TAUNET 20

Abraham ak Abimelek

1Ak kiu Abraham eng' olooto kwo komostap Negeb, kwo komeny kwenutap Kadesh ak Shur, ak komeng'iis ko kiprutoiyo eng' Gerar. 2#Tau 12.13; 26.7 Ki itaam `Abraham Sarah kwondonyi kole, “Ineendet ko tupchennyu.” Ki iyookto anyun Abimelek laitoryatap Gerar kimutyi Sarah. 3Ago ki nyoonji `Kamuktaindet Abimelek eng' karwotitoet kemoi koleenji, “Keero, kaimei isabe, kwondo ne kaimutyigei ko kwondap chii.” 4Ago ki tomo koriikyi Abimelek ineendet. Koleenji Kiptaiyat, “Tos ibare agot pororyet ne po iman? 5Tos ma leenjo ineendet, ‘Sarah ko tupchennyu?’ Ak ma mwa agine kwonyooto kole, ‘Ineendet ko tupchennyu?’ Ki ayai ko uu ni eng' muguleldo ne po iman ak eng' eunek che tiliileen.” 6Ak ki mwachi anyun `Kamuktaindet ineendet eng' karwotitoet, koleenji, “Wei, angen ale ki iyai ko uu ni eng' muguleldo ne po iman. Agot anee ko ki aeetenen si meyaiywo tengek. Nooto anyun amu nee si ma achamun itwaa ineendet. 7Ara anyun imutyi nguno kwonyi chiitap ko po, amu maotyoo inee si kosaun si isap. Ago ngot ko meweekte, inai ile imee ne matiny, inyee, ak tuguuk tugul che itinye.”

8Ki ng'eet anyun Abimelek karon miising' ak koguur otwogikyik tugul. Kotetyi tuguuchooto tugul kochut itiikwak; ak ki aragenso kot miising' pichooto. 9Ki kuur anyun `Abimelek Abraham, koteebe koleenji, “Koiyaiywech nee? Ak nee chalwok ne koayaun, kot igesenjo ak laitornatennyu tengegi tee ni? Koiyaiywo tuguuk che ma nyolu keyai.” 10Ak ki leenji `Abimelek Abraham, “Koigeer nee, si iyai kii?” 11Ki le Abraham, “Ki ayai niito amu ki aleen, ma mi olito iman kayweetap Kamuktaindet, ak imuuchi icheek kobara amu kwondanyu. 12Ago eng' iman, ineendet ko chepkamennyu, sieetap chebyosennyo; ak ki atun. 13Ye kingo kagomoong'wa Kamuktaindet eng' kootap abba, ak kogoono awendot, aleenji anyun ineendet, ‘Rireneng'ung' ni ne tuun iboorwo; imwae eng' komosta age tugul ole kibendi ile, Ineendet ko ng'eetap kamennyu.’ ” 14Ki igoochi anyun `Abimelek Abraham keechiirek ak tuuga, otwogik che murenik ak che tiibiik, ak koweekyi Abraham Sarah kwondonyi. 15Ak ki leenji Abimelek, “Keero, mi taing'ung' emoninyu, meny ole ichame.” 16Ki leenji Sarah, “Keero, kaagoochi ng'eetap kamenng'ung' silingisyek eliphuut agenge, koek chooto che tugun koonyek eng' piik che mi kobooten, ak kagiityin imanda eng' taitap piik tugul.” 17Ki sa anyun `Abraham Kamuktaindet, ak ki isoop `Kamuktaindet Abimelek, ak kwondonyi, ak chebaigeinikyik, ak ki sich lagok. 18Amu kiga korat Kamuktaindet ne Toroor mootinwek tugul che po kootap Abimelek, amu Sarah kwondap Abraham.

Currently Selected:

TAUNET 20: KAPR

Highlight

Copy