Markus Uram 12
12
Er Yesus biryi kiklina uram doboka sun anggur wa dam aryi wa iramnyi nang deyok ati liliboka eterebmou uram
12:1-12
1Ura, Er Yesus biryi sun Yahudi yala nang kalingnamnyi sien nang ati, kemdeirin uram eboka eterebmou. Ara, Erci sunsi ato ebmou, “Ninyi tentok wa dam talenanyi biryi anggur yala koubmou. Anggur yala koubmou ura, erci lika doboka er wa dam asi lika doboka aknabdongobmou. Lika dobmou ura, erci anggur du uruna kiknibmou. Kiknibmou ura, erci, ‘Yuk nang aryi ni anggur du asi ukula dobingnyei,’ teneboka kalikoka bun ai erebdob ai asi dobmou. Sirya dobmou ura, er anggur wa talenanyi biryi, ‘Yuk atei dam kum atei asi binkwan,’ tenebmou. Ato tenebmou ura, wa in nang ton nabmouci, sunsi, ‘Ni anggur wa asi kalikanindarur,’ ebmou. Ebmou cok, erci sunsi, ‘Anggur du sirya moubci ura, sunci buluboka ni ton karebkwanindarur.’ Ato ebmou ura, anggur wa talenanyi bira anaboka era atei binmou. 2Bindoka kuramwe ani, anggur du moubmou ura, er anggur wa talenanyi era atei tuba kuramwe. Kuramuryok, erci, ‘Ni anggur du ton dobdobtinyi,’ teneboka erci er arungnanyi bisi, ‘Anggur du molorbindoka boyarum,’ eboka bokdonokmou. 3Bokdonokmou bok, sun wa in nang aryi er wa talenanyi biryi bokdonokmounyi bisi anggur du kum karebmai. Erda kulab-kulab eboka yakdonokmai ura, anyi taruk lo dem tamuryanmou. 4Tamuryanmou ura, er wa talenanyi biryi er arungna nang asi yuknyi bokdonokmou. Bokdonokmou bok, sun wa in nang aryi anyi bibabyi anggur du kum karebmai. Erda sunci malyito kuboka anyi kisok asi yongobdongobmai. 5Ura, er wa dam talenanyi biryi er arungna nang asi yuknyi bisi bokdonokmou ura, a wa in nang aryi anyi bisi diba obmai. Ura, erci er arungna nang ilinto asi yuk-yuk bokdonokmou ura, a nang ara ton nang asi sunci kulab-kulab eboka obde banmai cok, ton nang asi diba obde binmai.
6Ura, er wa talenanyi biryi er arungna nang nirya asi bokdonokmou ura, er mi tentoknyi er boukwe weik kuramunyi tuba kubmou. Ati, sirya kobdob ara erci, ‘Ni mi nong ara, “Nun nai,” ebkwaming,’ teneboka erci er mi bokdonokmou. 7Bokdonokmou ura, er mi yanmou ba, sun wa in nang aryi sun mar moun yiboka sunci, ‘Anyi bira er wa talebkwandanyi kurur ati, anyi bisi obkwayeb. Sirya obmai ura, anggur wa ara nun dinyi iya kibkwansir,’ ebmai. 8Ato eboka sisikmai ura, sunci er wa talenanyi er mi nong asi taleboka obmai ura, er mining wa in dam aryi bai donokmai,” eboka kikliboka eterebmou.
9Er Yesus biryi a kiklina uram sirya ebmou ura, Erci sun Yahudi yala nang sien nang asi ato eboka asibdenmou, “Sun wa in nang aryi iya malyi dinyi kubmai ati, er wa talenanyi sunsi una kubkwande tenebmarum do? Erci yandoka a wa in nang asi obsekdiryi, er anggur wa yuk wa in nang ara teleb nang asi karebkwande ati ebmasin.” 10-11Ebmou cok, Er Yesus biryi sun Yahudi yala nang kalingnamnyi sien nang asi ato ebmou. “Er Imtamnyi Uram ebdeibmaca bobaramunyi kerek sekmounyi biryi neik deyok ati kerek sekamwe to ara sunci ton kum nungdendarur do? Ara, erci ato eboka kerek sekmou,
‘Sun ai don nang aryi ai don keil asi, “Bai donokman keil aca,” tenebmai bok, Er Imtamnyi biryi, “Iya teleb keil,” teneboka a nunukeiboka ai dika ererdein keil kibdeibmou. Ato kuboka Er Imtamnyi biryi ilil tenen dinyi kiknibmou ati, nun kanya kilkil weik kusurur.’ (Mazmur 118:22-23)
Ato eboka Er Imtamnyi Uram ermuruna kerek sekmounyi biryi kerek sekmou,” ebmou.
