Paidáish 37
37
1Aur Ya‘qúb mulk i Kan‘án meṉ, rahtá thá jaháṉ us ká báp musáfir kí tarah rahá thá. 2Ya‘qúb kí nasl ká hál yih hai: ki Yúsuf sattrah baras kí ‘umr meṉ apne bháiyoṉ ke sáth bheṛ bakriyáṉ charáyá kartá thá. Yih laṛká apne báp kí bíwiyoṉ Bilháh aur Zilfah ke beṭoṉ ke sáth rahtá thá, aur wuh un ke bure kámoṉ kí ḳhabar báp tak pahuṉchá detá thá. 3Aur Isráíl Yúsuf ko apne sab beṭoṉ se ziyáda piyár kartá thá, kyúṉki wuh us ke buṛhápe ká beṭá thá; aur us ne use ek búqalamún qabá bhí banwá dí. 4Aur us ke bháiyoṉ ne dekhá ki un ká báp us ke sab bháiyoṉ se ziyáda usí ko piyár kartá hai, so wuh us se bug̣z rakhne lage, aur ṭhíḳ taur se bát bhí nahíṉ karte the. 5Aur Yúsuf ne ek ḳhwáb dekhá, jise us ne apne bháiyoṉ ko batáyá, to wuh us se âur bhí bug̣z rakhne lage. 6Aur us ne un se kahá, Zará wuh ḳhwáb to suno, jo maiṉ ne dekhá hai: 7Ham khet meṉ púle báṉdhte the; aur kyá dekhtá húṉ ki merá púlá uṭhá aur sídhá khaṛá ho gayá, aur tumháre púloṉ ne mere púle ko chároṉ taraf se gher liyá aur use sijda kiyá. 8Tab us ke bháiyoṉ ne us se kahá, ki Kyá tú sach much ham par saltanat karegá, yá ham par terá tasallut hogá? Aur unhoṉ ne us ke ḳhwáboṉ aur us kí bátoṉ ke sabab se us se âur bhí ziyáda bug̣z rakkhá. 9Phir us ne dúsrá ḳhwáb dekhá, aur apne bháiyoṉ ko batáyá. Us ne kahá, Dekho, mujhe ek âur ḳhwáb dikháí diyá hai, ki súraj aur chánd, aur gyárah sitároṉ ne mujhe sijda kiyá. 10Aur us ne ise apne báp aur bháiyoṉ donoṉ ko batáyá. Tab us ke báp ne use ḍáṉṭá, aur kahá, ki Yih ḳhwáb kyá hai, jo tú ne dekhá hai? Kyá maiṉ, aur terí máṉ aur tere bháí sach much tere áge zamín par jhukkar tujhe sijda kareṉge? 11Aur us ke bháiyoṉ ko us se hasad ho gayá, lekin us ke báp ne yih bát yád rakkhí. 12Aur us ke bháí apne báp kí bheṛ bakriyáṉ charáne Sikm ko gaye. 13Tab Isráíl ne Yúsuf se kahá, Tere bháí Sikm meṉ bheṛ bakriyoṉ ko chará rahe hoṉge: so á ki maiṉ tujhe un ke pás bhejúṉ. Us ne us se kahá, Maiṉ taiyár húṉ. 14Tab us ne kahá, Tú jákar dekh, ki tere bháiyoṉ ká aur bheṛ bakriyoṉ ká kyá hál hai, aur ákar mujhe ḳhabar de. So us ne use Habrún kí wádí se bhejá, aur wuh Sikm meṉ áyá. 15Aur ek shaḳhs ne use maidán meṉ idhar udhar áwára phirte páyá. Yih dekhkar us shaḳhs ne us se púchhá, ki Tú kyá ḍhúṉḍhtá hai? 16Us ne kahá, Maiṉ apne bháiyoṉ ko ḍhúṉḍhtá húṉ; zará mujhe batá de, ki wuh bheṛ bakriyoṉ ko kaháṉ chará rahe haiṉ. 17Us shaḳhs ne kahá, Wuh yaháṉ se chale gaye, kyúṉki maiṉ ne un ko yih kahte suná, ki Chalo, ham Dútain ko jáeṉ. Chunáṉchi Yúsuf apne bháiyoṉ kí talásh meṉ chalá, aur un ko Dútain meṉ páyá. 18Aur júṉhí unhoṉ ne use dúr se dekhá, to peshtar is