Joannostir 16
16
Džeļ, 16.
1Dava phendžom Me tumenge, sobi tume nalen grehinentumen.
2Vitrādena tumen sinagogendir; te javela brīža, kedi svako, kon domarla tumen, dufinela, so jov dolesa slugini Davleske.
3Jake kērena, vašo dova so nadodžindle ni Dādes ni Man,
4Ne Me phendžom tumenge dava vašo dova, sobi tume, kedi dojavela do brīža, melipiren, so Me phendžom tumenge dolestir; narakirdžom dovo tumenge pšeršumastir, vašo dova so isomas tumensa.
5Ne kana džava ko bičaibnaskīro Mīro, te nikon tumendir naphučela Mandir: kai džasa?
6Ne dolestir, so Me phendžom tumenge dova, smentņumasa pherdandija tumāro dži.
7Ne Me lašņes rakirava tumenge: fididīr vaš tumenge, sobi Me džav; hai keļi Me nadžav. Radipnaskīro najavesa ke tume; ne keļi džava, togi bičavava Les ke tume.
8Te Jov, javindoi, dosikavela svetoske, grehostir te čačipnastir te sendostir:
9Grehostir, so napačana an Mange;
10Čačipnastir, so Me džava ko Dād Mīro, te uže nadikhena tume Man.
11Sendostir, so da svetosko kraļis sendume.
12Oščo būt isi Mange so phenav tumenge; ne tume kana našti pojanen.
13Kedi javela Jov, lašņo Duhos togi lidžala tumen po sāro lašņuma: na Pestir Jov lela rakirel, ne lela rakirel, so šunela, te so jāla kērla tumenge džinibnaskīro.
14Jov proslavini Man, vašo dova so Mīrestir lela te tumenge kērla džinibanaskīro.
15Sāro, so isi Dādeske, isi Mīro; vašo dova phendžom, so Mīrestir lela te kērla tumenge džinibnaskīro.
16Ano signuma tume Man nadikhena, te noko ano signuma tume Man dikhena; hai Me džava ko Dād?
17Doi vār Leskīre sikļaibnangīrendir phendle jek vavreske: so dava Jov rakirla menge: ano signuma tume nadikhena Man, te noko ano signuma tume Man dikhena, te: Me dživa ko Dād?
18Te jake jone rakirdle: so dava rakirla Jov: ano signuma? Nadžinas, so rakirla
19Iisusos, halija, so kamena phučen Les, phendža lenge: dolestir hobi phučena tume jek vavrestir, so Me phendžom: ano signuma nadikhena tume Man, te noko ano signuma tume dikhena Man?
20Lašņes, lašņes rakirava tumenge: tume rovena te henkļinena, ne svetos radinipes; tume jāna smentna, ne smentnuma tumāro ano raduma jāla.
21Džūli, kedi ločakirla, čerpini tuga, vašo dova so javdža lakīri štunda; ne kedi ločkirla tiknes, uže nalipirla tuga radumastir, vašo dova so ločija mānuš ano svetos.
22Jake kana tumenge isi tuga; ne Me dikhava tumen noko, te tumāro dži hotņakirlapes, te raduma tumāro nikon naotlela tumendir.
23Te an do dīves tume naphučena Man nisostir. Lašņes, lašņes rakirava tumenge: sostir feņu pomangena Dādes an Mīro lav, dela tumenge.
24Žin kana tume niso namangle an Mīro lav; mangen, te dolena, sobi raduma tumāro jāl pšečkirdo.
25Žin kana Me rakirdžom tumenge druh dolidžipena; ne javela brīža, kedi uže narakirava tumenge dolidžipnasa, ne mamui kēra džindlo tumenge Dādestir.
26An do dīves tume mangena an Mīro lav, te narakīrava tumenge, so Me lava mangav togi Dādes vaš tumenge:
27Hai samo Dād miļini tumen, vašo dova so tume miļidne Man te pačandīne, so Me vigijom Dēvelestir.
28Me vigijom Dādestir te javdžom ano svetos; te noko mukhava svetos te džava ko Dād.
29Leskīre sikļaibnangīre phendle Leske: dik, kana Tu mamui rakiresa, te dolidžipena narakiresa nisai,
30Kana dikhasa, so Tu džines sāro te načhebi Tuke, sobi kon phučel Tut. Pedava pačasa, so Tu Davlestir vigijan.
31Iisusos otphendža lenge: kana tume pačana?
32Dik, javela štunda, te javdža uže so tume rozdžanatumen svako an peskīri rīg te Man mukhena jedženes; ne Me naisom jek, vašo dova so Dād Mansa.
33Dava Me phendžom tumenge, sobi tumenge jāl an Mange pokoinuma. Ano svetos tumenge jāla tuga; ne kēren tumen muršikane: Me obšelijom svetos.
Currently Selected:
Joannostir 16: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
