Markus Uram 11
11
Er Yesus Yerusalem atei wengbinkou ba, ninyi ilinto Ersi kibdobmai uram
11:1-11
1Er Yesus ab Er miliramnyi nang ab banmai ani, Yerusalem atei mutuk dam yanmai. Ara, a mutuk ara, “Zaitun kon,” dam asi atei si Betfage ab Betania ab doramnyi dam yanmai. Yanmai ura, Er Yesus biryi Er miliramnyi nang bitinyi asi naboka uram ebkarebmou. 2Ara, Erci sunsi ato eboka ebkarebmou, “Sunda minob menekoka eikatei asi birurum. Atei birumunyi ura, bisam keledai kabunyi ukuryok nebmar asi birikmangnyi asi asing eibkwandurum. A keledai deici tam ara ninyi ton burdena kum kubmai. Ati, a keledai kabunyi asi asing eibdurumnyi ura, tabwe lobdongoboka boyarurum. 3Asi, ninyi aryi sunsi, ‘Sunda keledai ara unato ati lobdongoboka bobanmarurum do?’ eboka asibdesingnyi ura, sunci asibmasingnyi nang asi ato ebkwandurum, ‘Nun Du biryi, “Keledai boyarurum,” ebmasir ati, keledai tiya ati bobinmaminyi asi aminda tubto tamuboka boyankwanim ca,’ ebkwandurum,” ebmou. 4Er Yesus biryi Er milirandei nang bitinyi asi ato eboka bokdeibmou ura, sunci binmarei ani, keledai mi asi ai bublan dam bisik lingkwa dam birikdeibmai asi asing eibmarei ura, lobdongobmarei. 5Lobdongoboka bobanmarei bok, ninyi ton dam a tikabyi nang aryi sunsi ato eboka asibdenmai, “Sunda keledai asi unato ati lobdongoboka bobanmarurum do?” eboka asibmai. 6Ato eboka asibdenmai uca, sunci Er Yesus biryi, “Ato-ato ebdurum,” ebmou to kuboka ebmarei. Ba, sunci, “Ur bobirurum,” ebmai. 7Ebmai ura, sunci a keledai asi Er Yesus dam boyanmarei. Boyanmarei ura, sunci sun alib ongon aling kwiriboka keledai deici asi yangabdeibmai. Ura, Er Yesus weleboka keledai deici asi burbinmou. 8Burbinmou ba, ninyi ilinto aryi sun alib ongon aling kwiriboka Er binkwamou bisik ai deibde banmai. Ba, yuk nang ara wa in dam aryi kuboka co bok ilinto kubmou te kusakoka Er Yesus binkwamwe bisik ai deibde banmai. Ara, “Nun Nai bira Erebdobnyi,” teneboka ato kubde banmai. 9Ato kubde banmai ura, ninyi nirya ara sun menekoka banmai nang ab sun aminda yanganmai nang ab antaniboka uram weik doboka ato ebmai,
“Hosana! Er Imtamnyi bira nun arungdeirisururnyi biryi bokdonokmounyi bira nun dam yanganmar ati, nunci Er si weik eboka kibdobkwayeb. 10Anyi bira nun abwe Daud bitonyi weik sienyi kururci, ninyi ilinto lebsiriryi, kalikwansir ati, Er si weik eboka kibdobdarur. Hosana! Ninyi nirya aryi Er Imtamnyi si weik ebkwayeb.” (Mazmur 118:25-26)
11Ninyi nirya aryi uram weik doboka Er Yesus biti ato ebmai ba, Er Yesus Yerusalem atei binmou. Binmou ura, Erci Bait Allah ai ara Er Imtamnyi biti ninyi dama deirin ai asi wengbindoka akai dam kuramwe dinyi utotoa nirya diblilibde yibanmou. Bok, inibmou ba, Er Yesus ab Er miliramnyi nang amolbaryi ab anaboka atei Betania dam tamuboka binmai.
Er Yesus biryi co kwarang asi submou uram
11:12-14
12Mabmai ani, berekwe ura, Er Yesus ab Er miliramnyi nang ab aryi atei Betania aryi kuboka banmai ba, Er Yesus kwaning atanmou. 13Kwaning atanmou ura, Erci dinmou uca, kwarang co ton o tikamwe asi asing eibmou. Co kwarang bok ilinto boramwe ati, Er Yesus biryi, “Du ton mouranci asi dakoka yibkwan,” teneboka a co kwarang dam binmou. Dam binmou ura, ketengmou uca, a co kwarang ara muryi aryi du ton kum mouramwe, erda bok dem boramwe asi asing eibmou. 14Du ton kum asing eibmou ura, Erci a co kwarang asi ato eboka submou, “Du kum moubmarim ati, ninyi aryi aminda kan du asi dakoka yibkingnyei.” Er Yesus biryi ato eboka a co kwarang asi submou ba, Er miliramnyi nang aryi kekenmai.