12Er Yesus biryi sun Yahudi yala nang kalingnamnyi sien nang asi ato ebmou ati, sunci sun kanya aryi ato tenebmai, “Erci nunti, ‘Kebdeiboka wenebkwan,’ teneboka ato ebmasir se!” tenebmai. Ura, sunci, “Anyi bisi una kuboka talebkwamib do?” ebdanmai. Ebdanmai bok, ninyi ilinto Er Yesus bisi miliramnyi deyok aryi, sun Yahudi yala nang kalingnamnyi sien nang aryi ilil kubmou ba, Er Yesus bisi kum talebmai ura, bindobmai.
“Sun Roma nang weik sienyi Kaisar biryi moloransir to molobsici ura, nunda ersi dengna karebkwanub do kum do?” eboka asibdenmai uram
12:13-17
13Ura, liki yuk tum ara sun Yahudi yala nang sien nang aryi ton nang asi Er Yesus dam bokdonokmai. A nang ara sun er Musa kerek sekamwe to diblilibde kunuramnyi nang ton er weik sienyi si Herodes bisi miliramnyi nang asi bokdonokmai. Ara, sunci sun kanya aryi, “Er Yesus biryi sun Roma nang weik sienyi Kaisar biti malyi uram ebte ura, sun Roma nang aryi Ersi talebting,” tenebmaici, Er Yesus dam yanmai. 14Yanmai ura, sunci uram ilibdongoboka Ersi ato ebmai, “Nai, Kanda telebnyi dib en uram eteresurumnyi kurum ati, nun bingkunub. Ati, Kanci, ‘Sun ninyi aryi Niti, “Nun Nai,” tenebkwaning ati, namin uram akwe eterebkwan,’ tenena kum kurandim. Eda, Kanda Er Imtamnyi biryi dib en uram akwe eboka weneransirimnyi kurum. Ati, nunci Kansi asirdena ton asibdenkwankib,” ebmai. Ura, ato eboka asibdenmai, “Ara, sun Roma nang weik sienyi Kaisar biryi dengna moloransir dinyi ara, nunci ersi dengna karebkwanub do mem do?” Ato eboka sun Yahudi yala nang kalingnamnyi sien nang aryi bokdonokmai nang aryi Er Yesus bisi asibdenmai. 15Uca, Er Yesus biryi sunci, “Namin uram ilibdongoboka ebmaning bok, sun kanya ara Nisi, ‘Obtibyi,’ tenebmaning,” tenen bikmou. Ura, Erci sunsi ato ebmou, “Unato ati, sunci Nisi, ‘Malyi kubte,’ teneboka ukubdenmanurum do? Keil uang si dinar ton dibdenkwan ati boyandarur,” ebmou.
16Ba, keil uang ton boyanmai ura, Er Yesus biryi sunsi asibdenmou. “Sun dindarur. A keil uang deici ara unanyi urasin kikniboka sekmai do? Ba, si sengna ara unanyi si do?” eboka asibdenmou. Uca, sunci Ersi, “Sun Roma nang weik sienyi Kaisar urasin ab si kerek sengna ab kikniboka sekyi,” ebmai. 17Ato ebmai ba, Er Yesus biryi sunsi, “Uang ara sun Roma nang weik sienyi Kaisar er dinyi kurur ati asing eibmarum. Ati, erci sunsi moloransir to ur karebdarur. Sunci sun Roma nang iya weik sienyi Kaisar moloransici to kuboka karebmuncok, Er Imtamnyi bibabyi Er moloransici to kuboka karebkwandarur.” Er Yesus biryi ato ebmou ba, sun asibdenmai nang aryi, “Nai e, dib uram ebmar,” tenebmai.
Sun Saduki nang aryi, “Er Yesus biryi malyi dinyi ebte,” tenen Ersi ukubdendoka asibdenmai uram
12:18-27
18Ura, uki yuk tum aryi Saduki nang ton Er Yesus dam yanmai. A nang ara, “Ninyi dinung nang ara iya dinung kam kum bukwaming,” teneramnyi nang yanmai. Yanmai ura, sunci Er Yesus biryi, “Malyi uram ebte,” teneboka ikin deyok ati asibdenmai. 19Ara, sunci Ersi, “Nai, ner don deyok ati asibdenkwinkib. Er Musa biryi a deyok ati minob ura ato kerek sekamwe.
