Luk 15
15
Urọk arọọn̄ òchechep
(Mat 18:12-14)
1Usen ge, owuwa ebi ìkibọkọ otitip ido mè owuwa ebi kpekisun̄ Ikan ebi Ju enunu inigọọk igban̄ ijejeen̄ kè Jisọs. 2Ire, ebi Farisi mè ebi ìjeen̄ Ikan ìkup me ere ya ebebene ikinunuun̄ me etete kiban̄ ibe ke Jisọs ìkibọkọ ebi ijo itap, mè ikigọọk ema igbaan̄ irie inorie.
3Jisọs onọnọ ikọ ya ema ekinunuun̄, mè inito urọk ge inyi ema ibe, 4“Ire ene ge me etete kinyi ikaan̄ efit arọọn̄, mè ikpulu ema isa isibi isi mè esi etaka mbubet, arọọn̄ ge oneninan̄a me lek ichep, ene ya môtele akọp arọọn̄ onaan̄ge mè onaan̄ge kechilọ, mè ikijijen̄e ikana isi iweek arọọn̄ ge ya òchechep mege ire mgbọ môweekbe imun̄. 5Ene ya isiweek arọọn̄ ya imun̄, môsa me ubelejit iben arọọn̄ ya itoon̄ me oguga, mè isa ije ifo. 6Isika inire uwu, mônigwen ebi unene kan̄, mè ebi melek kan̄ elukbe me ere ge ibe enegọọk ọmọ enwọọn̄ unwọọn̄, mije ke ọmọ îweek arọọn̄ kan̄ òchechep imun̄. 7Me atikọ, ǹkitumu inyi enyi ibe, ubọk yaage si, unwọọn̄ òmimin igak eya môkup me emen inyọn̄ me ibot ogwu ijo ge gaalek ògwugwu ikom isibi me ijo irọrọ, igak me ibot akọp ene onaan̄ge mè onaan̄ge ebi ìkigwen lek kiban̄ ebi ata irọrọ, ebi igwugwu ikom ikakupge me uyọt.
Urọk ikpoko òchechep
8“Ofifi si, ire enenwaan̄ ge ikaan̄ akọp darakima, ge oneninan̄a me lek ichep, ogwu enenwaan̄ ya ìbomimin ukan̄ isa imọọn̄ inu ibene irak inu geelek me uwu kan̄ ichan, mè igwuun̄ chieen̄ iweek ikpoko ya mege ire mgbọ môweekbe imun̄. 9Isiniweek ikpoko ya imun̄, môgwen ebi unene kan̄ mè ebi melek kan̄ elukbe me ere ge ibe enegọọk ọmọ enwọọn̄ unwọọn̄, mije, ke ọmọ îweek ikpoko kan̄ òchechep imun̄. 10Ikeya si, ǹkitumu atikọ inyi enyi ibe ke ikpele unwọọn̄ ọmọ òwa me etete ebi osat Awaji me ibot ogwu ijo ge gaalek ògwugwu ikom isibi me emen ijo kan̄.”
Urọk gwun̄ jom-jòm ògwugwu ikom
11Jisọs okpọkpọk ito ofifi urọk inyi ema ibe, “Îkaan̄ ogwu enerieen̄ ge òkakaan̄ ibot bọn ebirieen̄ iba. 12Ogwu ijija me lek kiban̄ onenigwen ogwu ute, mè itumu inyi ibe, ‘Nte n̄a, che otutuuk inu okaan̄be nyi eji ngwan̄ iba, mè nyi emi uche eyi òrere emi lek mgbọ keyi.’ Ogwu ute okpukpulu otutuuk inu îkaan̄be iche irek iba inyi bọn kan̄ iba cha, mè isa uche eyi ogwu ijija ya inyi ogwukaan̄. Ibọbọkọ.
13“Sọntiik mgbọ iraraka, gwun̄ enerieen̄ ogwu ijija ya okpukpulu otutuuk inu kan̄ cha inyam, mè ibọkọ ikpoko itap me akpa, mè ibene ije ije inan̄a me uwu ifo atalek ujọn̄ọ ere isi iluk, mè ifiat ikpoko cha otutuuk isan̄a isa iluk ubene ugwem melek ebi òje oyet. 14Mgbọ îfiatbe otutuuk ikpoko cha isan̄a kpai, uga akan̄ oneninin̄ ikana otutuuk ido ere îlukbe ya. Uraafiọọn̄ otetet ọmọ ire lek, ìkayaka ìkaan̄ inu geege ìborie. 15Inenisi iweek ikwaan̄ me ubọk gwun̄ enerieen̄ ge me ido ya. Ogwu enerieen̄ ya oneniria ọmọ ibe ikisi ikpukpo okodi inyi ọmọ. 16Me ere ìkikpukpo okodi cha, kpunu ogwu òkinyi ọmọ inorie geege. Eya orọ, ikekikeek ibe ke ọmọ môkọt igọọk ikirie inorie okodi cha okirie.
