San Lucas 14

Jesús binchexrueꞌen naa thi niꞌi

1Naa nchaꞌon nchejugaꞌa ni, Jesús kjui bine ngain nchianduꞌa naa xi fariseo icha renthe, ko are mee icha xi fariseo tatetsayeꞌe xa Jesús. 2Ko ngathexin kon Jesús tajii naa xii beninxin xa chikjan. 3Kuthimejan Jesús banchiangi ngain xi tjaago ley ko ngain xi fariseo:

—¿Anchao sinchexrueꞌen ni naa chujni niꞌi ngain nchaꞌon nchejugaꞌa ni?

4Aro jeꞌe xa tabinthetenkua xa, kuthimejan Jesús kathe thi niꞌi mee ko binchexrueꞌen ko ndache ixin unchao satsji xa. 5Ko ndachro Jesús ngain xi fariseo:

—¿Kexeꞌe ra, ja̱ naa kuluchuꞌa ra o naa kuxinthaꞌa ra setsingaa ba naa thue, asantsjeꞌa ra ba nchaꞌon mee maski nchaꞌon mee nchejugaꞌa ni?

6Ko xruꞌin xii nchao batheꞌe ngain Jesús.

Chujni bituꞌen tsji ngain kiai thutheꞌe na̱

7Are Jesús bikon kexreen tedinchieꞌe na̱ ntha xintaon icha renthe ixin ruginthe na̱, jeꞌe kuekiin naa thi kuꞌen ko ndachro:

8—Are naa chujni rundathjo ra ixin tsji ra kiai thutheꞌe na̱, dintheꞌa ra ngain ntha xintaon sinthe chujni icha renthe, ixin ja̱ siji inaa chujni icha renthe ke jaꞌa, 9ko thi ndathjo ixin kjui kiai, jeꞌe rundathjo jaꞌa: “Dajon ntha ritaꞌa yaa ngain inaa chujni jiꞌi.” Kuthimejan jaꞌa satsjixin nthi̱ꞌa̱ kunixin jié juasuaxin ko sasigariꞌi ngain ntha xintaon jii icha ngandeꞌe. 10Mexinxin, are naa chujni rundathjo tsji ngain naa kiai, jaꞌa daritaꞌa ntha xintaon sinthetaꞌa ni icha renthe, ixin are tsii thi ndathjo ixin rukji ngain kiai, jeꞌe nchao rundathjo: “Datho ngain ntha dinthe ni icha renthe.” Jamee jaꞌa tsusayaꞌa ngathexin kon kain chujni te nthi̱ꞌa̱. 11Ixin thi chujni jeꞌo tusayeꞌe, sinchekusue na̱; ko thi chujni rinaoꞌa tsusayeꞌe, ni mee sinchesayeꞌe na̱.

12Kai ndachro Jesús ngain thi kuetuꞌen ixin kjui ngain kiai mee:

—Jaꞌa are sakee naa kiai thetuenꞌa jeꞌo xi chunxin, ko jeoꞌa xan choo, jeoꞌa ni chujnia, jeoꞌa ni tekee nchiandui ko chunda na̱ tsjé tumi, ixin kain chujni jiꞌi nchao sakeꞌe na̱ inaa kiai ko tsetuꞌan na̱ jaꞌa ixin tsji sinthekoꞌo na̱ ko jamee jeꞌe na̱ utsunkjañaꞌa na̱ thi jeꞌe na̱ juine na̱ ngain kiaa. 13Mexinxin are jaꞌa sakee naa kiai, kai thetuꞌen chujni nua, thi chujni chroꞌa chrji, thi chujni chundaꞌa naa raa ko thi chujni dikonꞌa. 14Ko jamee Ndo Dio sinthanchaon jaꞌa ixin jeꞌe na̱ chroꞌa tsjenga ꞌna na̱, aro Ndo Dio tsjenga ꞌna ngajin are ruxechon kain chujni bincheꞌe jian.

Thi tsuꞌen ngain kiai jié seꞌe ngajni

15Are binthekiꞌin na̱ jiꞌi, naa thi jii nthi̱ꞌa̱ ndachro ngain Jesús:

—Anto chrjuin ixin thi chujni sine nthi̱ꞌa̱ ngain thi thetuꞌan Ndo Dio.

