Mareko 11

Yesu Eŋe Ware Ware Suwaine Yaline Okane Yerusalem Matko Waketke

1Eŋe ari Yerusalem mat osino lotkekoi paki, ari mat etke metkoik, Betpage so Betani ere Oliwa bonaga wane wazaino metkoik. Yewa okorau so Yesu eŋe medewetkine etke matokotke. 2Matok ore more iwa yale etane rake, Ŋire ari Betani mat eriwa meuno tingo pamaike, eya wa more pore kauk horsi nigatne mane medeune mulapko lukkau okorayake. Horsi eya ŋei maneŋo kutno wa mi metmele, eya ka more mulap siloke so ma sarikeik. 3Ŋo, ŋei maneŋo qesonŋure rayake, ‘Ŋire eya onoka wane okanmamik?’ Rakiso, ŋire iwa yale olale raikeik. Suwaineŋo raki sari mamaite. Urata qoekimo koso ikop birakaki sariyake. 4Yale ra etane biraotki ere ari yewaka pore kauk mat mane numa meuno pake yewao horsi nigatne medeune mane mulapko luwo okoraki, ere ka more silokkakoik. 5Ŋei natne eŋe yewa osoetno okorakoi, eŋe ore more rakoi, Ei, ŋire dalino okangeik wane, horsi medeune eya silokkamamik? 6Rauso ere Yesuŋo don etange yale edanbik eŋe detpi qoeki oŋ rau, so ere ma sarikoik. 7Ere horsi medeune eya Yesu wano ma sari more, eretne momo takot suwaine eyaŋo kutno motpik, so Yesu eya wane kutno wa metke. 8Pakiso, ŋei ŋerep korop eŋe momo takotene kito qoke numao horsi kine gesoke ariyakane lameke arikoi. Ŋei ŋerep natne eŋe zariŋ awak so eki metine eyaŋo rutupke lamekkoi. 9Yesu eŋine keuwo kitoki ŋei magu natne ŋado kitou magu natne eŋe alakane more, iwa yale boka ra pezoŋka bakom kito arikoi, Ŋene Kaisale wane oraŋem! Ŋei iwa Waomŋo eŋine tungo birakaki sarimaike! Kaisaleŋo mosop-kakep! 10Ŋaboze Dawit ŋaboine sari ware ŋoniyake! Aŋelo eŋe qeliwo Kaisale wano orau! 11Eŋe yale okankau, Yesu eŋe Yerusalem lotke more Kaisale Wane Bakom Urum koto waket more kine kine kotino pake eya korop kawareke. Kepe mo qoeyakane okangi, Yesu eŋe dokoine12 yewa ebuki, Betani ari pakoi.

Yesu Eŋe Pik Eki Soakkake

12Kepe qaeki sakoka eŋe wiye more Betani mat qeliŋka sari numa keuwo Yesu eŋe ŋara wane seukke. 13Seuke more deine potki ariki kaki pik mane metine loutneŋo supakaki qei amaŋ okorake Yesu eŋe wele natne mayakane okane ari pik eki kino okora pore kaki wele mane mi metke. Midaka togole. Onoka wane, wele qeqe nasoino mida wane, eŋe pore metineka kake. 14Paki, Yesu eŋe pik yewa olatke, Ge koso ŋado wele mane mi qekene! Midakaka togogole! Dokoine eŋe eya detkakoi.

Yesu Eŋe Kaisale Wane Bakom Urumgo Ŋei Ŋerep Qole Qole Metkoi Eya Osoponge

15Eŋe ari Yerusalem lotke more, Yesu eŋe ari Kaisale Wane Bakom Urum kotino waket more ŋei ŋerep nalu qole qole urata eya wane kotino ma metkoi, eya kiyeke more osoponge. Ŋei eŋe zake yewa kutno mere wesi setne maingekoi, so met met kutno mere naŋi qole qole urata ma metkoi, eya korop kito surubage qakki ketke. 16Paki, eŋe kine kine koso Kaisale Wane Bakom Urum wane sen koto mi ma waket saket okangei wane ra togoleke. 17Ra togole more iwa yale edange, Kaisale wane ekapŋo iwa yale ramaike, ‘Urumne eya eŋe ŋei ŋerep kepe baŋem ŋine maguine maguine sarikei, eŋane meŋe meŋen urum okaniyake.’ Ŋine yale okanbimo, kobu ŋei eŋane mat okanmaike. 18Yesu eŋe yale raki, Kaisale wane papa togon welaine ŋei, Parisaiyo, so Kaisale wane mosop ŋei, Pris, eŋe dere more auye rakoi, Ŋene dalino okane more qeŋem seukeyake. Ŋo, ŋei ŋerep eŋe korop Yesu wane kito ebo eboninane zonomineŋo detkau, zok manerop ewinerop okange, eya wane Parisaiyo so Pris eŋe kaetongi, qeliŋkakoi. 19Ruwo kereki naso yewao Yesu eŋine so dokoine eŋe Yerusalem qelige so ket arikoi.

