Ḳhurúj 22
22
1Agar koí ádmí bail yá bheṛ churá le, aur use zabh kar de, yá bech ḍále, to wuh ek bail ke badle páṉch bail, aur ek bheṛ ke badle chár bheṛeṉ bhare. 2Agar chor seṉdh márte húe pakṛá jáe, aur us par aisí már paṛe ki wuh mar jáe, to us ke ḳhún ká koí jurm nahíṉ. 3Agar súraj nikal chuke, to us ká ḳhún jurm hogá, balki use nuqsán bharná paṛegá; aur agar us ke pás kuchh na ho, to wuh chorí ke liye bechá jáe. 4Agar chorí ká mál us ke pás jítá mile, ḳhwáh wuh bail ho yá gadhá yá bheṛ, to wuh us ká dúná bhar de.
5Agar koí ádmí kisí khet yá tákistán ko khilwá de, aur apne jánwar ko chhoṛ de ki wuh dúsre ke khet ko char le, to apne khet yá tákistán kí achchhí se achchhí paidáwár meṉ se us ká mu‘áwaza de.
6Agar ág bhaṛke aur káṉṭoṉ meṉ lag jáe, aur anáj ke ḍher yá khaṛí fasl yá khet ko jalákar bhasam kar de, to jis ne ág jaláí ho, wuh zarúr mu‘áwaza de.
7Agar koí apne hamsáye ko naqd yá jins rakhne ko de aur wuh us shaḳhs ke ghar se chorí ho jáe, to agar wuh chor pakṛá jáe to dúná usí ko bharná paṛegá. 8Par agar chor pakṛá na jáe, to us ghar ká málik Ḳhudá ke áge láyá jáe, táki ma‘lúm ho jáe, ki us ne apne hamsáye ke mál ko háth nahíṉ lagáyá. 9Har qism kí ḳhiyánat ke mu‘ámale meṉ, ḳhwáh bail ká ḳhwáh gadhe, yá bheṛ, yá kapṛe, yá kisí âur khoí húí chíz ká ho, jis kí nisbat koí bol uṭhe ki wuh chíz yih hai, to faríqain ká muqaddama Ḳhudá ke huzúr láyá jáe, aur jise Ḳhudá mujrim ṭhahráe wuh apne hamsáye ko dúná bhar de.
10Agar koí apne hamsáye ke pás gadhá, yá bail, yá bheṛ, yá koí âur jánwar amánat rakkhe, aur wuh bag̣air kisí ke dekhe mar jáe, yá choṭ kháe, yá haṉká diyá jáe, 11to un donoṉ ke darmiyán Ḳhudáwand kí qasam ho ki us ne apne hamsáye ke mál ko háth nahíṉ lagáyá; aur málik use sach máne, aur dúsrá us ká mu‘áwaza na de. 12Par agar wuh us ke pás se chorí ho jáe, to wuh us ke málik ko mu‘áwaza de. 13Aur agar us ko kisí darande ne pháṛ ḍálá ho, to wuh us ko gawáhí ke taur par pesh kar de, aur pháṛe húe ká nuqsán na bhare.
14Agar koí shaḳhs apne hamsáye se koí jánwar ‘áriyat le, aur wuh zaḳhmí ho jáe, yá mar jáe, aur málik waháṉ maujúd na ho, to wuh zarúr us ká mu‘áwaza de. 15Par agar málik sáth ho, to us ká nuqsán na bhare; aur agar kiráya kí húí chíz ho to us ká nuqsán us ke kiráya meṉ á gayá.
16Agar koí ádmí kisí kuṉwárí ko, jis kí nisbat na húí ho, phuslákar us se mubásharat kare, to wuh zarúr hí use mahr dekar us se biyáh kare. 17Lekin agar us ká báp hargiz rází na ho ki us laṛkí ko use de, to wuh kuṉwáriyoṉ ke mahr ke muwáfiq use naqdí de.
18Tú jádúgarní ko jíne na dená.
19Jo koí kisí jánwar se mubásharat kare, wuh qata‘í ján se márá jáe.
20Jo koí wáhid Ḳhudáwand ko chhoṛkar kisí âur ma‘búd ke áge qurbání chaṛháe, wuh bi’lkull nábúd kar diyá jáe. 21Aur musáfir ko na satáná, aur na us par sitam karná, is liye ki tum bhí mulk i Misr meṉ musáfir the. 22Tum kisí bewa yá yatím laṛke ko dukh na dená. 23Agar tú un ko kisí tarah se dukh de, aur wuh mujh se faryád kareṉ, to maiṉ zarúr un kí faryád sunúṉgá; 24aur merá qahr bhaṛkegá; aur maiṉ tum ko talwár se már ḍálúṉgá, aur tumhárí bíwiyáṉ bewa, aur tumháre bachche yatím ho jáeṉge.
25Agar tú mere logoṉ meṉ se kisí muhtáj ko, jo tere pás rahtá ho, kuchh qarz de, to us se qarzḳhwáh kí tarah sulúk na karná, aur na us se súd lená. 26Agar tú kisí waqt apne hamsáye ke kapṛe girau rakh bhí le, to súraj ke ḍúbne tak us ko wápas kar dená. 27Kyúṉki faqat wuhí us ká ek oṛhná hai, us ke jism ká wuhí libás hai, phir wuh kyá oṛhkar soegá? Pas jab wuh faryád karegá, maiṉ us kí sunúṉgá; kyúṉki maiṉ mihrbán húṉ.
28Tú Ḳhudá ko na kosná, aur na apní qaum ke sardár par la‘nat bhejná. 29Tú apní kasír paidáwár aur apne kolhú ke ras meṉ se mujhe nazr o niyáz dene meṉ der na karná, aur apne beṭoṉ meṉ se pahlauṭhe ko mujhe dená. 30Apní gáeoṉ aur bheṛoṉ se bhí aisá hí karná: sát din tak to bachcha máṉ ke sáth rahe; áṭhweṉ din tú use mujh ko dená. 31Aur tum mere liye pák ádmí honá. Isí sabab se darandoṉ ke pháṛe húe jánwar ká gosht, jo maidán meṉ paṛá húá mile, mat kháná; tum use kuttoṉ ke áge pheṉk dená.
Currently Selected:
Ḳhurúj 22: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
