Лука 22

Баш руханийлернинъ гизли ниетлери

1 # Мт 26.1-5, 14-16; Мк 14.1-2, 10-11; Юх 11.45-53 ‌#Чыкъ 12.1-30Песах денильген Маясыз Пишкен Пите Байрамы якъынлаша эди. 2Баш руханийлернен Къанун оджалары халкътан къоркъып, Исаны ольдюрмеге имкян къыдыра эдилер. 3#Юх 13.2О вакъыт он экиден бириси олгъан, Искариот деп адландырылгъан Иуданынъ ичине Шейтан кирди. 4Иуда барып, баш руханийлернен ве Сарай къаравулларынынъ башлыкъларынен Исаны насыл этип якъаламакъ акъкъында анълашты. 5Олар севинип, Иудагъа пара бермек къарарына кельдилер. 6#Фаал 1.16Иуда бунъа разы олды. Халкъ олмагъанда, оларгъа Исаны сатмакъ ичюн келишкен вакъыт къыдыра башлады.

Песах ашына азырланув

7 # Мт 26.17-25; Мк 14.12-21; Юх 13.21-30 ‌#Чыкъ 12.6; 1 Кор 5.7Маясыз Пишкен Пите Байрамынынъ куню кельди. Онда адамлар Песах къозусыны къурбан чала эдилер.

8Иса Пётрнен Юханны ёллап:

– Барынъыз да, бизге Песах ашыны азырланъыз, – деди. 9Олар Исадан:

– Ашны къайда азырлайджагъымызны истейсинъ? – деп сорадылар. 10Иса оларгъа:

– Шеэрге киргенинъизде, сизге бир бардакъ сув котерип кеткен адам расткеледжек, – деди. – Онынъ пешинден барып, о кирген эвге киринъиз 11ве эв саибине шойле денъиз: «Оджа сенден: “Шегиртлеримнен Песах ашыны ашайджакъ одамыз къайда?” – деп сорай». 12О адам сизлерге юкъары къатта, энди эр шейи азырлангъан, бир балабан оданы косьтерир. Анда керек шейлерни азырланъыз, – деди.

13Шегиртлер барып, эр шейни Иса айткъаны киби таптылар ве Песах ашыны азырладылар.

Иса шегиртлеринен берабер Песах ашыны ашай

14 # Мт 26.26-30; Мк 14.22-26 Вакъты-саати кельгенде, Иса он эки эльчинен берабер софра этрафында ер алды 15ве оларгъа:

– Сизнен бу Песах ашыны ашамакъны азап чекмезден эвель пек арзу эттим. 16#Сыр 19.9Сизлерге айтам: Алланынъ Падишалыгъында Песах олмагъандже, бу ашны ашап оламайджам, – деди.

17Къадени элине алып, шукюр этти ве:

– Буны алынъыз да, озьара пайлашынъыз. 18Сизлерге айтам: Алланынъ Падишалыгъы кельмегендже, Мен бу вакъыттан башлап, юзюм мейвасынынъ ичимлигини ичмейджем, – деди.

19 # Юх 6.51; 1 Кор 10.16; 11.24 Сонъ отьмекни алды, шукюр этип парчалады, шегиртлерине берип:

– Бу сиз ичюн берильген Меним тенимдир. Мени анъмакъ ичюн буны япынъыз, – деди. 20#Чыкъ 24.8; Йрм 31.31Аштан сонъ оларгъа къадени узатып, шойле деди:

– Бу къаде – сиз ичюн тёкюлеяткъан къанымнен кучьке кирген янъы васиеттир. 21#Збр 40.10; Юх 13.18Амма бакъынъыз! Мени саткъан адам Меннен берабер бир софрада отурмакъта. 22#Фаал 2.23Эбет, Инсан Огълунынъ кетеджеги эвельден тайин этильди. Лякин Оны саткъан адамнынъ алына беля!

23Эльчилер, олардан къайсы бири буны япаджакъ экени акъкъында бир-биринден сорап башладылар.

Ким буюкче?

