LUKE 12
12
Küthse Küsari vünüh Zhüzhü üta Küüza
(Mat 10.26-27)
1 #
Mat 16.6; Mrk 8.15. Jütiküsavü anyi riekhuowa anyi nyienyie sehzhu taji küzhile kenüh mari küsü nüh küsü ajih nyi taji kütsevü ma nüh ma sehnyiri vü, “Nohri Farisiri ahzhi vünüh azhüzhüluo, jümatü küthse wie,” ti ma sehnyiri vü küütü vünüh küza. 2#Mrk 4.22; Luk 8.17. Müküüthsü nta sate küsa zanyo küsü nga münyie, nyutü müküüthsü nta küthi küsa zanyoküsü nga münyie. 3Jükenüh nohri nüh momowa aküzo vünüh phrateveh nüh aküwie vü künakera wie naveh, thi nohri nüh küüzhezhü azhe lovü nüh momowa jüle naveh nüh azhe rügivünüh zia küza wie naveh.
Thawa Kükrüle ünü
(Mat 10.28-31)
4Eh füri hi nüh nohri vü küza naveh, nohri satsa zothe müwie ketünga jüma nyia vünü zanyo küsü nga müküsarari mükrütümü. 5Thitü thawa kükrüle nüh hi nüh nohri vü küza naveh, thawa nüh nohri zothemü taji viwa nyihsuozü vü küthsera kükhra peveh nüh jüma krü luo.
6Kakhrü münga tü pesa künyi vünüh zhumüveh ülo? Thitü jütawie ketünga Saküüwuowa atüvü nü küsünga müküma. 7Mokenüh lo tathuoüji, nohri lüshe aveh nga chie mütüthuoh. Mükrütümü, nohri tü kakhrü hozake nyia vünüh amehzhiveh.
Nyiri tüvü Khrista Küphrazhu Müzükrütümü
(Mat 10.19-20,32-33; 12.32)
8Thi hi nüh nohri vü küza naveh, thari nüh nyiri tüvü anyi Tsawa küza küthsü naveh nüh, anyi Tsawa nga rügizhüleri Saküüwuowa tüvü küza küüthsü Naveh. 9Thi thawa nüh hi kule naveh nüh hi nga rügizhüleri Saküüwuowa tüvü kule naveh.
10 #
Mat 12.32; Mrk 3.29. Thi thari nüh anyi Tsawa vü azhü kümüsü küsü nga phra naveh nüh nojatsü naveh, thitü thari nüh Kümtse sietse phrakümüsü naveh nüh nojamütsüra.
11 #
Mat 10.19,20; Mrk 13.11; Luk 21.14,15. Thi mari nüh sie künazizhe tüvü thi küjira tüvü thi kükhraküvira tüvü küruvü mokümjie nyutü mowa phrate nave nüh ti nohri luoveh mütsazatümü. 12Küpakenühnyunü no mowa küüzale nüh jüma tsotho vünüh Kümtse Sietse nüh nohri sosie tsü naveh, ti küza.
Künyirhie Zanyomükümüshethsüwa vi Küüzhühie
13Jütiküsavü anyi riekhuo zhie vü nyi küsü nüh, “Küsosiewa, eh jie vü hi sie azhezhu küsuo üti küzajie,” ti küza.
14Thitü ma nüh ma vü, “Anyiwa, hi tü thawa nü nohri zanyoküüsuo zhüthuo nyutü küsuotsü üti satsü lo?” ti küza. 15Thinü ma nüh mari vü, “Azhüzhü luo, thi zanyokümüngu aveh vünüh kiethuoh luo, küpakenühnyunü nyiri kürho azhütsawa tü künyirhie küzhi vünüh rhomüküveh kenüh,” ti küza.
16Jüti sataji ma nüh mari vü küüzhühiezhü küza nü, nyirhieri küsü ma zhuh vü luoshü mühie sheh; 17jütiküsavü ma mpa müshe taji, “Moti sanathuoh lo? hi tü eh tsuo vi küthsepe müluo thuohnü? 18Thinü ma mpa ma jüle taji, hi nüh hati sanaveh, e luowatü phrümü nü saküji naveh thi eh tsuo thi eh zanyo aveh jülovü thse naveh,” ti küza. 19Tinü hi nüh hi mpa eh kürho vü, eh kürho, mahvi küthake kenüh noh tü zanyo aküji hozake sasavehthuoh lo, kürüzih ti pe luo, tsaluo, zhu luo, thi loküzhe saluo. 20Thitü Saküüwuowa nüh ma vü, “Noh zanyo mükümüshewa, sütavü no vünüh no kürhowa vitewa nathuoh, tinü no nüh zanyo küche küsari thawa azhi sanathuoh lo?” ti küza.