se ki wuh nazdík pahuṉche, us ke qatl ká mansúba báṉdhá: 19aur ápas meṉ kahne lage, Dekho, ḳhwáboṉ ká dekhnewálá á rahá hai. 20Áo, ab ham use már ḍáleṉ, aur kisí gaṛhe meṉ ḍál deṉ, aur yih kah deṉge, ki Koí burá daranda use khá gayá; phir dekhenge, ki us ke ḳhwáboṉ ká anjám kyá hotá hai. 21Tab Rúbin ne yih sunkar use un ke háthoṉ se bacháyá, aur kahá, Ham us kí ján na leṉ. 22Aur Rúbin ne un se yih bhí kahá, ki Ḳhún na baháo, balki use is gaṛhe meṉ, jo biyábán meṉ hai, ḍál do, lekin us par háth na uṭháo. Wuh cháhtá thá ki use un ke háth se bachákar us ke báp ke pás salámat pahuṉchá de. 23Aur yúṉ húá, ki jab Yúsuf apne bháiyoṉ ke pás pahuṉchá, to unhoṉ ne us kí búqalamún qabá ko, jo wuh pahine thá, utár liyá, 24aur use uṭhákar gaṛhe meṉ ḍál diyá: wuh gaṛhá súkhá thá; us meṉ zará bhí pání na thá. 25Aur wuh kháná kháne baiṭhe, aur áṉkh uṭháí, to dekhá, ki Isma‘ílíoṉ ká ek qáfila Jili‘ád se á rahá hai, aur garm masálih, aur raug̣an i balsán, aur murr, úṉṭoṉ par láde húe Misr ko liye já rahá hai. 26Tab Yahúdáh ne apne bháiyoṉ se kahá, ki Agar ham apne bháí ko már ḍáleṉ, aur us ká ḳhún chhipáeṉ, to kyá nafa‘ hogá? 27Áo, use Ismá‘ílíoṉ ke háth bech ḍáleṉ, ki hamárá háth us par na uṭhe, kyúṉki wuh hamárá bháí aur hamárá ḳhún hai. Us ke bháiyoṉ ne us kí bát mán lí. 28Phir wuh Midiyání saudágar udhar se guzre: tab unhoṉ ne Yúsuf ko kheṉchkar gaṛhe se báhar nikálá, aur use Isma‘ílíoṉ ke háth bís rúpaye ko bech ḍálá: aur wuh Yúsuf ko Misr meṉ le gaye. 29Jab Rúbin gaṛhe par lauṭkar áya aur dekhá, ki Yúsuf us meṉ nahíṉ hai, to apná pairáhan chák kiyá. 30Aur apne bháiyoṉ ke pás ulṭá phirá aur kahne lagá, ki Laṛká to waháṉ nahíṉ hai, ab maiṉ kaháṉ jáúṉ? 31Phir unhoṉ ne Yúsuf kí qabá lekar, aur ek bakrá zabh karke use us ke ḳhún meṉ tar kiyá; 32aur unhoṉ ne us búqalamún qabá ko bhejwá diyá; so wuh use un ke báp ke pás le áe, aur kahá, ki Ham ko yih chíz paṛí milí, ab tú pahchán ki yih tere beṭe kí qabá hai yá nahíṉ? 33Us ne use pahchán liyá aur kahá, ki Yih to mere beṭe kí qabá hai: koí burá daranda use khá gayá hai. Yúsuf beshakk pháṛá gayá. 34Tab Ya‘qúb ne apná pairáhan chák kiyá, aur ṭáṭ apní kamar se lapeṭá, aur bahut dinoṉ tak apne beṭe ke liye mátam kartá rahá. 35Aur us ke beṭe beṭiyáṉ use tasallí dene játe the, par use tasallí na hotí thí. Wuh yihí kahtá rahá, ki Maiṉ to mátam hí kartá húá qabr meṉ apne beṭe se já milúṉgá. So us ká báp us ke liye rotá rahá. 36Aur Midiyáníoṉ ne use Misr meṉ Fútífár ke háth, jo Fir‘aun ká ek hákim aur jilaudároṉ ká sardár thá, bechá.
Currently Selected:
Paidáish 37: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