‘Ninyi tentok aryi ner doande bok, mi ton kumnyi dibci ura, er weit aryi unuboka er du doanci ner youak dakwandur. Ara, er weit aryi er du dibmarinyi bisi mi deibci ura, er du yok unubkwandur.’ (Ulangan 25:5)
Ato eboka er Musa biryi minob kerek sekamwe,” ebmai. 20Sun Saduki nang aryi ato ebmai cok, sunci Er Yesus bisi ato ebmai, “Nai, uki tentok tum aryi sun du weit yabwe tabaryi a kuramnyi. Kuramiryok, er dunyi bira ner ton doamuryok, mi kum deibmou cok, dibmou. 21Dibmou ura, er weit dunyi damnyi youak dakmouci, er du doamwe ner asi dobmou. Dobmou ura, mi kum deibmou cok, anyi bibabyi dibmou. Dibmou ura, er weit winiryi anyi biryi unuboka a ner asi youak dakmou ura, mi kum deibmou cok, anyi bibabyi dibmou. 22Ato kuboka a du weit yabwe silib tabaryi nang aryi neik ner asi youak dakde baramnyi ani, mi ton kum deibmai cok, nirya dibmai. Ura, sirya kobdob ara a ner ababyi dibmou. 23Ati, sun ninyi nirya iya kam bukokwaming tum ara unanyi bisi, ‘A ner ara ni ner,’ ebkwande do? Er akenyi yabwe ara ninyi tabaryi nang kuramnyi ati asibdenmakib,” ebmai.
24Ba, Er Yesus biryi sunsi ato ebmou. “Sun tenen kanya aryi u dikum dinyi kum bikoka sunci Nisi asibdenmanurum se! Sunda Er Imtamnyi Uram ermururamnyi nang aryi eboka kerek sekamnyi to ara diboka kum bingdarur nang kundarur. Er Imtamnyi mikib aryi sun dibmangnyi nang asi kam diba bukeibkwande ara sunda dib kum tenerandum nang se. 25Sun diboka kekendarur. Ninyi nirya kam bukokwaming bok, ner kum dobkwaming. A tum berekci ura, ninyi nirya ara Er Imtamnyi Uram eryuryangan nang kuraming to kuboka ner kum dobkwaming. 26Sun diamingnyi nang ara Er Imtamnyi biryi iya kam bukeibkwande. Sunda Er Imtamnyi Uram ermururamunyi biryi eboka kerek sekamwe to ara ton kum nungdendarur do? Ara, er Musa bira buksalibdob co dam tikmou bok, Er Imtamnyi biryi ersi ato ebmou,
‘Nira Imtamnyi bira kan abwe yabwe Abraham ab, Ishak ab, Yakub ab aryi si weik eraneinyi kunun,’ ebmou. (Keluaran 3:6,15)
27Er Imtamnyi biryi ato ebmou deyok ati, sun dibmangnyi nang iya kum dibkwaming ati lak kibmou. Nun abwe yabwe iya dianting ura, Er Imtamnyi biryi, ‘Nira sun abwe yabwe aryi si weik eraneinyi kunun,’ kum eamwe. Sun Saduki nang aryi u dikum dinyi dib kum tenerandum se! Er Imtamnyi biryi sun din nang asi iya kam bukeibkwande ati ebmasin.” Ato eboka Er Yesus biryi sun Saduki nang asi eterebmou.
Musa kerek sengna etereramunyi tentok aryi Er Yesus bisi, “Er Imtamnyi biryi nunsi ebdeibsou uram ara dan uram asi iya nunukoka diblilibkwanub do?” eboka asibdenmou uram
12:28-34
28Er Yesus eterebmou ura, ninyi tentok ara Musa kerek sengna etereramunyi tentok aryi Er Yesus dam yanmou. Ati, erci a sisikdanmai uram asi kekebmouci, “Nai e, nun Nai biryi sun Saduki nang asi uram teleb ebkarebmar,” tenebmouci, erci yandoka Er Yesus bisi ato eboka asibdenmou. “Nai, Er Imtamnyi biryi nunsi, ‘Ukubdarur-Ukuna mem,’ en uram yuk-yuk takubdeibsou ati, dan takubdeibsou uram asi iya nunukoka diblilibkwanub do?” eboka asibmou. 29Ba, Er Yesus biryi anyi bisi ato ebmou, “Er Imtamnyi biryi ebdeibsou uram iya nunukoka diblilibkwanub uram ara er Musa biryi ato eboka kerek sekeibsou uram asi diblilibkwandarur.
