TAUNET 19

Sogornatetap piigap Sodom

1Ki it anyun malaikaisyechooto aeng'u Sodom eng' koskoleny, ak kitebyei ng'wony Lot eng' ormariichetap nganasanooto. Ye kingo keer Lot icheek, kong'eet kotorookta ak ipkogutung'ji. 2Koleenji, “Kasaak ale omosu, obwa anyun kiptainikyuk kootap otwogindeng'wong', ak otebi kemouni komugul, oun keelyek si osip ong'eetyee omuste.” Kowol icheek kole, “Achicha, kitebee saang' kemout komugul.” 3Ki igaigai Lot miising' anyun kot komasta icheek koba koonnyi. Ki yachi ineendet icheek igoorto ak kochopchi magatiinik che ma kinde mermereek, si koam. 4Ago ye ki tomo koruiyo, kobwa meng'iigap nganasanooto po Sodom koyiem koot; piik tugul neranik ak che oosen kobun komoswek tugul. 5#Kirw 19.22-24 Ki kuur `icheek Lot ak koleenji, “Ngorcho piik che ketaach eng' koong'ung' kemouni? Imutwech kobwa saang', si kobiit kenai icheek.”

6Ki manda Lot kwo ole mi icheek eng' kurgat, ak koger kurgeet. 7Ak koleenji, “Asaok, che kitupche, amoegu sogoran! 8Ogeero, atinye tiibiikyuk aeng' che pergein. Okany amutwak, si oyachi ko uu ye koroo. Moyachi kiy pichu amu kagobwa koonnyu.”

9Ak ki wol kole, “Istegei!” Kotestai kole, “Ki nyo chiichi ko too, ago inee ni kagomach koek ne irwookwech i! Kimache anyun keyaun ne ya kosiir icheeget.” Ki ibookyi `icheek Lot ak komang'ji kurgeet koleen kobut. 10Ago ki iyogoi eunekwak pichu ki mi ko ak kochuut Lot kwo ko, ak koger kurgeet. 11#2Lai 6.18 Yeityo kobire korateet pichooto ki miitei kurgeetap koot, che mengeechen ak che eecheen, agoi kong'etyo kocheeng'ei kurgeet.

Ng'emetap Sodom ak Komora

12Ki teebee anyun `pichooto Lot koleenji, “Tos itinye chii age eng' yu? Saania, weeriiguk, tiibiiguk, anan chiing'ung' age tugul eng' nganasani? Ngot komi imaande eng' olito. 13Kimache keng'em nganasani, amu kogoeet waagaat agobo icheeget eng' taitap Kamuktaindet ne Toroor, ak kagoyakwech Kamuktaindet ne Toroor keng'em.” 14Ki manda Lot kwo ak ipkoleenji sanigap tiibiikyik “Ong'eetyee ak omande obe, amu machei kong'em Kamuktaindet ne Toroor nganasani.” Ki keer sanichooto ng'aleekyik ko uu tangoi. 15Ki ichirchir `malaikaisyek Lot ko kerir emet koleenji, “Ng'eet, imut kwondong'ung' ak tipchuguk aeng' si mobegu eng' kergong'yet ne ityin nganasani.” 16#2Pet 2.7 Ki igagei ineendet komanda; amu ki igagei, ko ki nam pichooto eunnyi, eutap kwondonyi ak eunegap tiibiikachik aeng' komaanda eng' nganaseet ak kobagaakta eng' saang' amu ki riiree Kamuktaindet ne Toroor. 17Ye kingo kagomaanda, koleenji, “Sarugei, mwei amegus kong' anan itonone ui tugul eng' kewani; mwechi tuloonook parak, ang' puch komeng'etu.” 18Koleenji Lot, “Achicha, kiptaiyandennyu! 19Kairiiree uitugul otwogindeng'ung', ak kotesak aiyebindong'ung' eng' saruunet ne koisarwo si ma abet saboondanyu. Nga no anyun-i, koma muuchi amwechi tuloonook parak si konyoorwo yaityo, ak kogoono ame. 20Keero, ang'ni nganaseet ne neegit ak ko ming'in, myee amwechi oliindo si asar saboondanyu.” 21Koleenji ineendet, “Kaagasun ng'olyoondoniito agine ale ma ang'eme nganasanooto kaimwa. 22Chaakte, mwechi olooto, amu ma muuchi ayai kiy agoi iit olooto.” Ki kiguure Zoar#19:22 Zoar: Nooto ‘Ming'in.’ nganasanooto amu nooto.

23Kiga kochoor asiista ye kingo itei Lot Zoar. 24#Mat 10.15; 11.23-24; Luk 10.12; 17.29; 2Pet 2.6; Jud 7 Kiroong'ji anyun Kamuktaindet ne Toroor Sodom ak Gomorah roptap koik che laldos ak maat ne punu kipsengwet. 25Ki peel kong'em nganasochooto, atebweet komugul, piik tugul che ki menyei nganasochooto, ak tuguuk tugul che piitos eng' ng'wony. 26#Luk 17.32 Ago kiguskong' kwondap Lot eng' let, ak kiwalak koek tulweet ne ming'in ne po muunyuk. 27Ki ng'eet Abraham karon komusta kwo agoi koit ole kigatonone eng' taitap Kamuktaindet ne Toroor; 28ak ye kingo tabendo kogeer oliin po Sodom ak Gomorah, ak emet tugul ne po atebweet, kooro iyeto ne po emet kotogostoi ko uu iyetap maat ne oo miising'.

29Ak kingo ng'emei Kamuktaindet nganasook che po atebweet, kobwaat Abraham ak komaanda Lot, komandae ng'emisyetap nganasochooto kiga komeng'oot.

30Ki manda anyun Lot kotogosta tulweet parak ak tiibiikyik aeng' amu ki iywei komeny Zoar ak ipkomeny kebeneet oriit ak tiibiikyik. 31Ki leenji anyun chepto ne oo chepto ne ming'in, “Kagoosit kwandanyo, ak ma mi mureno emoni ne imuuchi kotunech ko uu piteetap ng'wony komugul. 32Ngenage kwandanyo kumik si kobiit kobogit ak keruiye ak ineendet, si keriip iyoteet.” 33Ara ki inaga kwandanywa anyun kumik kemounooto ak ki wo ne oo kwo ipkoruiyo ak kwandanyi. Ma nai kwan ye kingo ruitos tuwai, anan ye ki kong'eetei. 34Eng' peetuut ne ki isubi nooto, koleenji ne oo ne ming'in, “Keero, ko ki ruiye lagat ak abba. Nginage kogeny kumik kemouni po ra si iwe aginye oruiye tuwai, si keriip iyoteet.” 35Ki inaga kumik kwandanywa kogeny kemounooto, ak king'eet anyun ne ming'in, kwo ipkoruiyo ak kwan. Ma nai kora koruitos tuwai, anan kong'eetei. 36Ki manach anyun tiipchooto tuwai po Lot komanage kwandanywa. 37Ki sich `ne oo weeriit, ak kiguure kainennyi Moab.#19:37 Moab: Eng' kutitap Yahudik ko ‘ne punu abba.’ Ineendet ko kwandap Moabik agoi ra. 38Ki sich `chepto ne ming'in agine weeriit, ak kiguure kainennyi Ben-Ami.#19:38 Ben-Ami: Eng' kutitap Yahudik ko “weeriitap piikyuk.” Ineendet ko kwandap Amonik agoi ra.

Currently Selected:

TAUNET 19: KAPR

Highlight

Copy