San Mateo 15
15
Thi nchekjan jianꞌa chujni
(Mr. 7:1-23)
1Kuthimejan binthekunchieꞌen ngain Jesús kanxion xi fariseo ko kanxion xi tjaago ley binthekixin ngain rajna Jerusalén, ko banchiangi xa ngain Jesús ko ndachro xa:
2—¿Unda chujni chrjiꞌo ncheꞌa na̱ thi bancheꞌe ni ndudachriꞌa ná xrachrjen? Ixin jeꞌe na̱ tunthiꞌa na̱ jinda ngain raa na̱ are jine na̱.
3Aro Jesús banchiangi ngain xa ko ndachro:
—¿Unda jaꞌa ra ncheꞌa ra thi thetuꞌan Ndo Dio ko jeꞌo ncheꞌe ra thi kuethuꞌan ni xrachrjeꞌan ra? 4Ixin Ndo Dio ndachro: “Nchesayeꞌe ra ndudaa ra ko janaa ra”, ko “Thi runichja jianꞌa ixin ndudee o janee, chujni mee jikininxin seꞌen.” 5Aro jaꞌa ra ndachro ra ixin naa chujni nchao rundache ndudee o janee: “Jaꞌan chroꞌa tsjengijna suixin ixin kain thi jaꞌan chunda ubajon ngain Ndo Dio.” 6Ko jaꞌa ra ndachro ra ixin chujni mee irugundaꞌa tsjengijna na̱ ndudee na̱ o janee na̱. Ko jañaa jaꞌa ra ncheꞌe ra thi kjuaguꞌa ra ni ndudachriꞌa ra xrachrjen, ko incheꞌa ra thi thetuꞌan Ndo Dio. 7¡Jaꞌa ra xro kunxon ndachro ra ixin anto jian ra! Jian dindachro Isaías, thi bagayée juajnee Ndo Dio, are ndachro:
8Chujni teꞌi nchesayana na̱ kunixin ruꞌa na̱,
aro nchesayanaꞌa na̱ kunixin anseen na̱.
9Mexinxin xruꞌin xree maski tenchesayana na̱;
ko thi jeꞌe na̱ tenchekueꞌen na̱ chujni juxon thi thetuꞌan xii te nthiꞌi ngataꞌa nunthe.
10Kuthimejan Jesús bayée kainxin chujni binthe nthi̱ꞌa̱ ko ndachro ngain na̱:
—Thiꞌin ra thi rundathjo ra ko thinxin ra jian: 11Thi nchekjan jianꞌa chujni jeꞌa thi jine ko thi diꞌi na̱, thi nchekjan jianꞌa chujni, mee kain thi jianꞌa nichja na̱.
12Kuthimejan thi chujni bakao Jesús kunchieꞌen na̱ ngain ko ndachro na̱:
—¿Anuꞌa suixin ixin xi fariseo binchexruxinꞌa xa are binthekiꞌin xa thi suixin bindachro?
13Aro Jesús ndachro ngain na̱:
—Kain ntha thuchjuin kjuengaꞌa Ndudana thjen ngajni, sachrjenginua ntha. 14Ncheꞌa ra thi dinthendachro xa, ixin jeꞌe xa inchin chujni dikonꞌa ko dikao inaa thi dikonꞌa. Ko ja̱ naa thi dikonꞌa sikao inaa thi dikonꞌa, kayui na̱ tsanthjen na̱ ngaa naa thue.
15Kuthimejan Pedro ndachro ngain Jesús:
—Ndachjejin ni ra keꞌe ruchro thi bendachro.