Yesu Eŋe Eki Pik Wane Donkisi Kito Edange

20Qaeki sakoka, eŋe ari kau, pik eki wele midaine yewa mo toroge okorake. Metine so ŋodine kaki korop marapke okorake. 21Petoro eŋe Yesuŋo okange, eya detsoroke more Yesu olatke, Kito ŋebo ŋebon, ge pik iwa kanom! Ge yatne soakkene, eŋe mo marapke okoramaike. 22Yesu eŋe mainge rake, Ŋine Kaisale malipkau. 23Ŋine maine bonaga iwa olale raikei, Ge wiye more sontake ari kiwetko ketnom! Ŋine wet etkeka mi okane more, wet weku okane raikeiwo, welekatne donŋine welerop okaniyake. Eya wane na ŋidanmaile. Kine kine ŋine yewaŋo raikei, rokop mawe wakoniyake. 24Ŋo, ŋine kine kine natne Kaisaleŋo ŋiboniyakane meŋenkaikei, naso yewao ŋine Kaisaleŋo kine kine mo ŋibonge eya togoleka dere malipka more meŋenkaikei. Na welekatne ŋidanmaile. Ŋine yale malipka more meŋenkaikeiwo, Kaisaleŋo kine kine eya ŋiboniyake. 25Naso ŋine meŋen meŋen more okora more, ŋei maneŋo umat mane mo ŋinano make eya detsoroke more eŋane turuŋ yewa qeliŋkawarekei. Yalewaka magaŋine weti qeliwo metmaike, eŋe ŋinane turuŋŋine yewa qeliŋgi nigetkayake. 26Ŋo, ŋine ŋei ŋerep eŋane sot turuŋene mi qeliŋkau niget ŋuniyakeo, magaŋine weti qeliwo metmaike eŋe yalewaka ŋinane sot turuŋŋine eya mi qeliŋgi nigetkayake.

Pris Edo Yesu Wane Rakoi, Maŋo Ge Biragange

27Yesu eŋine so dokoine eŋe zinge ari Yerusalem lotke more Yesuŋo Kaisale Wane Bakom Urum kotino ari waket lolike geki, Kaisale papa togon welaine ŋei so Kaisale wane mosop ŋei ŋetne so Yuda ŋei ŋetne eŋe Yesu wano sarikoi. 28Sari olale rakoi, Ge eŋet biŋek so zonom eya diyao ŋine manom paki, kine kine eya korop okan waremaine? Maŋo eŋet biŋek suwaine eya gingane, ge urata eya ma okanmaine? Ge yatne Kaisale wane Bakom Urum koto ŋine kine kine eya ma qakenom, korop saket warike, zonom eyamo maŋo gingi, ge okanine? 29Yesu eŋe mainge edange, Na yaleka ŋine qeso qeson weku qeson ŋunbe, naŋane qeso qeson yewa mainge nolatpiso na masi kine kine eya maŋane dereretko mamaile eya wane kine rawe desikei. 30Yohane wane doku tau tau urata eya qeliwo ŋine wakonge, me ŋeiwo ŋine wakonge? Eya ŋido mainge nolatpi detpe. 31Eŋe yale ra qeson ongi eŋe dere more eŋe edomka auye rakoi, Ŋene raikene eya qeliwo ŋine wakonge, yale ra olatŋem eŋe rayake, pakimo ŋine onoka wane eya mi dere malipkamami? 32Me ŋene raikene, ŋeiwo ŋine wakonge, eya raŋem maine mi konapkeyake. Ŋei ŋerep eŋe Yohane wane detkakoi, eŋe Kaisale wane qelit ŋei wele, eya wane Pris eŋe dere more kaetongi, 33don iwa yale mainge Yesu olale rakoi, Ŋene mi detmaine. Eŋe yale rauso, Yesuŋo edange, Na yaleka, na maine mi maŋo qeli ewe zonom ningi, urata eya mamaile, eyamo mi ŋidanikale.

Currently Selected:

Mareko 11: onsNT

Highlight

Copy