San Mateo 19

Jesús tjaago ixin thi dachrjendeꞌe ni tekaꞌo choo

(Mr. 10:1-12; Lc. 16:18)

1Are Jesús juexin ndachro kain yaa, jeꞌe sakjuixin Galilea ko sakjui nuntheꞌe Judea thi jii tuenxin nda Jordán. 2Anto tsjé chujni ruee Jesús, ko nthi̱ꞌa̱ jeꞌe binchexrueꞌen tsjé chujni niꞌi.

3Kuthimejan kanxion xi fariseo binthekunchieꞌen xa ngain Jesús ixin bikjexin xa a nchaoꞌa rugatheꞌe Jesús ko banchiangi xa:

—¿Anchao naa xii sachrjendeꞌe chriꞌi xa ixin chrujan ibinchexruxinꞌa xa?

4Jesús ndachro ngain xa:

—¿Atsjeꞌa ra Xruen Ndo Dio, thi jitaxin ixin are kainxin kuexiꞌin beꞌe jeꞌe ndo binchechjian ndo xii ko nchrii? 5Kai jitaxin: “Mexinxin xii sachrjendeꞌe xa ndudee xa ko janee xa ixin sekaꞌo xa jeꞌo chriꞌi xa, ko kayuixin na̱ sinthe na̱ inchin nakuaxinxon chujni.” 6Ko jañaa ijeꞌa yoo chujni na̱, jai kayui na̱ kjan na̱ nakuaxinxon chujni. Mexinxin thi ni Ndo Dio binchekjan nakua chujni, chujni chroꞌa santsjendeꞌe choo ni teꞌi.

7Kuthimejan binthendachro jeꞌe xa:

—¿Unda diketuꞌan Moisés ixin nchao sajon ni ngain nchra naa xroon setaxin ixin unda bachrjendeꞌe choo ni, ko jañaa nchao rundache ni nchra satsji nchra?

8Jesús ndachro:

—Moisés bajon juachaxin jañaa ixin jaꞌa ra atho cha thinxin ra. Ixin are Ndo Dio binchechjian nchrii ko xii jeꞌa jañaa kuetuꞌan ndo. 9Ko jaꞌan rindathjo ra ixin jaan nchao sachrjendeꞌe xa chriꞌi xa, ja̱ bithja nchra tajijuakaꞌo nchra inaa xii. Aro ja̱ jeꞌa ixin jiꞌi, thi xii jitanchrjanda nchra sincheꞌe nchra thi jianꞌa ixin tsjee nchra inaa xii ko xi sekaꞌo nchra rukjan xi kuxeꞌe nchra.

10Kuthimejan chujni bakao Jesús ndachro na̱:

—Ja̱ jañaa tangixin thi sekaꞌo choo nchrii ko xii, icha jian sinthekaoꞌa choo na̱.

11Jesús ndachro ngain na̱:

—Kanxinꞌa chujni nchao tsinxin na̱ jiꞌi, jeꞌo thi chujni Ndo Dio ndachro ixin nchao sinthe na̱ jeꞌo na̱. 12Jii tsjé xii eunuco (xii bakadeꞌe na̱ thi xixi xa o baguankaoꞌa xa). Te xii are bakunkjiꞌi xa baguankaoꞌa xa thi xixi xa, te xa bakadeꞌe na̱ xa. Ko te xa rinaoꞌa xa dinthekaꞌo xa nchrii ixin icha rinao xa sincheꞌe xa xra thetuꞌan Ndo Dio, ndo thjen ngajni. Ko thi jian thinxin jiꞌi, ncho ncheꞌe thi thetuꞌan ndo.

Jesús binchenchaon xan nchinnchinchjan

(Mr. 10:13-16; Lc. 18:15-17)

13Kuthimejan juiauꞌe na̱ Jesús kanxion xan nchinnchinchjan ixin Jesús rukiin raa ngataꞌa jaa xan ko runichjee Ndo Dio ixin runchenchaon xan, aro chujni bakao Jesús kuexiꞌin na̱ binchesatheꞌe na̱ kain chujni binthekiaꞌo chjan mee. 14Aro Jesús ndachro ngain chujni bakao:

—Tanchrjanda ra xan nchinnchinchjan tsii xan ngajin, kayakuenꞌa ra xan, ixin chujni ncheꞌe inchin xan nchinnchinchjan teꞌi, chujni mee sinthe na̱ ngain thi thetuꞌan Ndo Dio.

