LUKE 11

Jisu nüh Kükhuo Ro vi Küüza

(Mat 6.9-13; 7.7-11)

1Jüsevü ma tü wa taji azhie küsü vünüh kükhuo sanü khuotuo taji peveh ünü ma sehnyiri küsü ma vü runü, “Vüwa, Johan nüh ma sehnyiri kükhuo ro küsosie kümüjie hiri nga sosie jie,” ti khuo.

2Thinü ma nüh mari vü, nohri kükhuo küsavü hakümjie khuo luo,

rügivü küpewa eh Pa,

Noh kümtse nyowa tü küüsiakeluo; noh kükajiwa küüru luo;

azhih ha nga vi thajüwu vü kümüjie noh müshe saluo.

3Nosü nüh nosü vo vi hiri tsüluo.

4Hiri kükhiemuo nojatsüluo,

küpakenühnyunü hiri nga nyuri nüh hiri vü müküleküsari nojatsü küveh kenüh.

Thi hiri vi kümüramizhi lovü müküle küsari nojatsüküveh kenüh.

Thi hiri vi kümüramizhi lovü müthsetümü,

thitü kümüsüwa vünüh hiri külole luo.

Küpakenühnyunü kajipewa thi kükhra thi kütholathovü watü küsuokürho no zhi wiethuoh, Amen.

5Thinü ma nüh mari vü, nohri thawa nüh afü peveh nüh arüza vü wa taji, “Eh füwa, alohse küche hi küünajie, 6küpakenühnyunü eh fü küsü küze wa taji khintü nüh ru peküveh kenüh, thi hi tü zanyoküsü nga vi ma küütsa mükünyie kenüh,” ti küza. 7Thinü ma nüh azhe lovü nüh, “Hi samüküüjakünya tümü, azhe nga khemüthuoh thi eh tsari nga hi sie zetewakhethuoh, hi tü süra nü zanyo küsü nga vi nomütsürathuoh,” ti küza. 8Hi nüh nohri vü küza naveh, anyi jümatü no füsakümü kenüh ma süra zanyo vi no mütsürawie ketünga noh nüh müzükrü nüh khuopehuo küveh kenüh süra nü noh nüh kükhuowa vi tsü naveh.

9Jükenüh hi nüh nohri vü küza naveh, khuo luo, jütathuoüji vi nohri tsü naveh, phah luo, jütathuoüji nguranaveh, kütüluo, jütathuoüji sa nohri tsü naveh. 10Küpakenühnyunü thari nüh khuo naveh nüh tsü küvehkenüh, thi thari nüh phaveh nüh ngu küveh kenüh, thi thari nüh kütüveh nüh küütüri vü satsü küveh kenüh. 11Apa thawa nüh ma tsanüh anga khuo thuoüji amüre tsüveh lo? 12Nyutü wirüji khuothuoüji shumathu tsüveh lo? 13Jükümjie nohri kümüsüri nga zanyo kümühie vi noh tsari kütsü thsüveh üji rügivü küpe Pawa thuoüji thari nüh ma vü khuonaveh nüh Kümtse Sietse jüma nyiavünüh küzakele nga tsü naveh lo!

Jisu thi Beelzebul

(Mat 12.22-30; Mrk 3.20-27)

14Jüsevü Jisu nüh mükümtse sietse kenüh azhümüküphrawa vünüh mükümtse sietsewa zhezhujamü tü, thinü anyi jüma tü azhü phrara, jüti küsavü nyiri tü ngotewa. 15Thitü mari wuori nüh, “Ma nüh sietse kümüsü zheküveh hatü kümüsü sietse nyia kajiwa Beelzebul kükhra vünüh zheja veh,” ti küza.

16 # Mat 12.38; 16.1; Mrk 8.11. Thi wuori nüh ma müte taji, rügi vünüh thsoshi sakütsa üti khuo. 17Thitü ma nüh mari müshe thsü taji mari vü, “Kaji küsüküsü nga mari mpa mari azhie vünüh küsuomüthuoüji kaji jüma tü mütsierathuoh, thi tsapatharuo azhievü küsuo müthuoüji azhe jüma tü mütsierawiethuoh. 18Thi Tsuore#11.18 Tsuore: Tsuore thuoüji English vünüh küpapa küji Devil, Demon, Satan ta küjijira kümühie Vüwa mükünongü sanü ma siesaluokütse sietse kümsüwa küzaveh. wie nga mari azhie vünüh mükünongüluo pemüthuoüji mokümjie ma kajipe tü tsiera naveh lo? Küpakenühnyunü nohri nüh hi tü Beelzebul kükhra vünüh mükümtse sietse zheveh ta küsa kenüh. 19Thinü hi tü Beelzebul kükhra vünüh sietse kümüsü zhejaveh üji nohri tsari nü mowa nüh zheja veh lo? Jükenüh mari nüh nohri küüna naveh. 20Thitü hi nüh jüma tü Saküüwuowa kükhra nüh zhejaveh üji Saküüwuowa kajipe nohri vü rupevehthuoh.

