San Mateo 25

The xan nchrii

1Kai ndachro Jesús:

—Thi thetuꞌan Ndo Dio nthi̱ꞌa̱ ngajni mee tsuꞌen inchin thi bincheꞌe the xan nchrii binthekji ngain naa kiai thi kutheꞌe na̱ ko bikao xan candiil xan chexin aceite, ixin rugichuenxin xan xi rukutheꞌe. 2Naꞌo xan nchrii jian baxraxaon xan thi runcheꞌe xan ko naꞌo xan ndusenꞌa xan thi runcheꞌe xan. 3Xan ndusenꞌa keꞌe bancheꞌe xan, bikao xan candiil xan, aro bikaoꞌa xan yee aceite. 4Ko xan jian baxraxaon thi bancheꞌe xan, bikao xan candiil xan ko yee aceite. 5Ko xi rukutheꞌe dakaꞌa biji xa ko kain xanchrii kjueꞌe xan kuthachrin cha ko tabinthejua xan. 6Kuthimejan inchin ngusine thie kuiꞌin na̱ kuyao naa thi ndachro: “¡Ujuii xi tsutheꞌe, dachrje ra dichuenxin ra xa ngatja nthiꞌá!” 7Kuthimejan kain xan nchrii bingathjen xan ko binchegakaon xan candiil xan. 8Kuthimejan xan ndusenꞌa keꞌe bancheꞌe xan kjui xan binthendachro xan ngain thi xan baxraxaon jian: “Chjana ni ra nchion aceitea ra ixin candiil na ná ndatedanga.” 9Aro xan jian baxraxaon binthendachro xan: “Naꞌi, ixin jaꞌan ná siranaꞌa ná aceite ko kai ixin jaꞌa ra. Icha jian thji ra thi tuchji aceite ko nthi̱ꞌa̱ theꞌna ra aceite sundaꞌa ra.” 10Aro nguii sakjui xan bikeꞌna xan aceite, juii xi tsutheꞌe. Ko xan jiche candiil bixinkaꞌo xan xi rukutheꞌe ngain thi jii kiai ko kuejee na̱ nchia. 11Kuthimejan binthekii thi xan bikeꞌna aceite ko binthendachro xan: “Nthatsaꞌan ra ñao danthjena ni ra nchia.” 12Aro xi tsutheꞌe ndachro xa: “Chunxinꞌa ra.”

13Kuthimejan Jesús ndachro:

—Chuꞌen ra kain nchaꞌon ixin nuaꞌa ra keꞌe nchaꞌon ko keꞌe hora rukjan siꞌi jaꞌan, thi Xii juixin ngajni.

Ni bithuꞌe tumii xi najni

14’Thi thetuꞌan Ndo Dio nthi̱ꞌa̱ ngajni, mee inchin naa xi najni, sarukji kjín ko baye̱e ni nchexree xa ko bajon xa tumii xa ixin rugithuenda na̱ tumi.

15’Ngain naa xi ncheꞌe xra bajon xa naꞌo no̱ tumi, ko ngain inaa bajon xa yoo no̱ tumi, ko ngain inaa bajon naa no̱ tumi. Kuthimejan xi najni sakjui xa kjín. 16Ko xi ncheꞌe xra bayée thi naꞌo no̱ tumi, binchencheꞌe xa tumi xra ko bacha xa inaꞌo no̱ tumi. 17Ko xrajeꞌo bincheꞌe thi bayée thi yoo no̱, ko kai bacha iyoo no̱ tumi. 18Aro thi bayée naa no̱ tumi, binchechjian naa thue ko kjuabaa tumii xi najnii.

19’Batho tsjé nchaꞌon, kuthimejan kjan xi najnii ni ncheꞌe xra teꞌi ko baye̱e xa na̱ ixin ndachro na̱ keꞌe bincheꞌe na̱ kunixin tumii xa. 20Ko saꞌo biji thi bayée naꞌo no̱ tumi, ko bajon inaꞌo no̱ tumi, ko ndachro ngain xa: “Nchana, suixin chjana naꞌo no̱ tumi ko digayeꞌe inaꞌo no̱ tumi bacha jaꞌan.” 21Xi najni ndachro xa ngain: “Atho nchao jii, jaꞌa naa thi ncheꞌe xra jian ko ncheꞌe kain thi dituꞌan. Jaꞌa atho jian bincheꞌe ngain thi tsjéꞌa tumi chjaꞌa, mexinxin jai ruchjaꞌa icha tsjé. Xrakui dixiꞌin nchiania ko ruchaa ná.” 22Kuthimejan kunchieꞌen thi ncheꞌe xra bayée thi yoo no̱ tumi, ko ndachro: “Nchana, suixin chjana yoo no̱ tumi, ko dayeꞌe iyoo no̱ tumi bacha jaꞌan.” 23Xi najni ndachro xa ngain: “Atho nchao jii, jaꞌa naa thi ncheꞌe xra jian ko ncheꞌe kain thi dituꞌan. Jaꞌa atho jian bincheꞌe ngain tumi tsjéꞌa chjaꞌa, mexinxin jai ruchjaꞌa icha tsjé. Xrakui dixiꞌin nchiania ko ruchaa ná.” 24Aro thi ncheꞌe xra bayée thi nakua no̱ tumi, ndachro ngain xi najnii: “Jaꞌan nuna ixin suixin anto cha ansean ko datsiin thi suixin bakengaꞌa ko dikjejo thi tsee suixin binchencheꞌa xra. 25Mexinxin jaꞌan xraon na ko kjuabaa tumia, aro nthiꞌi jii tumia.” 26Xi najni ndachro xa: “Jaꞌa naa ni ncheꞌe xra jianꞌa ko atho saꞌa. Ja̱ benuꞌa ixin jaꞌan datsiin thi jaꞌan kuengaꞌa ko thjejo thi tsee xruꞌin nchaꞌon binthanthaꞌa xra, 27mexinxin icha jian jaꞌa rugikaan tumina ngain nchia nchencheꞌe na̱ tumi xra, ko are jaꞌan rukjan na, rugayaa tumina kunixin thi rugacha tumi.” 28Ko ndachro xi najni ngain ni te nthi̱ꞌa̱: “Dantsjeꞌe ra xa thi naa no̱ tumina chunda xa ko dajon ra tumi ngain thi jichunda the no̱ tumi 29ixin thi uchunda, kjan sayée icha ko ruchunda icha. Ko thi xruꞌin chunda, maski tsjéꞌa chunda, xrasachrjeꞌe. 30Ko thi ncheꞌe xra xruꞌin xree, dikaan ra ngain thi naxin xeꞌe, nthi̱ꞌa̱ thi rutsjanga ko sinetaon neno.”