16Jesús ndachro:
—¿Akai jaꞌa ra chroꞌa thinxin ra? 17¿Athinxinꞌa ra ixin kain thi jine chujni sathji ngaxiꞌin tseꞌe na̱, kuthimejan dachrje? 18Aro thi nichja chujni mee thixin ngain anseen na̱, ko mee thi nchekjan na̱ jianꞌa. 19Ixin ngain anseen chujni thixin kain thi jianꞌa xraxaon na̱, inchin thi naduenxon choo na̱, thi dinthejuakaꞌo na̱ inaa nchrii jeꞌa chriꞌi na̱ o xii jeꞌa xixiꞌi na̱, thi dinthejuakao choo na̱ ko xrathutheꞌa na̱, thi thee na̱, thi nduaꞌa nichja na̱ ixin inaa chujni, thi nchekaxinkua na̱ chujni thi nduaꞌa. 20Kain jiꞌi thi nchekjan jianꞌa chujni, aro jeꞌa ixin jine na̱ ko tunthiꞌa na̱ jinda.
Naa nchrii juixin Canaán anto chunthia nchra Jesús
(Mr. 7:24-30)
21Jesús bachrjexin nthi̱ꞌa̱ ko sakjui ngain nuntheꞌe rajna Tiro ko rajna Sidón. 22Ko naa nchrii juixin nuntheꞌe Canaán ko beꞌe nthi̱ꞌa̱ chiaon seen kuyao nchra ngain Jesús:
—¡Suixin thi bachrjeninxin chujnii David, nthatsaꞌan ñao thiakunuana! Xanꞌna xan nchrii chunda xan naa espíritu jianꞌa ko anto tangi tuꞌen xan.
23Aro Jesús binchexon kuinꞌa thi ndachro nchra. Kuthimejan chujni bakao juii na̱ ngain jeꞌe ko binchetseꞌen na̱ ñao ko ndachro na̱:
—Dencheꞌe thi ndachro nchra ixin jiruaa ná nchra ko seen jituyao nchra.
24Kuthimejan ndachro Jesús ngain nchra:
—Ndo Dio ruaꞌan na jaꞌan jeꞌo ngain chujni Israel ixin ndadigitjaan na̱ inchin kuleko.
25Aro nchrii mee kunchieꞌen nchra ko bethuxin nchra ngain Jesús ko ndachro nchra:
—¡Nthatsaꞌan ñao thjengijna na, suixin!
26Jesús ndachro ngain nchrii mee:
—Nchaoꞌa jii ja̱ naa chujni santsjeꞌe xeꞌen niuthja ko ruchjee nio kunia.
27Aro jeꞌe nchrii mee ndachro nchra:
—Jaan ndua, aro kunia kai jine ba thi nchue niuthja dinthjixin ngataꞌa nthanchaon jinetaxin ni nchee ba.
28Kuthimejan Jesús ndachro ngain nchrii mee:
—¡Jaꞌa anto jian chunthia ngain Ndo Dio! Tsuꞌen inchin jaꞌa rinao.
Ko are juexin nichja Jesús xeꞌen thi nchrii kuxrueꞌen xan.
Jesús binchexrueꞌen tsjé chujni niꞌi
29Jesús sakjuixin nthi̱ꞌa̱ ko biji ngandeꞌe nda Galilea, kuthimejan kuani naa jna ko tabeꞌe nthi̱ꞌa̱. 30Tsjé chujni kunchieꞌen ngain Jesús, ko juiauꞌe na̱ tsjé chujni chroꞌa bakji, ni bagikonꞌa, ni thapo, ni bakingiꞌa naa raa, ko tsjé chujni niꞌi. Kain chujni teꞌi bakeꞌe na̱ ngandaxiꞌin Jesús, ko jeꞌe binchexrueꞌen kainxin na̱. 31Ko kainxin chujni binthe nthi̱ꞌa̱ kuiseꞌen na̱ are bikon na̱ ixin chujni thapo unchao nichja na̱, ko thi bakingiꞌa raa unchao banchekingi raa, thi chroꞌa bakji unchao sakjuixin ruthee, thi bagikonꞌa unchao bikon. Ko kainxin chujni kuexiꞌin na̱ binchesayeꞌe na̱ Dioe chujni Israel.
