Bakaanelabu 4

Fiyeel buko li Saŋ hákil huhaanaahu háamakahu hata Kusuwifaku

1Nan Fiyeel buko li Saŋ kulakomuu elobayi li ésukayi, élambaayi, li ahaanawu ata kufooyaaku kata Eluufayi yata Ateemit, li Kusaduusiyeŋaku li kúliiŋul. 2Muñeˈe súumutiil maayeet, min Fiyeel buko li Saŋ kunaake kuliikenumuu ésukayi, ban li kunaak koon Yéesu layitowuuyitowul li eketayi, min lako kama kaketumuu kuyilo foof kuyitowumul li eketayi. 3Li kujok Fiyeel buko li Saŋ kukul̥ boot yok hunak hukaten, mata banakabu bo bajone. 4Bale bukan kameeŋe li kalakomuu bajamabu bata Hulimahu Hásuumaahu, li kúyinen. Kánayinaabuku káyinenumuu, kuyilo kúliiŋ bukan koono sínjunne hutok.

5Li líiŋ hunak hukaten, kunahaanaku kata Kusuwifaku, li kuhaaniil, li kaliikenemuu ésukayi eluwaayi ésukayi eluwaayi yata Móyiis, li kujoj Yeelusalem. 6Kalako tomuu li bajojabu umbu, buko kommuu Aan alakomuu álambaawu áamakawu, Kayif, Saŋ, Alekusandul li bukanabuku feh kata butoŋabu bata álambaawu áamakawu. 7Muñeˈe li kúŋalul Fiyeel buko li Saŋ kubil kukaan li tutiil min kugel̥l̥eniil kooniil:

— Li sembe say, mantee foof li kajaw kata ayi jífakenume ánayinaawu aboboweenumuu?

8Fiyeel an Buyinumabu Banabaabu bumeeŋenumuu li aaniil:

— Kunahaanake kata ésukayi, kuhaanake, 9jumbuku síyaat li kágel̥l̥enoololi mata majake man jikaane an aboboweene, ban li jimit jígel̥l̥enoli buu ánayinaawu ummu áfakenumi eeno. 10Joote jihaas bukuluul foofuul feh, li bukanabuku feh kata Isilayeel kaanaku: ánayinaawu ummu ammuu hákiluul, li kajawaku kata Yéesu Kilisita ata Nasalet láfakume. Yéesu Kilisita an jibaaŋumuu li ekuluwaayi, ban Ateemit li ayitenumulool li eketayi. 11Yéesu akila Bakiicelabu bulobumuu moola boon:

«Huyitikahu han bukuluul kuteefaabuku jihoyumuu,

ho hubile hulakomuu huyitikahu hútinaalahu#4:11 Ukijenawu 118:22 (Huyitikahu hammuu li kajinjaku).»

12Li Yéesu bale an ayilo ábajum buloŋabu bábaneliitumuu. Mata bajut an li etaamaye an Ateemit áboñulo bukanabuku, ábute li Yéesu, boot kafakenolaal.

13Muñeˈe kunahaanaku kata Kusuwifaku li kujuk koon Fiyeel buko li Saŋ kulollob li kabaneyiil. Nan kuhaasumuu koon kujangawut, ban foof kulet bukan káamak, li kusego ŋáa’. Li kuhaas foof koon Fiyeel buko li Saŋ kunaanaak kunaboo li Yéesu. 14Bale li kujuk ánayinaawu aboboweenumuu mafake, ban li ayito to hákiliil, kuyilaat kulobiil hulim. 15Muñeˈe li kooniil kúfu’ li huwoogahu hata huhaanaahu, min buko humumiil kulako kátalloo mata hulimahu unhu. 16Li kugel̥l̥enoo koon:

— Boot min ukaanaal kánayinaabuku umbuku buu? Mata li mal̥egenamu kukankaan búhiisenum bájaahaleniye, ban bukanabuku feh kata Yeelusalem kuhaase. Alolaal humumolaal uyilaataal uceeŋaal. 17Bale muñeˈe unuuloolaaliil oonaaliil jakum kulaañen kulob an li kajawaku kata Yéesu, jakum bil kafakenaku kan kufakenumuu ánayinaawu aboboweenumuu kuhaŋ majamo li ésukayi.

18Muñeˈe li kulaañen kúhooñul Fiyeel buko li Saŋ min kooniil kuyaan kukat makat elob ésukayi li kaliikeniil li kajawaku kata Yéesu.

