Lizsij dih Gaihcij 22
22
Yaqbwzlahhanj dingq Cangqdiq
1Gij saeh neix goq le, Cangqdiq ij sawq Yaqbwzlahhanj, yiengq de couh heuh Yaqbwzlahhanj naeuz: “Yaqbwzlahhanj!”
Yaqbwzlahhanj han naeuz: “Aex, gou youq dineix.”
2Cangqdiq couh naeuz: “Mwngz daiq daeglwg mwngz, couh dwg daeglwg dog mwngz, caemh dwg mwngz ceiq ndiep ceiq aiq hih Hijsaj, daiq de bae dieg Mohliqyaq. Bae daengz mwnq le, gou yinx aen bya he naeuz mwngz ni, hawj mwngz daiq de bae mwnq, aeu de ma coemh hwj bwiz gou.”
3 Yaqbwzlahhanj dingq le, caemh ciuq Cangqdiq raengq hih yienghmwnq bae guh. Doengxhaet daihcaeux hwnq daeuj le, couh ying duz lawz okdaeuj, caiq heuh song boux vunzhoiq caeuq daeglwg de daeuj, caiq bae bag liu. Yienghyiengh cungj cwnjbiq ndei le, couh caezgya okdin yiengq mwnq dieg Cangqdiq hawj de bae he bae lo. 4Bae daengz daixsam ngoenz le, Yaqbwzlahhanj daj lizgyae couh yawjraen mwnq dieg mwnq. 5De couh doiq song bouxhoiq de naeuz: “Faenhsou caeuq duz lawz youq dineix daengj, daengj gou caeuq daeglwg gou bae mwnq baex baiqbaiq he gaenq, di haem cij ma.”
6Raengq sat le, de couh dawz gij liu hawj daeglwg de gwed; bonjfaenh de cix dawz gyoqfeiz caeuq cax. Couh yienghneix, bohlwg vunz couh hwnj bya bae noengxnoengx lo. 7Bae le, Hijsaj heuh daxboh de naeuz: “Boh hax boh!”
Yiengq Yaqbwzlahhanj han naeuz: “Aex, lwg hax, guxmaz lah!”
Hijsaj han naeuz: “Gyoqfeiz caeuq liu cungj miz lo, hoeng, duz yiengz ij coemh hwj dajbwiz he nej?”
8Yaqbwzlahhanj han naeuz: “Lwg hax, duz yiengz coemh hwj dajbwiz he, Cangqdiq de gag cwnjbiq miz hawj nex; raeuz mboujyungh you.” Song boux de yienghneix mwngz gawq gwh gawq caemh vanzlij dwg giqcuz ganjroen.
9Gajlaeng song boux de bae daengz gwnz bya. Daengz mwnq Cangqdiq yinx naeuz Yaqbwzlahhanj ni he le, de couh youq mwnq caeb aen daiz dajbwiz he. Caeb ndei le, couh dawz liu baij hwnj gwnz daiz de bae, caiq dawz daeglwg de goenj hwnjdaeuj, coengq hwnj gwnz liu bae. 10Coengq ndei le, de couh dawz cax yingx hwnjdaeuj ij gaj daeglwg de. 11Couh youq mwhneix, bouxcai Yehhozvaz daj gwnzmbwn hemq de naeuz: “Yaqbwzlahhanj! Yaqbwzlahhanj!”
Yaqbwzlahhanj han naeuz: “Aex, gou youq dineix!”
12Bouxcai naeuz: “Mwngz mbouj ndaej doengh fawz gaj daeglwg mwngz. Seizneix gou rox mwngz dwg boux dingq gij vah Cangqdiq caeuq sinq Cangqdiq he hih vunz lo, aenvih mwngz daiq daeglwg dog mwngz cungj sijndaej aeu hawj de.”
13Yaqbwzlahhanj dingq daengz neij le, couh ngiengx raeuj hwnjdaeuj muenghyawj, sawqmwh yawjraen miz duz yiengzdaeg he, song gij gok de ngaiz dap youq ndaek caz oen he mbouj ndaej ok ma. Yiengq de couh bae gej aeu duz de ma dingj daeglwg de coemh hwj guh dajbwiz. 14Vih yienghneix, Yaqbwzlahhanj couh an mwnq dieg mwnq heuh Yehhozvaz-Hijlwz. (‘Yehhozvaz-Hijlwz’ dih iqswh couh dwg ‘Yehhozvaz itdingh cwnjbiq ndei.’) Itcig daengz seizneix, gij vunz lij riengz naeuz: “Youq gwnz bya Yehhozvaz de gag cwnjbiq miz hawj.”
15Bouxcai Yehhozvaz caiq daj gwnzmbwn hemq Yaqbwzlahhanj mbat daixngeih naeuz: 16“Yehhozvaz naeuz: ‘Aenvih mwngz daiq daeglwg dog mwngz cungj sijndaej aeu hawj gou, sojhij gou gamj aeu gij mingh gou ma baujcingq, 17gou bietdingh soengq fuk hawj mwngz, hawj doengh daih gajlaeng mwngz fat lailai hwj, fat lai luj gij ndaundeiq gwnzmbwn, luj anjsa henz haij yienghmwnq lai. Gyoengqde caemh ndaej hoenxhingz dizyinz ciemq aeu aen singz gyoengqde. 18Lajmbwn sojmiz hih minzcuz cungj dwg dajlaeng doengh daih gajlaeng mwngz hih boux he ndaej miz fuk, aenvih mwngz dingq gij vah gou.’”
19Bouxcai gangj doengh gawq neix sat le, Yaqbwzlahhanj couh dauq ma daengz song bouxhoiq mwnq. Gyoengqde couh itheij maj Bezciqbah, couh dwg Yaqbwzlahhanj doz youq hih mwnq dieg mwnq.
Doengh daeglwg Nazhoq
20Gij saeh neix goq le, miz vunz naeuz Yaqbwzlahhanj ni beixsauj de Mizgyah caeuq daeggo de Nazhoq caemh miz geij daeglwg lo. 21Daegdaeuz dwg Uhswh, gajlaeng daengz Buqswh, daengz Gihmujliq (Gihmujliq couh dwg daxboh Yaqlanz), 22roengz ma daengz Gihceh, Hahsoj, Bizdaz, Izlah caeuq Bijdujliq. 23Gajlaeng Bijdujliq seng Liqbwzgyah dah lwgsau neix. Bet daeglwg neix cungj dwg Mizgyah seng hawj Nazhoq he. 24Meh yahnoix Nazhoq heuh Liuzmaj; de caemh seng miz Dizbaz, Gyahhamz, Dahyaz caeuq Majgyah.
Currently Selected:
Lizsij dih Gaihcij 22: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
