LUKE 15
15
Nyihzhü Kümiekümüwa
(Mat 18.12-14)
1 #
Luk 5.29,30. Jütiküsavü rülo küsü akhrü kükhrühri thi kükhiemuori hozake ma zhü küna nti ma se nyiru. 2Thinü Farisiri thi Khonyo küsosieri nüh jazhi taji, “Anyi hama tü kükhiemuori sieke thi mari sie kütsazhu sa veh lie,” ti küza. 3Jükenüh ma nüh küüzhühie hama mari vü küza:
4Nohri anyi wuori nüh nyihzhü müzake peh taji jümari azhie vünüh küsü kümiemü thuoüji gura kenüh tüguri areza vü samü nü kümie kümüwa müjieküphara küjunü mphatü le naveh lo? 5Thi ma nüh jüma phara thuoüji lozhe taji jüma vi ma safürügivü sanü, 6azhe vü rujura thuoüji ma füri thi ma zhephruri jizhuh taji, “Hi sie lozheluo, küpakenühnyunü eh nyihzhükümiekümüwa küngurathuoh kenüh.” 7Jükenüh hi nüh küza naveh, jükümjie eh luoveh mükhaphrü ketünga azhümünyie ta küsa kükhiemuori küsü luoveh khaphrü thuoüji künyitsari gura kenüh tügu nyia vünüh rügivü tü lozhe naveh.
Tuli Kümiekümüwa
8Jümpa mükünyu krevühri küsü nüh tuli türake penü küsü kümiemü thuoüji ma tü müjie küphara küjunü aküla tso nü azhe rhü taji mphatümü naveh lo? 9Thi ma nüh jüma phara thuoüji ma füri thi ma zhephruri jizhuh nü, “Hi sie lozheluo, küpakenühnyunü eh tuli kümiekümüwa küngurathuoh kenüh,” ti küza. 10Jükenüh hi nüh küza naveh, kükhiemuori küsü luovehkükhaphrü kenüh Saküüwuowa zhühleri nga lozhe nü küza.
Kümiekümü Tsawa
11Jüsevü nga ma nüh, khanavü nyi küsü tü atsa nyimpari künyi peh; 12thinü kürünguowa nüh ma pa vü ru nü, “Eh pa, zanyo ehsuoperi hi tsüluo,” ti khuo. Thinü ma nüh küsuo nü tsümü. 13Rülo pike asevü kürünguowa tü ma zhiri vi nü anyu aleküsuo vü tewa, jüla nüh tsosütsorü taji makünyirhie aveh saküramü. 14Jütisanü ma zanyo aveh saküramü ünü anyu jüvü kümükhuojih küji ru nü ma tü thotsa she tewa. 15Jükenüh ma tü anyu jüla nyi küsü vü wa nyipe ünü ma nüh ma küze taji awu kühuo. 16Thinü ma tü awushie aküfü lovü kütüwa nga tsangü, thitü nyi küsü nga ma vü zanyo küsü nga mütsü. 17Jütiküsavü asevü thuoüji ma mpa ma se thsüra taji, “Eh pasieperi tü kütsaküzhu zhile thi küüluo nga peveh, thi hitü hala nüh khehthe na savehthuoh,” ti ma mpa ma jüle. 18Hi süra nü tse eh pa vü tewa le taji ma vü, “Eh pa, hi tü Saküüwuowa tüvü nga thi noh tüvü nga khiemuomüthuoh, 19hi tü no tsa ta küsa nga müjitsethuoh, thinü hi vi nosiepe küsü kümüjie nga küsamü luo,” ti küza. 20Jüti sataji ma tü süra nü tse le ma pa vü wa.
Thitü azhe ru müküju kületsuo vü kütse vünüh mapa nüh ma ngu taji ma no kümüze she nü zhüwa ma khekethi kümetsü. 21Thinü ma tsanüh ma vü, “Eh pa, hi tü Saküüwuowa atüvü nga thi noh tüvü nga khiemuo müthuoh. Hi tü khinyi nü no tsa ta nga müjitsethuoh,” ti küza. 22Thitü ma pa nüh ma sieperi ji taji nü, “Shishiti wa thsümünyi kümühietsari viru ma küvü luo, thi tühjükhe thi jiküükruvüh viru thsetsüluo,” ti küza. 23Thi wa taji mieshüzah kümühietsawa fethe luo, hiri kütsazhu sanü lozhe naveh, 24küpakenühnyunü eh tsa hamatü sümüthuoh ti sa ünü rhosheleruthuoh, kümiemüthuoh ti ünü nguralethuoh. Jüti sataji kütsazhuwa tü sate.
25Jütiküsavü ma jie tü azhu vü wa nü azhe shenyi ru ünü aza küsa thi akütsi khi künara. 26Thinü ma nüh sieperi küsü ji nü mowa saveh lo? ti küna. 27Thinü siepewa nüh, “No nü shele teru pevehthuoh thi no nü mühie lozhe nü ru peküveh kenüh no pa nüh mieshüzah kümühie küsü fethe nü tsazhuveh lie,” ti küza.
28Thitü ma jie tü ma rüshu she kümü kenüh azhe lovü mütu nti sa, jükenüh ma pa nüh ru taji ma künyi. 29Thitü ma nüh ma pa vü, “Halie, mahvi hathake sieperi kümüjie no kenüh küro thi no zhü nga mükürü wie, thitü noh tü mowa hi tsü lo? Nyihnyih küsüwienga vi hi tsü taji eh füri sie kütsazhu nga müsa. 30Thitü no tsa hama thuoüji no künyirhie aveh küüphroküphrieri sie nü saküra khehmü, thi jüti sataji ma zhe vü shele ru ünü mieshüzah kümühietsawa fethe,” ti küza. 31Thinü ma pa nüh ma vü, “Eh tsa noh nü tsotho aveh vü hisie peh veh, thi zanyo küzake eh ke pehveh nüh aveh no zhi wie. 32Thinü hiri tü tsotho hama sanü mülozheji mümühie, küpakenühnyunü noh nü tü sümüthuoh ti sa ünü rholeküru kenüh, ma tü kümie müthuoh ti sa ünü künguralethuoh kenüh,” ti küza.
Currently Selected:
LUKE 15: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
