San Lucas 5

Pedro bithikaon Jesús ko tsjé kuchee tse na̱

(Mt. 4:18-22; Mr. 1:16-20)

1Naa nchaꞌon, Jesús tajii ngandeꞌe jinda diꞌin Genesaret, ko nthi̱ꞌa̱ xrathe anto tsjé chujni ko anto kunthedugee na̱ ngaka jeꞌe ixin kain na̱ binao na̱ rukiꞌin na̱ juajnee Ndo Dio. 2Ko Jesús bikon nthi̱ꞌa̱ tate yoo ntha barko ngandeꞌe nda ko xruꞌin chujni teringa ntha ixin xii tse kuchee tatethjeen xa nunchaꞌa. 3Kuthejan Jesús kuani naa ntha barko, ko mee ntha barkue Simón Pedro, ko Jesús kuetuꞌen Pedro ixin icha runchengaxinton ntha ngangi nda. Kuthimejan nthi̱ꞌa̱ tabetaꞌa Jesús ko kuexiꞌin kjuague kain chujni te ngandeꞌe nda. 4Are Jesús juexin kjuaago, jeꞌe ndachro ngain Simón Pedro:

—Thjiꞌo ntha barko ngain nda icha niꞌnga, ko nthi̱ꞌa̱ dankaꞌngi ra nunchaꞌa ixin rutse ra kuchee.

5Pedro ndachro ngain Jesús:

—Suixin ke tjaago, nguixin thie binthaꞌa ná xra ko xruꞌin kuchee tse ná, aro ixin Suixin rendachjejin na, jaꞌan sigankaꞌngi nunchaꞌa ngain jinda inaa.

6Ko jañaa bincheꞌe na̱, ko ixin anto tsjé kuchee tse na̱ kuexiꞌin chrintaon nunchaꞌa. 7Kuthejan baye̱e na̱ xi dakao na̱ jian, xi teringa ntha barko jngo ixin runchechieꞌen na̱ ntha barkue na̱ ko rukjengijna choo na̱. Ko kayui ntha barko anto binchekaon na̱ ntha ko uchiaon saruxinkajingi ntha jinda. 8Are bikon Simón Pedro jiꞌi, jeꞌe bethuxin ngain Jesús ko ndachro:

—Nthatsaꞌan ñao sathjixin Suixin ngajin na ixin jaꞌan anto tsjé thi jianꞌa binthaꞌa.

9Ko Simón Pedro kunixin chujni binthe ngain jeꞌe anto binthexraon na̱ ixin anto tsjé kuchee tse na̱. 10Kai Jacobo ko Juan, kayui xeꞌen Zebedeo, thi jian bagakao Pedro, anto binthexraon. Aro Jesús ndachro ngain Pedro:

—Xraonꞌa jaꞌa, ixin jai tsexiꞌin tsjejo chujni sinchesayeꞌe Ndo Dio.

11Kuthimejan are binchechieꞌen na̱ ntha barko ngandeꞌe ndachaon, bintheganianxin na̱ ntha ko takuinthuꞌe na̱ kain ko saruee na̱ Jesús.

Jesús binchexrueꞌen naa thi bechunda chin lepra

(Mt. 8:1-4; Mr. 1:40-45)

12Are Jesús beꞌe ngain naa rajna, nthi̱ꞌa̱ kunchieꞌen naa xii bechunda chin lepra. Ko are bikon xa Jesús, bethuxin xa ko bisetaꞌa xa nunthe ko binchetseꞌen xa ñao ko ndachro xa:

—Ja̱ suixin rinao, nchao sinchexrueꞌen chin richunda.

13Kuthimejan Jesús kuinxe raa ko kathe xii mee ko ndachro:

—Jaan rinaꞌo, tuxruaꞌan.