Jesús bajon juine noo no̱ xii
(Mr. 8:1-10)
32Kuthimejan Jesús baye̱e chujni bakao ko ndachro ngain na̱:
—Jaꞌan thiakunuaa kain chujni teꞌi ixin uchunda nii nchaꞌon te na̱ nthiꞌi ngajin, ko xruꞌin thi sine na̱. Jaꞌan rinaoꞌa ruruaꞌan na̱ ngain nchianduꞌa na̱ ja̱ sineꞌa na̱ ixin ngatja nthiꞌá ndasendaxin na̱ jintha.
33Kuthimejan chujni bakao Jesús ndachro na̱ ngain jeꞌe:
—Aro ¿kexreen sinthoꞌo ná tseꞌna ná thi sine na̱ anto tsjé na̱, ko nthiꞌi xruꞌin nchia jii?
34Jesús banchiangiꞌi chujni bakao ko ndachro:
—¿Kejaꞌin niuthja chunda ra?
Ko jeꞌe na̱ ndachro na̱:
—Yaato niuthja ko kanxion kuchechjan.
35Kuthimejan Jesús kuetuꞌen kain chujni taruginthe na̱ ngataꞌa nunthe. 36Ko jeꞌe kuaa thi yaato niuthja ko kuchee, ko kuexruxiꞌin Ndo Dio. Kuthimejan kunchrijindunga niuthja ko kuchee ko bajon ngain chujni bakao ko jeꞌe na̱ kunchjea na̱ nio kunixin kuchee ngain kainxin chujni binthe nthi̱ꞌa̱. 37Kainxin na̱ juine na̱ ko kujeꞌe na̱ jian, ko thi xexin juine na̱ xrabinchekaon na̱ yaato nthaxra. 38Ko kain chujni bine kjui noo no̱ xii, ko bikinꞌa ni nchrii ko chjan. 39Kuthimejan are kain na̱ sakjui na̱, Jesús kuanito naa ntha barko ko sakjui ngain nunthe Magdala.
Currently Selected:
San Mateo 15: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
San Mateo 15
15
Thi nchekjan jianꞌa chujni
(Mr. 7:1-23)
1Kuthimejan binthekunchieꞌen ngain Jesús kanxion xi fariseo ko kanxion xi tjaago ley binthekixin ngain rajna Jerusalén, ko banchiangi xa ngain Jesús ko ndachro xa:
2—¿Unda chujni chrjiꞌo ncheꞌa na̱ thi bancheꞌe ni ndudachriꞌa ná xrachrjen? Ixin jeꞌe na̱ tunthiꞌa na̱ jinda ngain raa na̱ are jine na̱.
3Aro Jesús banchiangi ngain xa ko ndachro:
—¿Unda jaꞌa ra ncheꞌa ra thi thetuꞌan Ndo Dio ko jeꞌo ncheꞌe ra thi kuethuꞌan ni xrachrjeꞌan ra? 4Ixin Ndo Dio ndachro: “Nchesayeꞌe ra ndudaa ra ko janaa ra”, ko “Thi runichja jianꞌa ixin ndudee o janee, chujni mee jikininxin seꞌen.” 5Aro jaꞌa ra ndachro ra ixin naa chujni nchao rundache ndudee o janee: “Jaꞌan chroꞌa tsjengijna suixin ixin kain thi jaꞌan chunda ubajon ngain Ndo Dio.” 6Ko jaꞌa ra ndachro ra ixin chujni mee irugundaꞌa tsjengijna na̱ ndudee na̱ o janee na̱. Ko jañaa jaꞌa ra ncheꞌe ra thi kjuaguꞌa ra ni ndudachriꞌa ra xrachrjen, ko incheꞌa ra thi thetuꞌan Ndo Dio. 7¡Jaꞌa ra xro kunxon ndachro ra ixin anto jian ra! Jian dindachro Isaías, thi bagayée juajnee Ndo Dio, are ndachro:
8Chujni teꞌi nchesayana na̱ kunixin ruꞌa na̱,
aro nchesayanaꞌa na̱ kunixin anseen na̱.
