San Marcos 4
4
Jesús okixtij sen ejemplo de on tokaketl
(Mt. 13.1-9; Lc. 8.4-8)
1Oksejpa Jesús otemachtij ne itenko on mar. Pampa sanoyej* miyek tlakatl onosentlalij ompa kampa yejua nemiya, Jesús otlejkok ipan sen barco yejuan onkatka ipan on mar, niman onotlalij. On tlakamej nemiyaj atlatenko. 2Niman yejua kinmachtiaya miyek tlajtlamach* ikan ejemplos, niman ijkin kinmijliaya:
3—Xkakikan kuajli tlinon nemechijlis. Sen tlakatl oyaj okixinito xinachtli de trigo. 4Niman seki xinachtli oxinito ipan ojtli, niman on totomej ouajlajkej niman okikuajkej. 5Okseki xinachtli oxinito ipan tepetlayoj kampa xmás onkaj tlajli, niman on xinachtli nimantsin oixuak, pampa xmás uejkatlan onkatkaj on tlajli kampa oxin. 6Pero ijkuak okis on tonaltsintli, okoseu imijlo on trigo. Niman ika xuejkatlan kipiyaya ineluayo, ouajuak. 7Niman okseki xinachtli oxinito intsajlan uitskojtin. On uitskojtin saniman onoskaltijkej niman okixomiktijkej imijlo on trigo. Yejua ika xotlak. 8Pero seki xinachtli oxin ipan kuajli tlajli. Onoskaltij, niman sanoyej kuajli otlak. Seki okitlakitij 30 iteyo, niman seki 60 iteyo, niman seki se ciento iteyo.
9No okinmijlij:
—Tla nemejuamej nenkipiyaj nemotlamachilis, xkajsikamatikan in ejemplo.
Jesús okijtoj tline temachtia ikan ejemplos
(Mt. 13.10-17; Lc. 8.9-10)
10Niman kemaj sakin* ijkuak Jesús sa iselti nemiya inuan on inomachtijkauan* niman sa keski tlakatl, yejuamej okitlajtlanilijkej Jesús para ma kimijli tlinon kijtosneki on ejemplos. 11Yejua okiminnankijlij:
—Nemejuamej Dios yomechkauilij para nenkimatiskej on tlinon iyantikatka* de on kenijki yejua tlamandaroua. Pero on oksekimej nikinmachtia san ikan ejemplos, 12para maski kikakiskej on tlinon nikijtoua, niman kitaskej tlinon nikchiua, xkajsikamatiskej, para maka noyolkuepaskej niman kintlapojpoluis Dios on intlajtlakol.
Jesús okimelajkaijtoj on ejemplo de on tokaketl
(Mt. 13.18-23; Lc. 8.11-15)
13Kemaj okinmijlij:
—Tla xnenkajsikamatij in ejemplo, ¿kenijki nenkajsikamatiskej okseki ejemplos? 14On tlakatl yejuan tlaxinia, on ken on yejuan kiteijlia itlajtoltsin Dios niman on xinachtli ken itlajtol Dios. 15On ojtli kampa ouets on xinachtli sano ijki ken inyojlo sekimej tlakamej yejuan kakij itlajtol Dios. Pero nimantsin uajlau on diablo*, niman kitlalkaualtia ika on itlajtol Dios yejuan okitokakej ipan inyojlo. 16On tlajli yejuan tepetlayoj kijtosneki inyojlo on tlakamej yejuan kuelkakij itlajtol Dios, niman ikan paktli kiseliaj on tlajtojli. 17Pero in tlakamej xmás kuajli kajsikamatij on tlajtojli. Yejua ika ijkuak impan uajlau on tlen tepajsoloj niman kintlauelitaj niman tlajtlamach* ika kintlajyouiltiaj ipampa itlajtol Dios, nimantsin kauaj intlaneltok. 18On tlajli yejuan uitsyoj kijtosneki inyojlo on tlakamej yejuan kuelkakij itlajtol Dios. 19Pero pampa sa komatstokej kenijki nopanoltiskej, niman sanoyej kinekij notomintiskej, niman okseki tlajtlamach* kinejnemiliaj, kelkauaj on itlajtol Dios. Ijkon itlajtol Dios xueli kimpaleuiya yejuamej. 20Pero on kuajli tlajli kijtosneki inyojlo on tlakamej yejuan kuelkakij itlajtol Dios, niman kiseliaj, niman intech kisa sen kuajli tlakyotl. Yejuamej ken on xinachtli yejuan okitlakitij 30 iteyo, niman ken on yejuan okitlakitij 60, noso ken on yejuan okitlakitij se ciento.