16Kuthimejan Jesús ndachro ngain chujni mee:

—Naa xii kuiin xa naa kiai anto jié, ko kuetuꞌan xa ixin rugituꞌen anto tsjé chujni ixin rukii na̱ rujine na̱. 17Ko are ujuexin kunchjian thi sine na̱, xii mee ruaꞌan xa naa thi ni ncheꞌe xree xa ixin biketuꞌen kain chujni ixin unchao tsii na̱ ixin sine na̱. 18Aro kain chujni mee kuexiꞌin na̱ ndachro na̱ ixin chroꞌa tsji na̱. Ko thi saꞌo ndachro: “Najuexinkua kueꞌna naa nunthe, ko rugunda sitsjaa nunthe. Nthatsaꞌan ñao nchetjañana ixin chroꞌa tsji.” 19Inaa ndachro: “Jaꞌan ukueꞌna naꞌo yuntee kuxinthaa, ko tsji ixin sikon anchao taon ba; mexinxin nthatsaꞌan ñao nchetjañana ixin chroꞌa tsji.” 20Ko inaa ndachro: “Jaꞌan najuexinkua kuthe na, mexinxin chroꞌa tsji.” 21Ko are kjan thi ncheꞌe xra, ndachro kain jiꞌi ngain xi najnii. Kuthimejan xi najnii guñao xa ko ndachro xa ngain thi ncheꞌe xra mee: “Jaka thji ngain kain nthiꞌá yeye ko ngaa nthiꞌá nchinnchin ngain rajna jiꞌi ko sikuꞌna nthiꞌi chujni nua, chujni chroꞌa chrji, thi koꞌa naa raa ko thi dikonꞌa.” 22Kuthimejan jeꞌe thi ncheꞌe xra mee ndachro: “Ubinthaꞌa inchin suixin kuetunna, ko xra sithja sixiꞌin icha na̱.” 23Jeꞌe xi najni mee ndachro ngain ni ncheꞌe xree xa: “Thji no ngaa nthiꞌá ko no nthiagadoꞌo ko nchetseꞌen ñao na̱ ixin tsii na̱ sixiꞌin na̱. ¡Jaꞌan rinaꞌo rukaon nchiania! 24Ixin jaꞌan irinaoꞌa ixin sixiꞌin chujni jaꞌan ukuetuan rukii saꞌo.”

Thi tangi tuꞌen chujni ruee Jesucristo

25Anto tsjé chujni ruee Jesús, ko jeꞌe ngaria ko ndachro ngain na̱:

26—Ja̱ chrujan chujni tsii ngajin, rugunda icha ruthjueꞌna jaꞌan ke ndudee, o janee, o chriꞌi, o xeꞌen, o xan choo o nchri choo, ko kai icha ruthjueꞌna ke thi jichunxin jeꞌe. Ko chujni sincheꞌa jiꞌi, chroꞌa siꞌin chujnina. 27Jañaa chujni ruxrajonꞌa seꞌen ixin jaꞌan, chujni mee chroꞌa siꞌin chujnina. 28Ja̱ chrujan ra sinchechjian ra naa nchia anto jié, ¿a jeꞌa saꞌo ruxraxaon ra kejaꞌin tumi tsunchjianxin nchia, ko jañaa tsunuꞌa ra a sithja tumia ra tsjexinxin tsunchjian nchia? 29Ixin ja̱ kuexinxion kuethe xro ko ijuaꞌa binchechjian nchia. Kuthimejan chujni sikon jaꞌa tsjanua na̱, 30ko chujni mee rundachro na̱: “Xii jiꞌi kuexinꞌa xa jueꞌe xa nchia.” 31Ja̱ na rey utsji siketukaꞌo inaa rey, ¿a jeꞌa saꞌo ruxraxaon anchao kunixin the no̱ xi soldadue tsji siketukaꞌo thi inaa rey chunda kan no̱ xi soldado? 32Ko ja̱ rey ruxraxaon ixin tsixinꞌa, xra ikjion jithii rey jngo, jeꞌe ruruaꞌan kanxion chujnii ixin sikao na̱ juajna ixin itsetoꞌa. 33Jañaa kai, ja̱ chrujan ra chroꞌa tsinthueꞌe ra kain thi chunda ra, chroꞌa siꞌin ra chujnina.

Xijntha ndatsuxruathe

(Mt. 5:13; Mr. 9:50)

34’Xijntha jian, aro ja̱ ndatsuxruathe, ¿kexreen rukjan sunda inaa? 35Ko xijntha mee ichroꞌa sinchegunda na̱ ngain thja, ko kai xruꞌin xree sithekjan xee kuxiigo, ko ixruꞌin dunda xijntha. Jaꞌa ra xro thiꞌin ra, thinxin ra jian.

Currently Selected:

San Lucas 14: plsNT

Highlight

Copy