LUKE 16
16
Mükünyitsa Künyirhiekühuowa
1Jisu nüh ma sehnyiri vü, nyirhieri küsü tü ma künyirhieri huo na küsa kenüh siepe küsü sa. Thinü ma nüh künyirhie ma zhi aveh zorie vehthuoh ta nyuri nüh ru nyirhiewa vü küza. 2Thinü ma nüh ru ma siepewa ji taji nü, noh khuke phrateru ehkhüna vü tumüthuohnü moti samü lo. Noh nüh kürokütseri kürüh taji hi tsümü luo, küpakenühnyunü nohtü eh zanyo kühuowa nosü vünüh tuvü thuoüji müküsanüh sanaküvehthuoh kenüh. 3Thinü ma zanyo kühuowa nüh ma mpa ma jüle taji, “Eh vüwa nüh hi tü ma zanyo kühuo küüro vünüh hi jamüna sathuohnü, hi tü azhih chü nta wie ketünga kükhramünyie, thi hi tü khrütsa nti ünü zükrü, ti sa. 4Hi nüh mota saji mühie naveh nüh hi nüh thsüvehthuoh! Eh küüro hama jamü thuoüji thari nüh mari azhe vü hi siekeranaveh nüh jümari vü afü sanaveh,” ti sa.
5Jüti satajinü ma nüh ma vüwa ashewi vü küvehri küsüsü nüh jiru taji apowa vü, “Noh tü eh vüwa shewiküzake vüveh lo?” ti küna. 6Thinü ma nüh, “Avüju ku müzake,” ti küza. Thinü ma nüh jüma vü, “Shupe nü no lasi vi taji shiti tünyieke ti rhü luo,” ti küza. 7Jütisanü ma nüh küpawa vü, “Noh nü küzake vü vehlo?” ti küna, thinü ma nüh, “Ahie küüto awe müzakevüveh,” ti küza. Thinü ma nüh ma vü, “No lasi vi nüzerake rhü luo,” ti küza.
8“Thinü siepe mükünyitsawa vüwa nüh ma ro thsü taji küsa kenüh ma siake, küpakenühnyunü azhih hama tsari tü mari tsothori vü aro thsü taji küüto tü aküwiewa tsari nyia vünüh mühie kümü kenüh,” ti küza.
9Jisu nüh küzalehü taji, “Hi nüh nohri vü küza naveh, nohri mpa nüh azhih vü künyirhie sie afü saluo, jütathuoüji jüma münyie nüh sakümüvü rhoküpehuo azhe vü nohri sieke nathuoh. 10Thari nüh zanyo küzah vü nyitsa raveh nüh aküji vü nga nyitsara naveh, thi thari nüh zanyo küzah vü münyitsa nüh küji vü nga münyitsara. 11Jükenüh noh nüh mükünyitsa künyirhie vü müzhütsa thuoüji thawa nüh küzhütsa künyirhie vü no tsotü navehlo? 12Thi nyuri azhi vü nga no mütsotüra thuoüji thawa nüh zanyovi nohri ake vü thse taji vi no zhi küüsa naveh lo?
13 #
Mat 6.24. “Siepe küsü mürhü nü küpawa kümüzemü naveh, nyutü nyi küsü vü akürho tsü nü küpawa vü kulemü naveh. Noh tü Saküüwuowa thi künyirhie masü siepe müsarhiera,” ti küza.
Jisu nüh Küüzazhü Wuori
(Mat 11.12-13; 5.31-32; Mrk 10.11-12)
14Farisiri künyirhie kümünguri nüh hari thsü taji azhükümüsü phra nü ma riesa. 15Thitü ma nüh mari vü, “Nohri thuoüji anyiri atüvü nohri mpa müshokütse wiethuoh, thitü Saküüwuowa nüh noh ri luoveh thsü veh, küpakenühnyunü nyiri azhie vü müsiekütsewa tü Saküüwuowa atüvü nü akükre kenüh,” ti küza.
16 #
Mat 11.12,13. Johan müjie küru küju nü Khonyowa thi setsaküthsüritü peh ru, jüsevü nüh khinyi küju Saküüwuowa kükaji Zhühthe Kümühiewa phrate tse, thi nyiküsüküsü nga wurie jülovü tuveh. 17#Mat 5.18. Thitü Khonyo vü rhüküsa kütüke küsü kümiena küsanü thajüwu thi azhih küümie nüh küürüzikhe.
18 #
Mat 5.32; 1 Kor 7.10,11. Thari nüh ma vüvüh jamü nü küpa vi le veh nüh küüphroküphrie satsevehthuoh, thi thari nüh nyuri nüh jaküsa nyimzari vi naveh nüh küüphroküphrie sa vehthuoh.
Nyirhiewa thi Lazar
19Nyirhieri küsü athsü akümo#16.19 Akümo: Samwa nyutü anyiri kürholi teküwa sevü asatsa mpa küpeh. thi alo külozü nüh küto thse nü rülotsotho lora nü kürhori peh. 20Thi anyo Lazar ti küsa khrükütsari akhüma mpa küprori küsü wa ma kheri vü peveh ünü, 21nyirhiewa nüh ashietsaküütsuotsari nga khuotsangü nü peh, thi ashuri nga wa nü ma khüma thsopori müzhipe.
22Jütiküsavü khrükütsawa tü sümü, thi rügizhüleri nüh ma viwa Abraham küso rügivü samü, thi nyirhiewa sümü nü viwa chowumü. 23Thinü ma tü wa nü nyihsuozü vünüh münomüna she taji toke nü no küze ünü Abraham thi Lazar ma küsorügivü küpe leküsuo vünüh ngukera. 24Jütiküsavü ma tü zia taji, “Eh pa Abraham, no hi kümüze nü Lazar küze taji ma tüjü viwa aju lovü tehke nü viru eh mizhi saküüji tsü jie, küpakenühnyunü hi tü anyihzhu hala nüh münomüna shepevehthuohnü,” ti küza.
25Thitü Abraham nüh ma vü, “Eh tsa, noh tü müsheluo, notü no kürho vü zanyo kümühieri ngumüthuoh, thi lazar nga jükümjie zanyo kümüsüri ngumüthuoh, thitü khinyi thuoüji ma nü lora vehthuoh, thi no thuoüji münomünavehthuoh,” ti küza. 26Jümpa mükünyu hiri azhievü akhithuoh küji küsüpemüthuoh, hawuovü nüh jüwuovü wa na küsa nga müsara thi jüwuovü nüh hiri wuovü ru na küsa nga nyi küsünga müsarathuoh. 27Thinü ma nüh, “Eh pa Abraham hi nüh no vü khuoveh, thinü ma eh pa zhe vü küze luo,” ti küza, 28küpakenühnyunü hi tü eh nüri nyi münga peveh, mari nga kümnomnape hala teru nga müthsü tinü ma küze taji mari vü küüza luo, ti khuo.
29Thitü Abraham nüh, “Mosa thi setsaküthsüri mari siepeveh, mari mpa jümari vünüh küünamü luo,” ti küza. 30Thinü ma nüh, “Nyu, eh pa Abraham, wuori aküsü vünüh mari vü wa thuoüji mari luoveh khaphrütüra naveh,” ti küza. 31Thitü ma nüh ma vü, “Mari tü Mosa thi setsaküthsürazhü nga müküna thuoüji nyi küsü nüh aküsü vünüh rhosürawie ketünga mari samüküütsotüra,” ti rületsü.
Currently Selected:
LUKE 16: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
