Keriben 28
28
XXVIII
O Bišuoxtoto Šero
1He kana pes savore ikerde ǧiden, prinǧārde, kaj i pāñeskri phuv bučol Melita.
2He o divle manuša ehas but lāče k’ amende; kerde jag, he kana perelas brešind he ehas šilālo l’ile sakones amendar ke peste.
3He pales, kana o Pavlos kediñas kašta phandle jekhethāne, he thod’as len pro jag, avl’as jek sap kathar o tāt’ipen, he l’il’as leskro vast.
4He kana o divle manuša dikhenas kaj o drabeskro sap ehas umlado leskre vastestar, vakerde maškar peste, Čāčes akadava manuš mudārel. Ikerd’as pes kathar o bāro pāñi, uva o čāčipen les na mukel t’avel ǧido.
5Čhivrdiñas e sapes, he pēl’as andro jag. Na ikerd’as i dukh.
6He jon užārenas, kaj sik avela phosado, vaj sik merela. He kana but dikle, he i dukh les n’avelas, ehas aver gōd’aha, he phende, kaj ehi Devel.
7Pr’akada pāñeskri phuv ehas jek rajkāno kher, he o raj bučolas Publios. Jov amen l’il’as ke peste, he trin d’ivesa diñas amenge pharpalipen.
8He o Publioskro dad ehas nasvālo e tāte rateha, he leskro rat ǧalas avri lestar. O Pavlos gēl’as andre ke leste, he mangelas pes, he thod’as peskre vasta pre leste, he sast’ārd’as les.
9He kana adava ehas kerdo, o aver manuša pr’ada phuv, have ehas nasvāle, avle, he ehas sast’ārde.
10He jon amen hašārenas but, he kana amen gēl’am avri lendar, thode pr’amende savoro, so kamahas.
11He pal trin čhon, amen gēl’am andr’ek Aleksandroskā pāñengri, so terd’il’as savoro jivend pre pāñeskri phuv, he lakro nav ehas Kastoris he Poluksos.
12He amen avl’am pre Sirakuskā phuv, he bešl’am trin d’ivesa odoj.
13He odotar gēl’am pašal, he avl’am andro Regiumos, he pal jek d’ives i balval phurdelas kathar o khameskro koter, he tajsa gēl’am andri Puteoli.
14Odoj rakl’am e phralen, he jon mangenas amen, te bešas efta d’ivesa maškar lende; he pales phird’am ki Rima.
15He odotar, kana o phrala šunde, kaj amen samas odoj, avle k’amende až’andro Apioskro Foros he o Trin Xabnaskre Khera, he kana len o Pavlos dikl’as, parikērd’as mre Devleske, he ehas zorāleder andro jilo.
16He kana avl’am andri Rima, o šelengro diñas e phandle manušen e Najbāreder Lurdeske, he mukl’as e Pavlos te bešel korkoro, he ehas lentsa jek lurdo, havo les ikerelas.
17He avl’as auka, kaj pal trin d’ivesa o Pavlos vičind’as e najbāreder manušen maškar o bibolde t’aven jekhethāne. He kana pēle ke peste, phend’as lenge, Manuša, phrala, me na kerd’om mamuj o ǧene, he mamuj o phurāne keribena amāre dadengre, uva jon man thode, phandles kathar i Jeruzalema, andro Rimanengre vasta.
18He kana jon pes mandar savoro phučle, kamenas te man muken te ǧav, odoleske, kaj na has andra mande či, te man našaven.
19He kana o bibolde vakerde mamuj odova, me našt’i keravas aver, he irind’om man ko Thagār. Me na kamavas te vakerav či mamuj peskre manuša.
20Odoleske me tumen vičind’om t’aven ke peste, kaj te tumen dikhav, he te vakerav tumentsa, odoleske kaj me som phandlo adale sastrentsa vaš odova, so užārel o Izraelis.
21He jon phende leske, Amen na l’il’am o l’ila pal tute kathar i Judea, he ñiko maškar o phrala, have avle, na vakerelas bilāčes pal tute.
22Amen kamas te šunas tutar, so ehi andri tri gōd’i. Amen ǧānas, kaj vakeren andri sako phuv mamuj adala phrala.
23He kana leske phende jek d’ives, avle but manuša ke leste andro leskro kher. Sikavelas he sikl’ārelas pal i Devleskri phuv, he paruvelas lengro jilo, kana vakerelas pal o Ježišis kathar o Mojžišiskro Bāro Lav, he kathar o Devleskre Manušengre l’ila, he vakerelas a rat’astar andre rat.
24He varehave pat’anas so vakerelas, he varehave na pat’anas.
25He kana jon na has jekha gōd’aha, gēle avri, kana o Pavlos phend’as jek lav, Lāčes vakerd’as o devleskro Vōd’i preko Izajāšis, o Devleskro Manuš amāre dadengro,
26G’an k’ada manuša! Phenen auka, Tumen šunena, he na xal’ovena; tumen dikhena, he na prinǧārena.
27O jilo adale manušengro ehi bilačārdo, he lengre kana ehi kašuke, he jon phandle peskre jakha, odoleske kaj na kamen te dikhen peskre jakhentsa, he te šunen peskre kanentsa, he te xal’oven peskre jileha, he na kamen t’aven bolde, he na kamen mandar, kaj te len sast’ārav.
28G’ānen odoleske! kaj o Devleskro sast’ipen ehi bičhado e gāǧenge, he jon šunena o lav.
29He pales, kana vakerd’as adala lava, o bibolde gēle avri, he vakerde but maškar peste.
30He o Pavlos bešelas duj berš andro peskro užlo kher, he lelas savoren ke peste, have avle te les dikhen.
31He vakerelas pal mri Devleskri phuv, he e zorāle jileha sikl’ārelas pal savori mre Rajeskri Ježišiskri Kristoskri būt’i, he ñiko les na ikerelas.
Currently Selected:
Keriben 28: MOR1936
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1936.