Ko ndabitjanbeꞌo chin lepra bechunda xii mee. 14Ko Jesús kuetuꞌen xa ko ndachro:

—Xruꞌin kensen ndache thi kuꞌen. Jeꞌo thji ngain xi daana ixin sikon xa ixin xruꞌin chin chunda ko dajon ngain Ndo Dio thi kuetuꞌan ley bayée Moisés, ko jañaa kainxin chujni tsunuꞌe na̱ ixin jaꞌa ixruꞌin chin chunda.

15Aro nchaꞌon ko nchaꞌon icha tsjé chujni bakunuꞌe na̱ thi jian bancheꞌe Jesús. Ko anto tsjé chujni baxrathe na̱ ngain jeꞌe ixin bakiꞌin na̱ ixin Ndo Dio, ko ixin bakuxrueꞌen na̱ ixin kexeꞌo chin binthechunda na̱. 16Aro Jesús sabakji thi xruꞌin chujni te, ko nthi̱ꞌa̱ jeꞌe banichjee Ndo Dio.

Jesús binchexrueꞌen naa thi chroꞌa bakji

(Mt. 9:1-8; Mr. 2:1-12)

17Naa nchaꞌon Jesús jitjague tsjé chujni ixin Ndo Dio, ko nthi̱ꞌa̱ tate kanxion xi fariseo ko xi tjaago ley xi binthekixin kain rajna te ngain nunthe Galilea ko Judea ko Jerusalén. Ko juachaxiin Ndo Dio beꞌe ngain Jesús ko banchexrueꞌen tsjé chujni niꞌi. 18Are mee, binthekii kanxion xii binthekiaꞌo ngain naa nthaton naa thi chroꞌa bagakji, ko binao na̱ ruxranxiꞌin na̱ thi niꞌi thi beꞌe Jesús. 19Aro chroꞌa bixiꞌin na̱ ixin anto tsjé chujni beꞌe ngandangii nchia mee. Mexinxin kuani na̱ ngataꞌa nchia ko binthjiantaꞌa thi jijanthe nchia ko nthi̱ꞌa̱ binchexinkajinxin na̱ thi niꞌi kunixin nthatuꞌen ngayee chujni ko ngathexin kon Jesús. 20Are Jesús bikon ixin kain xii mee chunthia xa ixin Jesús runchexrueꞌen thi niꞌi, Jesús ndachro ngain thi niꞌi:

—Kain thi jianꞌa jaꞌa bincheꞌe, jaꞌan ubinthatjañaꞌa.

21Kuthimejan kain xi tjaago ley ko xi fariseo kuexiꞌin binthekjao choo xa ko binthexraxaon xa: “¿Kensen xii jiꞌi, ixin nchaoꞌa jinichja ixin Ndo Dio? Xruꞌin chujni nchao sinchetjañeꞌe inaa chujni thi jianꞌa ncheꞌe na̱, jeꞌo Ndo Dio nchao ncheꞌe mee.”

22Aro Jesús ubenuꞌe thi texraxaon xa ko ndachro:

—¿Unda xraxaon ra jañaa? 23¿Kexeꞌe thi icha tangiꞌa rundathjan naa thi niꞌi: “Thi jianꞌa jaꞌa bincheꞌe jaꞌan ubinthatjañaꞌa”, o rundathjan: “Dingathjen ko sathji”? 24Ko ixin jaꞌa ra tsunuꞌa ra, jaꞌan tsjaago ngajin ra ixin jaꞌan, thi Xii juixin ngajni, chunda juachaxin nthiꞌi ngataꞌa nunthe ixin nthatjañaa chujni thi jianꞌa ncheꞌe na̱.

Kuthejan Jesús kjan ngain thi niꞌi ko ndachro:

—Jaꞌa rindathjo dingathjen, tsiꞌin nthatuꞌan ko sathji nchiandui.