15Ko Jesús juexin kuiin raa ngataꞌa kain xan nchinnchinchjan, jeꞌe sakjuixin nthi̱ꞌa̱.

Naa xan xii anto tsjé tumi bechunda xan

(Mr. 10:17-31; Lc. 18:18-30)

16Naa xan xii juii bitsjeꞌe Jesús ko banchiangi xan:

—Suixin ke tjaago ko anto jian, ¿keꞌe icha jian sinthaꞌa ixin rukjan na inaa chujni narua ko xruꞌin nchaꞌon seꞌen na?

17Jesús ndachro ngain xan:

—¿Unda ndachro ixin jaꞌan jian na? Nakuaxinxon thi jian jii ko mee Ndo Dio. Aro ja̱ rinao rukjan inaa chujni narua, dithikaon ko ncheꞌe kain thi kuetuꞌan Ndo Dio.

18Xan xii ndachro xan:

—¿Kekaa thi thetuꞌan ndo?

Ko Jesús ndachro ngain xan:

—Duenꞌa chujni, darichrikoꞌa nchrii jeꞌa nchriꞌa, theꞌa, nichjaꞌa thi bincheꞌa inaa chujni, 19chundeꞌe juasaaya ndudaa ko janaa, ko ruthjueꞌe kain chujni inchin thjueꞌe nthauꞌa.

20Xan xii mee ndachro xan ngain Jesús:

—Kain yaa kuexian binthaꞌa are xra nchiin na, ¿keꞌe xraditjaan sinthaꞌa?

21Jesús ndachro ngain xan:

—Ja̱ rinao rukjan naa chujni dithikaon kain thi thetuꞌan Ndo Dio, thji ko nchekji kainxin thi chunda ko tunchjeyeꞌe tumia chujni nua, ko tsjé ruchunda nthi̱ꞌa̱ ngajni. Kuthimejan siꞌi ko sakji ná thi jaꞌan sakji.

22Ko are xan xii kuiꞌin xan yaa, anto bechiin xan ko sakjui xan, ixin anto tsjé bechunda xan.

23Kuthimejan Jesús ndachro ngain chujni bakao:

—Ndua thi rindathjo ra ixin atho tangi ixin naa chujni anto tsjé chunda sixiꞌin ngain thi thetuꞌan Ndo Dio, thi thjen ngajni. 24Icha tangiꞌa naa kucamello sathuxiꞌin ba thuechjeꞌen naa nthachia ke chujni anto tsjé chunda sixiꞌin na̱ ngain thi thetuꞌan Ndo Dio.

25Are chujni bakao Jesús kuiꞌin na̱ jiꞌi, anto kuiseꞌen na̱ ko banchiangiꞌi choo na̱:

—¿Kensen nchao rukjan inaa chujni narua remee?

26Jesús tabetsjeꞌe na̱ ko ndache na̱:

—Chujni chroꞌa sincheꞌe na̱ kain thi tangi yaa, aro ixin Ndo Dio xruꞌin tangi jii.

27Kuthimejan Pedro ndachro ngain Jesús:

—Jaꞌan ná kuinthua ná kain thi binthechunda ná, ko chrji ná ngajin. ¿Keꞌe sacha ná jaꞌan ná?

28Jesús ndachro ngain na̱:

—Ndua thi rindathjo ra, ixin ngain nchaꞌon are kainxin rukjan narua, are mee jaꞌan, thi Xii juixin ngajni sariꞌi ngain ntha xintaon detaꞌa ni chunda icha jié juachaxin, ko jaꞌa ra xro chrji ra ngajin kai sinthe ra ngain theyoo ntha xintaon ko sayéꞌe ra juachaxin sincheꞌe ra jie̱ ngain chujnii thi theyoo xeꞌen Israel. 29Ko kain chujni kuinthuꞌe nchianduꞌa, xan choo, nchri choo, ndudee, janee, o chriꞌi, o xeꞌen, o jngiꞌi ixin tencheꞌe na̱ xrana, chujni mee sayée na̱ naa renkia icha tsjé ke thi ubechunda na̱ ko kai rukjan na̱ inaa chujni narua ko xruꞌin nchaꞌon tsjexin. 30Aro tsjé chujni xraxaon na̱ ixin jai anto renthe na̱, are mee, xruꞌin tsurenthe na̱, ko ni xraxaon ixin jai rentheꞌa na̱, are mee jeꞌe na̱ icha tsurenthe na̱.

Currently Selected:

San Mateo 19: plsNT

Highlight

Copy