Mateo 24

Chrónka Jesús kixin tsoxika ti ni̱nko

(Mr. 13:1-2; Lc. 21:5-6)

1Ndá ti ó kꞌuaxjexín chꞌin Jesús ti ni̱nko la sáchrokjui chꞌan, la ti sin kꞌuájiko chꞌan mé kóchjina sin kixin tsochóhen chꞌan tsotsjehe chꞌan nkexrín náxrjón tsíkꞌóna ti ni̱nko. 2A̱ndá chꞌin Jesús ndáchro:

―¿Tjejotsjehéra kaín tíha ní? Chaxín ndáxrja̱n kixin ijnko ña̱o la tsꞌo̱ya̱ kuenté ti ni̱nko i. Nijnko ixro̱ tsꞌejókjenhña kícho kixin kaín la tsoxitjen ―ichro chꞌan.

Ti nkehe tso̱hen ti ña̱o tsjixixín

(Mr. 13:3-23; Lc. 21:7-24; 17:22-24)

3Ndá chrꞌéxi̱n sákjui̱ sin chritaón ti ijna̱ Olivo la chꞌin Jesús kjuákꞌetja̱xi̱n la kóchjina ti sin kꞌuájiko chꞌan la kjuanchankí sin:

―Chro̱nka nkesá tso̱hen tíha. ¿Nkexrín tso̱noexíni ti ó tsꞌinka la ko nkexrín tso̱noheni ti ó itsi ti tsjeje̱ chjasintajni? ―ichro sin.

4Ndá kjuáte̱he chꞌin Jesús ndáchro:

―Tsjehéra kixin ninkexró chrókjuitꞌayahyara. 5Kixin itsi itsjé chojni tsꞌákjexi̱n ni̱ná, tsondáchro: “Janhan mé ti Cristo”, la itsjé chojni sichꞌiyehe sin. 6Ti ó tsinhínra tsondáchro chojni kixin ó siín guerra la ko tsꞌixin kjuachrakon kixin tsjajo̱nko kícho sin la chróchrakonhñara, kixin ticháxi̱n xi̱kaha tso̱hen. Kjánchó na̱xa̱ tsꞌitjáñahña chjasintajni. 7Ijnko nación tsjajo̱nko íjnko nación la ko ijnko chjasin tsjajo̱nko íjnko chjasin. La itsjé chjasin tso̱kjinta la ko tsꞌixin ichin la ko tsꞌinki nonte nkuíxín. 8La kaín tíhi la na̱ntá tsoxrankíxixón ti kjuatjoté tsꞌikon chojni.

9 # Mt. 10:22. *’A̱ndá jahara la tsotsé chojni la tsjikaánra sin ti tjejó ti sin tꞌe̱to̱an kixin sinchekjasótiara sin la tsꞌóñá sin ti jahara. La ko kaín chojni siín chjasintajni tso̱nínkakohen sin ti jahara kixin tinkachónkira ti janhan. 10A̱ndá ti ña̱o a, la itsjé sin tsíto̱he sin ti janhan, la í tsitekakonhña sin, la ko tso̱nínkakohen kícho sin la ko tsꞌeka kícho sin ijie̱. 11La itsi itsjé chojni nduáhya tsjako la sichꞌiyehe itsjé chojni. 12La tsꞌixin nchónhña nkehe jínahña la itsjé chojni la í tso̱tjue̱hya kícho. 13#Mt. 10:22.*A̱ndá ti nkexro tsjacha tsitekaon ti janhan hasta tsjeje̱ chjasintajni la tsaá sin. 14A̱ndá ti itan jína chronka nkexrín tꞌe̱to̱axín Díos mé ticháxi̱n tsihin kaín chojni kuenté chjasintajni, la ti ó tsjixin ndá tsꞌitjáña ti chjasintajni.