25Ko thi chroꞌa bagakji bingathjenbeꞌo ngathexin kon kain chujni te nthi̱ꞌa̱, ko tsiin nthatuꞌen ko sakjui nchianduꞌa. Ko nguii sakjui nchianduꞌa binchesayeꞌe Ndo Dio. 26Ko kain chujni te nthi̱ꞌa̱ kuiseꞌen na̱ binchesayeꞌe na̱ Ndo Dio, ko anto texraon na̱ ko ndachro na̱:

—Jai bukon ná naa thi anto chrjuin kuꞌen.

Jesús nichjee Leví

(Mt. 9:9-13; Mr. 2:13-17)

27Kuthimejan Jesús bachrjexin nthi̱ꞌa̱, ko jeꞌe bikon naa xi thjejo tumii César biꞌin Leví. Ko xii jiꞌi tajii xa ngain thi xengaxin ꞌna, ko Jesús ndachro ngain xa:

—Xrakui ko rueꞌna.

28Ko Leví bingathjen ko nthi̱ꞌa̱ kuinthuꞌe kain, ko ruee Jesús.

29Ko are icha tsukjin, Leví binchechjian naa kiai jié ngain nchianduꞌa ixin Jesús, ko nthi̱ꞌa̱ binekaꞌo na̱ tsjé xi thjejo tumii César ko icha chujni. 30Aro tsjé xi fariseo ko xi tjaago ley xrajeꞌo bagithikaon xa, kuexiꞌin xa nichja xa tsjé thi jianꞌa ixin betsingeꞌa xa chujni bagakao Jesús, ko ndachro xa:

—¿Unda jinthekoꞌo ra ko dikoꞌo ra xi thjejo tumii César ko icha chujni ncheꞌe thi jianꞌa?

31Jesús ndachro ngain xa:

—Chujni niꞌa, chujni mee rugundeꞌa na̱ xi nchexruan, jeꞌo chujni teniꞌi rugundeꞌe xi nchexruan. 32Jaꞌan juiꞌa binichjaa chujni tencheꞌe jian, jaꞌan juiꞌi binichjaa chujni tencheꞌe thi jianꞌa ixin isincheꞌa thi jianꞌa tencheꞌe na̱.

Banchiangiꞌi na̱ Jesús ixin thi nchekjaaño ni

(Mt. 9:14-17; Mr. 2:18-22)

33Kuthimejan jeꞌe xa banchiangiꞌi xa Jesús ko ndachro xa:

—¿Unda chujni dakao Juan ko chujni dakao xi fariseo anto nchekjaaño na̱ ko anto nichjee na̱ Ndo Dio? Aro chujnia kainxin nchaꞌon jine na̱ ko diꞌi na̱.

34Jesús ndachro ngain xa:

—Jaꞌa ra, ¿anchao rundache ra chujni te ngain naa kiai thi thutheꞌe na̱ ixin sinchekjaaño na̱, are xra jii xi tsutheꞌe? 35Aro tsii nchaꞌon are chujni sasikao na̱ xi tsutheꞌe, kuthimejan nchue sinchekjaaño na̱.

36Kai ndachro Jesús jiꞌi ngain xa:

—Xruꞌin chujni thinchje rioꞌo luntho narua ixin tseyexin luntho ndalinchrjen. Ja̱ naa chujni sincheꞌe jamee, jeꞌe ndasinchetjaan luntho narua, ko rioꞌo luntho narua chrjuinꞌa sikon ni ngain luntho ndalichrjen. 37Kai chroꞌa sikia vino jidatsuxiꞌin ngaa naa ruanxran nthaxii ixin vino jidatsuxiꞌin tsunchrintaon ruanxran nthaxii, ko vino ko ruanxran ndasitjaan. 38Mexinxin vino jidatsuxiꞌin sikia ngaa ruanxran narua, ko jamee kayui xruꞌin tsuꞌen. 39Ko xruꞌin chujni diꞌi vino suji, kuthejan sinchexruxiꞌin siꞌi vino sujiꞌa, ixin ndachro na̱: “Vino suji, mee thi icha jní.”

Currently Selected:

San Lucas 5: plsNT

Highlight

Copy