21Thari nüh ma kenüh mpa künyirhie vizhuh nü Saküüwuowa vü münyirhie nüh sanaveh nüh jükümjie sawie naveh, ti küza.
Saküüwuowa Kütsotü
(Mat 6.25-34)
22Jütisanü Jisu nüh ma sehnyiri vü, jükenüh hi nüh nohri vü küza naveh, nohri kürho kenüh nohri luoveh mütsazatümü, mowa tsanaveh lo? Nyutü no satsa kenüh mowa vi navehlo? ti müshe mütse tümü. 23Küpakenühnyunü kürholi tü ashie nyia vünüh jiküveh kenüh, thi asatsa tü thsümünyi nyia vünüh ji küvehkenüh. 24Awuori kürho müshe nono, mari tü amahtsü nga müzhuh thi küma wienga mümawie, mari tü vizhuh küsape nyutü aluo nga münyie, thitü Saküüwuowa mpa nüh mari avo saküveh wie. Jükenüh nohri tü amüwa nyia vünüh ame küzake pevehlo? 25Thi thawa nüh jümari kenüh luoveh kütsaza vünüh makürho kha küsü saküsuora navehlo? 26Nohri tü zanyo kütazü jüwie nga müsara, nohri tü mokenüh zanyo küpari kenüh tsaza veh lo? 27#1 Kaj 10.4-7; 2 Kkz 9.3-6.Sanü küwuri kürho müshe nonoluo, mari tü mokümjie shoveh lo? Mari tü küüroküli nyutü siehtürüh nga müsa; thitü hi nüh nohri vü küza naveh, Solomon wienga ma tsokrü mühie she wie ketünga küwu jümari kümüjie vi ma satsa müküteh. 28Thitü apra nosü azhuh vü shoketünga thuohtü nü viwa anyithü lovü kütsori nga Saküüwuowa nüh saküzüvehüji, halie, kütsotü küzülari, küzakele ma tü nohri küüteh sa tsü naveh lo?
29Jükenüh nohri nü mowa tsanaveh lo? Nyutü zhu na lo ti sanü mphatümü, nyutü nohri luoveh kütsaza samütsetümü. 30Küpakenühnyunü azhih hala akuoh aveh zanyo hari phakütsewie, thitü nohri Pa nüh nohri nüh müviji mükümühie aveh thsüveh. 31Jütanyunü jüma mütho vünüh ma kajipe phah luo, jütathuoüji zanyo hamari aveh no zhi sara naveh.
Rügivü Künyirhieri
(Mat 6.19-21)
32“Mükrütümü, refü küzülari, küpakenühnyunü kajipe vi nohri tsü na küsa nohri Pa kümüshe küsa thuohkenüh. 33Nohri zhiri zhu nü nyuri noküümze kütsü samü luo, nohri kürho vi rakaku kürütso lovü müthsetümü, nokünyirhie rügivü müküsazipe vü saluo, jüla thuoüji kürühuri nga mpakera thi amükhra nga nüh mütsara. 34Küpakenühnyunü no künyirhie khiela peveh nüh nomüshe nga jüla peh naveh.
Huoküpehuo Sieperi
35 #
Mat 25.1-13. “Nohri küshi tseke pewie luo, thi nohri nyihku nga küüjupehuo luo. 36#Mrk 13.34-36. Thi sieperi nüh mari vüwa kümünyute kütsazhu vünüh shele küru huo nü ma ru taji amükhie kütü thuoüji shita sakütsü kümüjie sa pehla luo. 37Siepe thari nüh ma vüwa küru huopela nü mütu naveh nüh kümüngatsahri, hi nüh nohri vü küzato naveh, ma nüh ma mpa ma küshi tseke taji mari küshupe nü küütsazhu naveh, thi ma nüh ru nü mari avo sanaveh. 38Mükütüküzü ma tü riehuo kümüzhi künyiawa nyutü kücheawa vü ru thuoüji jüüta sapelanü ngu thuoüji mari kümüngatsahri. 39#Mat 24.43,44.Thitü hama thsüluo, kürühuri küsie ru naveh nüh taküsa azhe avüwa nüh küthsü tüla ma tü ma zhe ja sataji fekhuo küütuwanyu nü. 40Nohri nga küchempelaji mümühie, küpakenühnyunü anyi tsawa tü mükümüshe vünüh ru na saküveh kenüh,” ti küza.
