 4.1-9)

4 # Mat 13.1-9; Mk 4.1-9. Keinung kachiva̱wui eina rāmamānda mi kachungkha Jishuwuili rākakazip tharan ana chānjam akha hāngchithei: 5“Atha khayao mi akhana athā yaokhavai vai, kala ana yaozatlakha atha kaikha shongfali tātungda phei eina naikazama kala yongkazata vānaobingna ngamuizāhaowa. 6Kaikhana lungguitungli tāzanga; akhar kharshoklaga khanim maleithuda ngahuihaowa. 7Khangatei kaikha ka̱shāt ngachaili tāzangda ka̱shātli phorrumhaida shangthathaowa. 8#Mat 11.15. Kala athā kaikha ngalei katumli tāzanga; kala kharshokta shāshā mathei.” Ana hi hānglaga, “Shākhui khavai khanā kakaa china shākhuiranu” da panglāk eina vaowa.

Chānjambingwui Kharin

(Mat 13.10-17; Mk 4.10-12)

9 # Mat 13.10-13; Mk 4.10-12; Isa 6.9-10; Jer 5.21; Ezek 12.2. Awui sākhangatha̱bingna ali chānjam hiwui kakhalat khikhala da khangahān tharan, 10ana hānga, “Nathumli Vare wungramwui khangathuma tui chi theikhui khavai pangshap mihaira; kha khangateibingwui vanga chānjam thada lei. Chiwui vang eina athumna yanglala matheimara kala shālala bhap matāmara.”

Jishuna Athā Khayaowui Chānjam Meikakhai

(Mat 13.10-17; Mk 4.13-20)

11 # Mat 13.18-23; Mk 4.13-20. #1 Thes 2.13; 1 Pet 1.23. “Chānjam hi hithai; Athā chi Varewui tuina. 12Shongfali tākazangbing chi shākhui kahaibingna; kha athum tui chili mashitsang khavai kala kahui masamphang khavai chipee china rālaga athumwui eina tui chi khuithuihaowa. 13Ngalei tarākha makhalei lungguina pemting kahai apamli tākazang athābing chi tui chi kashā eina mathānthathup khuisanga; kha angayung maleithuda athumna kasha̱nakhawui vang shitsanglala kasui kharā tharan yāmhaowa. 14Ka̱shātwui ngachaili tākazangbing chiya shākhui kahaibingna kha athumna okthuivāmamān kaji eina okathuiwui lumlao, kashāngkharei kala hunkhawui vang ringkaphā mirin china shangthathaowa, kala atheila minkakhui mangavāmana. 15Ngalei katumpamli tākazangbing chiya tui chi shākhuilaga ningkathar kala kahāng khanganā wuklung eina singtitta khānglaga athei kachungkha khamatheibing chi kathāna.

Luk eina Khumkahai Thaomei

16 # Mk 4.21; Mat 5.15; Lk 11.33. “Mi khipānakha thaomei sharkāhailaga luk eina makhumhaimana, lah petzingkhurli mahaimana; kha rākazangbingna kahor chi theikhavai meishongli sharhai. 17#Mk 4.22-23; Mat 10.26-27; Lk 12.2-3; Eph 5.13. “Kaja maphongshokla thumhaoki kaji khikha maleimana, lah matheiki kaji kala kahorli makhuishokla kafakhamhaoki kaji khikha maleimana. 18#Mk 4.24-25; Mat 13.12; 25.29; Lk 19.26. “Chiwui vang eina nathum nganākhuikazaklu, khikhalajila khaleia chili chungmeida mira kala makhaleia chiwui eina ana lei da kaphaning chila khuithuihaora.”

