Lizsij dih Gaihcij 21
21
Sajlah laux ndaej fuk
1Yehhozvaz Cangqdiq cojgvaq Sajlah, caemh hengz gaxgonq de dapwngq hawj Sajlah miz lwg. 2Yiengq Sajlah caemh cingqcaen mizndang lo, caemh cingqcaen daengz mwh Cangqdiq naeuz hih mwhde, gannaeuz Yaqbwzlahhanj gaenq laux liux lo, hoeng vanzlij miz daeglwg he hawj de. 3Yaqbwzlahhanj couh an coh hawj laeq lwg neix heuh Hijsaj.
4Hijsaj seng okdaeuj ndaej daengz daixbet ngoenz le, Yaqbwzlahhanj couh ciuq Cangqdiq dingh hih gveihdingq hawj de gozlij. 5Seng Hijsaj hih mwhde, Yaqbwzlahhanj ndaej bak bi.
6Gajlaeng, Sajlah naeuz: “Cangqdiq sawjhawj gou angq riu; famz dingqri daengz gienh saeh neix hih vunz cungj caemh caeuq gou angq hwj riu.” 7De caiq naeuz: “Miz byawz ndaej sien rox sien naeuz Yaqbwzlahhanj ni naeuz: ‘Sajlah ndaej miz lwg’ gij vah neix nex? Seizneix gou gingqyienz daengz de laux le ndaej seng miz daeglwg he hawj de.”
Yaqgyaz caeuq Hijsizmajliq ngaiz boenq deuz
8Laeq lwg neix ciemh ngoenz ciemh hung, ndaej daengz geknauq lo. Daengz ngoenz geknauq he, Yaqbwzlahhanj couh loengh laeuj cingj hek, loengh hwj cienfanh hoengh he. 9Couh youq ngoenz mwnq, Sajlah yawjraen Hijsizmajliq cix yex cix riu daeglwg de. (Hijsizmajliq couh dwg daeglwg Yaqgyaz, vunz Ngaihgiz, seng hawj Yaqbwzlahhanj he.) 10De yawjraen yienghneix le, couh ndatheiq hwj doiq Yaqbwzlahhanj naeuz: “Mwngz boenq dahhoiq neix caeuq daeglwg de deuz bae! Mbouj ndaej hawj daeglwg dahhoiq neix caeuq daeglwg gou doxcaeuq ciep aeu gij gyadangq mwngz law.”
11Yiengq Yaqbwzlahhanj couh vih gienh saeh neix hwj simnyap ij rai bae, aenvih Hijsizmajliq caemh dwg daeglwg de hah. 12Hoeng, Cangqdiq vued Yaqbwzlahhanj naeuz: “Mwngz gaejyungh vih daeglwg neix caeuq Yaqgyaz dahhoiq neix causim; mwngz caenh ciuq Sajlah naeuz hih yienghmwnq bae guh sat lo. Fanjcingq dwg Hijsaj, daeglwg neix, seng hih lwg cij suenq dwg doengh daih gajlaeng mwngz. 13Gajlaeng daeglwg dahhoiq neix, gou caemh gaengjdingq ij hawj doengh daih gajlaeng de bienqbaenz aen guek hung he, aenvih de caemh dwg mwngz seng he.”
14Couh yienghneix, daengz haet daixngeih daihcaeux, Yaqbwzlahhanj couh dawz bingj caeuq daehnaeng raemx he daeuj beq hwnj gwnz hongzmbaq Yaqgyaz bae hawj de, caiq daiq laeq lwg de daeuj hawj de, hawj de deuz lo. Deuz le, gajlaeng Yaqgyaz youq rogndoi Bezciqbah byaij bae byaij dauq, mbouj rox hih ij bae mwnqlaw, 15daeh raemx de caemh gw liux lo. Yiengq de couh dawz laeq lwg de coengq youq laj go faex hwj, 16bonjfaenh de couh gag byaij bae liz laeq lwg de aiq miz saek bak baj yamq gyae baenzneix, couh naenghnag roengzma, gag naeuz: “Gou mbouj nyienh yawj laeq lwg neix couh yienghneix ngaiz rai bae law!” De cungj siengsim hwj naengh youq mwnq coengq sing daej engxengx.
