Lucas 13

Tjinkia ti nkehe tjenka̱yáxian o̱ tsjasótia

1A̱ndá ti ña̱o a, la iso sin kꞌuejó ntiha chenka sin Jesús nkexrín kjuíchꞌe Pilato kꞌue̱to̱an itsꞌen iso chojni tsíkji̱xi̱n Galilea la kónkojiéko ti ijni̱é sin ti ijni̱é ti iko tꞌóñá sin chjéxin sin kjuasáya Díos. 2Ndá kjuáte̱he chꞌin Jesús ndáchro:

―¿Á tjénka̱yáxinra kixin xi̱kaha kóhen ti sin tsíkji̱xi̱n Galilea kixin a̱ntsí chónta sin ijie̱ ke ti íso sin chjasén ntiha ní? 3Ndáxrja̱n kixin kjá náhí. A̱ndá jahara ti tsjínkíhyara ti tjénka̱yáxinra la kaínra xi̱kaha itsꞌenra. 4A̱ndá ti dieciocho sin ikꞌuén ti ó kꞌo̱ya̱ ti torre siloé la, ¿á tjénka̱yáxinra kixin a̱ntsí chónta ijie̱ ke ti íso sin tjejó Jerusalén ní? 5Chaxín ndáxrja̱n kixin náhí. A̱ndá ti jahara tsjínkíhyara ti tjénka̱yáxinra la kaínra xi̱kaha tsꞌitjáñara.

Éxi ti inta tꞌónahña to higo

6Kja̱xin kjuíncheyóe̱xin chꞌin Jesús jnko nkehe ndáchro:

―Ijnko chojni chónta ijnko inta tꞌóna to higo no̱nte̱e la sákjuitsjehe á kꞌóna ti ito. A̱ndá ti ó kjuíji ntiha ndá tsjehe la kꞌuitjahya ninkehó. 7Ndá ndáche ti nkexro tꞌayakohen ti nonte: “Ó tji iní nánó tꞌinkatsjaha̱ ti inta i la kꞌuitjáhya ninkehó to higo. Tꞌóchrínjña ti inta kixin tsoxehe̱ ti nonte.” 8A̱ndá ti nkexro a ndáchro: “Tito̱hé ijie nánó ó ndá janhan si̱ntantáha̱ inche la ko tsotjahá nchekatjehe#13:8 nchekatjehe abono 9la áchꞌe tsꞌóna ito. A̱ndá ti náhí la jína tsꞌochrínjña.”

Ijnko tjan níhi kuito̱he jína ti ña̱o to̱kꞌéhe chojni

10Ndá ijnko ña̱o to̱kꞌéhe chojni la Chꞌin Jesús kjuákꞌe ijnko nchia xrakue̱xin ti sin judío la kjuako. 11Ndá ntiha itjen ijnko chojnichjin níhi chónta ncha̱kuén jínahña la ó dieciocho nánó kjuíncheníhi ti jehe tjan, tjesékoá tjan, xitjahya xrentoá tjan. 12A̱ndá ti ó kꞌuíkon chꞌin Jesús kixin xi̱kaha itjen ti chojni chjin la kꞌuéye̱he̱ chꞌan tjan ndáchro chꞌan:

―Ó kjuìihan ti ichin chonta.

13Ndá chꞌin Jesús kjuakꞌetja tja tjan a, la tuénxín xrentoá tjan la chjéhe tjan Díos kjuasáya. 14#Ex. 20:9, 10; Dt. 5:13, 14.*A̱ndá ti nkexro tꞌe̱to̱an kuènté ni̱nko la kónínkaon kixin chꞌin Jesús kjuínchekito̱he jína ijnko chojni ti ña̱o to̱kꞌéhe sin, la ndáche ti chojni tjejó ntiha:

―Siín injon ña̱o jína tóhen ixra̱, chrókꞌuinkara chrókuíto̱hara jína la jehya ti ña̱o to̱kꞌéheni.

15A̱ndá Ìnchéni kjuáte̱he, ndáchro:

―Jahara nkojinxónhña tjénka̱yáxinra. ¿Á tjásindankéhyara ti koxi̱nta̱ara o̱ ti kolócho̱ara tjiko̱ara va itꞌi va ìnta̱ ti ña̱o to̱kꞌéheni ní? 16A̱ndá ti tjan í tsíkꞌaxrjeníxin Abraham la ó chónta dieciocho nánó tsíkjinchenteto ti Jínahña la, ¿á jehya jína chrókjuásinta̱nka̱ ti nkehe tsíkóntetoxín tjan ti ña̱o to̱kꞌéheni ní?

17Ndá xi̱kaha ichro Jesús la kaín ti sin kónínkaon la kósuéhe̱ sin. La kaín ti chojni tjejó ntiha la chéhe̱ sin kꞌuíkon sin kaín ti kjuaxroan ijié kjua̱ko̱xi̱n chꞌin Jesús.

Ti itje mostaza

(Mt. 13:31-32; Mr. 4:30-32)

18Ndá ndáchro chꞌin Jesús:

―¿Nkehe tóyóhe̱ ti kjuachaxin tꞌe̱to̱axín Díos la ko nkehe jína chrókjui̱ntayóa̱xian? 19Éxi ijnko itje mostaza tsíkꞌe̱nka̱xin ijnko chojni no̱nte̱e. La ti ó tsꞌaña la tsꞌánkí nte̱to la tsꞌóna ijnko inta ijié. A̱ndá ti koxroxe xritjaká mé itsi va sichꞌéna va ka̱ké va chríkꞌá ti inta.