9Mexinxin xruꞌin xree maski tenchesayana na̱;
ko thi jeꞌe na̱ tenchekueꞌen na̱ chujni juxon thi thetuꞌan xii te nthiꞌi ngataꞌa nunthe.
10Kuthimejan Jesús bayée kainxin chujni binthe nthi̱ꞌa̱ ko ndachro ngain na̱:
—Thiꞌin ra thi rundathjo ra ko thinxin ra jian: 11Thi nchekjan jianꞌa chujni jeꞌa thi jine ko thi diꞌi na̱, thi nchekjan jianꞌa chujni, mee kain thi jianꞌa nichja na̱.
12Kuthimejan thi chujni bakao Jesús kunchieꞌen na̱ ngain ko ndachro na̱:
—¿Anuꞌa suixin ixin xi fariseo binchexruxinꞌa xa are binthekiꞌin xa thi suixin bindachro?
13Aro Jesús ndachro ngain na̱:
—Kain ntha thuchjuin kjuengaꞌa Ndudana thjen ngajni, sachrjenginua ntha. 14Ncheꞌa ra thi dinthendachro xa, ixin jeꞌe xa inchin chujni dikonꞌa ko dikao inaa thi dikonꞌa. Ko ja̱ naa thi dikonꞌa sikao inaa thi dikonꞌa, kayui na̱ tsanthjen na̱ ngaa naa thue.
15Kuthimejan Pedro ndachro ngain Jesús:
—Ndachjejin ni ra keꞌe ruchro thi bendachro.
16Jesús ndachro:
—¿Akai jaꞌa ra chroꞌa thinxin ra? 17¿Athinxinꞌa ra ixin kain thi jine chujni sathji ngaxiꞌin tseꞌe na̱, kuthimejan dachrje? 18Aro thi nichja chujni mee thixin ngain anseen na̱, ko mee thi nchekjan na̱ jianꞌa. 19Ixin ngain anseen chujni thixin kain thi jianꞌa xraxaon na̱, inchin thi naduenxon choo na̱, thi dinthejuakaꞌo na̱ inaa nchrii jeꞌa chriꞌi na̱ o xii jeꞌa xixiꞌi na̱, thi dinthejuakao choo na̱ ko xrathutheꞌa na̱, thi thee na̱, thi nduaꞌa nichja na̱ ixin inaa chujni, thi nchekaxinkua na̱ chujni thi nduaꞌa. 20Kain jiꞌi thi nchekjan jianꞌa chujni, aro jeꞌa ixin jine na̱ ko tunthiꞌa na̱ jinda.
Naa nchrii juixin Canaán anto chunthia nchra Jesús
(Mr. 7:24-30)
21Jesús bachrjexin nthi̱ꞌa̱ ko sakjui ngain nuntheꞌe rajna Tiro ko rajna Sidón. 22Ko naa nchrii juixin nuntheꞌe Canaán ko beꞌe nthi̱ꞌa̱ chiaon seen kuyao nchra ngain Jesús:
—¡Suixin thi bachrjeninxin chujnii David, nthatsaꞌan ñao thiakunuana! Xanꞌna xan nchrii chunda xan naa espíritu jianꞌa ko anto tangi tuꞌen xan.
23Aro Jesús binchexon kuinꞌa thi ndachro nchra. Kuthimejan chujni bakao juii na̱ ngain jeꞌe ko binchetseꞌen na̱ ñao ko ndachro na̱:
—Dencheꞌe thi ndachro nchra ixin jiruaa ná nchra ko seen jituyao nchra.
24Kuthimejan ndachro Jesús ngain nchra:
—Ndo Dio ruaꞌan na jaꞌan jeꞌo ngain chujni Israel ixin ndadigitjaan na̱ inchin kuleko.