Er Yesus biryi Bait Allah ai dam wengbindoka sun dengtamurdaramnyi nang nirya asi yakdonokmou uram
11:15-19
15Ura, banmai ani, Er Yesus ab Er miliramnyi nang ab Yerusalem atei dam yanmai. Yanmai ura, Erci Bait Allah ai ara Er Imtamnyi biti ninyi dama deirin ai dam wengbinmou. Ura, Erci sun Bait Allah ai dam kuboka dekdanmai nang asi yakdonokmou. A nang ara domba ab Er Imtamnyi biti deiriramnyi dama yuk-yuk asi dengdanmai bok, Er Yesus biryi sunsi baitam yakdonokmou. Yakdonokmou cok, Erci sun co bok amuma karen nang lamna nirya dangublobmou. Tonda, sun emnanyi asi dekoka kareramnyi nang bun sokon ababyi erci dangublobmou. 16Dangublobmou ura, Erci ninyi ilinto ara sun dekwamai bona asi boyibina yana kimai asi asing eibmou ura, Erci sunsi, “Bait Allah ai dam yibindoka bobina yana kimna mem,” ebmou. 17Ebmou ura, Erci sun a kubmai nang asi ato eboka eterebmou, “Er Imtamnyi Uram minob bikoka ermururamunyi si Yesaya biryi kerek sekamwe to sunci diboka kekebdarur. Er Imtamnyi biryi ato ebmar,
‘Ni ai ara sun im dangna tukwe dangna nang nirya aryi Nisi molobkwaning ai kubkwanir.’ (Yesaya 56:7)
Er Imtamnyi biryi ato ebmou bok, sunci manmaliboka Er ai asi dengna weik molobtabangna nang ai kibdeibmarum.” 18Er Yesus biryi ato eboka wenebmou ura, sun Er Imtamnyi kan ninyi kan noutam kuboka antanirdeirin deyok nang ab ton sun Musa kerek sengna etereramnyi nang ab aryi kekebmai. Kekebmai ura, sunci, “Anyi bisi una kuboka obtibyi do?” tenen mar moun yibkalibmai. Ara, ninyi ilinto aryi Erti, “Teleb Uram eterebmasir,” tenebmai ati, sun Yahudi yala nang sien nang aryi, “Ninyi nirya Er Yesus bisi milibingnyei,” tenebmaici, ilil kubmou ura, mar moun yibmai. 19Sunda mar moun yiboka sisikdanmai bok, inibwe ba, Er Yesus ab Er miliramnyi nang ab anaboka Yerusalem atei aryi kuboka baitam binmai.
Er Yesus biryi Er miliramnyi nang asi, “Sunci sun kanya dam aryi kankana kuna kum uca, sun molobmamunyi ura, sun utotoa nirya asi molobmamunyi dinyi ara Er Imtamnyi biryi kunubdeibkwansir,” ebmou uram
11:20-26
20Mabmai ani, berekwe ura, Er Yesus ab Er miliramnyi nang aryi, “Yerusalem atei tamuboka binkwayeb,” teneboka banmai. Banmai ba, co kwarang tikamwe dam yibanmai. Yibanmai ba, sunci Er Yesus biryi submou co kwarang nirya ara koula danmou asi asing eibmai. 21Ura, er Petrus biryi Er Yesus bisi, “Nai, dirderum, Kanci submoumwe co kwarang ara sirya koula danmar anun e,” ebmou. 22Ba, Er Yesus biryi Er miliramnyi nang asi ato ebmou, “A co kwarang ara Er Imtamnyi mikib aryi koula danmar. Ati, sunci Er Imtamnyi bisi tuba-tuba dib tenebdarur,” ebmou. 23Ato ebmou cok, Erci sunsi ato eboka eterebmou. “Niryi sunsi diboka ebkwinsin uram asi kekebdarur. Unanyi-unaner aryi er kanya dam aryi, ‘Ni molobnyi to Er Imtamnyi biryi dib ati kunubdeibkwanir,’ tenebci ura, Anyi-a ner aryi ebmaci dinyi ara Er Imtamnyi biryi kunubdeibkwande. Ba, unanyi-unaner aryi a mutuk kon asi, ‘Kan yuk tobkaboka ilila me kwan um asi wengbirum,’ ebci ura, erci er kanya aryi kankana kum kubmaci deyok aryi, Anyi-a ner ebmaci tok ilil tenen dinyi asi Er Imtamnyi biryi kunubkwande. 24A deyok aryi, sunci Er Imtamnyi bisi Ersi molorandum ba, sunci sun kanya dam aryi, ‘Ni molobman dinyi asi Er Imtamnyi biryi dib kunubdeibkwanir,’ iya tenerandarur. Ato kuramunyi ura, sun molobmunyi dinyi asi Er Imtamnyi biryi diboka kunubkwansir,” eboka eterebmou. 25Ebmou cok, Er Yesus biryi Er miliramnyi nang asi ton ato eterebmou. “Sunda Er Imtamnyi bisi Ersi molorandum ba, yuknyi yuk ner aryi malyi kubdeibsici ba, sun kanya a deyok ati, mambul kubsici ba, sunci, ‘A dinyi teneina ati takwan,’ teneboka Anyi-a ner ab yuma antanibdandarur. Sirya antanibmunyi ura, Er Imtamnyi bisi ur molobdarur. Ara, Er Imtamnyi biryi sun malyi kun dinyi kiliboka sun ab tonkwa antanibkwansir ati, sunbabyi neiktoto sun yuk nang ab antanibdarur. 26Ati, sunci yuk nang aryi malyi kun dinyi asi luba kum kibmunyi ura, sun Nai Imtamnyi biryi sun malyi kurandum dinyi ababyi neiktoto kum kilibkwansir,” eboka Er Yesus biryi eterebmou.