‘Sunda Israel yala nang aryi kekebnindarur! Nun Nai Imtamnyi tentoknyi bira iya mikibnyi kurur. 30Ton, sunci sun Nai Imtamnyi bisi diboka boukwe weik kibdarur. Tonda, sunci sun Nai Arungdeirisururnyi bisi tuba-tuba teneiramunci, Er teleb tenesurur to tanglona kum uca kunubde bindarur,’ ebmou. (Ulangan 6:4-5)
31Ton bitinyi dinyi iya nunukoka diblilibkwanub dinyi bitinyi dinyi ara,
‘Sunci sunbiramnyi boukwe kiboka dibnilirdarandum to kuboka sun yuk nang asi neiktoto boukwe weik kiboka dibnilibkwandarur.’ (Imamat 19:18)
A ebdeibsou uram bitinyi ara iya nunukoka diblilibkwanub uram akwe kurur,” ebmou.
32Er Yesus biryi ato ebmou ura, Musa kerek sengna etereramunyi biryi Ersi ato ebmou, “Nai teleb, diboka ebmanirim. Er Imtamnyi tentoknyi bira iya mikibnyi kurur. Yuk nang Er kurur to nang ton kum kunung.#Ul. 4:35; Yes. 45:21 33Tonda, nunci nun Nai Imtamnyi bisi boukwe weik kiboka iya teneibibiryok, Ersi tanglona kum uca iya dirnilina teleb. Ba, nunbiramnyi dirnilirdaramib to kuboka, nunci sun yuk nang asi neiktoto boukwe weik kiboka dirnilina teleb. Ato ebdeibsou uram asi iya nunukoka diblilibibyi uca, Er Imtamnyi Er kanya kilkil kubdeibkwanub. Nunci bisam sapi kum domba kum oboka Er Imtamnyi biti dama deiriramib ab, yuk dinyi ab aryi Er Imtamnyi biti kareboka dama deiriramib ababyi teleb dinyi kurur. Bok, nunda a bitinyi ebdeibsou uram asi nunukeiboka dibliliboka kunubibyi uca, Er Imtamnyi Er kanya dam aryi iya kilkil weik kubkwande,” ebmou. 34Ato eboka Musa kerek sengna etereramunyi biryi uram tamubkarebmou ba, Er Yesus biryi, “Anyi bikdob uram ebmanir,” tenebmou. Ura, Erci anyi bisi ato ebmou, “Ni kwit, kanda Er Imtamnyi amwetam bunanyi kibkwandanyi bitonyi kurum.” Er Yesus biryi ato ebmou ba, ninyi nirya aryi Yesus bisi asirdena ara ilil kubmou.
Er Yesus biryi, “Nira Er Imtamnyi biryi bokwetebnounyi bira Ninyi Lemsinanyi bira Daud yalanyi kunun,” eboka eterebmou uram
12:35-37
35Yuk uki tum aryi Er Yesus bira Bait Allah ai ara Er Imtamnyi biti ninyi dama deirin ai dam wengbindoka eterebmou. Eterebmouci, Er Uram kekenmai nang asi ato eboka asibdenmou, “Sun Musa kerek sengna etereraming nang aryi Er Imtamnyi biryi ninyi lemna Weik Sienyi bokwetebunyi biti ato eraming. ‘Anyi bira nun abwe Daud yalanyi a kunum kurur,’ enung ara sunci unato deyok ati eraming tenebmarum do? 36Nun abwe Daud bira Er Imtamnyi Kanya Roh Kudus aryi eterebmounyi biryi anyi biti ato ebmou, ‘Ni Nai Arungdeirinururnyi,’ ebmouci, ato ebmou,
‘Er Imtamnyi bira ni Nai Arungdeirinururnyi bisi ato ebmou,
“Kanda Ni Imtamnyi siriktam kuboka buryarum.
Ba, Niryi kan mar ordana nang nirya asi muna kibdongoboka Kan yan amwetam kun nang kibdeibkwan,” ebmou.’ (Mazmur 110:1)
37Ati, nun abwe Daud biryi Er Imtamnyi biryi bokwetebkwamwe Ninyi Lemsururnyi biti, ‘Ni Nai Arungdeirinururnyi,’ ebmou bok, anyi bira er Daud yalanyi bibabyi kururcok, er Daud bisi Arungdeirirurnyi bibabyi kurur.” Er Yesus biryi ato eboka eterebmou ba, sun bulubmai nang nirya kilkil kanya kuboka kekebmai.