17“Mije otutuuk ufialek cha, gwun̄ ya oneninọ lek, mè ibe, ‘Jei! Ìre kpasi ukwook ke nkibọkọ ikeyi? Otutuuk ebi usun̄ ìkisi ikwaan̄ inyi nte n̄a mîkaan̄ inorie ikirie ijot otu, mè ikirie isik. Emi nnenikikwu me lek uraafiọọn̄ me ere keyi! 18Mâgwu ikom ije ifo igọọk nte n̄a. Nsire uwu, mâriaak nte n̄a, mè itumu inyi ibe: Jei, nte n̄a, nrọ ijo inu me isi Awaji, mè irọ owu si ilọ. 19Emi ǹkayaka ìgbe ogwu ebegwen gwun̄ kwun̄. Eya orọ, mọnọ emi kubọk ene ge me lek ebi usun̄ kwun̄.’ 20Itutumu ikeya ifieek me ejit kan̄ isan̄a, inanan̄a ikeke, mè ije ika igọọk ogwu ute. Ire, mgbọ gwun̄ ya ìkajeje ìgbet, ogwu ute okukup me ujọn̄ọ ere ibene chieen̄ imun̄ ọmọ, mè ikaan̄ njijin me lek kan̄, mè isa ekot ekot ilibi isi ikweek ogwu gwun̄, mè iwele ubọk iba ikana ọmọ ikat.
21“Mgbọ yaage, gwun̄ enerieen̄ ya obebene ikitumu inyi ogwu ute ibe, ‘Jei Nte n̄a, nrọ ijo inu me isi Awaji, mè irọ owu si ilọ enenen. Emi ǹkayaka ìgbe ogwu ebegwen gwun̄ kwun̄.’
22“Ìkatutumu ikọ ya ìsan̄a me otu, ogwu ute otataan̄ ukpo itumu inyi ebi usun̄ kan̄ ibe, ‘Ìgwat lek ìsa ofọnti eyi òjajaan̄ ichit ìna ìnitap gwun̄ n̄a, mè ìmọnọ mkpọtubọk ìsa ìnitap ọmọ me otubọk, mè ìteen̄ ikpukot ìsa ìjet, inyi itap ikwek ukot, 23mè ìsi ìtet eriembuuk ya eyi egwookbe inyi imin ufuk mè ijaan̄ lek ìkpan̄, mè ìbala ìsa ìtem inorie, mè eji enerie ijọk. 24Mije, gwun̄ n̄a yi îkwu, mè iyaka ijomo me mkpa. Ọmọ îchep, ekpọkpọk iweek ọmọ imun̄.’ Sa me ikeyi, nte gwun̄ ya ototo ijọk, ebi ene ebebene ikirie, mè ikinwọ.
25“Otutuuk mgbọ cha, ngwan̄ gwun̄ ya ogwu ugane ọmọ òwa me ere îkikpukpo anam ogwu ute. Mgbọ îkika, mè inije igbet uwu, inọnọ ida nkwukwak mè okput òjijop okitaan̄ me uwu kiban̄. 26Eya orọ, igwegwen ogwu usun̄ kiban̄ ge ikido ibe mè ìre keke ke ekirọ me uwu kiban̄ ye? 27Ogwu usun̄ ya ofọfọọk ọmọ ibe, ‘Îre ngwan̄ kwun̄ ogwu ijija oka. Eya orọ nte kwun̄ otobe ijọk, mè ibe ekpan̄ eriembuuk eyi egwookbe ya, mè esa etem inorie, mije ke ngwan̄ kwun̄ ya îka me utelelek mè unye-lek. Îre eya orọ uwu okikput.’
28“Ogwu ngwan̄ ogwu ugane inọnọ ikọ ya, inanaan̄ ejit enenen, mè ijit ininin̄ uwu. Mgbọ ogwu ute onọbe ibe ke gwun̄ kan̄ ogwu ugane îka, mè inaan̄ ejit, mè ijit ininin̄ uwu, isisibi igọọk, mè isi iriaak. 29Ire, gwun̄ ya ofọfọọk ogwu ute ibe, ‘Owu kpọ-nu, karake acha acha mbenebe ikisi ikwaan̄ inyi owu kubọk usun̄, ǹkakpaka ida ikọ kwun̄ kubọk ge. Ire, owu òkakup-nu usen ge, mè ìmọnọ kubọk sọntiik gwun̄ ebot ge ìnyi emi ibe emi, “Bọkọ kpan̄ sa rie ijọk melek ebi unene kwun̄.” 30Ire, mgbọ keyi gwun̄ kwun̄ yilọ, ogwu òkpukpulu inu kwun̄ isa isi ifiat isan̄a melek ebi òje oyet, ogwube ikom ije ukpọk ubọk ika inu me uwu, owu oneninyi ida ibe ekpan̄ eriembuuk ya efiatbe mgbọ igwook inyi imin ufuk etem enyi, mè itaka.’
31“Ogwu ute obebe gwun̄ ya, ‘In̄-in̄ gwun̄ n̄a! Kpọ, owu melek n̄a ekikup mgbọ geelek. Otutuuk inu geelek nkaan̄be ìre eyi kwun̄. 32Eya orọ, îgbe ibe eji erie ijọk, mije, ngwan̄ kwun̄ yi ìkup mgbọ yi kubọk ogwu òkwukwu itele eji, mè iyaka ikpọk ijomo me mkpa, mè ikup si kubọk ogwu òchechep, eweweek imun̄.’ ”
Currently Selected:
Luk 15: ANNa
Highlight
Share
Copy
Want to have your highlights saved across all your devices? Sign up or sign in
© The Nigeria Bible Translation Trust, 2013