15 # Dn. 9:27; 11:31; 12:11. *’A̱ndá jahara ti ó tsꞌikonra kixin tsjixraká ti ña̱o tsjakꞌe ti nkehe jínahña nkaxehen ti ni̱nko tjóá éxi tsíkjin Daniel, (ti nkexro nchekuáxin la ticháxi̱n tsienxín), 16ndá ti nkexro tjejó Judea la tsinká sin sátsji̱ sin chritaón ijna̱. 17#Lc. 17:31.*Ti nkexro tjejó chritaón ndo̱e la í tsꞌinkajinhña tsákja sin nkojín nkehe. 18A̱ndá ti nkexro tjejóchꞌe xra̱ no̱nte̱e la í tsokjanhña tsákja ti ika tꞌitsáte. 19Nóa ti chojnichjin tjejóyá la ko nóa ti nkexro tjejónchekakí ixjan ti ña̱o a. 20Chrokjuanchehe sin Díos kixin jehya ncha̱kuén ikin#24:20 ncha̱kuén ikin ti nitjó imá ikin invierno chrókóhen tíha la ko jehya ti ña̱o to̱kꞌéhe chojni. 21#Dn. 12:1; Ap. 7:14.*Kixin ti ña̱o a mé tsꞌixin ijnko kjuachrakon imá ijié, ijnko kjuachrakon nunca kꞌuixinhña ndesi xránkíxixín chjasintajni la ko tsꞌixinhña ínaá. 22Ti chrókꞌue̱to̱anhña Díos kixin tjoka tsꞌatsínka tíha la chrókuaáhya ninkexró. Kjánchó tsꞌe̱to̱an chꞌan kixin tjoka tsꞌatsínka ti kjuachrakon ijié kixin jehe chꞌan mé imá tjue̱he chꞌan ti sin kjueyá chꞌan.

23’A̱ndá ti tsondáchro chojni: “Tsjehéra ntihi itjen ti Cristo”, o̱ “Tsjehéra ntiha itjen chꞌan”, la chrókuitekákonhñara. 24Kixin itsi itsjé chojni tsondáchro kixin jehe sin mé ti Cristo, la ko itsi itsjé ti sin nduáhya tjako la tsjasin sin kjuaxroan ijié la hasta tsjacha sichꞌiyehe sin kaín chojni, kjónté ti sin tsíkjeyá Díos. 25Ó senó xrja̱nká ti nkehe tso̱hen kixin tso̱nohara. 26#Lc. 17:23, 24.*Méxra̱ ti tsondáchro chojni: “Tsjehéra itjen chꞌan nte̱je̱”, la tsꞌaxrjéhyara tsitsjehéra. O̱ ti tsondáchro chojni: “Tsjehéra ntihi tjemá chꞌan”, la chrókuitekákonhñara. 27Kixin éxi ti tjónkíxín la tꞌikon chojni tꞌinkaséña ti tji̱to̱xin ña̱o la tꞌaxrjentá hasta ti tjiatóxin ña̱o, mé xi̱kaha tsꞌikon chojni ti ó itsi ti Xje̱en Díos kꞌóna Chojni. 28#Lc. 17:37.*Kixin éxi ti tjetsínka ijnko iko tsíkꞌen la ntiha tónkotsé ti konte̱xrje̱n.

Tsokjan ti Xje̱en Díos kꞌóna Chojni

(Mr. 13:24-37; Lc. 21:25-33; 17:26-30, 34-36)

29 # Is. 13:10; Jl. 2:10, 31; 3:15; Ap. 6:12; Is. 13:10; Ez. 32:7; Jl. 2:10; 3:15; Is. 34:4; Ap. 6:13. *’A̱ndá ti ó tsjixin tsꞌatsínka ti kjuachrakon ijié la ti ña̱o la tsꞌixitié, la ti nitjó la í tsꞌinkaséñaxínhña. Kaín ti konotsé la tsꞌánótje̱xi̱n nka̱jní la ko kaín ti nkehe siín nkaya nka̱jní la tsꞌinki. 30#Dn. 7:13; Zac. 12:10-14; Ap. 1:7.*La kaín chojni tsꞌikon tsi̱xi̱n nka̱jní ti Xje̱en Díos kꞌóna Chojni. La kaín ti chojni chjasintajni la tsochrakon sin la tsotsjánka sin tsꞌikon sin kixin itsi ti Xje̱en Díos kꞌóna Chojni, chríkjan ijnko itji̱, tsi̱ka̱o chꞌan ti kjuachaxin ijié kuènté chꞌan. 31Ndá Díos tsochrꞌán ti ángel kuènté kixin tsꞌánoa ti trompeta kixin tso̱chjina kaín ti chojni tsíkjeyá Díos, tsji̱xi̱n sin kanoé lado chjasintajni.