Ti nkehe tꞌánkíxin nio̱tja̱

(Mt. 13:33)

20Ndá ndáchro chꞌin Jesús ínaá:

―¿Nkehe chrókjui̱ntayóa̱xian ti kjuachaxin tꞌe̱to̱axín Díos? 21Tíha la éxi ti nkehe nchekꞌánkí nio̱tja̱ kjuinkíkjaxín ijnko chojnichjin iní medida harina. Landá ti ichꞌo la kꞌuánkí.

Ti puerta tekahya

(Mt. 7:13-14, 21-23)

22Kꞌuatsínka chꞌin Jesús kaín chjasin ihyé la ko kaín chjasin ntsíntsí nkákjako ti itan jína kixin ó sátsji̱ chꞌan chjasin Jerusalén. 23A̱ndá ijnko nkexro kjuanchankí:

―Ìnchéni, ¿á isokoá ti sin tsaá ní?

Ndá chꞌin Jesús kjuáte̱he, ndáchro:

24―Tóxakohanra tꞌixe̱énxinra ti puerta tjekahya kixin nchónhña chojni tjinkaon sin chrókꞌuixehen sin, kjánchó tsjachahya sin. 25Ti ó tsꞌikjehe̱ ìnché ti nchia ti puerta, ndá jahara tsꞌejora ndója tsꞌèyara tsꞌinkara ti puerta tsondáchrora: “Jaha itjen nkaxehen, taki̱tjehé nchia”, tsixrora. Kjánchó ti ìnché nchia tsjate̱he tsondáchro: “Nónahña nketí kꞌuinkaxínra jahara”, tsixro chꞌan. 26Ndá jahara tsjankíxinra tsondáchrora: “Kjonieni la ko kꞌuikaoni nkoko̱a ti jaha la ko kjuákꞌe kjuàkua ti nti̱a chjaséni”, tsixrora. 27#Sal. 6:8.*Kjánchó ti ìnché nchia la tsondáchro: “Chaxín ndáxrja̱n kixin chónhña nkexro ti jahara. Sátsjixinra ntihi jahara chojni kjuíchꞌe ti nkehe jínahña.” 28#Mt. 22:13; 25:30.#Mt. 8:11, 12.*Ndá ntiha tso̱tsja̱nkara la ko sintetaónra ñénora ti ó tsꞌikonra Abraham, Isaac, Jacob la ko kaín ti sin kꞌuéchronka itén Díos tsꞌejó sin ti itjen Díos tꞌe̱to̱an, ndá jahara la tsꞌaxrjéxinra ntiha. 29Kixin tsji̱xi̱n chojni nó tji̱to̱xi̱n ña̱o la ko nó tjiátóxin ña̱o la ko nó norte la ko nó sur la tsꞌejótja̱xi̱n sin ti itjen Díos tꞌe̱to̱an la sinie sin. 30#Mt. 19:30; 20:16; Mr. 10:31.*A̱ndá iso ti sin kanhñó tjetoan ijie la a̱ntsí tsꞌe̱to̱an sin, a̱ndá ti sin imá tꞌe̱to̱an ijie la ti ña̱o a la tsꞌítuehen sin.

Tꞌává chꞌin Jesús

(Mt. 23:37-39)

31A̱ndá ti ña̱o a la ikui iso ti sin fariseo la ndáche sin chꞌin Jesús:

―Sátjixian ntihi kixin ti rey Herodes la tjinkaon tsꞌóñá ti jaha.

32Ndá chꞌin Jesús kjuáte̱he, ndáchro:

―Sátjira chenkara ti nkexro jínahña: “Ijie la ko ndóye tsakítsje ncha̱kuén jínahña chónta chojni la ko si̱ntakito̱ha̱ chojni níhi jína la níxin ña̱o la tsjixìna ti ixra̱ kuénta̱na.” 33Kjánchó ticháxi̱n kixin na̱xa̱ sátjia ijie la ko ndóye la ko ti ña̱o chrꞌéxi̱n kixin nijnko nkexro chrónka itén Díos tꞌenxín ndója ti chjasin Jerusalén.

34’Jerusalén, Jerusalén. Jaha tꞌoñá ti nkexro tjako itén Díos la tjatexian ixro̱ ti sin ichrꞌán Díos ikui chrókjuinki̱tsa. Itsjé vece tjínka̱oan chrókónkotséra la chrókꞌuayakohanra éxi ijnko kochíká tꞌayakohen ti xje̱en chrínkí ka̱ñe̱ñe̱e, kjánchó jahara la tjinkákonhñara. 35#Sal. 118:26.*Chrókónoha kixin Díos la tsíto̱he ti jahara la tsꞌikonhñara ti janhan hasta ti ña̱o tsondáchrora: “Jína ti nkexro kui̱xi̱n kjuachaxin ihni̱é Ìnchéni Díos.”

Currently Selected:

Lucas 13: poeNTplus

Highlight

Copy