17Gajlaeng, Cangqdiq dingqri laeq lwgngez mwnq daej, yiengq bouxcai Cangqdiq couh dajlwh gwnzmbwn heuh Yaqgyaz naeuz: “Yaqgyaz hax, Yaqgyaz! Mwngz guxmaz daej vauxvaux lah? Gaej lau; Cangqdiq gaenq dingqri laeq lwg mwngz daej lo. 18Vaiqdi hwnq! Bae umj laeq lwg mwngz. Gou gaengjdingq hawj doengh daih gajlaeng de fat lai hwj bienqbaenz aen guekgya hung he.” 19Bouxcai gangj doengh gawq neix sat le, Cangqdiq couh hawj Yaqgyaz yawjraen aen cingjraemx he. De couh majcangq dawz aen daehnaeng coux raemx de bae coux raemx ma hawj daeglwg de gw.
20Couh yienghneix, Cangqdiq siengzseiz baujyouh laeq lwgngez neix; laeq lwgngez neix caemh ciemh ngoenz ciemh hung. De youq rogndoi Bahlanz youq, caemh dwg boux dwk naqgung remrem he. 21Daxmeh de caemh aeu dah lwgsau vunz Ngaihgiz he hawj de guh yah.
Yaqbwzlahhanj caeuq Yaqbijmijlwz doxdingh
22Miz baez he, goengjvuengz Gihlah'wj Yaqbijmijlwz caeuq boux gywnhcangj de Feihgoz bae cimh Yaqbwzlahhanj. Gyoengqde doiq Yaqbwzlahhanj naeuz: “Mboujguenj mwngz guh gijmaz, Cangqdiq cungj baujyouh mwngz, soengq fuk hawj mwngz. 23Sojhij gou seizneix muengh mwngz youq dangqnaj Cangqdiq doiq gou baujcingq, baujcingq baezneix mwngz mbouj yaeuh gou caeuq gij lwg gij lan doengh daih gajlaeng gou. Gou baenzlawz doiq mwngz ndei, mwngz caemh ij baenzlawz doiq gou caeuq gij vunz dieg mwngz seizneix doz youq he ndei.”
24Yaqbwzlahhanj han naeuz: “Ndaej hah, gou nyienh'eiq baujcingq.” 25-27De yienghneix naeuz le, couh soengq cwz, soengq yiengz hawj Yaqbijmijlwz, yiengq song boux de couh doxdingh lo.
[25]Couh youq soengq hih mwhneix, Yaqbwzlahhanj ngeix daengz gaxgonq de naeuz goq Yaqbijmijlwz geij mbat, naeuz: “Bouxhoiq mwngz ciemq aeu aen cingjraemx gou,” [26]hoeng, Yaqbijmijlwz mbatmbat cungj doi naeuz: “Gou cungj mij rox gij saeh neix haem! Dwg byawz guh hih saeh nex? Mij vunz naeuz gou ni haem. Mwngz vihmaz mbouj naeuz gou ni vaiqdi nex? Seizneix mwngz naeuz le, gou cij rox.” 28Yiengq Yaqbwzlahhanj soengq daeuj hih mwhde, de couh dawz caet duz yiengzcohlwg linghvaih coengq youq lingh gok hwj.
29Yaqbijmijlwz raen le, couh cam naeuz: “Mwngz dawz caet duz yiengzcohlwg linghvaih coengq hwj, dwg gijmaz iqswh nej?”
30Yaqbwzlahhanj han naeuz: “Cingj mwngz sou caet duz yiengzcohlwg neix; sou caet duz neix le, couh dwg cingqmingz naeuz mwngz gaenq nginh aen cingj ngaiz ciemq aeu mwnq dwg aen cingj gou lo.” 31Yiengq de couh an mwnq dieg mwnq heuh Bezciqbah, aenvih song boux de youq mwnq doxdingh baujcingq. (‘Bezciqbah’ couh dwg ‘baujcingq dih cingj’ dih iqswh.)
32Couh yienghneix, song boux de youq Bezciqbah doxdingh doxhanh lo. Dingh ndei le, Yaqbijmijlwz caeuq boux gywnhcangj de Feihgoz maj mwnq dieg Feihliqswq vunz mwnq lo. 33Yiengq Yaqbwzlahhanj youq Bezciqbah ndaem go faex hunghung he, caemh youq mwnq gingqbaiq Yehhozvaz, seiqseiz lix dih Cangqdiq. 34Yaqbwzlahhanj youq dieg miz Feihliqswq vunz youq he doz youq baenx haujlai caez.
Currently Selected:
Lizsij dih Gaihcij 21: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