24Шегиртлернинъ арасында, олардан къайсы энъ буюк олгъаны акъкъында бир тартышма чыкъты. 25Лякин Иса оларгъа:

– Башкъа миллетлернинъ падишалары озь халкълары устюнде эфендилик этелер. Оларнынъ укюмдарлары «яхшылыкъ япкъанлар» деп адланалар. 26#Мт 20.26; Мк 10.43-44Сизде исе ойле олмасын! Аранъыздан ким буюк олса, озюни энъ кучюк киби тутсун. Ким башлыкъ олса, хызметчи киби олсун. 27#Мт 20.28; Юх 13.4-5Къайсы бири буюк? Софра башында ер алгъанмы я да хызмет этип тургъанмы? Софра башында ер алгъан дегильми? Мен исе аранъызда хызмет эткен киби олдым! 28#Еуд 2.18Сынав кечкен вакъытларымда Меннен берабер сиз эдинъиз. 29#Лк 12.32Шу себептен, Падишалыкъта башлыкъ этмеге акъкъыны Бабам Манъа бергени киби, Мен бу акъны сизге берем. 30#Мт 19.28; Сыр 3.21Сонъ Меним Падишалыгъымда софрада отурып ашап-ичерсиз, тахтларгъа отурып, Исраильнинъ он эки къабилесине укюм этеджексиз, – деди.

Иса Пётрнынъ ёлдан уруладжагъы акъкъында эвельден айта

31 # Мт 26.31-35; Мк 14.27-31; Юх 13.36-38 ‌#Эюп 1.6-12; Ам 9.9Иса:

– Симон, Симон! Мына, Шейтан сизни сынамакъ ве ун киби электен кечирмек ичюн рухсет сорады. 32#Юх 17.9Лякин Мен, имандан таймасын, деп сен ичюн ялвардым. Сен Манъа къайтып кельгенинъде, къардашларынънынъ иманыны къавийлештир, – деди.

33 # Юх 21.19; Фаал 12.4 Симон Исагъа джевап берип:

– Рабби! Мен Сеннен зиндангъа да, олюмге де бармагъа азырым! – деди. 34Иса онъа:

– Санъа шуны айтам, Пётр: бугунь хораз къычырмаздан эвель, сен Менден учь кере вазгечеджексинъ, – деди.

Чувал, торба ве къылыч

35 # Лк 9.3; 10.4 Иса шегиртлерине:

– Мен сизни акъчасыз, торбасыз, аякъкъапсыз ёллагъанымда, бир шейде эксиклигинъиз олдымы? – деди.

– Ич бир шейде олмады! – деп джевап берди олар.

36– Энди кимнинъ акъчасы олса, озюнен алсын. Кимнинъ торбасы олса, оны да алсын. Кимнинъ къылычы олмаса, урбасыны сатып, къылыч сатын алсын. 37#Еш 53.12Сизлерге айтам: «джинаетчилернен бир сайылды» язылгъан сёзлер Менде беджерильмек керек. Меним акъкъымда айтылгъан сёзлернинъ эписи ерине кельмек керек, – деди оларгъа Иса.

38Шегиртлер:

– Рабби, мына бу ерде эки къылыч бар! – дедилер.

– Етер! – деди Иса.

Зейтюн дагъында

39 # Мт 26.36-46; Мк 14.32-42 Эвден чыкъып, адети боюнджа Иса Зейтюн дагъына кетти. Шегиртлери де Онынъ артындан кеттилер. 40#Мт 6.13О ерге кельгенде, Иса оларгъа:

– Сынавдан кечмек ичюн, дува окъунъыз, – деди. 41Озю исе олардан бир таш атув месафесине четке барды да, тиз чёкип дува окъуп башлады:

42 # Мт 6.10; Мк 10.38; Юх 18.11; Еуд 5.7 – Баба! Эгер истесенъ, бу азаплар къадесини Менден ал! Амма Меним дегиль, Сенинъ истегинъ эда этильсин!

43 # Мт 4.11; Мк 1.13 Шу арада коктен бир мелек Исагъа корюнип, Онъа къувет бере башлады. 44Иса олюм азабында олып, даа буюк кучьнен дува окъуй башлады. Ондан чыкъкъан тер ерге тамгъан къан тамчыларына ошай эди.

45Дува окъугъан сонъ турып, Иса шегиртлерининъ янына кельди. Оларны къайгъыдан юкълап къалгъан алда корьди. 46Оларгъа:

– Сиз не ичюн юкълайсыз? Къана турынъыз да, сынавдан кечмек ичюн, дува окъунъыз, – деди.