Er Yesus biryi, “Sunci sun Musa kerek sengna etereraming nang asi milibmunyei,” eboka eterebmou uram
12:38-40
38Er Yesus biryi eterebmouci, Er Uram kekebmai nang ilinto asi ton ato ebmou, “Sunci sun Musa kerek sengna etereraming nang asi dilibmunyei. A nang ara, ‘Ninyi aryi kisal daksiting,’ tenena akwe ukuraming. A nang sun tenen kanya ara, ‘Nunda cang acu murun ongon aling teleb aling ongobibiryi yibarkiringmabyi ba, yuk nang ab ebdabibiryi, ninyi nirya aryi kisal daksiting,’ teneraming. Ba, tonda ‘Ninyi nirya aryi nunti, “Nun nai yabwe,” eboka kibdobsiting ati, nunda atei keta tam bindoka yuk nang ab ebdatibyi,’ tenen kuraming. 39Tonda, a nang sun tenen kanya aryi, ‘Nunda Musa Uram eteren ai asi bibyi ura, sien nang bun sokon asi buktibyi.’ Tonda, sunci, ‘Ninyi aryi du dongobsingnyi ura, yina tonkwa yibibyi ba, nunda sien nang bun sokon asi buktibyi ba, ninyi nirya aryi kisal daksiting,’ tenen sun Musa kerek sengna etereraming nang aryi ato kuraming. 40Tonda, a nang ara sun sulyi nerabwe asi, ‘Sunda Er Imtamnyi bisi diblilibkwandum ati, sunda sun dinyi ara nunsi karebsindarur,’ eraming. Ato eboka sunci molobman kum dinyi moloboka sun sulyi nerabwe dinyi asi ukula doraming. Tonda, sun Musa kerek sengna etereraming nang aryi Er Imtamnyi bisi moloraming ara cang-cang eboka moloraming. Ara, ninyi nirya aryi, ‘Nai e, a nang ara Er Imtamnyi bisi diboka moloraming nang,’ tenebsiting tenen ati ato kuraming. A nang ara ato kuboka malyi kuraming ati, Er Imtamnyi biryi sunsi iya wenebkwande. Ati, sunci a nang aryi kuraming to milibmunyei ati ebmasin,” eboka Er Yesus biryi Er miliramnyi nang asi eterebmou.
Er Yesus biryi Er miliramnyi nang asi er sulyi ner aryi er dama deibmou ati eterebmou uram
12:41-44
41Sun Yahudi yala nang aryi Bait Allah ai dam ara co bok dongon co sangkol deiamnyi. A co bok dongon co sangkol asi sun Yahudi yala nang aryi co bok dongoboka Er Imtamnyi bisi dama kareramnyi. Asi, Er Yesus bira a co bok dongon co sangkol dam a dibde bukmou bok, bona bon nang ilinto yandoka keil uang dengna weik dinyi dongoboka Er Imtamnyi biti dama karenmai. 42Deibdongobmai bok, sulyi ner tentok utotoa bona kum boramwe ner yanmou. Ura, a ner aryi keil uang bitinyi ara dengna mitik dinyi deibdongobmou. 43-44Deibdongobmou ba, Er Yesus biryi Er miliramnyi nang asi nabmou ura, Erci sunsi, “Niryi sunsi diboka ebkwinsin uram asi kekendarur. A sulyi ner ara utotoa kum borur ner aryi dengna mitik dinyi deibdongobmar bok, Er Imtamnyi biryi, ‘Dengna ilinto deibdongobmar,’ tenebmar. A ner ara er taruk dam kubmou dinyi nirya deibdongobmar ba, er kwaning dekdobman uang ababyi kum danmar. A deyok aryi, Er Imtamnyi biryi erti, ‘Dengna ilinto deibdongobmar,’ tenebmar. Ba, sun bona bon nang aryi dengna weiktoto deibdongobmang bok, Er Imtamnyi biryi, ‘Mitikanun akwe deibdongobmang,’ tenebmar. Ara, a nang aryi dengna ilinto asi tuba kabdongobmang ati, Er Imtamnyi biryi sunti, ‘Dengna mitik akwe deibdongobmang,’ tenebmar.” Ato eboka Er Yesus biryi Er miliramnyi nang asi eterebmou.
Currently Selected:
Markus Uram 12: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
