Génesis 32
32
Jacob ruaꞌan juajna ngain Esaú
1Ko Jacob kuexiꞌin sakjui inaa, ko ngatja nthiꞌá betan kanxion angeel Ndo Dio. 2Ko are bikon ángel teꞌi ndachro: «¡Kai nthiꞌi jii Ndo Dio!» Mexinxin binchegiꞌin nthiꞌa Mahanaim. 3Kuthimejan Jacob ruaꞌan juajna ngain Esaú, ko Esaú beꞌe ngain nunthe Seir, ngain nunthe Edom. 4Ko jaꞌin kuetuꞌan rundachro na̱: «Ndache ra xan chian Esaú ixin sinthaꞌa thi tsetuna xan ko ndache ra xan ixin jaꞌan bariꞌi ngain chrinina Labán, 5ko jai chunda kuxinthaa, kulucho, kuleko, xi ncheꞌe xra ko nchri ncheꞌe xra. Ko ruaꞌan juajna jiꞌi ixin jian sayeꞌna xan are saso ngain xan.
6Are kjan ni bikao juajna, ndachro na̱ ngain Jacob:
—Kjui ná bitsjaa ná Esaú, ko ujithii ixin ruchuꞌan ngatja nthiꞌá kunixin noo renkia ni xii.
7Jacob are kuiꞌin jiꞌi anto xraon ko kuaa juachaon ko yoo kunchjeeya chujni jii ngain, kuleko, kuxinthaa ko kucamello. 8Ko xraxaon: «Ja̱ Esaú sithja naa chjeeya chujni ko kuxiigo, ko jeꞌe tsjaaya, ni kanxin nchao satsinga na̱.» 9Kuthejan Jacob nichjayee Ndo Dio ko ndachro: «Nchana, Diue ndudachriꞌna Abraham ko ndudana Isaac, Suixin ndachjejin na ixin rukjan na ngain nuntheꞌna ko ngain ni chujnina, ko Suixin ndachro ixin jian rukjina. 10Jikininxinꞌa na kain thi Suixin bechjana ko Suixin thjen ngajin kainxin nchaꞌon. Jaꞌan bathujin nda jithinga diꞌin Jordán ko xruꞌin barichunda, jeꞌo ntha kutho jingaa rana, aro jai ni chujnina ixin ndakutsjé na̱ yoo kunchjeeya na̱. 11Nthatsaꞌan ñao thjengijna na ixin suenꞌa na xan chian Esaú. Jixraon na ixin tsii xan ko suena xan ko suen xan kain chriꞌna ko xan nchinchinchjanꞌna. 12Aro Suixin bendachjejin na ixin jian rukjina, ko chujni rugachrjeninxin na jaꞌan, rukutsjé na̱ inchin nchise jii ngandeꞌe ndachaon ko chroꞌa rugikin na̱.»
13Ko Jacob bejua nthiꞌa thi̱e mee. Kuthimejan kuinchieꞌe kuxiigo, thi bechunda chiaon, ixin runchethuen Esaú. 14Ko kuinchieꞌe yoo renkia kuthentso kunaꞌa ko kan kudaꞌa; yoo renkia kuleko kunaꞌa ko kan kudaꞌa; 15kan ko the kucamella kunixin xeꞌen ba; ko yoo kan kuxinthaa kunaꞌa ko the kudaꞌa, ko kai kan kulucho kunaꞌa ko the kudaꞌa. 16Ko jejee bakeꞌe kain kuxiigo kuinchieꞌe teꞌi, ko bakeꞌe nanaa chujni beka nanaa tajuchjan kunchjeeya, ko ndache na̱:
—Ditaon ra nthiꞌá, ko kjínxin ncherrueꞌe ra choo ba.
17Ko thi saꞌo bitaon nthiꞌá kuetuꞌen:
—Are setan xan chian Esaú, ko sanchiangi xan: “¿Kensen nchaa, ko thinoo thji ko kensen kuxigue rithjiꞌo?”, 18Ko jaꞌa datheꞌe: “Jiꞌi kuxigue Jacob, thi sithuꞌan suixin, Esaú. Ko Jacob, thi sincheꞌe thi suixin rundachro, kai jirrueꞌna ná.”
19Ko Jacob xra jeꞌo kuetuꞌen thi yuxin ko thi ninxin ruaꞌan. Ko ndache kain ni tedeka kuxiigo:
—Are setan ra Esaú, xra jeꞌo rundache ra, 20aro xraxaon ra ndache ra: “Jacob, thi sincheꞌe thi suixin rundachro, kai jirrueꞌna ná.”
Ixin Jacob xraxaon: «Sinthabangaa ñao Esaú ixin kuxiigo sinthathuan, ko binthataon ba nthiꞌá, ko jañaa are setan a xra rugabangaꞌa ñao ko ndakua sayeꞌna.» 21Ko kuxiigo sithuen Esaú, binchetaon ba nthiꞌá, ko Jacob tabithuꞌe thi̱e mee ngain nchia ndasiꞌin.
Jacob tetukaꞌo Ndo Dio
22Ko thi̱e maꞌo Jacob bingathjen ko sabikao kayui chriꞌi ko kayui nchri nchexree chriꞌi ko thi thejngo xeꞌen ko bathujin na̱ nda jithinga diꞌin Jaboc, 23kunixin kain thi jidikao. 24Kuthimejan sakjan Jacob, ko are jeꞌo tajii, biji naa thi xii ko kuexiꞌin kuetukaꞌo nguixin thi̱e ko kuajanda choo chrijan nchaꞌon. 25Ko thi jithetukaꞌo Jacob, are bikon ixin chroꞌa thjeꞌe cha, thi xii bintja nthachreen Jacob ko ndabachrjegaꞌa nthalurue. 26Kuthimejan thi xii ndachro:
—Tajanda na ixin ubingasaan.
Ko Jacob batheꞌe:
—Ja̱ sinchenchaonꞌa na, tsajandaꞌa.
27Ko banchiangi thi xii:
—¿Kexreen diꞌin?
—Jaꞌan diꞌin na Jacob.
28Ko thi xii ndachro:
—Jaꞌa isinꞌa Jacob. Jai siꞌin Israel, ixin kuetukoꞌo Ndo Dio ko kuetukoꞌo chujni ko kjuacha.
29Ko Jacob banchiangiꞌi:
—¿Kexreen diꞌin jaꞌa?
Aro thi xii batheꞌe:
—¿Unda danchiangi kexreen diꞌin na?
Kuthimejan thi xii nthiꞌa binchenchaunxin. 30Ko Jacob binchegiꞌin nunthe mee, Peniel ixin ndachro: «Bikon Ndo Dio ko jeꞌe Ndo bikon na Ndo kai, ko benꞌa na.»
31Ko are jichriꞌin nchaꞌon Jacob sakjuixin Peniel, aro ixin kuniꞌi nthachreen thinga thjiꞌin ko dania sajithji. 32Mexinxin jai ni Israel neꞌa na nthao te ngain nthachreen kuxiigo ixin Jacob bachrjegaꞌa nthachreen.
Currently Selected:
Génesis 32: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