Nguii nunthe sueꞌen jie̱

31’Ko jaꞌan, thi Xii juixin ngajni, siꞌi inaa kunixin jié juachaxin kunixin kain angelna, are mee tasariꞌi ngain ntha xintaunna kunixin jié juachaxin. 32Ko chujni te nguixin nunthe ruxrathe na̱ ngathexin kon na, ko santsjenda na̱ inchin ncheꞌe thi thingaria kuleko are dantsjenda kuleko te ngayee kuthentso. 33Ko sakee kuleko no rajianxin ko kuthentso no rajngunxin. 34Kuthimejan thi Rey rundachro ngain chujni te no rajianxin: “Xrakui ra, jaꞌa ra xro ubinthanchaon ra Ndudana, ko dayeꞌe ra thi jeꞌe ndo thetuꞌan ndo, thi ubechjian ndo are nakuexinxon kunchjian nunthe. 35Ixin jaꞌan beꞌen na jintha, ko jaꞌa ra chjana ra thi juine ko beꞌen na jinda ko jaꞌa ra chjana ra thi biꞌi, jaꞌan bakji ngain rajna xraa chujni jeꞌa nuntheꞌe ko jaꞌa ra chjana ra nchia thi barichrinxiꞌin. 36Jaꞌan xruꞌin luntho barichunda, ko jaꞌa ra chjana ra luntho baringaꞌa, jaꞌan kunina ko jaꞌa ra basutsjena ra, jaꞌan biaxinna ngain nduꞌa xiiso, ko jaꞌa ra basutsjena ra.” 37Kuthimejan chujni jian rundachro na̱: “¿Kensa bikon ná ixin suixin beꞌen jintha ko chjaꞌa ra benthe ko kensa bikon ná ixin suixin beꞌen jinda ko chjaꞌa ra jinda? 38¿Ko kensa bikon ná ixin suixin bakji inchin chujni jee nuntheꞌe, ko jaꞌan ná chjaꞌa ra nchia barichrinxiꞌin, ko kensa barichundaꞌa luntho ko jaꞌan ná chjaꞌa ra luntho? 39¿Ko kensa bikon ná ixin suixin kuniꞌa o bariꞌi ngaxiꞌin nduꞌa xiiso ko jaan basutsjaꞌa ra?” 40Ko xi rey satheꞌe xa: “Ndua thi rindathjo ra ixin kain thi jian bincheꞌe ra ngain chujni nandaa jidithikaon na̱ maski chujni mee xraa rentheꞌa na̱, aro thi jian bincheꞌe ra ngain na̱, ruchro ixin ngajin na bincheꞌe ra.”

41’Kuthimejan xi rey rundachro xa ngain chujni te no rajngunxin xa: “¡Sathjixin ra ngajin, jaꞌa ra chujni jianꞌa! ¡Sathji ra ngathe xruꞌi dangaꞌa, kunchjian ixin nchiijin ko kain angeel! 42Ixin jaꞌan beꞌen na jintha ko jaꞌa ra chjanaꞌa ra thi juine, beꞌen na jinda ko chjanaꞌa ra thi biꞌi. 43Jaꞌan bakji inchin chujni jee nuntheꞌe, ko jaꞌa ra chjanaꞌa ra nchia thi barichrinxiꞌin. Jaꞌan barichundaꞌa lunthuna, ko jaꞌa ra chjanaꞌa ra luntho baringaꞌa. Jaꞌan kunina ko biaxinna ngain nduꞌa xiiso ko jaꞌa ra basutsjenaꞌa ra.” 44Kuthimejan jeꞌe na̱ rundachro na̱: “Nchana, ¿kensa bikon ná ixin suixin beꞌen jintha o beꞌen jinda, o inchin chujni jee nuntheꞌe, o kensa bikon ná ixin suixin barichundaꞌa lunthua, o kensa suixin kuniꞌa, o biaxiꞌan ngain nduꞌa xiiso ko jaꞌan ná kjuengijnaꞌa ra?” 45Ko xi rey rundachro xa: “Ndua thi rindathjo ra, ixin binaoꞌa ra kjuengijna ra chujni nandaa jichunthia na̱ ko xraa rentheꞌa na̱, mee ruchro ixin jaꞌa ra kjuengijnaꞌa ni ra jaꞌan.” 46Mexinxin chujni bincheꞌe jianꞌa tsji na̱ ngathe xruꞌi dangaꞌa, ko chujni jian rukjan na̱ inaa chujni narua thi xruꞌin nchaꞌon tsjexin.

Currently Selected:

San Mateo 25: plsNT

Highlight

Copy