32’Chrokꞌuitjára ti nkehe si̱ntayóa̱xián kuènté ti inta tꞌóna to higo. Ti ó tꞌaña ti ntahnte̱ la ko tꞌixin ti chaon yoa la nohara kixin í séhya tsokjan ichrin. 33Mé xi̱kaha ti ó tsꞌikonra tsꞌixin kaín tíha, la tso̱noaxínra kixin í séhya tsokjan janhan. 34Chaxín tjo̱nka̱ra kixin kaín tíhi tso̱hen ti na̱xa̱ tꞌenhña ti chojni siín ijie. 35Ti nka̱jní la ko chjasintajni la tsꞌitjáña, kjánchó ti itan kuénta̱na la tsꞌitjáñahña nkochríxín.

36’Kjánchó ti ña̱o la ko ti hora tso̱hen tíha, la ninkexró noehña, ni ti sin ángel tjejó nkaya nka̱jní, ni ti Xje̱en Díos noehña, jehó ti Itꞌé chꞌan mé nohe tíha.

37 # Gn. 6:5-8. *’Ti ó tsokjan ti Xje̱en Díos kꞌóna Chojni la tso̱hen éxi kóhen ti ña̱o kꞌuékjakꞌe Noé. 38Ti ña̱o a ti na̱xa̱ tite̱éhya sin ìnta̱ la jína kꞌuejó sin, kjónie sin la ko ikꞌui sin, sítóte̱he sin hasta ti ó kjuixraká ti ña̱o kꞌuíxehen Noé ti ntabarco. 39#Gn. 7:6-24.*A̱ndá jehe sin la kienxínhña sin hasta ti ó kꞌuaniá ichrin ndá ikui yeé ìnta̱ la kꞌuátjoá sin kaín sin. Mé xi̱kaha tso̱hen ti ó tsokjan ti Xje̱en Díos kꞌóna Chojni. 40A̱ndá ti yaá chojni tjejóchꞌe ixra̱ nonte la ijnko sin sátsji̱, a̱ndá ti íjnko la tsíto̱he. 41Yaá chojnichjin tjejónchetsinka noa la ijnko sátsji̱ la ko ijnko tsíto̱he.

42’Méxra̱ chrókꞌuejotsjehera kixin noahñara nkehora la ko nkesá tsꞌinka janhan. 43#Lc. 12:39, 40.*Kja̱xin chrókónohara tíhi, ti ijnko nkexro chrókónohe nkehora chrókui ijnko nkexro chrókueéhe, la chrókjuakꞌetsjehe chꞌan chrókjuakꞌentá chꞌan ti ndo̱e chꞌan ndá xrokjuahya chrókꞌuixehen ti nkexro tjinkaon tseé. 44Méxra̱ jahara la jína chrókꞌuejora kixin ti Xje̱en Díos kꞌóna Chojni la titàya̱ itsié.

Ti nkexro jína ichꞌe ixra̱ la ko ti nkexro náhí

(Lc. 12:41-48)

45’Ti nkexro chaxín jína ichꞌe ixra̱ la ko nohe, la ti lamo la tꞌe̱tue̱hen kixin tsꞌayakohen ti sin tjejó ti nchia kuènté chꞌan la tsjajon nkehe sinie sin chji̱nti̱i hora. 46Náxrjón chéhe̱ ti nkexro ichꞌe ixra̱ ti ó itsi ti lamo la tsꞌikon kixin chaxín tjechꞌe ixra̱. 47Chaxín ndáxrja̱n kixin ti lamo la tsjajon chꞌan kaín ti ixra̱ chónta chꞌan kixin tsotsjehe ti nkexro a. 48A̱ndá ti ijnko chojni chꞌehya ixra̱ jína la tsjenka̱yáxin kixin kjá tjokahya tsokjan ti làmoé 49la tsjankíxin tsjajo̱nko ti íso sin chꞌexín ixra̱ la ko sinieko ko itsꞌika̱o kaín ti chojni tsékoan. 50Ndá xrína̱hña tsokjan ti lamo, ti ña̱o la ko hora noehña ti nkexro chꞌexín ixra̱. 51La ti nkexro a la tsjasóte kixin kjuínchexiteyáhya ti ixra̱ kꞌuítoan, la ko tsꞌe̱to̱an chꞌan kixin tsjasóte ti nkexro a éxi ti sin nkojinxónhña tjenka̱yáxin. Ndá ntiha tsotsjánka chꞌan la ko sinietaón chꞌan ñeno chꞌan.

Currently Selected:

Mateo 24: poeNTplus

Highlight

Copy