19Bale Fiyeel buko li Saŋ li kooniil:

— Jitiib bukuluul humumuul min jijuk, mantee coccol hákil Ateemit, min áloli jihoy bátuul Ateemit, min jítuuluul. 20Mata áloli jiyilaat jikat balobut wahawu wan jijukumuu, li wan jijamumuu.

21Muñeˈe kunahaanaku kata Kusuwifaku li kulaañen kunuuloo Fiyeel buko li Saŋ, ban li kukateniil. Kujukut li buko majakut man kóotummuu kútekumiil, mata ésukayi feh enaanaak esal Ateemit mata wahawu wabajumuu. 22Simitasu sata ánayinaawu an kufakenumuu jáahaleni, sihaŋe kúyii kúl̥uba.

Kal̥awaku kata káyinenumuu

23Nan kunahaanaku kata Kusuwifaku kuyaane kukatenuliimuu, Fiyeel buko li Saŋ li kujow kunaben kufaaliil, min kuhebiil wahawu feh wan kunahaanaku kata élambaayi li kuhaanabuku kulobumuu. 24Muñeˈe nan káyinenumuu kujamumuu kulimaku kan Fiyeel buko li Saŋ kulobiilumuu, li kul̥aw Ateemit li mano koon:

— Anahaan, awu humumi úwuwenumuu emitayi, li etaamayi, li halahu, li wahawu feh wáami dómuu. 25Awu humumi úlobummuu, li sembe sata Buyinumabu Banabaabu, li butum bata átuubawoli ahaan Dayit, ammuu aloka ooli oon:

«Wáa újiye búsukabu feh li buyitowul

li etindihuuñ ló?

Wáa újiye li kunaak kukaal̥o li kúsonoo

boot li Amaaŋenawu?

26Kúyiiyaku kata etaamayi

li kubil kucaal̥ boot hutiik,

kunahaanaku kata sísukasu li kufam tin tano

boot hutiik li Amaaŋenawu,

li Afakenaawu ammuu oola#Ukijenawu 2:1-2.»

27«Mata li mal̥egenamu, li ésukayi inye Elod, li Fons Filat, li bukanabuku kákaanumutumuu li awu Ateemit baleyi, li kata Isilayeel, kufamumuu min kutiik alokaawu ooli anabaawu ammuu Yéesu, an ul̥usumuu alako Afakenaawu. 28Muñowu kukaanumuu min wahawu feh wan ufinumuu min uyinoole kakaan yan no, li sembaasu sooli li húfañumahu hooli, ubaj. 29Amaaŋen, muñeˈe lujuke min kunuuloolemuu li áloli. Usénoli, áloli jammuu kulokaabuku kooli, sembe sata min jilob hulimahu hooli li kábanewoli. 30Uhíis sembaasu sooli mantee bukan kásomute li kufak, búhiisenum, li wah wájaahaleniye li úkaanumi li kajaw kata alokaawu uya anabaawu ammuu Yéesu.»

31Nan kubanumuu kal̥awaku, etaamayi li egoloo tan kuwoogumuu. Buyinumabu Banabaabu li bubil bulako li buko foofiil feh, min kunaak kulob hulimahu hata Ateemit li kabaneyiil.

Káyinenumuu li kuŋa’ wahawu wan anoowan abajumuu kukaan tin tano

32Muñeˈe káyinenumuu li Yéesu li kujokoo loon an ano, min kubaj kayinoo kano, li hulim hano. Bajut an li buko aane wahawu wan abajumuu woola balewool, bale wahawu wan kubajumuu wooliil foofiil feh. 33Kufootalaku Yéesu li eketayi. Ateemit li ásooniyeniil foofiil feh li káji káamak. 34Bajut an li buko agaye wah. Mata kabajumuu etaam li kújula yo, kabajumuu siluuf li kújula so kuban, li kúŋalul sídalamasu sata bunoomabu kubil, 35kusen kufootalaku. Sídalamasu unsu li kaŋa’ so kugaben anoowan loon afañumuu.

36Muñowu foof bajumuu ánayine akee aan koone Suseef alakowe aŋatak, ban li abuki li étebelemukayi yata Ciif. Kufootalaku li kukaanool kajawaku kaaneyimuu Balunabaas, (yo yommuu, an awankulene bukan). Suseef li abaj etaam, 37muñeˈe li anoom etaamayi, min áŋalul sídalamasu abil asen kufootalaku.

Currently Selected:

Bakaanelabu 4: cskDBL

Highlight

Copy