Jishuwui Ava̱ kala Achinā Ngarā

(Mat 12.45-50; Mk 3.31-35)

19 # Mat 12.46-50; Mk 3.31-35. Chitharan ashava̱ eina achinā ngarāna awuili rai, kha mi chungnāhaida awuili mazangpaithuwa. 20Chieina kachikathāna ali ahānga, “Nashāva̱ eina nachinā ngarā nali samphangngai da kayāngli ngaraili.” 21#Lk 11.28; Joh 15.14. Chieina ana athumli ngahānkāda hānga, “Varewui tui nganāda chi kasā athum chi ishava̱ kala ichināngarāna.”

Siphan Zingrot Kakhām

(Mat 8.23-27; Mk 4.35-41)

22 # Mat 8.23-27; Mk 4.35-41; 6.47-52; Joh 6.16-21. Thangkha ana awui sākhangatha̱bingli marikhong akhali tongrumda athumli hānga, “Ithum ngayi vāklaida kāusa.” Chieina athum zathaowa, 23kala athumna zatmamānlakha Jishu pivāhaowa. Chitharan ngayi chili siphan zingrot panglāk eina ungrāsai kala athumwui marikhongli tara̱ ngaphaosangda athum ka̱lā shiki jihaowa. 24#Lk 5.5; 8.45; 9.33,49; 17.13. Chieina athumna ali vāmathotkhuilaga hānga, “Amei, Amei, ithum shimānki jiura.” Chieina ana ngakarthuida masi kala khangaphao chili ngasām khavai kakaso eina va̱rihaowa. 25Chiwui thili ana athumli hānga, “Nathumwui shitkasang kachili leikhala?” Chieina athumna matakhaknāhaida khangacheela ngacheenāhaida akha eina akha “Hi kachikathā mida, ana kakaso eina masinala, tara̱nala awui kahāng khanganākhala?” da ngazek ngaroka.

Raih Kazanga Mi Akhali Raikhami

(Mat 8.28-34; Mk 5.1-20)

26 # Mat 8.28-34; Mk 5.1-20. Chiwui thili athumna Galileeli kāroda khalei Gerasawui ngaleili vāshunga. 27Ana ngalei kathengli karkashok tharan raih kazanga mi akha keinung chiwui eina rāngaroka; atam kasāngkha kashankachon mangavaila kala shimlila mapamla chikhurpamli pamhairasai. 28#Mk 1.24; Joh 2.4.Ana Jishuli kathei eina vaolaga awui mangāchangli ngakhumshām eina panglāk eina hānga, “Reikhamataia Varewui Naomayara Jishu, nana ili khi sāki kajikhala? Ili marekharekmialu.” 29Kaja ana makathar manglā chili mipa chiwui eina shokhaolu da kasohairasai. (Kaja china tarākhashida ali singhaoda ali khamayon mila phāsanga, marikhānghui einala khalapa kala zurthing einala narhai, kha khalap kahai saikora nganurshatlaga kameo china ali lamhāngli kashamvāhaowa.) 30Jishuna ali, “Nawui ming khipā hokhala” da ngahāna. Chieina ana, “Ili Legion hoi” da ngahānkai; kaja kameo kachungkha ali zanghaowa. 31Kala kameobing china athumli kazeiramshong makashamvāmialu da poi. 32Chitharan kaphungpheili hok ashangva̱ akha phazāzatsai; chieina athumli hok ashangva̱ chili zang ngasakmi khavai poi. Kapo chi mayāmihaowa. 33Chiwui vang kameobing china mipāwui eina shoklaga hok ashangva̱ chili vāzanghaoda hokbing china amai tarenli yongkachup tāda ngayili hikthatserhaowa.

