Génesis 47
47
1José kjui bitsjeꞌe faraón ko ndachro:
—Ndudana ko xan chian ubinthekixin na̱ nunthe Canaán ko ute na̱ ngain nunthe Gosén, ko sajuiaꞌo na̱ kulekue na̱, kuxintheꞌe na̱ ko kain thi techunda na̱.
2Ko José bikao naꞌo xan choo ngain faraón ixin binchegatsuan xan. 3Ko faraón banchiangiꞌi xan ko ndachro:
—¿Keꞌe xra ncheꞌe ra?
Jeꞌe xan binthegatheꞌe xan:
—Jaꞌan ná thingaria ná kuleko xraa ni xranchrjena ná. 4Ko juiꞌi ná ixin sithuna ná ngain nunthe jiꞌi, ixin ngain nunthe Canaán anto jii jintha ko xruꞌin kachji sine kulekuna ná. Denthatsaꞌan ñao suixin, dekajanda ni ntha sinthe ná ngain nunthe Gosén.
5Kuthimejan faraón ndache José:
—Ndudaa ko xan choo juii na̱ biginthe na̱ ngajin. 6Ko nunthe Egipto jaꞌa thetuꞌan. Ko dajon Gosén thi icha jian jngi jii ngain nunthe Egipto, ko ncho dinthe na̱ ko ja̱ chrujan xan choo jian nuꞌe xan dayakuꞌen xan kuxiigo, dakee xan ixin sayakuꞌen xan kuxiguna.
7Kuthimejan José bikao ndudee ngain faraón ixin binchegatsuan ndo. Ko Jacob bajon juajna ngain faraón kunixin jié juasaaya ko binchenchaon. 8Ko faraón banchiangiꞌi Jacob:
—¿Kieꞌen nano chunda?
9Jacob batheꞌe:
—Uchunda naa renkia ko kan ko the nano chrji ndaꞌa ko ndeꞌi, ko maski jian o jianꞌa uridathua nano teꞌi, aro xra tuyaiꞌa inchin nano binthechon ni ndudachriꞌna xranchrjen.
10Ko Jacob binchenchaon faraón ko bachrjexin nthiꞌa. 11Ko José bajon nunthe icha jian jii ngain nunthe Egipto ngain ndudee ko xan choo ixin ruginthe na̱ nthiꞌa, jañaa inchin kuetuꞌan faraón. Ko jañaa ndudee ko xan choo binthechunda na̱ nunthe ngain nuntheꞌe Ramesés. 12Ko José chjee ndudee thi juine ndo, ko kai nanaa xan choo chjee xan thi rugithja rune jeꞌe xan ko chriꞌi xan ko xeꞌen xan.
Thi bincheꞌe José are beꞌe jintha
13Ko nguii nunthe Egipto xruꞌin nua kachji beꞌe ko icha suji beꞌe jintha. Ko ngain nunthe Egipto ko nunthe Canaán chujni bagenxin na̱ jintha. 14Ko José batse kain tumii ni nunthe Egipto ko ni nunthe Canaán ixin binchekjiꞌi nua kachji, ko kuenchjiꞌan tumi ngain nchianduꞌa faraón. 15Ko are ndajuexin tumii ni egipcio ko tumii ni Canaán, kain ni egipcio kjui na̱ ngain José ko ndachro na̱:
—Chjana ra thi sine ná, jeꞌa jian tsajanda ni ra senxin ná jintha ixin ixruꞌin tumina ná.
16Ko José batheꞌe:
—Ja̱ ixruꞌin tumi chunda ra, sikoo ra kuxigua ra ko sasingixiꞌan ra ba ixin nua kachji.
