Lizsij dih Gaihcij 20
20
Yaqbwzlahhanj bae Gihlah'wj
1Gajlaeng, Yaqbwzlahhanj caiq daj byozfaex Manqliq buen bae Gyahnamz hih mbiengj baixnamz mwnq gansauq he, bae daengz mwnq Gyahdihswh caeuq Cuh'wj hih cungqgyan he, mwnq heuh Gihlah'wj he, camqciz youq. 2Youq mwnq youq le, de doiq gij vunz mwnq naeuz mehyah de Sajlah dwg dahnuengx de lah. Yiengq goengjvuengz Gihlah'wj Yaqbijmijlwz caemh mij rox song boux de hih cingqcaen gvanhaeh, couh baij vunz bae daiq Sajlah ma, siengj aeu de ma guh yah.
3Yiengq miz ngwnz he, Cangqdiq hawj goengjvuengz Gihlah'wj Yaqbijmijlwz fangxngwnzloq; youq ndaw loq Cangqdiq doiq de naeuz: “Mwngz hax, hab rai luh! Mwngz aeu ma hih dah vunzbaz mwnq hax, de gaenq miz gvan lo.”
4-5Aenvih Yaqbijmijlwz mijyaengz ndaej yaek haeuj laeng dah de bae haem, sojlaiz de couh doiq Cangqdiq naeuz: [5]“Cangqdiq hax, boux mwnq de gag naeuz dah vunzbaz mwnq dwg dahnuengx de vwz, daiqlienz bonjfaenh dah de cungj caemh gag naeuz: ‘De dwg daeggo gou.’ Sojhij gou naemj gou guh hih gienh saeh neix dwg doiq ndaej hwnj liengzsim dih. Cangqdiq hax, gou caeuq gij vunz gou cungj mij guh loek, cungj mij'z coih haem; [4b]mwngz cungj ij hawj raeuz rai bae haz?”
6Cangqdiq caiq youq ndaw loq han de naeuz: “Gou rox hah, gou rox mwngz guh hih gienh saeh neix dwg doiq ndaej hwnj liengzsim hah, sojlaiz gou cij mij hawjm'z yaek haeuj laeng dah de bae, caemh mij ngaiz daekcoih daengz gou. 7Seizneix mwngz ij daiq dah mwnq maj hawj goeng de boiz. Goeng de dwg boux cenz gij vah gou he. Yiengq, goeng de couh bang mwngz gouz gou; gou couh mbouj hawj mwngz ngaiz rai. Hoeng, hauhnaeuz mwngz mbouj daiq dah mwnq maj boiz hawj goeng de boiz nex, mwngz caemh gag rox, mwngz caeuq gij vunz mwngz cungj ngaiz rairaeg bae.”
8Daengz haet daixngeih daihcaeux, Yaqbijmijlwz hwnq le, couh hawj gyoengq vunz gaen henz ndang de daeuj doxcomz, naeuz gyoengqde ni gij saeh ndaw loq de. Gyoengqde dingq le, cungj lau hwj ij rai bae. 9Gajlaeng Yaqbijmijlwz hawj Yaqbwzlahhanj daeuj, gvaiq de naeuz: “Mwngz vihmaz ij yienghneix doiq gou! Gou miz maz daekcoih mwngz, guh hawj gou caeuq gij vunz gou souh coih gajlaeng hangx mwngz! Mwngz guh hih gij saeh neix daiq ya lai luh.” 10De caiq saek naeuz: “Mwngz yienghneix guh ndaej gijmaz mwngz nex?”
11Yaqbwzlahhanj han de naeuz: “Gou naemqnaeuz gij vunz dieg neix mbouj lau Cangqdiq, ij gaj gou, ciengj aeu mehyah gou; gou cij yienghneix guh lah. 12Gizsaed hax, mehyah gou Sajlah caemh cingqcaen dwg dahnuengx gou nej, cijmboujgoq de caeuq gou dwg doengz boh mbouj doengz meh hwj lah; gajlaeng de cij haq hawj gou guh yah lah. 13Mwh Cangqdiq hawj gou biek ranz boh gou bae liuzlangq hih mwhde, gou gaenq raengq de goq naeuz: ‘Mboujguenj raeuz bae daengz mwnqlaw, mwngz cungj ij naeuz gou dwg daeggo mwngz, yiengq couh dwg naeuz mwngz ndiep gou lo,’ gij vah neix.”
14Yaqbijmijlwz dingq de yienghneix gangj le, couh soengq yiengz hah, cwz hah, caeuq vunzhoiq hah hawj Yaqbwzlahhanj, caemhcaiq daiq mehyah de daeuj hawj de boiz. 15Gajlaeng, Yaqbijmijlwz doiq Yaqbwzlahhanj naeuz: “Mwngz bae byaijbyaij yawjyawj gij dieg gou goqdoh bae; mwngz ij haenj youq mwnqlawz youq cungj ndaej, youzcaih mwngz aiq.” 16De caemhcaiq doiq Sajlah naeuz: “Gou hawj daeggo mwngz ngeihsam gaen#20:16 Dineix ndaw yienzvaenz dwg naeuz ‘itcien seqgwzlwz.’ Seqgwzlwz couh dwg mwhde dih cungqliengq danhveiq; it seqgwzlwz daengjhih 11.4 gwz. hih ngaenz; gij ngaenz neix ndaej hawj mwngz youq dangqnaj vunzlai guh baengzgawq, cingqmingz mwngz mij guh gij saeh saetnaj he.”
17-18Gaxgonq, Yehhozvaz vih mehyah Yaqbwzlahhanj ngaiz souh daengz gij saeh neix, de couh hawj Yaqbijmijlwz caeuq mehyah de, daiqlienz gij vunzbaz ndaw vangzgungh de cungj mbouj ndaej miz lwg. [17]Gajlaeng, Yaqbwzlahhanj couh gouz Cangqdiq; Cangqdiq couh dapwngq de, yw ndei Yaqbijmijlwz caeuq mehyah de, caeuq gij vunzbaz ndaw vangzgungh, hawj gyoengqde ndaej miz lwg.
Currently Selected:
Lizsij dih Gaihcij 20: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