21“Anyi kükhrari küsü nüh riesarie vüju taji ma zhehuope thuoüji ma tsokrü küzoriewa nyu. 22Thitü ma nyia vünüh kükhra nyi küsü ru ma sie saluonü chatera thuoüji ma nüh ma riesarie ma nüh tsotü küvehri aveh vitewa thi ma zhiri nga vite wawati.

23 # Mrk 9.40. “Nyi küsüküsü nga hi wuo vü mükünyuri nü hi mükünongüri wiethuoh, thi thari nüh hi mükükra nüh sanü hi sie zanyo vizhuhmütse nüh ma thuoüji zorietsetsah veh,” ti küza.

Mükümtse Sietse Sheleküru

(Mat 12.43-45)

24Mükümtse sietse nyi küsü vünüh shutewa thuoüji azhih küüweri vü kümünyiepe phatsetse ti, thi mphara thuoüji, “Hi nüh azhe khiela nüh teru nüh jüla shele tewa naveh,” ti sasati. 25Thi ma nüh küru vü rhükümtse taji zanyo satheküjike nü küsala ngungu ti. 26Jütisanü ma tü mampa mükünyu küpari türü nga sieru taji jüla petewawati, thi nyi jüma kürho tü khananyia vünüh kümüsütsa samümü ti, ti küza.

Kümünga Tsahri

27Ma zhü hama küzajumü ünü anyi riekhuo aza vünüh nyimzari küsü süra nü azhü zia taji ma vü, “Nyimzavüh no küwuowa thi no küünüwa thuoüji kümüngatsahwa,” ti küza.

28Thitü ma nüh, “Jüta nyunü thari nüh Saküüwuowa zhü küna nü ma luoveh lovü sa veh nüh kümüngatsah ri,” ti küza.

Thsoshi Küsü Kükhuo

(Mat 12.28-42)

29 # Mat 16.4; Mrk 8.12. Anyi riekhuowa küzhiküzhi ru ünü ma nüh, “Khinyi kürho hamari tü mükümühie kürho küsü, mari tü thsoshi phamü, thitü Jona thsoshi asevü thsoshi küsü nga kütsülewa nyuthuoh,” ti küza. 30#Jon 3.4.Jona nüh Ninevehri vü thsoshi sa, thi anyi Tsawa nüh khinyikürho hamari vü thsoshi sanaveh. 31#1 Kaj 10.1-10; 2 Kkz 9.1-12.Shiküsa rülovü Zhieseh vü kajivühwa nüh süra nü khinyi kürho anyi hamari sie tsie nü mari müshemüsünaveh, küpakenühnyunü ma tü azhih küpote vünüh ru Solomon küthsü küüna kenüh, thi halie, Solomon nyia vünüh küji tsahwa hala pevehthuoh. 32#Jon 3.5.Shih küsa rülo vü Ninevehri nga süra taji khinyi anyi hamari müshemüsü naveh; küpakenühnyunü Jona nüh küsosie vünüh mari luoveh kükhaphrü kenüh, thi halie, Jona nyia vünüh küji tsahwa küsü hala pevehthuoh.

Satsa vü Küwiewa

(Mat 5.15—6.22-23)

33 # Mat 5.15; Mrk 4.21; Luk 8.16. “Nyi küsü nga anyih tso taji vi azekhu lovü müthse, thitü alati rügi vü sa veh, jütathuoüji azhe lovüküturi aveh küwie jüma ngu naveh. 34Noh notha tü no satsa vü küwiewa wiethuoh, no notha mühiepe thuoüji no satsa aveh tü wie pepeti, thitü no notha tü mümühie thuoüji no satsa tü zomthsüthsü nü samünathuoh. 35Jükenüh no vü küwiewa müküüzo nüh sana küsakenüh azhüzhüluo. 36Thi mükütüküzü no satsa aveh vü mahnyo küsü vünga küzo münyie nüh wie khehmü thuoüji anyih küwierühlewa nüh no vü küwie kütsü kümüjie satsa aveh küwie mpathuoh,” ti küza.