Jesús okixtij sen ejemplo itech sen lámpara
(Lc. 8.16-18)
21No okinmijlij:
—Xakaj kuajki sen tlauijli, niman kitlalia itsintlan sen chikiutli noso itsintlan tlapechtli. Yej on tlauijli kitlalia tlakpak para ijkon ma tlauilpanti kuajli. 22No ijki, on tlen iyantikaj, machiyas ipan okse tonajli. Niman nochi on yejuan aman xakaj kimati, machiyas. 23Tla yakaj kipiya itlamachilis, ma kajsikamati kuajli.
24No okinmijlij:
—Xnemilikan kuajli tlinon nenkikakij, pampa ika on tlen tejua tiktekitiltia para tikintlajtlakolmaka oksekimej, Dios no yejua kitekitiltis para mitstlajtlakolmakas. Niman más miyek ika mitstlajtlakolmakas. 25Tej, yejuan kipiya kajsikamatilistli, Dios kimakas más, niman on yejuan xkipiya kajsikamatilistli, Dios kixtilis hasta nochi kech kipiya.
Jesús okixtij sen ejemplo de on xinachtli ijkuak ixua
26No okijtoj Jesús:
—On yejuan Dios kinmandaroua nochiuaj ken on xinachtli yejuan sen tlakatl kitôka ipan tlajli. 27Mojmostla on tlakatl kochi tlayoua niman nokuiteua kualkan. Niman on xinachtli ixua, niman kemaj noskaltia, pero yejua xkimati kenijki. 28On tlajli san iselti kiskaltia. Achtoj kisa on imilouayo, kemaj on imiyauayo, niman kemaj ixiloyo, kemaj iyeloyo, kamauak, niman kemaj sintli. 29Niman kemaj ijkuak yotlachikau, on tlakatl nimantsin kitsonteki on mijli, pampa yoyejkok on pixkilistli.
Jesús okixtij sen ejemplo de on xinachtli itoka mostaza
(Mt. 13.31-32,34-35; Lc. 13.18-19)
30No okijtoj Jesús:
—¿Kenijki tlamandaroua Dios? ¿Noso tlen ejemplo tiktlaliskej de on ken tlamandaroua Dios? 31Sano ijki ken sen tlakatl okitôkak iteyo on mostaza. On mostaza kipiya más pitentsin iteyo xken nochi kech xinachtli onkaj nikan ipan in tlaltikpaktli. 32Pero ijkuak yokitôkak, noskaltia niman ueyiya más uejkapania xken nochi kech xojtli. Sanoyej nomajmatia hasta on totomej uelij ompa kichijchiuaj intepajsol ne ipan imauan kampa tlaseuayok.
33Kinmachtiaya on kuajli tlajtojli ikan miyek ejemplos hasta kampa ueliyaj kajsikamatiyaj. 34Yejua kinmachtiaya san ikan ejemplos niman xitlaj* kinmijliaya tla xikan ejemplo. Pero ijkuak Jesús sa iselti nemiya inuan inomachtijkauan*, yejua kinmijliaya tlinon kijtosneki on ejemplos.
Jesús okiteltij on ajakatl
(Mt. 8.23-27; Lc. 8.22-25)
35Ipan on tonajli ijkuak yotlayouak, Jesús okinmijlij on inomachtijkauan*:
—Tiauij ne okse ilado in mar.
36Kemaj, ijkuak yononauatijkej inuan on tlakamej, oyajkej oksekan itenko on mar. Niman on nomachtijkej* okuikakej Jesús sano ipan on barco kampa yejua ye nemiya. Oksekimej barcos oyajkej iuan. 37Niman kemaj más achi sakin*, ouajlaj sen ajakatl sanoyej chikauak, niman on atl onkoxoniya ne ijtik on barco hasta ye polakisnekiya. 38Pero Jesús kochtiaya tlakuitlapan ika de on barco ipan sen kuejtomatl. Niman kemaj okitlachaltitoj, niman okijlijkej:
—Totemachtijkau, ¿tline* yej tikochtikaj chika tejuamej ye tiamimiktokej? ¡Xtechpaleui!
39Kemaj Jesús onotelkets, okinauatij on ajakatl, niman okijlij on mar:
—Xmotelti ajakatl, niman maka sa itlaj xchiua.
Niman kemaj on ajakatl ouajnoteltij. Nimantsin nochi okaktiaj, niman nochi kuajli onokau. 40Niman kemaj okinmijlij on inomachtijkauan*:
—¿Tline sanoyej nemomojtiaj? ¿Tlen, xnentlaneltokaj hasta aman?
41Yejuamej sanoyej nomojtiayaj, niman kinojliayaj:
—¿Manin akin tlakatl in ika on ajakatl niman on mar kitlakamatij?
Currently Selected:
San Marcos 4: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
