JOHANA 8

1Ago ki wo Jeso tulweetap Mseituni. 2Ak kimus karon konyo Hekaluut, ak ki pwa piik tugul ole mi ineendet; ak ki tep ng'wony, koneet icheek. 3Ak ki imut siriik ak Pharisaik kobogoryot ne ki kinamji ibeetapkei; ak ye kingo kaginde kwenut, 4keleenji, “Kaneetindoni, kaginam kobogoryondoni eng' ibeetapkei, kota komi ibeetapkei. 5#A.La 20.10; NKNg'a 22.22-24 Ki ng'atech Musa eng' Ng'atuutyet kole, Kilage koik ne uu niito: ara ileen nee inyee?” 6Ki mwaei ng'olyoondoniito kotyemei ineendet, si kosich kiit ne kitaame. Ago ki ing'uruuk Jeso, kosir ng'wony eng' mornennyi. 7Ago ye kingo ta koteepse ineendet, kotonon, ak koleenji, “Ingotoi ne ma tinye tengek eng' okweek kowiir eng' koita.” 8Ak ki ing'uruuk kogeny kosir ng'wony eng' mornennyi. 9Ak ye kingo kas icheek ng'olyoondonooto, komanda kobee agenge agenge, kobooch ne oo agoi ne po let: ak ki ng'et Jeso ineegei, ak kobogoryondonooto eng' ole ki mi, kotononi eng' kween. 10Kotonon Jeso anyun ak koleenji, “Kobogoryondoni, mi ano icheek? Ma igikyin chii?” 11Ak ki le, “Ma igiikyo chii, Kiptaiyat.” Ak ki leenji Jeso, “Ma kiikyinin agane, ui anyun; kobooch nguno, koma tata iyai tengek.”

Lapkeiyet ne po ng'wony

12 # Mat 5.14; Jhn 9.5 Ki mwachi Jeso anyun icheek kogeny, koleenji, “Aa lapkeiyet ne po ng'wony: ineendet ne isuba ko ma wendoti eng' mesundeito, ago nyooru lapkeiyetap saboondo.”

13 # Jhn 5.31 Koleenji anyun `Pharisaik ineendet, “Ibaoryanjinigei; ma po iman paornateng'ung'.” 14Kowolji Jeso koleenji, “Agot ngabaoryanjinigei, ko po iman paornatennyu; amu angen ole abunu, ak ole awendi; ago mongen ole abunu, anan ole awendi. 15Orwoochi ko uu mageetap poorto; marwookyini chii anee. 16Ee, agot ngarwoch, ko po iman kirwoogennyu; amu ma mi aneege, ago kimi ak Kwanda ne ki iyookwo. 17Ee, ak ki kisir eng' Ng'atuutyeng'wong' keele, po iman paornateetap piik aeng'. 18Aa ineendet ne abaoryanjinigei, ak paoryanjino Kwanda ne ki iyookwo.” 19Koleenji anyun icheek ineendet, “Mi ano Kwandang'ung'?” Kowol Jeso kole, “Mongeno, anan Abba. Nda ki konaa, ta ki ongen Abba agine.”

20Ki mwa ineendet ng'aleechu eng' ole kigonoree silingisyek, ye ki ineetisyei eng' Hekaluut: ak ma nam chii ineendet; amu kitom koit sainnyi.

Kateunoik agobo peetuusyek che pwanei

21Ki mwachi anyun icheeget kogeny, koleenji, “Awendi, ak tuun ocheeng'a, ak obegu eng' tengektong'wong': ole awendi, ko momuuchi obwa.” 22Ki le anyun Yahudik, Tos pargei, amu mwaei kole, “Ole awendi, ko momuuchi obwa?” 23Ak ki leenji, “Oo po oli po ng'wony, aa po parak: oo po ng'wonyuni; ma po anee ng'wonyuni. 24Nooto kaamwaiwok, ale, obegu eng' tengekwogikwok: amu ngo moyuani ole aa ineendet, obegu eng' tengekwogikwok.” 25Ki leenji anyun icheek ineendet, “Ii ng'oo?” Koleenji Jeso, “Nooto ki amwaiwok kobooch taunet. 26Atinye tuguuk che chaang' che amwae ak che arwoochi agobo okweek: ago po iman ineendet ne ki iyookwo; ak amwachini ng'wony tuguuk che ki agas eng' ineendet.”

27Ago ma iguiyo kole mwachin agobo Kwanda. 28Ki leenji Jeso anyun, Ye kaouite Weeriitap chii, onai anyun eng' peetuunooto ole aa ineendet, amayae kiy aneege, ago amwae tuguuchu ko uu ye ki ineeta Kwanda. 29Ak kimi tuwai ak ineendet ne ki iyookwo; ma pagaakta aneege; amu ayae kotugul tuguuchooto chamaksei eng' ineendet. 30Ak ye kita komwaei tuguuchu, koyan ineendet che chaang'.