34Hok kahombing china shokkahai chi theilaga ngasamungda keinunglila, kha̱lila unghāngchithei. 35Chieina mibing china khi shokhaokhala da ayang khavai vai kala athumna Jishuwuili vākashung eina kameo shokkahai mipa chi kashankachon ngavailaga ning mathingrik eina awui ngalemli pamkasa theida athum ngacheelakhaowa. 36Otshot chi kathei mibingna chili kharā athumli kathada kameo kazangpā chili raimihaokhala da hāngchithei. 37Chieina Gerasa ngaleiwui kuikhamareili kapāna mibing saikorana ali athumwui eina thuimihaolu da poi; kaja athum ngacheenāhaowa. Chieina ana marikhong tongkhuiphungda latunghaowa. 38Kameo zangkasa mipa china ali shurkhavai poi. 39Kha Jishuna ali “Nashi shimli latungulu kala Varena nali kayākha samihaira̱khala kaji unghāngchitheilu.” da hānglaga chihohaowa. Chieina mipa china Jishuna awui vang kayākha sāmihairakhala kaji keinung katonga chili unghānga.

Jairuswui Naongalāva̱ kala Jishuwui Chontheira̱li Sākaza̱ Sha̱nao

(Mat 9.18-26; Mk 5.21-43)

40 # Mat 9.18-26; Mk 5.21-43. Chiwui thili Jishuna latkhaung tharan mi kachungkhana ali mathānthathup rāngaroka, kaja athum saikorana ali honpamda leisai. 41Chitharan Jairus kaho Synagoguewui akhavā akha apam chili rai, kala Jishuwui pheizingli ngakhumzangda ashi shimli kharāmi khavai poi. 42Kaja awui naongalāva̱ akhamāng kaje kum tharāda khani sha̱kha rarkahaiva̱ chi kazāda thinanai leisai.

Ana zatmamānlakha mi kachungkhana ali puiruida ngaheizanga. 43Chitharan zingkum tharāda khani ashee ngaya̱haida khipānakha maraimikharar sha̱nao akha, 44khanukli rāda awui chontheira̱li rāsaza̱ya; kala ngalāngda awui ashee khangaya̱ chi raihaowa. 45#Lk 8.24.Chieina Jishuna ngahāna, “Ili rāsākaza̱ chi khipākhala?” Saikorana I maningmana jiser kahai eina Peterna hānga, “Amei, nali mi kachungkhana puiruikhamda ngaheikazamda leili!” 46#Lk 5.17; 6.19.Kha Jishuna hānga, “Kachikathāna ili saza̱haira, kaja ina iwui pangshap shokkahai thei.” 47Chieina sha̱nao china mangathumpaimara da kathei tharan kathirriri rāda amangāli ngakhumzangda yarui saikorawui mangāli ana khiwui vang eina saza̱haokhala kala kathada ngalāngda raihaokhala kaji phongshar eina hāngphata. 48#Mat 9.22; Lk 7.50; 17.19; 18.42. Chieina Jishuna ali hānga, “Inao ngalāva̱, nawui shitkasang china nali raingasakhaira. Chingri eina ungulu.”

49Ana matuimahungda leilakha, khamungawui shim eina kharā mi akhana rāhānga, “Nanao ngalāva̱ thihaira, Ojālila masheikhautluialu”. 50Kha Jishuna chi kashā eina ali hānga, “Mangacheealu. Thada shitsangmalu, chithākha a ringra.” 51Ana shim chili vākashung eina Peter, John, James kala nao chiwui ava̱ avā maningla mi khipālikha shimlungli ali ngasoda mazang ngasakmana. 52Mi saikorana kathiwui vang khanangda chapngachālaga leisai; chieina Jishuna hānga, “Machapalu, kaja a thikahai maningmana kha pida khaleina.” 53Athumna ngalāva̱ chi thihaira kaji theihaoda ali mana̱shi. 54Kha ana awui pāng singkhuida hānga, “Inao ngalāva̱, ngakarthuilu.” 55Chieina ringuda heng sāda ngakarthui kala ali kashakazā mizā khavai kasoi. 56#Mat 8.4; Mk 3.12; 7.36; Lk 9.21. Ava̱ eina avāva̱la matakhakhaowa kha Jishuna shokkahai chi khipālikha mahanglakalu da kasoi.

Currently Selected:

LUKE 8: TANGBSI

Highlight

Copy