25Aro nchrii mee kunchieꞌen nchra ko bethuxin nchra ngain Jesús ko ndachro nchra:
—¡Nthatsaꞌan ñao thjengijna na, suixin!
26Jesús ndachro ngain nchrii mee:
—Nchaoꞌa jii ja̱ naa chujni santsjeꞌe xeꞌen niuthja ko ruchjee nio kunia.
27Aro jeꞌe nchrii mee ndachro nchra:
—Jaan ndua, aro kunia kai jine ba thi nchue niuthja dinthjixin ngataꞌa nthanchaon jinetaxin ni nchee ba.
28Kuthimejan Jesús ndachro ngain nchrii mee:
—¡Jaꞌa anto jian chunthia ngain Ndo Dio! Tsuꞌen inchin jaꞌa rinao.
Ko are juexin nichja Jesús xeꞌen thi nchrii kuxrueꞌen xan.
Jesús binchexrueꞌen tsjé chujni niꞌi
29Jesús sakjuixin nthi̱ꞌa̱ ko biji ngandeꞌe nda Galilea, kuthimejan kuani naa jna ko tabeꞌe nthi̱ꞌa̱. 30Tsjé chujni kunchieꞌen ngain Jesús, ko juiauꞌe na̱ tsjé chujni chroꞌa bakji, ni bagikonꞌa, ni thapo, ni bakingiꞌa naa raa, ko tsjé chujni niꞌi. Kain chujni teꞌi bakeꞌe na̱ ngandaxiꞌin Jesús, ko jeꞌe binchexrueꞌen kainxin na̱. 31Ko kainxin chujni binthe nthi̱ꞌa̱ kuiseꞌen na̱ are bikon na̱ ixin chujni thapo unchao nichja na̱, ko thi bakingiꞌa raa unchao banchekingi raa, thi chroꞌa bakji unchao sakjuixin ruthee, thi bagikonꞌa unchao bikon. Ko kainxin chujni kuexiꞌin na̱ binchesayeꞌe na̱ Dioe chujni Israel.
Jesús bajon juine noo no̱ xii
(Mr. 8:1-10)
32Kuthimejan Jesús baye̱e chujni bakao ko ndachro ngain na̱:
—Jaꞌan thiakunuaa kain chujni teꞌi ixin uchunda nii nchaꞌon te na̱ nthiꞌi ngajin, ko xruꞌin thi sine na̱. Jaꞌan rinaoꞌa ruruaꞌan na̱ ngain nchianduꞌa na̱ ja̱ sineꞌa na̱ ixin ngatja nthiꞌá ndasendaxin na̱ jintha.
33Kuthimejan chujni bakao Jesús ndachro na̱ ngain jeꞌe:
—Aro ¿kexreen sinthoꞌo ná tseꞌna ná thi sine na̱ anto tsjé na̱, ko nthiꞌi xruꞌin nchia jii?
34Jesús banchiangiꞌi chujni bakao ko ndachro:
—¿Kejaꞌin niuthja chunda ra?
Ko jeꞌe na̱ ndachro na̱:
—Yaato niuthja ko kanxion kuchechjan.
35Kuthimejan Jesús kuetuꞌen kain chujni taruginthe na̱ ngataꞌa nunthe. 36Ko jeꞌe kuaa thi yaato niuthja ko kuchee, ko kuexruxiꞌin Ndo Dio. Kuthimejan kunchrijindunga niuthja ko kuchee ko bajon ngain chujni bakao ko jeꞌe na̱ kunchjea na̱ nio kunixin kuchee ngain kainxin chujni binthe nthi̱ꞌa̱. 37Kainxin na̱ juine na̱ ko kujeꞌe na̱ jian, ko thi xexin juine na̱ xrabinchekaon na̱ yaato nthaxra. 38Ko kain chujni bine kjui noo no̱ xii, ko bikinꞌa ni nchrii ko chjan. 39Kuthimejan are kain na̱ sakjui na̱, Jesús kuanito naa ntha barko ko sakjui ngain nunthe Magdala.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.