LUKE 14
14
Jisu nüh Künari Küsü Saküümühie
1Jüsevü kümünyierülo küsü Jisu tü Farisiri azhienüh küjiri küsü azhe vü tsazhu nti wa ünü nyiküsü tü ma nophoke. 2Thinü halie, ajutsakümori küsü ma tüvü pelanü ngu. 3Thinü Jisu nüh Khonyo küsosieri thi Farisiri jüle nü, “Kümünyierülo vü akünari saküümühie Khonyo ünü nyu lo?” ti küna.
4Thitü mari tü zohmti pewie. Thinü ma nüh anyi jüma pataji ma sakümühie nü küzemü. 5#Mat 12.11. Jütisanü ma nüh mari vü, “Nohri tü rawu nyutü mieshü peh taji azhikrie küshe lovü tetu thuoüji kümünyierülo wie ketünga tsaza taji tu müshozhu tü lenaveh lo?” ti küna.
6Thinü mari tü azhü jüri thsü nü zanyo küsü nga müküzara nüh samü.
Khukekümühie thi Nyurikünothsü
7Jüsevü nga ru tsazhu üta jiru küsari ape kümühieri phataji küpeh vi küüzhühie. 8#Kzh 25.6,7.Nyi küsüküsü nga kümünyute kütsazhu vü ru tsazhu üta jiwie ketünga wa taji küsiake küvüri ape vü mpeh tümü; ma tü no nyia vünüh küsiake küvüri nga ji küsanga müthsü; 9thi nosü ji küsawa nüh ru taji no vü, anyi hama apekükhumü luo, ta thuoüji noh tü zükrü nü wa apekürünyie tsahwa vü peh nathuoh. 10Jükenüh nyuri nüh no ji thuoüji wa ape kürünyietsah wavü peh luo, jütathuoüji no küjiwa nüh ru thuoüji ma nüh nohvü, “Eh füwa no wa taji apeh kümüsie vü peh luo,” ta saru naveh, jütathuoüji no nga nyuri ru peküvehri aveh atüvü küsiake vüra naveh. 11#Mat 23.12; Luk 18.14.Küpakenühnyunü anyi küsüküsü nga ma mpa ma saküjikütseri aveh thuoüji saküza mütü naveh, thitü anyiküsüküsü nga mampa ma saküza kütseri thuoüji saküjitsü naveh, ti küza.
12Thi Jisu nüh nyuri küjiwa vü nga, “Noh nüh rüne vü nyutü rüza vü sietsazhu nta nyuri jiwie ketünga, noh füri nyutü noh jienüri nyutü no küshukürari nyutü noh zhephruri nyirhieri müjitümü, jümari thuoüji no ji shelewa amüthoh sale naveh, thi no nga ma ji le naveh. 13Thitü noh nyuri sietsazhu nta thuoüji kümükhuori, ajikekümüsüri, kürhomükümühieri, thi nothaküüjuri ji luo, 14jütathuoüji no akütsia vüra naveh, küpakenühnyunü mari tü no mütho müsalera; thi künyitsari rhole küsüravü no mütho wa tsü le naveh,” ti küza.
Kütsazhu Küji Küsü vi Küüzhühie
(Mat 22.1-10)
15Jütiküsavü jüla ma sietsazhu küperi küsü nüh azhü jüri künara taji ma vü, “Saküüwuowa kajipe vü kütsazhurari tü küzakelenga münga na lo,” ti küza.
16Thitü Jisu nüh ma vü, nyiri nyi küsü nüh kütsazhuküji küche taji nyiri hozake ji. 17Thi kütsazhu tsotho ru ünü ma nüh jiküsari wa ji üti ma siepewa küze taji, “Raluo, zanyo aveh küchekhehmüthuoh nüh,” ti küza. 18Thitü mari aveh nga küteküzhie khe taji: Powa nüh, “Hitü azhuh küsü sü saveh, tinü wa jüma münoji mümühie, hi nüh nohri vü khuoveh nü hi müküle nojatsüluo, 19küpakenühnyunü hi tü azhu küüro mieshü türake süsaveh, tinü hi tü wa taji jüri münoji mümühie, jükenüh hi müküle nojatsüluo,” ti khuo. 20Thinü küpawa nüh, “Hi tü eh vüvüh vi sa veh, tinü jükenüh mürurathuoh,” ti küza.
21Jütiküsavü siepewa tü ru nü ma vüwa vü küza. Thinü azhe vüwa tü arüshu taji ma sehnyiwa vü, shita anyuküji lekhuji küza küji aveh vü wa nü kümükhuori, thi ajike kümüsüri, thi nothaküüjuri thi kürho mükümühieri jiru luo. 22Thinü siepewa nüh, “Küjiwa, noh nüh mowa sa üta azhütsü nüh sakhemthuoh, thi khinyi nga ape pehüveh,” ti küza. 23Thinü vüwa nüh siepewa vü, “Lekhuji küza küji avehvü wa taji azhe küüpro naküsa kenüh nyiri küngu aveh jiru luo,” ti küza, 24Küpakenühnyunü hi nüh no vü küza naveh, hi nüh jiküsa nyi jümari küsü nga hi nüh kütsazhu kücheküsawa kümpowa nyu.
Sehnyi Küsa Makünyia Küpe
(Mat 10.37-38)
25Jütiküsavü anyi shieji küsü ma se nyiwa, thinü ma nüh kürele taji mari vü, 26#Mat 10.37. “Nyi küsüküsü nga hi vü ru taji ma mpa ma pa thi ma zah thi ma vüvüh thi atsari ajienüri thi atsevühri, thi jümpa mükünyu ma mpa ma kürhowienga mükürüpa nüh müsa thuoüji ma nü eh sehnyi müsatse. 27#Mat 10.38; 16.24; Mrk 8.34; Luk 9.23. Küsüküsü nga ma mpa ma khieluothso mükha nüh eh se nyi thuoüji eh sehnyiri müsatse.
28“Nohri wuori nüh khajie küriengüvü thawa nüh shupe taji küzake wa naveh nüh ti kürüh nyutü jüma sawajura na ünü nyu nüh ta mükümüshewa thawa peveh lo? 29Jütanyu thuoüji ma tü alope sasa taji sawamüjura thuoüji nyiri jü künguri aveh nüh ma riesanaveh. 30Thi nyi hama tü sa nta sanü müsaju nüh samüthuoh taküza naveh.
31“Nyutü kajiri küsü nüh kaji küsü siesaluo nta küsa vü küütü shupe taji ma nüh nyi nyie türake siewa anyi anyia mükeke siesaluo ra naveh nü nyu nüh taküsa mükümüshewa thawa lo? 32Müsara thuoüji küpawa aleküsuo vü kütse vünüh azhüle küze taji kürükümühie zhü tsütsü ti. 33Jükenüh nohri küsüküsü nga ma zhi aveh jam thuoüji eh sehnyi müsatse ta küsa Jisu nüh sehkhe zhü phratetsü.
Mütsü Ma kümühie Mükünyie
(Mat 5.13; Mrk 9.50)
34“Mütsü tü mühiemü, thitü ma küshewa münyie thuoüji mowa nüh vi saküshe le naveh lo? 35Jümatü azhih kenüh nga thi wihrüza kenüh nga kümühiemünyiethuoh. Thi nyiri nüh jümatü jamünathuoh. Khüna peh nü küünari nü künaluo,” ti küza.
Currently Selected:
LUKE 14: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