Sun Yahudi yala nang asi kalingnamnyi sien nang aryi Er Yesus bisi, “Unanyi biryi Kansi, ‘Ato-ato kubdum,’ eboka wa karebkou do?” eboka asibdenmai uram
11:27-33
27Ura, Er Yesus ab Er miliramnyi nang ab ara yanganmai ani, Yerusalem atei yanmai. Ura, Er Yesus bira Bait Allah ai ara Er Imtamnyi biti ninyi dama deirin ai dam wengbindoka dirkiringmou. Banmou ba, sun Er Imtamnyi kan ninyi kan noutam kuboka antanirdeirin deyok nang ab sun Musa kerek sengna etereramnyi nang ab, tonda sun Yahudi yala nang asi kalingnamnyi sien nang ab aryi Er Yesus dam yanmai. 28Yanmai ura, sunci Er Yesus bisi ato eboka asibmai, “Kanda ambutum ara unato ati sun atam dengdanung nang asi baitam yakdonokmomwe do? Unanyi biryi Kansi, ‘Ato-ato kubdum,’ eboka wa karebkou ba, kubmomwe do?” eboka asibmai. 29-30Sunci ato eboka asibdenmai uca, Er Yesus biryi sunsi tamuboka asibdenmou, “Yohanes ninyi me dongoramunyi bisi unanyi biryi, ‘Ato kubdum,’ eboka takubdeibmou ati, tenebmarum do? Er Imtamnyi biryi takubdeibmou ba, ninyi me dongoramwe do? Ninyi aryi takubdeibmai ba, me dongoramwe do?” eboka asibdenmou. 31Er Yesus biryi ato eboka asibdenmou ura, sun Yahudi yala nang kalingnamnyi sien nang ara kankana kubmou ba, sun mamun uram sisikdanmai. Ara, sunci ato ebdanmai, “Nunci, ‘Er Imtamnyi biryi takubdeibmou ba, ninyi me dongoramwe,’ ebibyi ura, Erci nunsi, ‘Ato ura sunda unato ati er Yohanes bisi dib kum tenebdarur do?’ ebkwamasir. 32Ba, nunci, ‘Ninyi aryi takubdeibmai ba, me dongoramwe,’ ebibyi ura, ninyi nirya aryi nunsi yu weik bobkwansing,” ebdanmai. Ara, sun Er Yesus dam bulubmai nang nirya aryi, “Yohanes bira Er Imtamnyi Uram ebdeibmaca bobananyi,” teneramnyi deyok aryi, sun Yahudi yala nang kalingnamnyi sien nang aryi, “Ninyi aryi takubdeibmai ba, Yohanes ninyi me dongoramwe,” ena ilil kubmou. 33Ura, sunci Er Yesus bisi uram dobmaici, “Nun kum bingnub,” ebmai. Ato ebmai ba, Er Yesus biryi sunsi ato ebmou. “Sunda Yohanes bira kum bingdarur ura, Nibabyi neiktoto sun dam asi Nira anyi biryi wa takubdeiboka, ‘Ato dinyi-ato dinyi ukubdum,’ ebnou kum ebkwamasin,” eboka Er Yesus biryi sun Yahudi yala nang kalingnamnyi sien nang asi uram dobmou ebkarebmou.
Currently Selected:
Markus Uram 11: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
