'Make 2
2
:Yusu' 'puh-dih: 'yu :or :korn-a 'tiei: 'meh-a
(Mt 9.1-8; Lu 5.17-26)
1:Yeh 'we :zi-dih:-a 'o ken dih, :yee' :Yusu' mu or 'bli :Kapa'nior-gwlor:-' de. :Yee' nyor⧾ 'worn-ih' :ka or :ne-a 'o :gwlor-'. 2'De nyor⧾ :dhulu' mu 'de or 'bli 'gbu. :Yee' 'de 'gbu 'yi-', :dhe-da: :sloror' se 'de :ne :neheh'. :Dha nyor⧾ 'ye-a' dih :nyna, 'do 'gbu worn 'i-a' 'jeh, 'do se :ne. :Yee' or po Nyorsoa-a' tubo-wlu:⧾ 'de on bo. 3:Yeh or wlu-a, :yee' nyor⧾ :nyieh, mo-: :an tele 'yu :due' :or :korn 'tiei: 'meh-a, 'de an ya-or 'de or bo. 4:Ka :gwlor-nyor⧾ :dhie:-a 'i, :yee' :ka on 'ye-a' no, 'de on 'ye-a' 'de 'yu :dao' 'de :Yusu' bo kpa, :yee' ka se :ne. Eh-: no-eh, 'de on chlan 'bie' 'do 'gbu 'dlu, :dha :Yusu' :bleh-dih:-a 'i, 'de on 'dhle-dih-or 'do or-a'a: ken 'pehn-deh ken. 5:Yeh :Yusu' 'ye-a an-a' dhih 'jeh-' :po-eh: :eh :ne-a 'de on 'di, :yee' or :wlu-' 'de or bo, or 'dae:, 'An 'yu, :an-a' deh⧾-zon⧾-a' dhih 'ma-dih-eh: bo 'weh.
6:Yee' :yeh nyor⧾ 'tele' :torne-nyor⧾-a' nyor⧾ :noo', :on :dhe-a 'o dih, on 'worn-ih'-a, :yee' an wlu-' 'de an-a' 'jeh 'di, 7on 'da, :Eh no 'de 'yu :daa, or wlu deh :dao' :eh? Or 'kor-dih Nyorsoa-a' 'nyne 'weh. Dha nyor 'wluh :or 'beh-dih: :or 'ye deh⧾-zon⧾-a' dhih bo 'ma-dih: :eh? Nyorsoa :due', or-: 'beh-dih-eh.
8:Yee' 'do :dha :due' :dao', :Yusu' yubo-eh 'i, :ka an 'chihleh-a deh :dao' 'i, 'do an-a' :porluh⧾ ken, 'de or :wlu 'de on bo, or 'dae:, :Eh no 'de a na-dih deh⧾ :daa :gwluhuh' dih 'suh :eh? 9Eh :kma 'i nyor 'ye :ao' 'da, 'de 'tiei-a' 'meheh'-yu: :daa bo, :eh :mor, :Sorn-', mu yai', 'duo: :an-a'a: ken 'pehn-deh-', :na, :on 'ye mu, :eh :zi 'o, :An-a' deh⧾-zon⧾-a' dhih 'ma-dih-eh: bo. 10Jorwor: 'an mu-eh a :torne:, :ka 'yu an 'da-dih-a Nyor-kpalu-a' 'yu, or :korn-a 'kpih dha yao 'zorn, 'do deh⧾-zon⧾-a' dhih-a' bo 'ma-dih-eh bo. Eh-a' dhih, or :wlu-' 'de or bo, or 'dae:, 11'An zela :on :gwluhuh', :sorn-', mu yai', 'duo: :an-a'a: ken 'pehn-deh-' :on 'ye 'de :on 'bli 'gbu mu.