Kocheerei `Jeso Yahudik

31Ki leenji Jeso anyun Yahudichooto kiga koyan ineendet, Ngot otebye okweek eng' ng'olyoondennyu, ko oo kasubikyuk iman; 32ak onai imanda, ak kotyachak imanda. 33#Mat 3.9; Luk 3.8 Kowolji icheek ineendet koleenji, “Ki kesweegap Abraham, ak tomo keegu otwogigap chii age tugul ole kinye kora. Imwaitoi ano anyun ile, ‘Kityaachok?’ ” 34Kowolji Jeso koleenji, “Amwaiwok, iman, iman, ale, age tugul ne yaei tengek ko otwogindetap tengek. 35Ak ma tebyei otwogindet eng' koot koigeny; tebyei weeriit koigeny. 36Ngo tyachak anyun Weeriit, ko otyagotin iman. 37Angen ale oo kesweegap Abraham; ago ocheeng'e obara, amu ma tinyei ng'olyoondennyu ole tebee eng' okweek. 38Amwae tuguuk che ki ageer eng' Abba: ak oyae tuguuchooto ki ogas eng' kwandang'wong'.”

39Kowolji koleenji, “Kwandanyo ko Abraham.” Koleenji Jeso, “Nda ki oo lagogap Abraham, ta ki oyae poisyosyegap Abraham. 40Ago ngo ocheeng'e obara, chiito ne kamwaiwok ng'aleek che po iman, che ki agas eng' Kamuktaindet: ki ma yai ko uu nooto Abraham. 41Oyae poisyonik che po kwandang'wong'.” Ki leenji anyun ineendet, “Ki ma kisichech eng' sokseet; ki tinyei Kwanda agenge, nooto ko Kamuktaindet.” 42Komwachi Jeso icheek koleenji, “Nda ka Kwandang'wong' Kamuktaindet, ta kaochama; amu ki anyoo abunu Kamuktaindet. Ki ma anyoo aneege, ago ki iyookwo ineendet. 43Amu nee si monai chooto amwae? Amu momuuchi ogas ng'olyoondennyu. 44Oo po kwandang'wong' chesawilyet, ak ochame oyai magutigap kwandang'wong'. Ki rumiindet kobooch taunet, ama tononi eng' imanit, amu ma mi imanit eng' ineendet. Ye mwaei lembech, komwaei agobo tuguukyik, amu kiplembechwa ineendet ak kwanda ne po nooto. 45Ago moyana amu amwae imanit. 46Ng'oo eng' okweek ne igiikyino kole atinye tengek? Ngot amwae imanit, ko amu nee anyun si moyana? 47Ineendet ne po Kamuktaindet kogasei ng'aleegap Kamuktaindet: nooto anyun mogase okweek, amu mo po Kamuktaindet.”

Jeso ak Abraham

48Kowolji anyun Yahudik koleenji, “Ma kimwae acheek iman keele, ii Samarindet, ak itinye oindet?” 49Kowol Jeso kole, “Ma tinyei oindet; ago agonyiti Abba, ak oteweera. 50Ago ma cheeng'e toroornatennyu: miitei agenge ne cheeng'ei ak korwoochi. 51Amwaiwok, iman, iman, ale, ngo riip chii ng'olyoondennyu koma keerei meet agoi.” 52Koleenji anyun Yahudik, “Kingen nguno keele itinye oindet. Ki kome Abraham, ak ki kobek maotik; ak imwae ile, ‘Ngo riip chii ng'olyoondennyu, koma chamchami meet agoi.’ 53Tos ii oo isiir kwandanyo Abraham, ne ki kome? Ki kobek maotik. Iyaegei iegu ng'oo?” 54Kowol Jeso kole, “Ngot atoroorige, ko puch toroornatennyu. Kwandanyu ne itoroora; ne omwae ole, ‘Ineendet ko Kamuktaindet neng'wong',’ 55ak tomo onai ineendet. Ago angen ineendet; ak ngot amwa ale, mangen ineendet, aegu kiplembechwa, ko uu okweek: ago angen ineendet ak ariibe ng'olyoondennyi. 56Ki paibai kwandang'wong' Abraham kogeer peetuunnyu; ak ki keer, ak kogaskei.” 57Koleenji Yahudik anyun, “Tom iit kenyiisyek konom, ak ki igeer Abraham?” 58Koleenji Jeso, “Amwaiwok, iman, iman, ale, Kingo tomo kobiit Abraham, ami.” 59Ki inem anyun koik komachei kowiire ineendet: ago ki unygei Jeso, ak komanda eng' Hekaluut.

Currently Selected:

JOHANA 8: KALDC

Highlight

Copy