JOHANA 9
9
Kosoobi `Jeso chii ne kiga kisich ko koraat
1Ak ye ki siirtoi, kogeer chiito ne ki koraat kobooch ko kagisich. 2Ak kiteebe ineendet kasubikyik, koleenji, “Rabbi, ng'oo ne ki yai tengekto, chiichi anan sigiikyik, si kesich ko koraat?” 3Kowol Jeso kole, “Ki ma yai chiichi tengekto, anan sigiikyik; ago si kobiit kotook poisyosyegap Kamuktaindet eng' ineendet. 4Kanyool keyai poisyosyegap ineendet ne ki iyookwo, kota ko peet: nyoonei kemout, ye ma komuuchi chii kobois. 5#Mat 5.14; Jhn 8.12 Ye ta ami, ko aa lapkeiyetap ng'wony.” 6Ye kingo kagomwa ko uu nooto, kong'utyi ng'ung'unyek, ak kotangwar, ak koilee konyekyik ng'ung'unyechooto, 7ak koleenji, “Ui iunde eng' tamboiyotap Siloam” (ye kiweech keele, “Kiyookto”). Ki wo anyun, ak koun, ak konyo kogeertoi.
8Ki mwa anyun piigap kokwet, ak che kiga kogeer ineendet eng' tai kole soomindet, kole, “Tos ma ineendet ni ne ki cham kotebyei ak kosoomsei?” 9Kole alage, Ineendet: kole alage, Achicha, ago kerge ak ineendet. Kole chiichooto, Aa ineendet. 10Ki leenji anyun icheek ineendet, Kagiyatita ano konyeguk? 11Kowol kole, “Katangwar ng'ung'unyek chiito ne keguure Jeso, ak koilee konyekyuk, ak koleenjo, ‘Ui Siloam ak iunde.’ Kaawe anyun ak aun, ak ageerte.” 12Ak ki leenji, “Mi ano ineendet?” Kole, “Mangen.”
Koteebsen Pharisaik chii ne ki koraat
13Ki imut icheek chiichooto ki koraat eng' tai, kwo ole mi Pharisaik. 14Ki sabato peetuunooto ye kitangwari Jeso ng'ung'unyek, si koyate konyegap chiichooto. 15koteebee anyun Pharisaik kogeny ineendet kole, katepto ano si igeerte? Ak ki leenji, “Kagoiile konyekyuk ng'ung'unyek che katangwar, ak kaaun, ak kaageerte.” 16Kole alak che po Pharisaik anyun, Ma punu Kamuktaindet chiichi, amu ma riibei sabato. Ago ki le alage, Imuktoi ano chii ne kiptengekyo koyai kaboorunoik che uu chu? Ak ki piit toiyet eng' kwenunnywa. 17Ki leenji anyun kogeny chiito ne koraat, Imwae nee agobo ineendet, amu kayaat konyeguk? Ak ki le, “Maotyo.”
18Ma iyan anyun Yahudik agobo ineendet, kole, ko koraat ak kagogeerto. Koguur sigiigap chiichooto kagogeerto, 19ak koteebe koleenji, “Tos weeriing'wong' ni, ne omwae ole ki kisich ko koraat? Katepto ano si kogeerto nguno?” 20Kowol sigiikyik kole, “Kingen keele weeriinnyo niito, ak kingen keele ki kisich ko koraat: 21ago ma kingen ole katepto si kogeerto nguno; ak ma kingen ineendet ne kayaatei konyekyik: oteebe ineendet; kogoeet; ingomwa ineegei.” 22Ki mwa ng'aleechu sigiikyik, amu ki iywei Yahudik: amu kiga sip kochamyechi Yahudik, kole, ngo ng'aany chii age tugul kole Kristo ineendet, kibeetoi eng' sinagogit. 23Ki mwa anyun sigiikyik amu nooto kole, “Oteebe, amu kogoeet ineendet. ”
24Ki kuur anyun ne po aeng' pichooto chiichooto ki koraat, ak koleenji, “Igoochi Kamuktaindet kalasunet: kingen keele kiptengekyo chiichi.” 25Kowol anyun ineendet kole, “Ngo kiptengekyo chiichooto, ko mangen. Angen kiit agenge, ale, koa koraat, ago ageertoi nguno.” 26Koleenji anyun icheek ineendet, “Kayaun nee? Kayatita ano konyeguk?” 27Kowolji icheek koleenji, “Kaamwaiwok, ama ogas, kalya si omach ogas kogeny? Omache oegu ak okweek kasubikyik?” 28Ak king'emji kuut ineendet kole, “Ii kasubindennyi so? Ago ki kasubigap Musa acheek.” 29Kingen keele kigong'alaalji `Kamuktaindet Musa: ago ma kingen kole po chiichi. 30Kowolji chiichooto icheeget koleenji, “Kwang'ut niito anyun, amu mongen ole punu, ago kagoyat konyekyuk. 31Kingen keele ma kasei Kamuktaindet kiptengeginik: ago ngo lasu chii age tugul Kamuktaindet, ak koyai magennyi, kogasei ineendet. 32Kobooch ngetoi ng'wony koma ki kas keele ki yaat chii konyegap chiito ne ki kisich ko koraat. 33Nda ma punu Kamuktaindet chiichi koma koi imuuch koyai kiy.” 34Kowolji ineendet koleenji, “Ki kisikten iman tengekwogik, ak ineetech?” Ak ki toorta ineendet kwo saang'.
Koneeti Jeso agobo koraatet ne po oriit
35Ki kas Jeso kole kagetoorta ineendet kwo saang'; ak kingo nyoor ineendet, koleenji, “Tos iyani Weeriitap Kamuktaindet?” 36Ak ki wol kole, “Ng'oo nooto, Kiptaiyat, si kobiit ayan ineendet?” 37Koleenji Jeso, Kaigeer ineendet ak ko ineendet ni ng'alaali kobooten. 38Ak ki le, Kiptaiyat, ayani. Ak kogutung'ji kolas ineendet.
39Ak ki le Jeso, “Ki anyoo ng'wonyuni amu kirwooget, si kobiit kogeerto che ma keertoi; ak kogoryo che keertoi.” 40Ki kas tuguuchuuto alak che po Pharisaik che ki mi kobooto ineendet ak koleenji, “Ki koryotin agacheek?” 41Koleenji Jeso, “Nda oo koryotiin okweek, ta motinye tengek; ago nguno omwae ole, ‘Kigeertoi’ nooto anyun, tebyei tengektong'wong'.”
Currently Selected:
JOHANA 9: KALDC
Highlight
Share
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