12:Yeh an-a' klehkpeh, an pobo-a 'o, :yee' 'tiei-a' 'meheh'-yu: :dao', or :sorn-' 'weh, or 'duo: or-a'a: ken 'pehn-deh-', 'de or mu. :Yee' eh :florn-dih: an-a' klehkpeh-: worn, 'de an po Nyorsoa-a' 'nyne ya, an no, :A 'see deh 'ye, eh 'see :ao' ne :zai'.
:Yusu' 'da 'Livae: or 'ye or-a'a: bo :na-nyor no
(Mt 9.9-13; Lu 5.27-32)
13:Yee' :Yusu' mu-: de :neheh' 'de :Galali'i-yobo'-pehnu worn 'i. :Yeh or :ne-a 'o, :yee' nyor⧾ :doru', mo-: yi 'de or bo, 'de or torne-uh deh. 14:Yeh or 'wluh-a 'o :dha 'o, 'de or mu-a, :yee' or 'ye 'yu :due' an 'da-dih-a 'Livae, :or 'dhu-a 'Ehfea-a'a: 'yu-', or-: :dhe dih 'do :gbalie :eh :korn-a 'zorn or za-dih-a 'taa-deh⧾. 'De :Yusu' :wlu 'de or bo, or 'dae:, Zi 'o 'on klei'. 'De 'Livae :sorn-', or zi 'o or klei'.
15Eh :korn 'we-eh :due', 'de 'Livae :pi-dih: :Yusu', 'de or mu deh :di 'da, 'de 'Livae 'bli 'gbu. :Yee' nyor⧾ :dhulu', mo-: zi 'o or klei'. Nyor⧾ :dao', on no 'taa-deh:⧾ :za-nyor⧾-: 'dekorn: deh⧾-zon:⧾ :no-nyor:⧾ :noo'-: mo-: 'kpa :Yusu'-: 'dekorn: or-a'a: bo :na-nyor⧾-: bo, 'de an kpuhba son⧾ ybei'. 16:Yee' :yeh nyor⧾ 'tele' :torne-nyor:⧾ :on 'dhu-a :Falasi'i-nyor⧾-', on 'ye-or, 'de or-: 'taa-deh:⧾ :za-nyor⧾-: 'dekorn: deh⧾-zon:⧾ :no-nyor:⧾ :noo'-: an kpuhba-a son⧾ ybei', :yee' on dhele: or-a'a: bo :na-nyor⧾-: dih, on 'dae:, :Eh no 'de or :ne 'taa-deh:⧾ :za-nyor⧾-: deh⧾-zon:⧾ :no-nyor:⧾ :noo'-: an kpuhba son⧾ ybei' :eh?
17:Yee' :yeh or 'worn-ih'-a, :yee' or 'dae:, Nyor⧾ :on se-a puhba:, on se :korn on 'ye kwein: :di-nyor 'kwla⧾-' dih 'bhorn. Jorwor: nyor⧾ :an puhba-a, mo-: :korn :on 'ye kwein: :di-nyor 'kwla⧾-' dih 'bhorn. 'On :se 'de yi 'do 'yi 'sleh-nyor⧾-a' dhih bo. Jorwor: deh⧾-zon:⧾ :no-nyor:⧾, mo-: 'on yi 'da 'da, on 'ye an-a' deh⧾-zon:⧾ :no-eh 'bor.
:Yusu' zela: 'suehn-' :pa-dhih ken dih
(Mt 9.14-17; Lu 5.33-39)
18Eh :korn ti :due', 'de nyor⧾ 'ni 'dlu :po :Jororn'-a'a: bo :na-nyor⧾-: 'dekorn: :Falasi'i-nyor⧾-: an pa 'suehn-'. :Yeh nyor⧾ :noo' 'ye-eh, :yee' on yi 'o :Yusu' bo, on dhele-or dih, on 'da, :Kaa eh no 'de :Jororn'-a'a: bo :na-nyor⧾-: 'dekorn: :Falasi'i-nyor⧾-a' no-: an pa 'suehn-', 'de :an-a'a: bo :na-nyor⧾-a' no-eh :eh?