17Ko ni egipcio bikao na̱ ngain José kunxiꞌin na̱, kulekue na̱, kuxintheꞌe na̱, kuluchuꞌe na̱, ko basingixinkaꞌo na̱ kain thi juine na̱ nguii nano mee. 18Ko are ndajuexin nano, kjui na̱ bitsjeꞌe na̱ José inaa, ko ndachro na̱:
—Chroꞌa sinthaaya ná ngajin suixin ixin ixruꞌin tumi chunda ná ko kuxiguna ná ukuxigua suixin. Ixruꞌin inaa keꞌe ruchjaꞌa ra, jeꞌo dithuena ná jngiꞌna ná ko tsuchji ná ngajin. 19¿Unda tsanchrjanda ni ra seꞌen na̱? Theꞌna ni ra jaꞌan ná ko jngiꞌna ná ixin nua kachji. Ko rukjan ná ni nchexree faraón ko sinthaꞌa ná xra ngataon jngiꞌi, ko thi suantaꞌa jngi, jeꞌe tsethuꞌan. Ko jeꞌo dechjana ni ra tsee sine ná ko tsee tsenga ná ko jañaa senxinꞌa ná jintha ko jngi setsingakuaꞌa jngi.
20Ko José kueꞌna kain jngiꞌi ni egipcio ixin bithuꞌe faraón. Kain ni egipcio binchekji na̱ jngiꞌi na̱ ixin anto suji jintha beꞌe ko jañaa kain jngi Egipto ndakjan jngiꞌi faraón, 21ko kain chujnii nunthe Egipto ndakjan na̱ ni ncheꞌe xra kueꞌna faraón, Ko kain jiꞌi bincheꞌe José. 22Ko nunthe kuenaꞌa José, kjui jeꞌo nuntheꞌe ni daana ixin faraón bagajon thi bane na̱, mexinxin binchekjiꞌa na̱ jngiꞌi na̱. 23Kuthimejan José ndache ni egipcio:
—Tsjexin ra, jaꞌa ra ko jngiꞌa ra jaꞌan kueꞌna ixin sithueꞌe faraón, anchee ruchjaꞌa ra tsee thenga ra ngataon jngi. 24Ko are suan, kain thi usuan naꞌo tunchjeeya ra, ko naa thi naꞌo kunchjeeya ra chjeꞌe ra faraón, ko thi icha ndadithuꞌa ra ko yaa dantsjenda ra tsee tsenga ra, ko thi icha sinthekoꞌo ra ni nchiandui ra.
25Ko ni egipcio batheꞌe na:
—Suixin kuajandaꞌa ni ntha beꞌen na̱, tajanda ni ntha rukjan ná ni ncheꞌe xra dikeꞌna faraón.
26Ko José bakeꞌe naa ley ngain nunthe Egipto ixin thi suan ngataon jngi naꞌo ruchjeeya ko naa thi naꞌo ruchjeeya sayee faraón. Ko ley jiꞌi xra bagithikaon na̱ ley are Moisés kji̱n xroon jiꞌi. Ko jeꞌo jngiꞌi ni daana kjuiꞌa jngiꞌi faraón.
Thi juinao Jacob rukuꞌen are ndarrugeꞌen
27Ko ni Israel tabinthe na̱ ngain nunthe Egipto ko bayee na̱ nunthe Gosén, ko nthiꞌa kutsjéxin na̱. 28Ko Jacob bechon ngain nunthe Egipto theyaato nano, ko kain nano bechon kjui naa renkia ko yoo kan ko yaato nano.
29Ko naa nchaꞌon are Israel kunuꞌe ixin tuin ndarrugeꞌen, ruaꞌan juajna ixin rukii José ixin rundache:
—Ja̱ ndua rinao sincheꞌe naa thi sinthatsaꞌan ñao, dakee raa chringiꞌi nthatsao na ko ndachro ixin jaan, sincheꞌe thi sanchiaꞌa. Nthatsaꞌan ñao, tjabaꞌa na ngain nunthe Egipto. 30Are ndaseꞌen na tjabaa na ngain chinthi thi texrabaa ni xranchrjeꞌna.
Ko José batheꞌe:
—Jañaa tsuꞌen.
31Aro Israel ndachro:
—¡Dajin ixin sincheꞌe thi ndathjo!
Ko José bajin ixin jaan, sincheꞌe thi ndachro, kuthimejan Israel bisetaꞌa ngataꞌa saon ngain thi dekjon.
Currently Selected:
Génesis 47: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