Jisu nüh Farisiri thi Khonyo Küsosieri Küüjo

(Mat 23.1-36; Mrk 12.38-40)

37Thinü ma azhü phra peveh ünü Farisiri küsü tü ru mazhe vünüh ashie tsa üti ma ji nü ma tü wa taji shiekütsape vü shupe. 38Thinü shiemüjie kütsa tüvü ma tü ake mümütso nüh küsa kenüh Farisi wa tü ma ngu nü ngo she. 39Jütiküsavü Vüwa nüh ma vü, nohri Farisiri thuoüji ahuokhu alievü thuoüji khrüveh, thitü alovü thuoüji nohri tü küzorie thi kümüsü mpawie. 40Nohri küzheri, alievü thawa nüh sanüh alovü nga jüma nüh müsa ülo? 41Thitü no khu lori vü thi no huo lori vü mowa peveh nüh vinyuri küümze satsümü luo, jütathuoüji halie, nohkeri nüh zanyo veh mütsemünathuoh.

42 # Lev 27.30. Thitü kümüzüwa nohri Farisiri vü waluo, küpakenühnyunü nohri tü are arheküünguri thi athso arheküünguri thi wihrüza müküzüküzü küüsuo türake sanü küüsuo küsü viru thseveh, thitü rhokükato thi Saküüwuowa küümzewa kule tsetseti, tü nohri tü hama ringa küsale thi küparinga küsa le.

43Kümüzüwa nohri Farisiri vü waluo, küpakenühnyunü nohri tü künazizhe vü ape kümühieri vü küpe thi asüküsaperi vü nyuri nüh nohri küsiakezhü kütsü lotsetseti küsa kenüh. 44Kümüzüwa nohri vü waluo, küpakenühnyunü nohri tünyiri nüh arüku müngu nüh ma nyia vü tse küwa kümüjie wiethuoh.

45Khonyo küsosieri küsü nüh ma vü, “Küsosiewa, noh nüh ha küüza vünüh hiri aveh luoveh sakümüsü müthuoh,” ti rületsü.

46Thinü ma nüh, “Kümüzüwa nohri Khonyo küsosieri vü nga waluo, küpakenühnyunü nohri nyuri akhuo nü saküzhotsüraveh, thitü nohri thuoüji noh tüjüri wie nga viwa akhuo jümari müshike. 47Nohri vü kümüzüwa waluo, küpakenühnyunü khanavü nohri pari nüh fethekümü setsaküthsüra rüku nohri nüh loju küveh kenüh. 48Jükenüh nohri tü nohri pari povü sa thi mari küürorimühiemü ta azhü nyi tsükütse kenüh, küpakenühnyunü mari nüh mari fethemü, thi nohri nüh mari rüku loju küveh kenüh. 49Jükenüh Saküüwuowa küthsü nga nüh küüza,” hi nüh setsaküthsüri thi zhüleri küze naveh, jümari azhievü wuori thuoüji mari nüh fethe thi kümnomnatsü naveh, ti küza. 50Thi azhih küsate vünüh setsaküthsüri aveh azüh küthü küsa khinyi kürho hamari vünüh amüthoh sanaveh. 51#Atü 4.8; 2 Kkz 24.20,21.Abel azüh vünüh Zekharia züh küju kükhurüpe thi Kümtse Zhia masü azhie vünüh zothe kümü kenüh. Ah, hi nüh küzawie naveh, mari züh tü khinyi kürho hamari vünüh amüthoh sa wie naveh.

52Kümüzüwa Khonyo küsosieri vü waluo, küpakenühnyunü nohri nüh küthsüwa kükhetevüh vitewa kenüh, nohri mpa wie nga mütu, thi nyuri tu na küsari nga kükhete kenüh.

53Jüti sataji ma tü jüla nüh tsezhutewa ünü, Khonyo küsosieri thi Farisiri tü wurie ma küchü thi ma rüsaküshu taji azhü hozake saküüphra. 54Rie taji ma vü küza thi azhü mükünyu phrana ünü nyunüh ti sanü ma re nti phah.

Currently Selected:

LUKE 11: POCHBSI

Highlight

Copy