19:Yeh on dhele-or dih, :yee' or 'da, 'Duhba:⧾ :on mu-a 'nynor nyina: :kpa-gor-', on se 'beh-dih: on 'ye 'suehn-' pa, ti 'nynor-a'a: yibeor :ne-a 'o on bo. 20Jorwor: ti-a mu 'o :nyni yibeor-a mu 'o on ybei' :za-eh:. :Yee' 'do 'we-eh: :dao' 'di, an mu 'suehn-' :pa.
21'De :ka :ne-a :due' 'di, nyor-a' no 'yli-eh: :dele'-a' 'for, 'de or-a' 'pa 'wla soa. :Mor or no-eh, :yee' 'yli-eh: :dele'-a' 'for-a mu-' :jli-eh:. :Mor or :jli-eh, :yee' or mu 'wla soa-a' 'for⧾ :nee' :chlan, eh 'ye :chlaan-bie: :dao' de dih kpa, 'de eh 'ye 'bie' :klaba' no. 22'De nyor-a' po nomor :dele' 'de :zolo-eh: :eh :no-dih-eh deh-ku: soa 'di. :Mor or no-eh, :yee' nomor :dele'-a mu-eh 'i :wa, 'de nomor 'ye dih 'wla, 'de deh-ku-zolo-eh 'ye 'kor. Jorwor: nomor :dele' :korn or 'ye 'de deh-ku-zolo-eh: :dele' 'di :po-eh:.
Nyorsoa-a' :gwlee-we-eh-a' dhih
(Mt 12.1-8; Lu 6.1-5)
23Eh :korn-Nyorsoa-a' :gwlee-we-eh :due', :yee' :Yusu'-: 'dekorn: or-a'a: bo :na-nyor⧾-: an yi-dih 'de deh⧾-yor: an 'da-dih-a 'wii 'nyne-', 'de 'gle. :Yeh an zi-a, :yee' or-a'a: bo :na-nyor⧾ 'duo: deh⧾-yor: :dao' en-' :nee'-a' kplan-a' 'weh. 24'De :Falasi'i-nyor⧾ :wlu 'de or bo, on 'da, :Gbee'e:. :Eh no 'de :an-a'a: bo :na-nyor⧾-a no deh :eh se-a 'o :a-a'a: 'tele'-a' :gwie 'i :ne, 'do Nyorsoa-a' :gwlee-we-eh 'di :eh?
25'De or 'dae:, Deh :Debe' no-a, ti 'moeh 'ye-a' or-: or-a'a: bo :na-nyor⧾-: no, 'de on se-a dii-deh 'ble, a :se-eh' zlo :e? 26Deh or no-a, eh-: :dhe dih. Or pa 'de Nyorsoa-a' 'gbu 'di, ti Abia'ta no-a Nyorsoa-a' 'slaa: :za-nyor⧾-a' nyor :klaba', 'de or di 'bhlee: on po-a 'o Nyorsoa ybei' dih, :eh :ne-a gban 'i, nyor 'plo-a' di-a, Nyorsoa-a' 'slaa: :za-nyor⧾ :due'-a di-a. 'De or 'nyi eh-a' :neheh' or-a'a: bo :na-nyor⧾ :ke.
27:Yee' or 'dae: :neheh', 'de on bo, Nyorsoa-a' :gwlee-we-eh :no-eh:-' 'do :gwlor-nyor⧾ bo. :Gwlor-nyor⧾ :se-' :no-eh: 'do eh bo. 28Eh-: :korn dhih, 'de 'yu an 'da-dih-a Nyor-kpalu-a' 'yu, or no :Gwlor :baa' 'do Nyorsoa-a' :gwlee-we-eh 'dlu bo.
Currently Selected:
'Make 2: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