Künyitsa thi Mükünyitsa Siepe
(Mat 24.45-51)
41Thinü Pitor nüh, “Vüwa, noh nüh küüzhühie zhüküüza hamatü hiri kenüh mpa ünü aveh kenüh lo?” ti küna.
42Jüti küünavü Vüwa nüh, “Thinü thawa nüh künyitsa siepe thi aro mühiewa sanü ma vüwa nüh mavi azhe lovü küji küüsanü tsothovü khem ti ashie vimari tsü üta sana lo?. 43Ma vüwa küruvü jü kümüjie salanü küngura siepewa tü kümüngatsawa. 44Hi nüh nohri vü küza toke naveh, ma nüh anyi jüma vi ma zanyo aveh nyia vü küjiwa küüsanaveh,” ti küza. 45Thitü siepe jüma tü ma mpa ma müshe vünüh, “Eh vüwa münü ru naveh ti sanü siepe nyimpari nga nyimzari nga fe thi tsazhu nü müshe küvehvü, 46siepe jüma vüwa tü ma nüh müshepemüküveh rülo vü thi ma müthsü nüh peküveh tsotho vü ru nü ma tethuohnya taji ma vi mükünyitsari refü vü thsemü naveh.
47“Thi siepe ma vüwa müshe thsü tü müküche nüh pehthi ma kümüshe kümüjie müsa ti küsawa küüzhi fenaveh. 48Thitü müthsü nüh küro taji küfeleh künguri thuoüji fe züla naveh, thi aküzhi kütsüri vünüh münguzhiji mümühie, nyi küsüküsü nga nyuri nüh zanyo zhitsü thuoüji, jümari vünüh zhikhuo wie naveh.
Jisu thuoüji Nyiri Saküüporiewa
(Mat 10.34-36)
49“Hi tü azhih hala anyih thsetsü nti ru, thi khinyi küjuzhunüh hi küülo naveh! 50#Mrk 10.38.Thitü hi tü baptis sana küsa Baptaizm küsü peveh, thi jüma müjie küju nü luoveh tsaza peveh. 51Nohri tü hi nüh azazhüküka vi azhih hala tsü nti küsakenüh ru ti müshe veh lo? Nyu, kürüküka vimütse nü saküüporie vitse. 52Küpakenühnyunü nosü nüh tuvü azhe küsü vü nyimünga küpe küsuomünathuoh, nyi küche nüh nyi künyimünongü nüh sa, thi nyi künyi nüh nyi küchemünongü nüh sanaveh. 53#Mik 7.6.Mari mpa mari azhie vünüh küsuo münaveh: pawa nüh tsawa münongü nüh sa, thi tsawa nüh pawa münongü nüh sa, zawa nüh tsavühwa münongü nüh sa, thi atsavühwa nüh azawa münongü nüh sa, anyiwa nüh ajünyiwa münongünüh sa, thi ajünyiwa nüh anyiwa münongü nüh sanaveh,” ti küza.
Atsole Kümüsümühie Küthsüra
(Mat 16.2-3)
54Ma nüh anyi riekhuowa vü küüzalehü, “Nohri nüh rünyi kütupe vü peh nü külu küpe ngu thuoüji atsorü nathuoh ta sasati, thi müzhütsanüh rütsatsa ti. 55Thi azhieseh vünüh amürhü mürhü küru ngu thuoüji nohri tü rünyi sa she naveh ta sasati, thi müzhütsah nüh mürhü tsatsahti. 56Nohri küthseküsari, nohri azhih thi thajüwu atsowa mokümjie ünüh phratetsüra veh üji nohri mokenüh khinyi tsothowa küzamütsüra lo?
Noh Mükünongüwa Siekümühielera
(Mat 5.25-26)
57“Nohri tü mokenüh nohri mpa khiemawa nüh katoveh ünüh mürüka thsü ülo? 58Thi noh nüh no mükünongüwa sie ashiküsawa atüvüküwavü küsarakümühie lekhuji vünüh no kükhra thsenü ma sie tsarümüluo, jütanyuthuoüji ma nüh no sho ashiküsawa vü sietewa naveh, thi ashiküsawa nüh no vi anyiküreri ake vü thsemü nü nyiküreri nüh no viküsizhe lovü thsemü naveh. 59Hi nüh küza naveh, noh nüh ame müküthuoh asevü nojüla nüh müshura,” ti küza.
Currently Selected:
LUKE 12: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