Исаны якъалайлар

47 # Мт 26.47-56; Мк 14.43-50; Юх 18.3-11 ‌#Фаал 1.16Иса даа бу сёзлерни айткъанда, топлашып кельген адамлар пейда олдылар. Он экиден бири Иуда адлы адам, башкъаларнынъ огюне чыкъып, Исагъа якъынлашты да, Оны опьмеге ынтылды. 48Иса онъа:

– Иуда, сен Инсан Огълуны опип сатасынъмы? – деди.

49 # Лк 22.38 Исанынъ янындаки шегиртлери не оладжагъыны анълап:

– Рабби, къылычларнен урайыкъмы? – дедилер. 50Олардан бириси баш руханийнинъ къулуны урып, онынъ онъ къулагъыны кести. 51О вакъыт Иса:

– Етер, токътанъыз! – деди де, къулнынъ къулагъына къол тийдирип, оны тедавийледи. 52Сонъ Оны алмагъа кельген баш руханийлерге, Сарай къаравулларынынъ башлыкъларына ве акъсакъалларгъа:

– Сизлер айдут тутаджакъ киби, къылыч ве таякъларнен силяланып кельдинъиз! 53#Лк 20.1; Эф 6.12Мен эр кунь Алланынъ Сарайында сизинъ аранъызда олгъанымда, Манъа къол котермей эдинъиз. Амма шимди сизинъ вакътынъыз, къаранлыкънынъ укюми, – деди.

Пётр Исадан вазгече

54 # Мт 26.57-58, 69-75; Мк 14.53-54, 66-72; Юх 18.12-18, 25-27 Олар Исаны якъалап, баш руханийнинъ эвине алып бардылар. Узакътан оларнынъ пешинден Пётр кетти. 55Азбарнынъ ортасында атеш якъып, этрафында адамлар отурмакъта эдилер. Пётр о адамларнынъ арасында отурды. 56Бир хызметчи къыз онынъ атеш янында отургъаныны корип, онъа тикилип бакъты да:

– Онен берабер бу адам да эди! – деди. 57Пётр къадынгъа:

– Эй, къадын, мен Оны танымайым! – деп инкяр этти.

58Бираздан сонъ башкъа бир адам Пётрны корип:

– Сен де олардан бириси оласынъ! – деди. Пётр онъа да:

– Адам, мен олардан бириси дегилим! – деди.

59Бир саат къадар кечкен сонъ, даа бириси:

– Акъикъатта, Онен берабер бу адам да олгъан. О Галилеядан да, – деди ишанчнен. 60Пётр онъа да:

– Акъай, сен не айткъанынъны бильмейим, – деди. О вакъыт, Пётр лафыны даа битирмегенде, хораз къычырды. 61#Лк 22.34Рабби Иса айланып, Пётргъа бакъты. Шу ань Пётр Раббининъ онъа: «Бугунь хораз къычырмаздан эвель, сен учь кере Менден вазгечеджексинъ», – деген сёзлерини хатырлады. 62Азбардан чыкъып, окюр-окюр агълай башлады.

63 # Мт 26.67-68; Мк 14.65 ‌#Еш 50.6Исаны тутып тургъан адамлар исе Оны мыскъыллап котеклей башладылар. 64Онынъ козьлерини багълап:

– Пейгъамберлигинъни косьтер, бизге Сени ким ургъаныны айт! – дей эдилер. 65Онъа даа чокъ куфюр сёзлер айта эдилер.

Иса Юксек Шура алдында

66 # Мт 26.59-66; Мк 14.55-64; Юх 18.19-24 Сабадан халкънынъ акъсакъаллары ве баш руханийлернен Къанун оджалары топланып, Исаны озьлерининъ Юксек Шурасына алып бардылар.

67– Месих Сенсинъми? Бизлерге джевап бер! – дедилер. Иса оларгъа:

– Сизлерге айтсам, инанмайджакъсынъыз. 68Суаль берсем, джевап бермейджексинъиз. 69#Збр 109.1; Мк 16.19; Фаал 7.56; Еуд 1.3Лякин бундан сонъ Инсан Огълу Къудретли Алланынъ онъ тарафында отураджакъ, – деди.

70О вакъыт эписи бирден:

– Демек, Сен Алланынъ Огълусынъмы? – деп сорадылар.

– Мен О экенимни озюнъиз айтасыз, – деди оларгъа Иса. 71#Мт 9.3; Юх 10.36Олар исе:

– Бизге даа насыл шаатлыкъ керек? Онынъ агъзындан озюмиз эшиттик! – дедилер.

Currently Selected:

Лука 22: CTB

Highlight

Copy